NGANI JAKULIJIGANYA 20
NYIMBO NA. 67 “Mlalichile Maloŵe”
Twalalichileje Ŵane Ligongo Lyakwanonyela
“Ngani syambone sikusosekwa kulalichidwa kaje kwa ŵandu ŵa mitundu josope.”—MALIKO 13:10.
CHAKULINGA CHA NGANIJI
Chitulijiganye yampaka chijile chinonyelo pakutulimbikasya kukamula masengo gakulalichila ni mtima wetu wosope.
1. Ana twalijiganyisye chichi pamsongano wapachaka wa mu 2023?
PAMSONGANO wapachaka wa mu 2023, a twapikene kuchenga kwa yindu yine yatukusakulupilila soni yimanyisyo yakusangalasya yakwamba utumiki wetu. Mwachisyasyo, twapikene kuti ŵandu ŵane chachikola upile wakuŵa kumbali ja Yehofa panyuma pakonanjidwa kwa Babulo Jwamkulungwa. Twapikenesoni kuti kutandila mu Nofemba 2023, ŵakulalichila ngasasosekwasoni kulemba yindu yosope yatesile pa masengo gakulalichila. Ana kuchengaku chikutendekasye kuti tugawoneje masengo gakulalichila kuŵa gangasosekwa? Iyayi.
2. Ligongo chichi tukusosekwa kulipeleka mnope pamasengo gakulalichila mbesi pajikuŵandichila? (Maliko 13:10)
2 Masiku pagakumala masengo getu gakulalichila ni pagakusasosekwasoni mnope. Ligongo chichi tukuŵecheta myoyo? Yili myoyo ligongo lyakuti jisigele ndaŵi jamnono kuti mbesi jiyiche. Agambe ganichisya yaŵaŵechete Yesu pakwamba ya mugachijendelaga masengo gakulalichila m’masiku gambesi. (Aŵalanje Maliko 13:10.) Mwakamulana ni yayili m’buku ja Mateyu, Yesu jwasasile kuti ngani syambone sichilalichidwa pachilambo chosope “mbesi” mkanijiyiche. (Mat. 24:14) Pelepatu akusala ya mbesi ja chilambo cha Satana chakusakalachi. Yehofatu aŵisile ‘lisiku ni ndaŵi’ jachatendele yeleyi pachangakaŵapa. (Mat. 24:36; 25:13; Mase. 1:7) Myoyo, lisiku lililyose palikumala tukusaŵa tuli mkuŵandichila ndaŵi jeleji. (Alo. 13:11) Mwamti apano tukusosekwa kupitilisya kulalichila mpaka pandaŵi jele mbesi jichiyika.
3. Ana chichi chachikusatulimbikasya kuti tulalichileje?
3 Patuganichisya ya masengo getu gakulalichila mpaka yiŵe chenene kuliwusya kuti: Ligongo chichi tukusalalichila ngani syambone? Tukusalalichila ngani syambone ligongo lya chinonyelo. Yatukusatenda pakuganonyela masengo gakulalichila yikusalosya kuti tukusitwanonyela ŵandu soni ngani syambone. Nambosoni kupunda pa yosopeyi yikusalosya kuti tukusamnonyela Yehofa soni lina lyakwe. Sambano kwende tukambilane mfundo jilijose pajika.
TUKUSALALICHILA LIGONGO LYAKUSINONYELA NGANI SYAMBONE
4. Ana tukusatenda yamti uli patupikene ngani syambone?
4 Aganichisye muŵapikanile mumtima paŵapikene ngani jine jakwe jakusangalasya. Mwine mundu jwine jwa mwiŵasa mwawo jwasalile kuti akwete mwanache kapena mundu jwine jwakamuchisye kupata masengo gaŵagasakaga wawojo. Mwangakayichila ŵasalile ŵandu ŵamwiŵasa mwawo soni achimjawo ngani jakusangalasyaji. Ana yeleyi ni yayatendekwe paŵapikene ngani syakusangalasya mnope, syakwamba Uchimwene wa Mlungu?
