1-2. Ana ni yindu yapi yayikamlepelekasisye Maliko ni Timoteyo kutenda yejinji pakwatumichila ŵane?

 ANA jemanja abale ŵachinyamata, mkusaka kutenda yejinji pakumtumichila Yehofa soni pakwatumichila ŵane mumpingo wenu? Ngatukukayichila kuti yeleyi ni yamkusaka kutenda. Kusala yisyene, yikusaŵa yakusangalasya mnope kwawona abale ŵachinyamata ŵajinji ŵakwete mtima wakusachilila kwatumichila ŵane. (Sal. 110:3) Nambope, ndaŵi sine jemanja ŵachinyamata pamkulingalinga kutenda yeleyi mpaka msimaneje ni yakusawusya. Ana mkulepela kutenda yineyakwe pakumtumichila Yehofa ligongo lya woga? Ana pakwete pamkanile kutenda utumiki winewakwe ligongo lyakulikayichila? Naga yili myoyo mmanyilile kuti nganimŵa jika.

² Nombe Maliko ni Timoteyo ŵasimene ni yakusawusya yakulandanayi. Nambope, jemanjaji nganakunda kuti wogawu soni kulikayichila yalepelekasye kwatumichila ŵane. Komboleka kuti ndumetume Paulo ni Banaba paŵamŵendaga Maliko kuti akaŵe yimpepe paulendo wandanda wa umishonale, Malikojo jwaliji ali mkutama m’nyumba jambone yimpepe ni mamagwe. (Mase. 12:​12, 13, 25) Atamose kuti yaliji myoyo, Maliko jwatyosile m’nyumba jamboneji ni chakulinga chakuti atendeje yejinji pakumtumichila Yehofa. Chandanda jwalakwe jwapite ku Antiyokeya. Kaneko ŵampechesye Paulo ni Banaba ku madela gane gakutalichila mnope. (Mase. 13:​1-5) Nombenajo Timoteyo jwasangalalaga kutama yimpepe ni achinangolo ŵakwe pandaŵi jele Paulo ŵamŵendaga kuti alalichileje najo yimpepe. Pakuŵa pandaŵiji Timoteyo jwaliji jwachinyamata soni nganamanyilila yejinji, yikakomboleche kukana kutenda nawo utumikiwu. (Alole 1 Akolinto 16:​10, 11; soni 1 Timoteyo 4:12.) Atamose yaliji myoyo, Timoteyo jwajitichisye utumikiwu mwamti Yehofa jwampele upile.—Mase. 16:​3-5.

3. (a) Ana Paulo jwamwonaga chamti uli Maliko ni Timoteyo? (2 Timoteyo 4:​6, 9, 11) (Alolesoni yiwulili.) (b) Ana chitukambilane yiwusyo yapi munganiji?

³ Maliko ni Timoteyo paŵaliji ŵachinyamata ŵalijiganyisye yampaka  atende pakukamula masengo gejinji ga mumpingo. Paulo jwayamichilaga mnope ŵachinyamataŵa, mwamti pandaŵi jajwamanyilile kuti asigele panandi kuwa, jwamŵilasile jemanjaji kuti akamkamuchisyeje. (Aŵalanje 2 Timoteyo 4:​6, 9, 11.) Ana Maliko ni Timoteyo ŵakwete ndamo syapi siŵasinonyelaga mnope Paulo? Ana abale ŵachinyamata mpaka atende uli kuti ajigalile chisyasyo chawo? Soni ana malangiso gachinonyelo ga Paulo mpaka gakamuchisye chamti uli ŵachinyamata masiku agano?

AMSYASYEJE MALIKO MWAKUŴA ŴAKUSACHILILA KUTUMICHILA

4-5. Ana Maliko jwalosisye chamti uli kuti jwasachililaga kwatumichila ŵane?

