1-2. Ana ŵandu ŵane akusachiwona chamti uli chitomelo?

 NDAŴI jachitomelo mpaka jiŵe jakusangalasya mnope. Naga apano ali pachitomelo ngatukukayichila akutenda yakuti chijendeje chenene. Mwelemu ni muyaŵelele ni ŵandu ŵajinji ŵali peŵasa apano. Mlongo jwine jwa ku Ethiopia lina lyakwe Tsion a jwasasile kuti, “Jimo mwa ndaŵi janasangalele mnope paumi wangu jaliji ndaŵi jinaliji pachitomelo ni ŵamkwangu. Twakambilanaga ngani syakusosekwa mnope soni twamalilaga ndaŵi jetu jejinji tuli mkukunguluka. Nasangalele mnope kumanyilila kuti mbatile mundu jwakusanonyela soni jwangusamnonyela.”

² M’bale Alessio jwa ku Netherlands jwasasilesoni kuti, “Yaliji yakusangalasya kwamanyilila chenene ŵamkwangu pandaŵi jatwaliji pachitomelo atamose kuti ndaŵi sine twatindanaga nganisyo.” Mungani ajino chitukambilane yakusawusya yampaka asimene nayo ŵandu ŵali pachitomelo soni mfundo sya m’Baibulo syampaka syakamuchisye kuti akole chitomelo chakusangalasya. Nambosoni chitukambilane yampaka atende abale ni alongo mumpingo pakwakamuchisya ŵandu ŵali pachitomelo.

CHAKULINGA CHA CHITOMELO

3. Ana chakulinga cha chitomelo chili chichi? (Misyungu 20:25)

³ Atamose kuti ndaŵi jachitomelo jikusaŵa ndaŵi jakusangalasya, nambope yindu yakutenda pandaŵi jeleji mpaka yilongolele yindu yachachitendaga pachachilombana. Palisiku lya ulombela, ŵandu ŵakulombana akusatenda chilanga kwa Yehofa chakuti chachinonyelana soni kuchimbichisyana kwa umi wawo wosope. Myoyo, mundu mkanatende chilanga chilichose, akusasosekwa kuganichisya mwakusamala ya chilanga chakusaka kutendacho. (Aŵalanje  Misyungu 20:25.) Mwelemu ni mwampaka tutendelesoni ni chilanga cha ulombela. Chitomelo chikusakamuchisya ŵandu ŵali pachitomelowo kumanyigana chenene soni kuti asaguleje yindu mwalunda. Mwamti ndaŵi sine mpaka asagule kulombana kapena kumasya chitomelocho. Myoyo, chitomelo pachimasile yangagopolela kuti ŵandu ŵaŵaliji pachitomelowo ali ŵangakulupichika. Nambo yikusaŵa kuti chitomelocho chakamuchisye kuti asagule yindu mwalunda.

4. Ligongo chichi tukusosekwa kukola nganisyo syakuŵajilwa pangani ja chitomelo?

⁴ Ligongo chichi akusosekwa kukola nganisyo syakuŵajilwa pangani ja chitomelo? Nganisyo syakuŵajilwa sichakamuchisya kuti aŵambaleje kukunguluka mnope ni mundu jwakumanyilila kuti ngasalombana najo. Nambotu ngaŵa kuti ŵandu ŵangalombelape ni ŵakusosekwa kukola nganisyo syelesi. Wosopewe tukusasosekwa kola nganisyo syakuŵajilwa pangani ja chitomelo. Mwachisyasyo, ŵandu ŵane akusaganisya kuti, naga ŵandu ali pachitomelo nikuti chachilombana basi. Ana kaganisye keleka mpaka kakwaye chamti uli abale ni alongo ŵali ŵangalombela? Mlongo Melissa jwakusatama ku United States jwalisoni jwangalombela jwasasile kuti, “Ŵandu ŵane ŵali pachitomelo akusagambaga kutenda yindu mwakulikanganichisya. Yakuyichisya yakwe ŵane akusajogopa kumasya chitomelo atamose ali mkuyiwona kuti ngachikwenda chenene. Yeleyi yikusiyatendekasya abale ni alongo ŵane kutenda woga kuti apate chitomelo, yayikusiyatendekasya kulagasika nganisyo.”

AMANYIGANEJE CHENENE

5-6. Ana ŵandu ŵali pachitomelo akusasosekwa kulingalinga kumanyilila yindu yapi mwa mjawojo?