5. Ana ŵapikene uli paŵalijiganyisye kandanda yisyesyene kutyochela m’Maloŵe ga Mlungu? (Alole yiwulili.)
5 Aganichisye muŵapikanile mumtima paŵalijiganyisye kandanda yisyesyene ya m’Maloŵe ga Mlungu. Ŵalijiganyisye kuti Atati ŵawo ŵakwinani akusiŵanonyela wawojo, soni kuti akusasaka kuti wawojo aŵe m’liŵasa lya ŵakutumichila ŵakwe. Ŵalijiganyisyesoni kuti Yehofa ali jwakusachilila kumasya yakusawusya yosope nambosoni ŵalijiganyisye kuti ŵakunonyelwa ŵawo ŵaŵawile chachijimuka. (Maliko 10:29, 30; Yoh. 5:28, 29; Alo. 8:38, 39; Chiw. 21:3, 4) Kusala yisyene, yaŵalijiganyisyeyi yatendekasisye wawojo kuŵa ŵakusangalala mnope. (Luk. 24:32) Mwamti ŵayinonyele yindu yaŵalijiganyagayi, soni ngamkanakunda kuti yindu yeleyi agambe kuyisunga mumtima mwawo.—Alole Yelemiya 20:9.
Patulijiganyisye kandanda yisyesyene ya m’Baibulo tukusaŵaga ŵakusangalala mnope soni tukusasachilila tuli twasalile ŵane (Alole ndime 5)
6. Ana alijiganyisye chichi kutyochela pa yaŵasimene nayo Ernest ni Rose?
6 Aganichisye chakutendekwa achi: M’bale jwine lina lyakwe Ernest b ali ni yaka 10, babagwe ŵajasiche. Pakumbuchila Yeleyi jwalakwe jwatite, “Naliwusyaga kuti, ‘Ana baba ŵangu apite kwinani? Kapena ngasinawonasoni?’ Kusala yisyene nakumbilaga achimjangu ŵakwete achibaba ŵawo.” Ndaŵi ni katema Ernest jwajawulaga pa lilembe lya baba ŵakwe kaneko ŵatindiŵalaga pasi ni kupopela kwa Mlungu kuti, “Chonde Mlungu angamuchisye kumanyilila kwali baba ŵangu.” Panyuma pa yaka 17 babagwe ali ajasiche, Ernest jwatandite kulijiganya Baibulo. Mwamti jwalakwe jwasangalele kumanyilila kuti pangali chilichose chakusamanyilila ŵawe ligongo yikusaŵa mpela kuti agonile basi. Jwasangalelesoni kumanyilila kuti ŵawe chachijimuka. (Jwak. 9:5, 10; Mase. 24:15) Mwamti pambesi pakwe jwapatile kwanga kwa yiwusyo yaŵaŵele ali mkulaga nayo kwa ndaŵi jelewu. Ernest jwaliji jwakusangalala kulijiganya yisyesyene ya m’Baibulo. Kaneko, ŵamkwakwe Ernest lina lyawo Rose, ŵatanditesoni kulijiganya yisyesyene ya m’Baibulo, mwamti ŵatandite kusinonyela ngani syakwamba Uchimwene wa Mlungu. Mu 1978 jemanjaji ŵabatisidwe. Mwamti ŵalipeleche mnope kwasalila yindu yaŵalijiganyaga ŵandu ŵamwiŵasa mwawo, achimjawo soni ŵandu ŵane. Yakuyichisya yakwe, Ernest ni ŵamkwakwe ŵakamuchisye ŵandu ŵakupunda 70 mpaka kwika pakubatisidwa.
7. Ana chikusatendekwa chichi patutandite kunonyela yisyesyene ya m’Baibulo? (Luka 6:45)
7 Kusala yisyene, patutandite kunonyela yisyesyene yatulijiganyisye m’Baibulo yikusaŵa yakusawusya kuti tugambe kutama ngasalila ŵane. (Aŵalanje Luka 6:45.) Tukusatenda yindu mpela muŵatendele ŵakulijiganya ŵa Yesu ŵa mundaŵi ja ŵandumetume ŵaŵaŵechete kuti, “Nganituŵa tulesile kuŵecheta yindu yitwayiweni soni kuyipikana.” (Mase. 4:20) Tukusayinonyela yisyesyene yatukusalijiganya kutyochela m’Baibulo, mwamti tukusaŵa ŵakusachilila kwasalila ŵane mwampaka tukombolele.
