NGANI JAKULIJIGANYA 19
NYIMBO NA. 22 Uchimwene Ukulamulila Tukuŵenda Kuti Uyiche!
Yatukumanyilila Pakwamba Yachachitenda Yehofa Pakwawelusya Ŵandu
“Yehofa . . . ngakusaka kuti jwine jwalijose ajonasiche.”—2 PET. 3:9.
CHAKULINGA CHA NGANIJI
Kutukamuchisya kusimichisya kuti Yehofa pachachawelusyaga ŵandu kusogoloku chachitenda yindu mwachilungamo.
1. Ligongo chichi mpaka tujile kuti tukutama mundaŵi jakusangalasya?
KUSALA yisyene, tukutama mu ndaŵi jakusangalasya mnope. Tukuŵecheta yeleyi ligongo lyakuti lisiku lililyose tukusayiwona yakulochesya ya m’Baibulo yili mkukwanilichikwa. Mwachisyasyo, tukuyiwona yakutenda “mwenye jwa kumpoto” soni “mwenye jwa kummwela” pakulimbanilana ulamusi wakulamulila chilambo chosope. (Dan. 11:40) Tukusiwonasoni ngani syambone syakwamba ya Uchimwene wa Mlungu sili mkulalichidwa pachilambo chosope soni ŵandu ŵajinji ali mkutanda kumtumichila Yehofa. (Yes. 60:22; Mat. 24:14) Kupwatika pelepa tukupochelasoni chakulya chausimu chejinji “pandaŵi jakwe.”—Mat. 24:45-47.
2. Ana tukusosekwa kuŵa ŵakusimichisya ya chichi? Nambi tukusosekwa kumanyilila chichi?
2 Yehofa akupitilisyape kutukamuchisya kupikanichisya chenene yindu yakusosekwa mnope yachiyitendekwe pachangakaŵapa. (Mis. 4:18; Dan. 2:28) Tukusosekwa kuŵa ŵakusimichisyasoni kuti payichitanda yakusawusya yekulungwa, tuchimanyilila yindu yosope yatuchisosekwa kumanyilila nichakulinga chakuti chitupitilisye kuŵa ŵakulupichika soni kuŵa ŵakamulana mnope pandaŵi jakusawusya jelejo. Nambope tukusosekwa kumanyilila kuti pana yindu yine yangatukuyimanyilila yayichitendekwa pandaŵi ja yakusawusya yekulungwa. Myoyo, mungani ajino chandanda chitukambilane ligongo lyakwe tuchenjile yindu yine yatwasasile kuti yichitendekwa pandaŵi jelejo. Kaneko chitukambilane yindu yine yatukuyimanyilila yayichitendekwa kusogoloku nambosoni mwachachitendelaga yindu Atati ŵetu ŵakwinani.
YINDU YANGATUKUYIMANYILILA
3. Ana munyumamu twasalaga yamti uli pakwamba ya ndaŵi jele ŵandu ngasakola upile wakutanda kumtumichila Yehofa? Ligongo chichi twasalaga yeleyi?
3 Munyumamu, twasalaga kuti payichigamba kutanda yakusawusya yekulungwa, pangali mundu jwalijose jwangakusamtumichila Yehofa juchachikola upile wakutanda kumtumichila jwalakwe soni kukulupuka pa ngondo ja Alamagedo. Twasasile yeleyi ligongo twaganisyaga kuti yindu yayatendekwe mundaŵi ja Chigumula yajimilaga yindu yayichitendekwa kusogoloku pachangakaŵapa. Mwachisyasyo, twaganisyaga kuti mpela muyaŵelele kuti Yehofa jwawugele litanga lya chombo Chigumula chili chisigele panandi kutanda, twayiwonagasoni kuti chakundanda kwa yakusawusya yekulungwa jwalakwe ‘chachiwugala litanga’ lya chilambo cha Satanachi mwamti pangali mundu juchachikola upile wakutanda kumkulupilila Yehofa ni kukulupuka.—Mat. 24:37-39.
4. Ana apano tukusayiwona yindu yayatendekwe pandaŵi ja Chigumula mpela yakulochesya yayichikwanilichikwa kusogoloku? Alondesye.