⁵ Naga ali pachitomelo, ana chichi champaka chakamuchisye kumanyilila kuti mpaka alombane ni mjawojo kapena iyayi? Akusosekwa kumanyigana chenene. Mkanatande chitomelo komboleka ŵamanyilile yindu yine yakwamba mjawojo. Nambo sambano patandite chitomelo akwete upile wakumanyilila ‘umundu wakusisika wamkati’ wa mjawojo. (Aŵalanje 1 Petulo 3:4.) Yeleyi yikupwatikapo kumanyilila chenene yakusati mjawojo pakumnonyela Yehofa, umundu wakwe soni kaganisye kakwe. Mkupita kwandaŵi chachisosekwa kuliwusya yiwusyo mpela ayi: ‘Ana munduju ali jwakuŵajilwa kulombana najo?’ (Mis. 31:​26, 27, 30; Aef. 5:33; 1 Tim. 5:8) Ana mpaka tukombole kunonyelana soni kuganichisyana jwine ni mjakwe? Ana mpaka tukombole kukululuchilana yakulepela yetu?’ b (Alo. 3:23) Pakumanyigana ni mjawojo akusosekwa kukumbuchila mfundo aji: Kuti ŵandu aŵe ŵakuŵajilana yangajigalila yakuti  pakalandane, nambo yakusatendaga kuti akamulanesoni patindene nganisyo.

⁶ Ana ni yindu yine yapi yakusosekwa kumanyilila yakwamba mjawojo pali pachitomelo? Mkanatande kunonyelana mnope ni mjawojo mpaka asache kukambilana yindu yine yakusosekwa mnope yakwamba mjawojo mpela yakulinga yakwete. Nambi uli pakwamba yindu yine yamtemela yakwamba mjawojo mpela yakusawusya ya mchilu, ngongole syakwete kapena yakusawusya yiliyose yiŵasimene nayo munyuma yayikusamtendekasya kulagasika nganisyo? Chitomelo pachigambile kutanda kwene nganiyiŵa yikomboleche kukambilana yindu yosopeyi. (Alole Yohane 16:12.) Naga akuyiwona kuti mjawojo ajangwiye kusaka kumanyilila yindu yamtemela yakwamba wawojo, akusosekwa kummanyisya kuti chachimsalilape. Nambope, akusosekwa kumanyilila kuti pandaŵi jakwe mjawojo chachisosekwa kumanyilila yindu yeleyi, nichakulinga chakuti chasagule yindu mwakuŵajilwa. Myoyo, pachachiyiwona kuti jili ndaŵi jambone chachisosekwa kusala yindu mwagopoka soni mwakuwona mtima.

7. Ana ŵandu ŵali pachitomelo mpaka atende yamti uli kuti amanyigane chenene? (Alole libokosi lyakuti, “ Naga Ali Pachitomelo ni Mundu Jwakusatama Kwakutalika.”) (Alole yiwulili.)

⁷ Ana mpaka atende uli kuti amanyilile umundu usyesyene wamkati wa mjawojo? Litala limo lyampaka atendele yeleyi lili kuŵechetana mwagopoka soni mwakuwona mtima nambosoni kumpikanilaga chenene mjawojo pakuŵecheta. (Mis. 20:5; Yak. 1:19) Kuti akombole kutenda yeleyi, mpaka asosekwe kutendelaga yindu yimpepe mpela kukunguluka, kulya yimpepe soni kulalichila yalumo. Mpaka amanyiganesoni chenene naga akukunguluka yalumo ni achimjawo soni ŵandu ŵamwiŵasa mwawo. Konjechesya pelepa mpaka alinganye chakutendekwa chine chakwe champaka chakamuchisye kumanyilila mwakusatendela yindu mjawojo ni ŵandu ŵane. M’bale Esuwin jwakusatama ku Netherlands jwasasile yindu yine yaŵalinganyisye paŵaliji pachitomelo ni Mlongo Alicia. M’baleju jwasasile kuti, “Twatendaga yindu yakutukamuchisya kumanyigana chenene. Yine yatwatendaga yaliji, kutelechela yimpepe yakulya, kapena kukamulila yimpepe masengo gane. Kutendela yalumo yeleyi kwatukamuchisye kumanyilila yakulepela yetu soni yatukusatenda chenene.”

