NGANI JA PANDANDA | YAMPAKA ATENDE KUTI AKOLE YISYOŴE YAMBONE
2 Atendeje Yindu Mwakulongosoka
-
Tujile kuti akusaka kuleka kumwa tiyi jwa suga mnope, nambo pandaŵi jilijose jakumwa tiyi akusacililape kutaga suga jwamjinji.
-
Ŵasimicisye kuti alece kwemba, nambo ndaŵi ni katema mjawo akwapaga sona.
-
Asacileje kwawula kukuwutuka kuti alimbisyeje cilu, nambo pakucele, akugwa ulesi kuti asosesose sapato syakuwutucila ligongo nganasiŵika pambone.
Ana tukulijiganya cici pa yisyasyoyi? Yisyasyoyi yikulosya kuti yindu yakutusyungulila, ŵakunguluka nawo, soni kutenda yindu mwakulongosoka mpaka yitukamucisye kola yisyoŵe yambone.
MALOŴE GAKAMUCISYA: ‘Mundu jwakalamuka paciweni cindu cakogoya akusajuŵaga, nambo jwakuloŵela akusagambaga kupelenganya ni kutanda kuligamba panyuma pakusimana ni yakusawusya.’—Miyambo 22:3.
Baibulo jikusatulimbikasya kuti tuganicisyeje yampaka tusimane nayo patutesile yine yakwe. Kutenda yeleyi mpaka kutukamucisye kuŵambala yindu yampaka yisokonasye yakulinga yetu. Mpaka kutukamucisyesoni kuti tukwanilisye yakulinga yetu. (2 Timoteo 2:22) Kusala mwakata, tutendeje yosope mwakulongosoka.
Aliŵicileje malile pa yindu, soni atendeje yakwakamucisya kuti yindu yambone yikasawusyaga kutenda
AMPAKA ATENDE
-
Aliŵicileje malile pa yindu. Mwambone, naga akusaka kuleka kulya mnope suga, alinjeje kum’ŵika pamalo pakusisika. Patandite kumkumbila mnope, mpaka agweje ulesi kuti akatande kumsosasosa.
-
Atendeje yakwakamucisya kuti yindu yambone yikasawusyaga kuyitenda. Mwambone, naga akuganisya yakuti awutuceje kundaŵi kulikose pakusaka kulimbisya cilu, aŵiceje pambone yakuwala yakuwutucilayo. Kutenda yeleyi ndaŵi syosope mpaka kwakamucisye kuti asyoŵelele.
-
Akoleje acimjawo ŵambone. Ŵanduwe tukusajigalila ndamo sya acimjetu. (1 Akolinto 15:33) M’yoyo, akakungulukaga mnope ni ŵandu ŵakwete ndamo syakusaka wawojo kuleka, nambo akunguluceje mnope ni ŵandu ŵampaka ŵalimbikasye kola ndamo syambone.