4 Ana yili yakuŵajilwa kusala kuti yindu yayatendekwe pandaŵi ja Chigumula yajimilaga yindu yayichitendekwa msogolo? Iyayi. Tukuŵecheta yeleyi ligongo lyakuti pangali lilemba lililyose lyalikusasala mfundo jeleji. a Yesu jwalandenye “masiku ga Nowa” ni ndaŵi jakuŵapo kwakwe. Nambope jwalakwe nganasala kuti chilichose chachatendekwe pandaŵi ja Chigumula chajimilaga yindu yayichitendekwa kusogolo. Jwalakwe nganasalasoni kuti yaŵatesile Yehofa pakuwugala litanga lya chombo yajimilaga yindu yineyakwe yayichitendekwa msogolo. Nambotu, yeleyi ngayikugopolela kuti pangali chilichose champaka tulijiganye kutyochela pangani ja Nowa soni Chigumula.
5. (a) Ana Nowa jwatesile chichi mkanichitande Chigumula? (Ahebeli 11:7; 1 Petulo 3:20) (b) Ana ni yindu yapi yayikulandana pakwamba ya masengo gakulalichila gatukutendaga masiku agano ni gagatendekwe mundaŵi ja Nowa?
5 Nowa pajwapikene utenga wakukalamusya wakutyochela kwa Yehofa jwalosisye kuti jwakwete chikulupi mwakutaŵa chombo. (Aŵalanje Ahebeli 11:7; 1 Petulo 3:20.) Mwakulandana ni yeleyi, ŵandu ŵapikene ngani syambone syakwamba Uchimwene wa Mlungu, akusasosekwa kutendapo kandu pa yindu yapikeneyo. (Mase. 3:17-20) Petulo jwamkolasile Nowa kuti jwaliji “jwakulalichila jwachilungamo.” (2 Pet. 2:5) Nambope mpela mutwayiwonele mungani jipite jila, ngatukumanyilila naga Nowa jwalinganyisye yakumlalichila mundu jwalijose juŵapali pandaŵijo Chigumula mkanichitande. Masiku agano tukusalingalinga kuti twalalichile ŵandu wosope pachilambo chapasi. Mwamti tukusatenda yeleyi mwakulipeleka mnope. Nambope atamose tuli tulinjilile chamti uli kuti tumyichile mundu jwalijose ni ngani syambone nganituŵa tukombwele kutenda yeleyi chilambochi mkanichiŵe kumala. Ligongo chichi tukusala yeleyi?
6-7. Ligongo chichi mpaka tusale kuti ngasitukombola kumlalichila mundu jwalijose pachilambopa mbesi mkanijiyiche? Alondesye.
6 Aganichisye yaŵasasile Yesu pakwamba ya masengo getu gakulalichila. Jwalakwe jwasasile kuti ngani syambone “sichilalichidwa pachilambo chosope chapasi kuti uŵe umboni kwa ŵandu ŵamitundu josope.” (Mat. 24:14) Yakulochesya yeleyi yikukwanilichikwa mnope masiku agano kulekangana ni kalakose. Ngani sya Uchimwene syelesi sikulachidwa mu yiŵecheto yakupunda 1,000. Nambosoni kupitila pa webusayiti jetu ja jw.org, nganisi sikwayichila ŵandu ŵajinji pachilambo chosope.
7 Nambope, Yesu jwasalilesoni ŵakumkuya ŵakwe kuti ‘ngasamalisya kusyungulila misinda josope’ kapena kumlalichila mundu jwalijose, jwalakwejo mkanayiche. (Mat. 10:23; 25:31-33) Yaŵasalile Yesuyi chiyikwanilichikwesoni masiku getu gano. Tukuŵecheta yeleyi ligongo lyakuti masiku agano ŵandu mamiliyoni gejinji akusatama m’madela gele masengo getu gakulalichila ŵagalekasisye. Kupwatika pelepa, ŵanache ŵajinji akupagwa lisiku lililyosye. Yisyene kuti m’weji tukusalipeleka mnope kuti twalalichile ngani syambone ŵandu ŵa mu “chilambo chilichose, mbumba jilijose, chiŵecheto chilichose, soni mtundu uliwose.” (Chiw. 14:6) Nambope, yisyesyene yakwe yili yakuti ngasitukombola kumlalichila mundu jwalijose pachilambopa mbesi mkanijiyiche.