8. Ana ŵandu ŵali pachitomelo mpaka apindule chamti uli pakulijiganya yalumo Maloŵe ga Mlungu?

⁸ Mpaka amanyiganesoni chenene naga akulijiganya yalumo Baibulo. Palombene chachisosekwa kulinganya ndaŵi jakuti atendeje kulambila kwapeŵasa yayichikamuchisya kumanyilila kuti Mlungu ali jwakusosekwa mnope mu ulombela wawo. (Jwak. 4:12) Myoyo, mpaka atende chenene kulinganya yakuti alijiganyeje Baibulo yalumo pali  pachitomelo. Pandaŵi jeleji, akusosekwa kumbuchila kuti nganaŵa liŵasa soni m’balejo nganaŵa mtwe wa mlongojo. Kusala yisyene, kulijiganya yimpepe Maloŵe ga Mlungu mpaka kwakamuchisye mnope kumanyigana chenene. Yeleyi ni yaŵatesile M’bale Max paŵaliji pachitomelo ni Mlongo Lisa ŵakusatama ku United States. Jwalakwe jwatite, “Kundanda kwa chitomelo chetu twalinganyisye yakuti tulijiganyeje ngani syakwamba chitomelo, syakwamba liŵasa soni ulombela. Ngani syelesi syatutendekasisye kutanda kukambilana yindu yakusosekwa mnope yayikaliji yakusawusya kuti tusikambilane.”

YINDU YINE YAKUSOSEKWA KUYIGANICHISYA

9. Ana ŵandu ŵali pachitomelo akusosekwa kuganichisya yindu yapi pakusaka kwasalila ŵane kuti ali pachitomelo?

⁹ Ana akusosekwa kwamanyisya ŵani kuti akwete chitomelo? Ŵandu ŵali pachitomelo ni ŵakusakola udindo wakusagula ŵandu ŵakusaka kwamanyisya ya chitomelo chawo. Nambope kundanda kwa chitomelo chawo mpaka atende chenene kwamanyisya ŵandu ŵakuŵalanjikape. (Mis. 17:27) Kutenda yeleyi kuchakamuchisya kuti akalagasikaga nganisyo ni yiwusyo yampaka ŵawusyeje ŵandu ŵane. Nambo naga asagwile kuti akammanyisya jwalijose ya chitomelo chawo, mpaka yatendekasye kuti ajendeje mwakusyemba yelesoni mpaka yiŵe yakogoya. Myoyo, mpaka luŵe lunda kwamanyisya ŵandu ŵane wampaka ŵapeje malangiso gakamuchisya. (Mis. 15:22) Mwachisyasyo, mpaka ŵasalile ŵandu ŵamwiŵasa mwawo, achimjawo ŵakudalilichika kapena achakulungwa ŵa mumpingo.

10. Ana ŵandu ŵali pachitomelo mpaka atende yamti uli kuti chitomelo chawo chiŵe chakumsangalasya Yehofa? (Misyungu 22:3)

¹⁰ Ana mpaka atende yamti uli kuti chitomelo chawo chiŵe chakuchimbichika? Chinonyelo chawo pachikukula ni pakusatandasoni kunonyelana mnope. Ana chichi champaka chakamuchisye kuti akatenda yindu yakumtumbilikasya Yehofa? (1 Akoli. 6:18) Aŵambaleje kambilana ngani syampaka syalongolele kutenda yindu yakulemwecheka, aŵambaleje kuŵa ŵaŵilipe pamalo gakusisika, nambosoni kumwa mnope ukana. (Aef. 5:3) Yindu yeleyi mpaka yalongolele kusaka kutenda yindu yagonana soni mpaka yalepelekasye kusagula yindu mwalunda. Mpaka yiŵe chenene kukambilanaga yindu yampaka yakamuchisye kuti chitomelo chawo chiŵeje chakumsangalasya Mlungu. (Aŵalanje Misyungu 22:3.) Alole yindu yine yayamkamuchisye M’bale Dawit soni Mlongo Almaz ŵakusatama ku Ethiopia paŵaliji pachitomelo. Jemanjaji ŵasasile kuti, “Twaŵaga yimpepe pamalo gakusimanikwa ŵandu ŵajinji kapena kwaŵenda achimjetu kuti tuŵe nawo yalumo. Mwamti nganitutamaga ŵaŵilipe mnyumba kapena m’galimoto. Yeleyi yatukamuchisye kuti tuŵambale kutenda yindu yayikalinjile kukulupichika kwetu.”