⁴ Mwakamulana ni yajasasile buku jine, maloŵe gakuti kutumichila, gakusagopolela kwakamuchisya ŵane “mwakulipeleka soni mwakupilila.” Mwamti Maliko ali chisyasyo chambone panganiji. Paulo pajwakanile kumjigala jwalakwejo paulendo wakwe waŵili wa umishonale, komboleka kuti jwatumbile soni jwatengwiche. (Mase. 15:​37, 38) Nambo yeleyi nganiyimtendekasya Maliko kuleka kwatumichila abale ni alongo ŵakwe.

⁵ Maliko jwajitichisye kwawula kukutumichila yimpepe ni Balanaba juŵaliji msuŵani jwakwe. Yili yimasile yaka 11, Maliko jwaliji jumo mwa ŵandu ŵaŵamkamuchisye Paulo pajwaliji kundende kandanda ku Loma. (Fil. 23, 24) Mwamti Paulo jwayamichile chikamuchisyo chakwe. Ni ligongo lyakwe jwalakwe jwasasile kuti Maliko ‘jwaŵele ali mkulimbikasya mnope.’—Akol. 4:​10, 11.

6. Ana kukunguluka ni Aklistu ŵakumanyilila yejinji kwamkamuchisye chamti uli Maliko? (Alole maloŵe ga mwiŵanda.)

⁶ Achimjakwe ŵa Maliko ŵaliji Aklistu ŵakulimba mwausimu. Yeleyi yamkamuchisye mnope Maliko. Panyuma pakuŵa yimpepe ni Paulo ku Loma, Maliko jwalinganyisye yakuŵa yimpepe ni ndumetume Petulo ku Babulo. Jemanjanji ŵaliji paunasi wakulimba mnope, mwamti pakwamba ya jwalakwe Petulo jwatite ‘Maliko ali mpela mwanangu.’ (1 Pet. 5:13) Jemanjaji paŵakamulaga masengo yimpepe, komboleka kuti Petulo jwakambilanaga ni mjakwe jwachinyamataju mfundo syejinji syakusangalasya. Mfundo syakwe syaliji syakwamba umi soni utumiki wa Yesu syele panyuma pakwe Maliko ŵasilembile m’buku ja Ngani Syambone jakolanjidwa ni lina lyakwe. a

7. Ana M’bale Seung-Woo jwatesile yamti uli pakujigalila chisyasyo cha Maliko? (Alolesoni chiwulili.)

⁷ Maliko jwapitilisye kutenda utumiki wakwe  soni kukamulana mnope ni abale ŵakulimba mwausimu. Ana jemanja ŵachinyamata mpaka mumsyasye chamti uli Maliko? Naga nganimpata upile winewakwe wa utumiki, mŵeje ŵakuwusimana mtima soni mpitilisyeje kusosasosa matala gane gakumtumichilila Yehofa mumpingo mwenu. Aganichisye chisyasyo cha Seung-Woo, jwakutumichila mpela jwamkulungwa jwa mumpingo. Pajwaliji jwachinyamata, m’baleju jwalilandanyaga ni ŵachinyamata achimjakwe. Ŵane mwa jemanjaji ŵaliji ali apochele mautumiki gane mumpingo, nambo jwalakwe jwaliji mkanaŵe. M’baleju jwayiwonaga kuti ngakumŵalanjila mwamti kaneko ŵasalile nganiji abale ŵakulimba mwausimu. Myoyo jwamkulungwa jwa mumpingo jwine jwamsalile kuti akusosekwa kutenda yiliyose yampaka akombole pakwatumichila ŵane atamose yili mkuti yakutendayo ngayikuwonechela kwa ŵane. Yeleyi yamlimbikasisye m’baleju kutanda kwakamuchisya ŵachikulile soni ŵandu ŵaŵalajililaga kajende pakwawula kumisongano. Pakuganichisya ya munyuma, jwalakwe jwatite, “Napikanichisye ngopolelo ja kwatumichila ŵane. Mwamti naliji jwakusangalala mnope ligongo lyakwakamuchisya ŵane.”