TUKUSALALICHILA LIGONGO LYAKWANONYELA ŴANDU
8. Ligongo chichi tukusasachilila kwasalila ŵane ngani syambone? (Alole libokosi lyakuti, “ Twanonyeleje Ŵandu—Twajiganyeje.”) (Alole chiwulili.)
8 Tukusitwanonyela ŵandu Mpela mwakusatendela Yehofa soni Yesu. (Mis. 8:31; Yoh. 3:16) Tukusitwatendela chanasa mnope ŵandu ŵele ‘nganakola Mlungu’ nambosoni “ŵangali chembecheyo.” (Aef. 2:12) Kusala yisyene jemanjaji akusalaga ni yakusawusya yejinji pa umi wawo nambo m’ŵeji tukwete chindu chambone chakusosechela jemanjaji chachili ngani syambone sya Uchimwene wa Mlungu. Kwanonyela soni kwatendela chanasa jemanjaji yikusatukamuchisya kuti twalalichileje ngani syambone. Ngani syambone syelesi sikusakamuchisya jemanjaji kukola chembecheyo, kola “umi usyesyene” apano nambosoni kwembecheya umi wangamala m’chilambo chasambano.—1 Tim. 6:19.
Kwanonyela ŵandu soni kwatendela chanasa kukusatutendekasyaga kusachilila kwasalila ngani syambone (Alole ndime 8)
9. Ana ni yindu yapi yatukusitwasalilaga ŵandu yayichitendekwa msogolo soni ligongo chichi? (Esekiele 33:7, 8)
9 Ligongo lyakuti tukusitwanonyela ŵandu yikusatutendekasya kuti twakalamusyeje pakwamba ya chilambo chakusakalachi. (Aŵalanje Esekiele 33:7, 8.) Tukusitwatendela chanasa achalongo achimjetu nambosoni achanasi ŵetu ŵangakulupilila. Ŵajinji mwajemanjaji akusagamba kulitamila ngamanyilila kuti kusogoloku kukwika ‘yakusawusya yekulungwa yanganiyitendekweje chipanganyichisye chilambo mpaka apano, soni yangasiyitendekwasoni.’ (Mat. 24:21) Tuli ŵakusachilila kwakamuchisya jemanjaji kumanyilila yindu yayichitendekwa pandaŵi jakuwelusya, ndaŵi jachachimasyaga dini ja unami nambosoni konanga chilambo chakusakalachi pa ngondo ja Alamagedo. (Chiw. 16:14, 16; 17:16, 17; 19:11, 19, 20) Mwamti lili lipopelo lyetu kuti ŵandu ŵajinji apikanile utengawu ni kutanda kumtumichila Mlungu. Nambo ana yichamalila uli ŵandu ŵangakupikanila utengawu apano kupwatikapo ŵachinasi ŵetu?
10. Ligongo chichi tukusosekwa kwasalila ŵandu mwachitema yindu yachiyitendekwe pachangakaŵapa?
10 Mpela mwatwalijiganyichisye mungani jipite jila, Yehofa chachakulupusya ŵandu ŵachachichenga mitima jawo panyuma pakuchiwona chonasiko cha Babulo Jwamkulungwa. Naga yichiŵa myoyo, nikuti tukusosekwa kuŵa ŵakusachilila kwakamuchisya ŵandu pandaŵi ajino. Aganichisye ayi: Mwine yatukwasalilaga ŵandu apano ni yayichakamuchisya jemanjaji kuti chakumbuchile pandaŵijo. (Alole Esekiele 33:33.) Komboleka kuti jemanjaji chachikumbuchilaga yindu yatwakalamusyaga, yayichatendekasya kuti atande kumtumichila Mlungu ndaŵi mkanijimale. Mpela muyaŵelele ni jwakulolela nyumba ja ukayidi jwa ku Filipi juŵachenjile mtima wakwe panyuma pakutendekwa “chisichinya chamachili,” kombolekasoni ŵandu ŵane chachitanda kumtumichila Mlungu ni kuchenga mitima jawo panyuma pakukuwona konasika kwa Babulo Jwamkulungwa.—Mase. 16:25-34.