8. Ana ni chiwusyo chapi champaka tukole pakwamba yachachijila Yehofa pakwawelusya ŵandu kusogoloku? (Alole yiwulili.)
8 Chiwusyo champaka tukole pelepa chili chakuti, ana Yehofa ni Mwanache jwakwe juŵampele udindo wakuwelusya, chachitenda yamti uli ni ŵandu ŵele ngasakola upile wakupikanila ngani syambone mkaniyitande yakusawusya yekulungwa? (Yoh. 5:19, 22, 27; Mase. 17:31) Lilemba lyakulongolela nganiji lisasile kuti Yehofa “ngakusaka kuti jwine jwalijose ajonasiche.” Mmalomwakwe, jwalakwe akusaka kuti “wosope agalawuche mtima.” (2 Pet. 3:9; 1 Tim. 2:4) Atamose kuti tukumanyilila yindu yeleyi, nambope Yehofa nganaŵepe kutumanyisya yachachitenda pakwawelusya ŵandu ŵanganakola upile wakupikanila ngani syambone. Nambosonitu jwalakwe jwangasosekwa kutusalila chine chilichose chakusaka kutenda.
Ana Yehofa chachitenda uli ni ŵandu ŵele ngasakola upile wakupikanila ngani syambone mkaniyitande yakusawusya yekulungwa? (Alole ndime 8) c
9. Ana ni yindu yapi yatusalile Yehofa kupitila m’Baibulo?
9 Kupitila m’Baibulo, Yehofa atusalile yindu yine yachachitenda kusogoloku. Mwachisyasyo, Baibulo jikusatusalila kuti Yehofa chachajimusya ku chiwa ŵandu ŵangalungama ŵele nganakola upile wakupikanila ngani syambone soni kuchenga ndamo syawo. (Mase. 24:15; Luk. 23:42, 43) Yeleyitu yikusayikasyasoni chiwusyo chine chakusosekwa mnope.
10. Ana ni yiwusyo yine yapi yampaka tukole?
10 Ana ŵandu wosope ŵachachiwa pandaŵi ja yakusawusya yekulungwa chachijonanjidwa kwangamala, mwamti ngasakolasoni chembecheyo chakwimuka ku chiwa? Baibulo jikusasala mwakupikanika chenene kuti ŵandu wosope ŵakusamsisya Yehofa ŵele Yehofajo pampepe ni asilikali ŵakwe chachajonanga pangondo ja Alamagedo ngasakolasoni upile wakwimuka ku chiwa. (2 Ates. 1:6-10) Nambi uli pakwamba ya ŵandu, mwine ŵandu ŵaŵawile pangosi syachilengedwe, kapenasoni ŵaŵawulajidwe ni ŵandu ŵane? (Jwak. 9:11; Sak. 14:13) Ana ŵane mwa jemanjaji chachiŵa mu gulu ja ŵandu “ŵangalungama” ŵachachijimuka ku chiwa m’chilambo chasambano? Pangani jeleji ngatukumanyililasoni chilichose.
YINDU YATUKUYIMANYILILA
11. Ana Yehofa chachawelusya ŵandu pakujigalila chichi pandaŵi ja ngondo ja Alamagedo?
11 Pana yindu yine yatukusamanyilila yayichitendekwa kusogoloku. Mwachisyasyo, tukusamanyilila kuti pandaŵi ja Alamagedo ŵandu chachiwelusidwa pakujigalila muŵatendelaga yindu ni achimjakwe ŵa Klistu. (Mat. 25:40) Ŵandu ŵachachawelusya kuti ali ngondolo chachiŵa ŵandu ŵaŵalosisye kuti ŵakamuchisyaga ŵasagulwe soni Klistu. Tukusamanyililasoni kuti ŵane mwa Aklistu ŵasagulwe chachiŵa chiŵela pachilambopa payichitandaga yakusawusya yekulungwa, mwamti ngasajigalidwa kwawula kwinani mpaka ngondo ja Alamagedo jili jisigele panandi kutanda. Myoyo, ligongo lyakuti ŵane mwa Aklistu ŵasagulwe chachiŵa chiŵela pachilambopa, yichiŵa yakomboleka kuti ŵandu ŵane ŵa mtima wambone chachikola upile wakwakamuchisya jemanjaji pamasengo gambone gachachikamulaga pandaŵijo. (Mat. 25:31, 32; Chiw. 12:17) Ligongo chichi kumanyilila yeleyi kuli kwakusosekwa mnope?
12-13. Ana ŵandu ŵane chachitenda yamti uli pachachimwona “Babulo Jwamkulungwa” ali mkonanjidwa? (Alole yiwulili.)