AMSYASYEJE TIMOTEYO MWAKULOSYA KUTI AKUSIŴANONYELA ŴANE

8. Ligongo chichi Paulo jwamsagwile Timoteyo kuti ajendeje najo? (Afilipi 2:​19-22)

⁸ Paulo jwasosekwaga kwenda ni ŵandu ŵakulimba mtima pajwawujilaga kumadela kwele ŵandu ŵamsisisye mnope. Myoyo, jwalakwe jwamjigele Sila kuti ampechesye pakuŵapo jwaliji Mklistu jwakumanyilila yejinji. (Mase. 15:​22, 40) Kaneko Paulo ŵamjigele Timoteyo kuti ajendeje najosoni. Ligongo chichi Paulo jwalinganyisye yakwenda ni Timoteyo? Ligongo limo lyaliji lyakuti Timoteyo jwakwete mbili jambone. (Mase. 16:​1, 2) Konjechesya pelepa, Timoteyo jwanonyelaga mnope ŵandu.—Aŵalanje Afilipi 2:​19-22.

9. Ana Timoteyo jwalosisye chamti uli kuti jwasamalaga ya Aklistu achimjakwe?

⁹ Kutandila pandaŵi jiŵatandite kutumichila yimpepe ni Paulo, Timoteyo jwalosisye kuti jwaŵikaga yakusaka ya ŵane pamalo gandanda kulekangana ni yakusaka yakwe. Myoyo, Paulo pajwatyokaga ku Beleya jwakwete chikulupi chakuti Timoteyo chakombole kwalimbikasya Aklistu ŵaŵagambile kutanda kwene kumkuya Yesu. (Mase. 17:​13, 14) Mwangakayichila, Timoteyo jwalijiganyisye yejinji kutyochela kwa Sila jwele pandaŵijo jwaliji chiŵela ku Beleya peko. Pali papitile ndaŵi, Paulo ŵamtumisye Timoteyo jika kuti akalimbikasye Aklistu ŵa ku Tesalonika. (1 Ates. 3:2) Mwamti kwa yine yaka yakupunda 15, Timoteyo jwaŵele ali mkwatendela chanasa ŵandu ŵaŵasimanaga ni yakusawusya mwamti jwalilaga yimpepe ni ŵandu ŵaŵalilaga. (Alo. 12:15; 2 Tim. 1:4) Ana Aklistu ŵachinyamata mpaka amsyasye chamti uli Timoteyo?

10. Ana M’bale Woo Jae jwalijiganyisye chamti uli kola chidwi ni ŵandu ŵane?

¹⁰ M’bale jwine lina lyakwe Woo Jae jwalijiganyisye yampaka atende kuti akoleje chidwi ni ŵandu ŵane. M’baleju pajwaliji jwachinandipile yamsawusyaga  kunguluka ni abale soni alongo ŵachikulile. Mwamti pali ku Nyumba ja Uchimwene jwagambaga kwakomasya jemanjaji mwakata. Myoyo, jwamkulungwa jwa mu mpingo jwine juŵamanyililaga chakusawusyachi ŵamkamuchisye. Jwalakwe ŵamsalile jwachinyamataju kuti mpaka atande kunguluka ni Aklistu achimjakwe mwakwayamichila pa yindu yambone yakusatenda jemanjajo. Ŵamlimbikasisyesoni jwalakwejo kuti aganichisyeje ya yindu yampaka yasangalasye ŵane. Kaneko jwachinyamataju jwakamulichisye masengo malangisoga. Apano jwalakwe ali jwamkulungwa jwa mumpingo mwamti jwasasile kuti, “Sambano ngusayiwona kuŵa yangasawusya kunguluka ni ŵandu ŵakulekangana nawo msingu. Mwamti ndili jwakusangalala mnope kuti apano ngusamanyilila yakusawusya yakusasimana nayo ŵane. Yeleyi yingamuchisye kumanyilila yampaka ndende pakwakamuchisya abale ni alongo.”