TUKUSALALICHILA LIGONGO LYAKUMNONYELA YEHOFA SONI LINA LYAKWE
11. Ana tukusamchimbichisya chamti uli Yehofa, kumkwesya, soni kumpa machili? (Chiwunukuko 4:11) (Alole yiwulili.)
11 Ligongo limo lyakusosekwa mnope lyalikusatutendekasya kulalichila ngani syambone, lili lyakuti tukusamnonyela mnope Yehofa Mlungu jwetu nambosoni lina lyakwe lyeswela. Tukusagawona masengo gakulalichila kuŵa litala lyakum’chimbichisya Mlungu jwatukusamnonyela. (Aŵalanje Chiwunukuko 4:11.) Ni mtima wetu wosope, tukusakamulana ni mfundo jakuti Yehofa Mlungu jwetu ali jwakuŵajilwa kumkwesya, kupochela uchimbichimbi nambosoni machili. Tukusamkwesya soni kum’chimbichisya Yehofa patukwasalila ŵane kuti jwalakwejo ni “juŵapanganyisye yindu yosope” soni kuti wosope tupali ligongo lya jwalakwejo. Tukusampaga jwalakwe machili patukamulichisye masengo ndaŵi jetu machili getu nambosoni chipanje chetu pamasengo gakulalichila mwakamulana ni mwayiŵelele yindu pa umi wetu. (Mat. 6:33; Luk. 13:24; Akolo. 3:23) Mwamti mpaka tusale kuti tukusasalila ŵandu ŵane ya Mlungu jwetu ligongo tukusamnonyela. Tukusaŵasoni ŵakusachilila kwasalila ŵane yakwamba lina lyakwe nambosoni yalikusajimila linali. Ana ligongo chichi tukusatenda yeleyi?
Tukusampaga Yehofa machili getu patukukamulichisya masengo ndaŵi jetu soni yindu yatukwete patuli mu utumiki mwampaka tukombolele (Alole ndime 11)
12. Ana tukusalichimbichisya chamti uli lina lya Yehofa patukulalichila?
12 Kumnonyela Yehofa kukusatutendekasya kuti tulichimbichisyeje lina lyakwe. (Mat. 6:9) Mwamti tukusajigala nawo mbali pakulichimbichisya linali, mwakwasalila ŵandu kuti yindu yaŵasasile Satana yakwamba Yehofa yili yaunami. (Gen. 3:1-5; Yob. 2:4; Yoh. 8:44) Patuli mu utumiki tukusasachilila kulichenjela lina lya Yehofa mwakwasalila ŵandu yindu yisyesyene yakwamba jwalakwe. Tukusasakasoni kuti jwalijose amanyilile kuti ndamo jekulungwa jakwete Yehofa jili chinonyelo soni kuti ali jwakulamulila jwachilungamo. Nambosoni tukusasaka kwamanyisya ŵane kuti pachangakaŵapa Uchimwene wakwe uchimasya yakusawusya yosope soni kuti ŵandu chachitamaga mwakusangalala soni mwamtendele. (Sal. 37:10, 11, 29; 1 Yoh. 4:8) Patukwasalila ŵandu ya ndamo syambone syakwete Yehofasi tukusaŵa tuli mkulichimbichisya lina lyakwe. Tukusaŵagasoni ŵakusangalala ligongo lyakutenda yindu yatukusasosekwa kutenda mpela ŵakutumichila ŵakwe. Ligongo chichi tukuŵecheta yeleyi?