11. Ana ŵandu ŵali pachitomelo akusosekwa kuganichisya ya chichi pakusaka kulosyana chinonyelo?

¹¹ Nambi mpaka alosyaneje chinonyelo mpaka papi? Chinonyelo chawo pachikukula mpaka asachejesoni kuti alosyaneje chinonyelo m’matala gejinji. Nambope naga nganisyo syakumbila yagonana sikukula mumtima mwawo, mpaka yiŵe yakusawusya kuti asagule yindu mwalunda. (Nyi. 1:2; 2:6) Nambosoni naga akulosyana chinonyelo mwakupundanganya mpaka yiŵe yangasawusya kutenda yindu yakumtumbilikasya Yehofa. (Mis. 6:27) Myoyo, kundanda kwa chitomelo chawo mpaka aliŵichile malile ga katende kawo kayindu mwakamulana ni mfundo sya m’Baibulo. c (1 Ates. 4:​3-7) Mpaka aliwusye kuti, ‘Ana ŵandu ŵa mudela jatukusatamaga akusayiwona kuti tukusalosyana chamti uli chinonyelo chetu? Ana yitendo yetu yikusalimbikasya kukumbila yagonana?’

12. Naga ŵandu ŵali pachitomelo atindene nganisyo akusosekwa kuganichisya ya chichi?

¹² Ana mpaka atende yamti uli kuti amasye kutindana nganisyo? Nambi uli naga akusatamila  kukangana? Ana yeleyi mpaka yilosye kuti ali ŵangaŵajilana? Ngaŵa myoyo. Akusosekwa kumanyilila kuti ŵandu wosope ŵali peŵasa ndaŵi sine akusatindana nganisyo. Mwamti ulombela wakulimba ukusapanganyidwa ni ŵandu ŵaŵili ŵakusakamusyangana kumasya yakusawusya yawo. Myoyo, yakutenda apano pakumasya yakusawusya yawo ni yachachitendagasoni mu ulombela wawo. Mpaka aliwusye kuti, ‘Ana tukusakambilana yakusawusya yetu mwamtendele soni mwakuchimbichisyana? Ana tukusaŵa ŵakoseka kwitichisya yakulepela yetu soni kongolela? Ana tukusaŵa ŵakundilila kupepesya soni kukululuchilana?’ (Aef. 4:​31, 32) Nambope amanyilile kuti, naga akusatamila kangana soni ngapikangana pali pachitomelo, yindu ngasiyichenga pachachilombanapo. Naga amanyilile kuti mjawojo ngakuŵajilana najo mpaka atende chenene kumasya chitomelocho. Kutenda yeleyi mpaka kuŵe kwakamuchisya kwa jemanja wosope. d

13. Ana chichi champaka chakamuchisye kumanyilila ulewu wa ndaŵi jakusosekwa kutama ali pachitomelo?

¹³ Ana chitomelo chawo chikusosekwa kutama kwa ndaŵi jelewu uli? Naga tukutenda yindu mwakuwutuka ndaŵi syejinji tukusasimana ni yakusawusya. (Mis. 21:5) Myoyo, akusosekwa kutama kwa ndaŵi nditu ali pachitomelo nichakulinga chakuti amanyigane chenene ni mjawojo. Nambope ngachikusosekwa kujigala ndaŵi jelewu mnope. Baibulo jikusati, “Chindu chakuchijembecheya pati chilepeleche, chikusapwetesya mtima.” (Mis. 13:12) Konjechesya pelepa, naga akutama pachitomelo kwandaŵi jelewu, yikusaŵa yakusawusya kuti aŵambale yakulingwa yakumbila kugonana. (1 Akoli. 7:9) Myoyo, mmalo mwakutamila kuganichisya ya ulewu watemi pachitomelo, mpaka atende chenene kuliwusya kuti, ‘Ana ni yindu yapi yayisigele kuti manyilile chenene yakwamba mjanguju nichakulinga chakuti sagule yakutenda?’

ANA ŴANE MPAKA ŴAKAMUCHISYE CHAMTI ULI ŴANDU ŴALI PACHITOMELO?