11. Ana m’bale jwachinyamata mpaka atende uli kuti atendeje chidwi ni abale ni alongo ŵa mumpingo mwakwe? (Alolesoni chiwulili.)

¹¹ Jemanja ŵachinyamata mpaka mkombole kuŵika yakusaka ya ŵane pamalo gandanda. Pamli pa misongano ja mpingo, mlinjeje kunguluka ni ŵandu ŵa misingu jakulekanganalekangana soni ŵakutyochela kwakulekangana. Mwakomasyeje soni mwapikanileje pakuŵecheta. Yeleyi yichimkamuchisya kumanyilila yampaka mtende pakwakamuchisya jemanjajo. Mwine mpaka myikopochele kuti liŵasa line lyachikulile likulaga kamulichisya masengo pologalamu ja JW Library^®. Kapena mpaka myikopochele kuti ŵachikulilewo nganalinganya yakwinjila mu utumiki ni mundu jwalijose. Myoyo, mpaka mwakamuchisye ŵandu mpela ŵeleŵa kuti akomboleje kukamulichisya masengo chenene yipangiso yawo yamakono, kapena kulinganya yakwinjila nawo mu utumiki. Mwamti pamkulingalinga kwakamuchisya ŵane, chimchiŵa chisyasyo chambone kwa ŵandu wosope.

MALANGISO GA PAULO MPAKA GAMKAMUCHISYE

12. Ana malangiso gajwapeleche Paulo kwa Timoteyo mpaka gakamuchisye chamti uli ŵachinyamata?

¹² Paulo jwapeleche malangiso kwa Timoteyo gagamkamuchisye kuti yindu yimjendeleje chenene paumi wakwe soni kuti atendeje chenene utumiki wakwe. (1 Tim. 1:18; 2 Tim. 4:5) Mwamti malangiso ga Pauloga mpaka gamkamuchisyesoni jemanja. Ana malangisoga mpaka gamkamuchisye chamti uli? Pamkuŵalanga yikalata yiŵili ya Paulo yakwawula kwa Timoteyo myiwoneje mpela kuti ŵamlembelaga jemanja. Pamkuŵalanga mganichisyejesoni yampaka mtende kuti mkamulichisyeje masengo malangiso gagakusimanikwa m’yikalatamo. Kwende tukambilane yisyasyo yakuŵalanjika.

13. Ana mundu akusasosekwa kutenda chichi kuti aŵe paunasi wambone ni Yehofa?

¹³ “Mlijiganyeje ni chakulinga chakuti mŵe ŵakulipeleka kwa Mlungu.” (1 Tim. 4:7b) Ana kulipeleka kwa Mlungu kukusagopolela chichi? Kuli  kumnonyela mnope Yehofa soni kuŵa jwakusachilila kutenda yayikusamsangalasya jwalakwe. Myoyo, ligongo lyakuti ngatukusapagwa ni ndamoji, tukusosekwa kutenda yakomboleka kuti tujikusye. Ana mpaka tujikusye chamti uli ndamoji? Maloŵe ga Chigiliki gakuti “mlijiganye,” ndaŵi syejinji ŵagakamulichisyaga masengo pakusaka kulondesya yayikusatendekwa pakulijiganya soni kukosechela mpikisano wakuwutuka. Ŵandu ŵaŵatendaga mpikisano wakuwutuka ŵasosekwaga kuŵa ŵakulinandiya. M’wejisoni tukusosekwa kuŵa ŵakulinandiya kuti tukombole kusya ndamo syampaka situkamuchisye kuti tuŵe paunasi wambone mnope ni Yehofa.