12 Atamose yakusawusya yekulungwa yili yitandite, yichiŵa yakomboleka kuti ŵandu ŵane ŵachachikuwona konanjidwa kwa “Babulo Jwamkulungwa” chachikumbuchila kuti kwa ndaŵi jelewu, ŵa Mboni sya Yehofa ŵaŵele ali mkuŵecheta kuti yeleyo yichitendekwa. Ana ŵane mwa ŵandu ŵachachiyiwona yeleyi chachichenga umi wawo ni kutanda kumtumichila Yehofa?—Chiw. 17:5; Esek. 33:33.
13 Naga yichitendekwa yeleyi nikuti yichilandana ni yindu yayatendekwe ku Iguputo mundaŵi ja Mose. Naga akukumbuchila, paja “ŵandu ŵamitundu jakulekanganalekangana” ŵaliji yimpepe ni Ayisalayeli paŵatyokaga ku Iguputo. Komboleka kuti ŵane mwajemanjaji ŵatandite kola chikulupi paŵayiweni kuti milili 10 jaŵakalamwisye Mose kuti jichitendekwa ku Iguputo jatendekwe. (Eks. 12:38) Naga yakulandanayi yichitendekwasoni panyuma pakonanjidwa kwa Babulo Jwamkulungwa, ana tuchitenguka kuyiwona kuti ŵandu ŵajinji atandite kumtumichila Yehofa ngondo ja Alamagedo jili jisigele panandi kutanda? Iyayi, ngasitutenguka naga yeleyi yichitendekwa. Tukuŵecheta yeleyi ligongo lyakuti m’wejisoni tukusasaka kulosya ndamo syakwete Atati ŵetu ŵakwinani ŵali “Mlungu jwaumbone mtima soni jwakwatendela ŵane chanasa, jwangatumbila chitema, jwagumbala ni chinonyelo changamala soni jwakusatenda yaŵechete.” b—Eks. 34:6.
Ŵandu ŵane ŵachachimwona “Babulo Jwamkulungwa” ali mkonanjidwa chachikumbuchila kuti kwa yaka yejinji ŵa Mboni sya Yehofa ŵaŵele ali mkuŵecheta yakutendekwayo (Alole ndime 12-13) d
14-15. Ana ŵandu chachikola upile wakutama ni umi wangamala pakujigalila ndaŵi jaŵawile kapena malo gakusatama? Alondesye. (Salimo 33:4, 5)
14 Ndaŵi sine, mpaka twapikane abale ni alongo ŵetu ali mkuŵecheta kuti, “Yikaliji chenene yikaŵe kuti jwachinasi jwangu jula chawe mkaniyitande yakusawusya yekulungwa ligongo nikuti akakwete chembecheyo chakwimuka ku chiwa.” Ngatukukayichila kuti mpaka paŵe magongo gakwatendekasya jemanjaji kuŵecheta yeleyi. Nambope, kuti mundu chakole chembecheyo chakwimuka ku chiwa, yangajigalilaga kuti jwawile ndaŵi japi. Yehofa ali jwakuwelusya jwambone, mwamti ndaŵi syosope jwalakwe akusatenda yindu yambone soni yachilungamo. (Aŵalanje Salimo 33:4, 5.) Myoyo, kwende ndaŵi syosope tukulupilileje kuti “Jwakuwelusya jwa chilambo chosope” chachitenda yindu yakulungama.—Gen. 18:25.
15 Yili yakupikanisoni kuŵecheta kuti yangadalilaga malo gakutama mundu kuti chapochele umi wangamala kapena iyayi. Yili yangapikanika kuŵecheta kuti Yehofa chachawelusya ŵandu mamiliyoni gejinji kuti ali “mbusi” ligongo lyakuti ŵatamaga m’yilambo yele nganakola upile wakupikanila ngani syambone sya Uchimwene wa Mlungu. (Mat. 25:46) Yehofa jwali Jwakuwelusya jwakulungama jwa chilambo chosope akusiŵaganichisya mnope ŵandu ŵeleŵa kulekangana ni mwampaka tutendele m’weji. Ngatukumanyilila muchachitendela yindu Yehofa ni jemanjaji pandaŵi ja yakusawusya yekulungwa. Komboleka ŵane mwajemanjaji chachikola upile wakulijiganya yakwamba Yehofa, kutanda kumkulupilila, nikuŵa kumbali jakwe pandaŵi jele Yehofajo chachilimanyikasya lina lyakwe kwa ŵandu wosope pachilambo chapasi.—Esek. 38:16.