14. Ana ŵandu ŵane mpaka ŵakamuchisye chamti uli ŵandu ŵali pachitomelo? (Alole chiwulili.)

¹⁴ Naga amanyilile kuti ŵandu ŵane ali pachitomelo, ana mpaka ŵakamuchisye chamti uli? Mpaka atende chenene kwaŵilanjila ku nyumba kwawo kuti chalye yakulya yimpepe, kutenda kulambila kwapeŵasa, kapena kutendela yimpepe yakusangalasya. (Alo. 12:13) Kupitila muyakutendekwa yeleyi mpaka yakamuchisye jemanjajo kumanyigana chenene. Ana ŵandu ŵali pachitomelo akusosekwa mundu jwakwapechesya ku malo gane gakwe, kapena akusosekwa chikamuchisyo cha kajende mwinesoni malo gakuti akakunguluche mwagopoka? Naga yili myoyo, mpaka atende  chenene kwakamuchisya. (Agal. 6:10) Mlongo Alicia jwatumkolasile kundanda jula ni M’bale Eshiwin akusakumbuchila yaŵatiga pakuyamichila yindu yaŵatendaga ŵane pakwakamuchisya paŵaliji pachitomelo. Jwalakwe jwasasile kuti, “Twaŵaga ŵakusangalala mnope abale ni alongo patusalile kuti naga tukusaka malo gakuti tukakunguluche mwagopoka mpaka tujawule kunyumba kwawo.” Naga ŵandu ŵali pachitomelo ŵaŵendile kuti ŵapechesye kwine kwakwe awuwoneje kuti uli upile wawo. Nambo ngakusosekwa kwaleka jemanjajo ali ŵaŵilipe. Atamose kuti mpaka asosekwe kwapa lipesa lyakuti akambilane yakulukosi kwawo, nambo wawojo ngasasosekwa kutalichila mnope.—Afil. 2:4.

15. Ana achimjakwe ŵa mundu jwali pachitomelo mpaka amkamuchisye chamti uli? (Misyungu 12:18)

¹⁵ Mpaka twakamuchisyesoni ŵandu ŵali pachitomelo kupitila mu yakutenda yetu soni yatukusaŵecheta. Ndaŵi sine mpaka tusosekwe ngaŵecheta chilichose. (Aŵalanje Misyungu 12:18.) Mwachisyasyo, mpaka tusacheje kwasalila ŵane kuti m’bale jwamti ni mlongo jwamti ali pachitomelo, chitamilecho achimsyenewo ali ngakusaka kwasalila ŵane. Ngatukusosekwa kwalya miseche kapena kwajimba magambo payindu yele ngayikutukwaya. (Mis. 20:19; Alo. 14:10; 1 Ates. 4:11) Konjechesya pelepa, ngatukusosekwa kwawusyaga ŵandu ŵali pachitomelo yindu yampaka yalagasyeje nganisyo. Mlongo Elise yalumo ni ŵamkwakwe ŵasasile kuti, “Yatutesyaga sooni ŵandu ŵane patuwusisye lisiku lyatuchilombana, chitamilecho yili mkuti achimsyenewe nganitukambilane ngani jeleji.”

16. Ana tukusosekwa kuŵambala kutenda chichi ŵandu pamasisye chitomelo?

¹⁶ Nambi uli naga ŵandu ŵali pachitomelo akamulene yakumasya chitomelocho? Tukusasosekwa kuŵambala kwinjilila nganijo kapenasoni kuŵa kumbali ja mundu jumpepe. (1 Pet. 4:15) Mlongo Lea jwatite, “Yangwayiye mnope panapikene kuti ŵandu ŵane akuwandisya yakuti masisye chitomelo. Yeleyitu yanguŵesye mnope.” Mpela mwatuŵechetele kundanda kula, naga ŵandu ŵane asagwile kumasya chitomelo chawo, yangagopolelaga kuti asagwile yindu mwakulemwecheka. Nambo yikusagamba kulosya kuti ŵanduwo ŵamanyililaga chakulinga cha chitomelocho. Ligongo yeleyi ni yayakamuchisye kuti asagule yindu mwalunda. Nambope, yasagwileyo mpaka yatendekasyeje kuti alagasicheje nganisyo kapena kutenda lipowo. Myoyo, mpaka tusosekwe kupata matala gakwakamuchisya jemanjajo.—Mis. 17:17.

17. Ana ŵandu ŵali pachitomelo akusosekwa kupitilisya kutenda chichi?

¹⁷ Yatukambilene munganiji, yitukamuchisye kumanyilila kuti chitomelo mpaka chikole yakusangalasya soni yakusawusya yakwe. Mlongo Jessica jwasasile kuti, “Kusala yisyene, chitomelo gali masengo gekulungwa. Ndili jwakusangalala kuti twakamulichisye masengo chenene ndaŵi jetu soni machili getu kuti tumanyigane chenene.” Myoyo, naga apano ali pachitomelo apitilisye kutendela yindu yalumo ni chakulinga chakuti amanyigane chenene. Pakutenda yeleyi yichikamuchisya kuti chitomelo chawo chijendeje chenene yayichakamuchisya kuti chasagule yindu mwalunda.