14. Ana tukusasosekwa kukola chakulinga chamti uli patukuŵalanga Baibulo? Asale chisyasyo.

¹⁴ Pamkuŵalanga Baibulo, chakulinga chenu chiŵeje kuŵa paunasi wambone ni Yehofa. Mwachisyasyo, Ana mpaka mlijiganye chichi pa maloŵe gaŵaŵechete Yesu kwa mnyamata jwine juŵaliji jwakusichila? (Maliko 10:​17-22) Jwachinyamataju jwakulupililaga kuti Yesu jwaliji Mesiya nambo nganakola chikulupi chachikamtendekasisye kuti atande kumkuya jwalakwe. Atamose kuti yaliji myoyo, Yesu “ŵamnonyele” jwalakwe. Ana yaŵatite Yesu pakuŵechetana ni mnyamataju ngayikumkwaya jemanja? Mwangakayichila Yesu jwasakaga kuti mnyamataju asagule chenene yindu. Yesu jwalosyaga chinonyelo chaŵakwete Yehofa kwa mnyamataju. (Yoh. 14:9) Myoyo pamkuganichisya ya nganiji soni mwayiŵelele yindu paumi wenu mliwusyeje kuti, ‘Ana ngusosekwa kutenda chichi kuti mbe paunasi wambone ni Yehofa soni kuti natumichileje ŵane?’

15. Ligongo chichi m’bale jwachinyamata akusasosekwa kuganichisyaga mnope mwakusatendela yindu? Asale chisyasyo. (1 Timoteyo 4:​12, 13)

¹⁵ “Mŵeje chisyasyo chambone kwa ŵandu ŵakulupichika.” (Aŵalanje 1 Timoteyo 4:​12, 13.) Paulo nganagamba kumlimbikasya Timoteyo kukusya lunda lwakwe lwa kuŵalanga soni kwiganya. Nambo ŵamlimbikasisyesoni kuti akole ndamo syambone mpela chinonyelo, kulupichika soni ndamo syeswela. Ligongo chichi Paulo ŵamlimbikasisye Timoteyo kutenda yeleyi? Yindu yambone yatukusatendaga yikusaŵa yakamuchisya mnope kwa ŵane kupunda yatukusaŵecheta. Tuwanichisye kuti ampele ngani jajikusala yampaka tutende kuti tuŵe ŵakulipeleka mnope pamasengo gakulalichila. Mwangakayichila, chimchiŵa ŵakusachilila kuŵecheta nganijo naga mkusalipelekaga mnope mu utumiki. Mwamti chisyasyo chenu chambone pangani jakulalichila chichalimbikasya ŵandu ŵajinji.—1 Tim. 3:13.

16. (a) Ana ni mbali msano syapi yampaka atende m’bale jwachinyamata pakulosya kuti ali chisyasyo chambone? (b) Ana m’bale jwachinyamata mpaka atende uli kuti aŵe chisyasyo chambone mu ‘yakuŵecheta yakwe’?

¹⁶ Mpela mwaŵaŵechetele pa 1 Timoteyo 4:​12, Paulo jwakolasile yindu msano yampaka atende jwachinyamata pakulosya kuti ali chisyasyo chambone. Myoyo, jemanja ŵachinyamata mpaka mtende chenene kuganichisyaga ya yindu yeleyi pamkulijiganya pajika. Mwachisyasyo, tujile kuti mkusaka kuŵa chisyasyo chambone pa ‘kaŵechete kenu.’ Naga yili myoyo, mpaka mtende chenene kuganichisya yakutendekwa yampaka msosekwe kuŵecheta yindu yakwalimbikasya ŵane. Naga apano mli chiŵela kutama pamlango pa achinangolo ŵenu, mtendeje yakomboleka pakulosya kuyamichila yindu yakusamtendelaga achinangolo ŵenuwo. Mpaka mlinganyesoni yakuti panyuma pa misongano mwayamichileje abale ni alongo ŵaŵakwete mbali. Kombolekasoni mpaka mlinganye yakuti pandaŵi ja misongano mjanjeje m’maloŵe genugenupe. Pakumtenda yeleyi, kulingalinga kwenu kuti mŵe chisyasyo chambone kuchilosya kuti mkusaka kutenda yejinji pakumtumichila Yehofa.—1 Tim. 4:15.