13. Ligongo chichi tukusaŵaga ŵakusangalala kumanyikwa kuti Mboni sya Yehofa? (Yesaya 43:10-12)
13 Chindu chakusangalasya chili chakuti Yehofa atusagwile kuti tuŵe “mboni syakwe.” (Aŵalanje Yesaya 43:10-12.) Yaka yipiteyo, chikalata chine chachatyochele ku Likuga Lyakulongolela chasasile kuti, “Ŵajinji mwa m’weji tukusayiwona kuti tuli ŵakuchimbichika mnope ligongo lyakumanyika kuti “Mboni sya Yehofa.” Ligongo chichi tukuŵecheta yeleyi? Aganichisye chakutendekwa achi: Tuŵanichisye kuti akusaka kuti mundu jwine akaŵe mboni jawo kukoti pandaŵi jakwimbidwa magambo. Kusala yisyene mpaka asagule mundu jwakummanyilila chenene, jwakumdalila, soni jwakwete mbili jambone. Mwakulandana ni yeleyi, Yehofa pakutusagula m’ŵeji kuti tuŵe mboni syakwe, jwalosisye kuti akutumanyilila chenene soni kuti mpaka tukombole kwasalila ŵane yakuti jwalakwe ali Mlungu jusyesyene. Yehofatu ŵatuchimbichisye pakutusagula kuti tuŵe mboni syakwe. Mwamti ndaŵi jilijose upile pawupatikene tukusitwasalila ŵane yakwamba lina lyakwe soni kwasimichisya kuti yindu yosope yaŵaŵechete Satana yakwamba Yehofa yili yaunami. Patukutenda yeleyi tukusaŵa tuli mkutenda yalikusagopolela lina lyetu lyakuti Mboni sya Yehofa.—Sal. 83:18; Alo. 10:13-15.
CHITUPITILISYE KULALICHILA MPAKA KUMBESI
14. Ana ni yindu yakusangalasya yapi yachiyitendekwe pachangakaŵapa?
14 Kusala yisyene, yili yakusangalasya mnope kumanyilila yindu yachiyitendekwe pachangakaŵapa. Ni chikamuchisyo cha Yehofa tukwete chikulupi chakuti ŵandu ŵajinji chatande kulijiganya yisyesyene yakusawusya yekulungwa mkaniyitande. Tuli ŵakusangalalasoni kumanyilila kuti atamose pandaŵi ja yakusawusya yekulungwa ŵandu ŵajinji chachitanda kulijiganya Maloŵe ga Mlungu kuti amchimbichisyeje Yehofa.—Mase. 13:48.
15-16. Ana chitupitilisye kutenda chichi soni mpaka pandaŵi japi?
15 Nambo apano, tukwete masengo gakusosekwa mnope gakuti tugakamule. Masengo gakwe gali gakulalichila ngani syambone sya Uchimwene wa Mlungu pachilambo chosope chapasi gele mkupita kwandaŵi ngasigatendekwasoni. Pandaŵi jakulandanaji, tukusosekwasoni kwakalamusya ŵandu pakwamba ya yindu yachiyitendekwe pachangakaŵapa. Ŵandu akusosekwa kumanyilila kuti mbesi ja chilambo chakusakalachi jisigele panandi kwika. Ndaŵi jakuwelusya pajichiyika, jemanjaji chachimanyilila kuti utenga ŵatwalalichilaga ŵatyochelaga kwa Yehofa Mlungu.—Esek. 38:23.
16 Ana apano tukusosekwa kuŵa ŵakusachilila kutenda chichi? Tukusosekwa kupitilisya kulalichila ngani syambone mwakulipeleka mnope ligongo lyakuti ndaŵiji jisigele panandi. Nambo kuti tukombole kutenda yeleyi, tukusosekwa kunonyela ngani syatukusalalichila, kwanonyela ŵandu soni kupunda pa yosopeyi tukusosekwa kumnonyela Yehofa Mlungu soni lina lyakwe. Mwamti tukusosekwa kulosya kulipeleka kweleku mpaka pandaŵi jele Yehofa chachiŵecheta kuti, “Basi.”
NYIMBO NA. 54 “Litala ni Ali”
a Msongano wapachaka watendekwe pa 7 Okotoba 2023, pamalo gakutendela misongano jekulungwakulungwa ku Newburgh ku New York, U.S.A. Mbali 1 ja msonganowu ŵajiŵisile mu pologalamu ja JW Broadcasting® ja Nofemba 2023, soni Mbali 2 ŵajiŵisile mu pologalamu ja Januwale 2024.
b Alole ngani jakuti, Baibulo Jikusachenga Umi Wa Ŵandu mu Sanja ja Mlonda ja Febuluwale 1, 2015 ja mtwe wakuti, “Nasangalele ni Kwanga kwa Yiwusyo Kwakupikanika Chenene kwa Baibulo.”