Atamose yakusawusya yekulungwa yili yitandite, . . . ana ŵane mwa ŵandu ŵachachiyiwona yeleyi chachichenga umi wawo ni kutanda kumtumichila Yehofa?
16. Ana apano tukumanyilila yamti uli pakwamba ya Yehofa? (Alole chiwulili.)
16 Kulijiganya Baibulo kutukamuchisye kumanyilila kuti Yehofa akusawuwona umi wa ŵandu kuŵa wakusosekwa mnope. Mwamti jwalakwe jwapeleche umi wa Mwanache jwakwe kuti wosopewe tukole upile wakutama ni umi wangamala. (Yoh. 3:16) Wosopewe tukusayiwona kuti Yehofa akusatunonyela mnope. (Yes. 49:15) Mwamti jwalakwe akusamanyilila lina lya mundu jwalijose. Jwalakwe akusatumanyilila chenene, mwamti atamose tuli tuwile jwalakwe chachikombola kutujimusya ni kutupa chilu mpela mwatwaŵelele pandanda soni kutendekasya kuti tukumbuchileje yindu yosope. (Mat. 10:29-31) Kusala yisyene, tukwete magongo gambone mnope gakututendekasya kukulupilila kuti Atati ŵetu ŵakwinani ŵali ŵachinonyelo, chachim’welusya mundu jwalijose mwakuŵajilwa, mwachilungamo soni mwachanasa.—Yak. 2:13.
Ngatukososekwa kukayichila yakuti Yehofa chachim’welusya mundu jwalijose mwachilungamo, mwakuŵajilwa, nambosoni mwachanasa (Alole ndime 16)
17. Ana tuchikambilana yamti uli mungani jakuyichisya?
17 Kuchenga kwa yindu yine yatukambilene munganiji, kututendekasisye kuyiwona kuti masengo gakulalichila gakusosekwa kukamulidwa mwachitema mnope kupundana ni kalakose. Ligongo chichi tukuŵecheta yeleyi? Soni chichi champaka chitutendekasye kulalichila ngani syambone mwangawujila munyuma? Tuchikambilana kwanga kwa yiwusyo yeleyi mungani jakuyichisya.
NYIMBO NA. 76 Ana Akusapikana Uli Mumtima?
a Kuti amanyilile ligongo lyalitendekasisye kuti tuchenje yindu yatulondesisye munganiji, alole ngani jakuti, “Amu ni Muŵasachile Ŵalakwe Kuti Yitendekwele” mu Sanja ja Mlonda ja Malichi 15, 2015 peji 7-11.
b Panyuma pakonanjidwa kwa Babulo Jwamkulungwa, ŵakutumichila ŵa Yehofa wosope chachilinjidwa pachachajimula Gogi jwa kuchilambo cha Magogi. Nombe ŵandu wosope ŵachachisagula kuŵa kumbali ja Mlungu chachilinjidwa panyuma pakonanjidwa kwa Babulo Jwamkulungwa.
c KULONDESYA YIWULILI : Yiwulili yitatu yayikulosya gane mwa magongo gampaka gatendekasye kuti ŵandu ŵane pachilambopa akapata upile wakupikanila ngani sya Uchimwene syatukusalalichila pachilambo chosope: (1) Jwamkongwe akutama mudela jele kupikanila ngani syambone kuli kwakogoya ligongo lya lilamusi lyaŵaŵisile ŵadini, (2) liŵasa likutama mudela jele ŵa boma ŵaŵisile malamusi gakulekasya kupikanila ngani syambone, soni (3) jwamlume akutama mudela jele kuli kwakusawusya kuja kumyichila ni ngani syambone.
d KULONDESYA CHIWULILI: Jwamkongwe jwa chisikana juŵalesile kumtumichila Yehofa, akukumbuchila yaŵalijiganyisye pakwamba ya konanjidwa kwa “Babulo Jwamkulungwa.” Kaneko akuchenga ndamo syakwe ni kuwujila kwa Yehofa soni kwa achinangolo ŵakwe ŵa Chiklistu. Yeleyi payitendekwe, tukusasosekwa kulosya chanasa soni chinonyelo chakwete Atati ŵetu ŵakwinani, kwineku tuli mkusangalala kuti mundu jwakulemwajo apitikwiche mtima.