17. kAna chichi champaka chimkamuchisye m’bale jwachinyamata kuti akwanilisye yakulinga yakwe yausimu? (2 Timoteyo 2:22)

¹⁷ “Mtile yakumbila yaunyamata. Mmalomwakwe mlinjelinjeje kutenda yayili yakuŵajilwa.” (Aŵalanje 2 Timoteyo 2:22.) Paulo ŵamlimbikasisye Timoteyo kuti alimbane ni yakumbila yampaka yijonanje yakulinga yakwe yausimu soni yampaka yijonanje unasi wakwe ni Yehofa. Komboleka jemanja mpaka mmanyilile kuti pana yakutendekwa  yine yele pajikape nganiyiŵa yakulemwecheka. Nambope mpaka yimtendekasye kuti mkakolaga ndaŵi jakwanila jakutendela yindu yausimu. Mwachisyasyo, mganichisye ya winji wa ndaŵi jamkusamalila pakutenda yakusangalasya mpela kulolela mpila, kulola yindu pa intaneti, kapena kutenda masewela ga pa kompyuta. Ana nganimŵa mkombwele kukamulichisya masengo ndaŵi jeleji pakutenda yindu yausimu? Mwine mpaka mkamuchisye nawo pa masengo gakulinganya Nyumba ja Uchimwene, kapena kutenda nawo ulaliki wa pa shelefu. Naga mkulingalinga kutenda nawo yindu yeleyi chimchipata achimjenu ŵasambano ŵampaka amkamuchisye kutenda yejinji pakumtumichila Yehofa.

KWATUMICHILA ŴANE KUKUSAYIKASYA UPILE WEKULUNGWA

18. Ligongo chichi mpaka tuŵechete kuti yaŵatesile Maliko ni Timoteyo yakamuchisye kuŵa ŵakusangalala?

¹⁸ Ligongo lyakuti Maliko ni Timoteyo jwasagwile kwatumichila ŵane ni mtima wawo wosope, yeleyi yakamuchisye jemanjaji kuŵa ŵakusangalala mnope. (Mase. 20:35) Maliko jwasosekwaga kwenda madela gejinji pachilambopa kuti akombole kwatumichila ŵane. Jwalakwe jwalembilesoni ngani jakusangalasya jakwamba umi wa Yesu soni utumiki wakwe. Nombe Timoteyo ŵamkamuchisye Paulo kutamilikasya mipingo soni kwalimbikasya Aklistu achimjakwe. Yili yangakayikasya kuti Yehofa jwasangalele mnope ligongo lya msimu wa kulipeleka wajwalosisye Maliko ni Timoteyo.

19. Ligongo chichi abale ŵachinyamata akusosekwa kupikanila malangiso gajwapeleche Paulo kwa Timoteyo? Ana yakuyichisya yakwe mpaka yiŵe yamti uli?

¹⁹ Umboni wakulosya kuti Paulo ŵamnonyelaga Timoteyo ukusawonechela mu yikalata yajwamlembele mjakweju. Yikalatayi yalosisyesoni kuti Yehofa akusiŵanonyela mnope ŵachinyamata. Mwamti jwalakwe akusasaka kuti jemanja ŵachinyamata yindu yimjendeleje chenene. Myoyo, mpaka mtende chenene kukamulichisya masengo malangiso gajwapeleche Paulo mwakulingalinga kukola mtima wakusaka kwatumichila ŵane. Naga mkutenda yeleyi, chimchisangalala ni umi wambone apano soni ‘chimchikamula mwamachili chembecheyo cha umi usyesyene’ wawukwika kusogoloku.—1 Tim. 6:​18, 19.