Kuŵa Paunasi ni Mlungu
Mpela mwatwalijiganyichisye mungani jandanda m’kopeji, ŵandu ŵajinji akusajiwona Baibulo kuti jili buku jeswela. Jemanjaji akusayiwona kuti pakujiŵalanga soni kukamulichisya masengo jajikusasala, akusalipikana kuti ali ŵakuŵandikana mnope ni Mlungu soni akusapikanichisya chakulinga cha umi wawo.
Baibulo jikusasala kuti ŵandu ‘ŵausimu’ kapena ŵakusasamala ya unasi wawo ni Mlungu ali ŵandu ŵakusachimbichisya nganisyo sya Mlungu soni kutenda yindu mwakamulana ni malamusi gakwe. Mwakulekangana ni yeleyi, ŵandu ŵangasaka kuti Mlungu ŵalongoleleje, akusadalila nganisyo syawo, soni akusagambaga kuya yakumbila ya mtima wawo.—Yuda 18, 19; Aefeso 5:1.
CHEMBECHEYO
CHIWUNDO CHA M’BAIBULO: “Naga ukwasa mtima pati usimene ni yisawusyo, ni kuti ugwejo machili gakwe gakunandipa.”—Misyungu 24:10.
ANA YELEYI YIKUGOPOLELA CHICHI?: Kutenguka mpaka kujonanje machili getu gakulimbana ni yakusawusya yetu. Nambo chembecheyo chikusatulimbikasya kuti tukawujila munyuma. Naga tukwete chembecheyo, tukusamanyilila kuti yakusawusya yetu yili yakandaŵi soni tukusalijiganya yindu yambone kutyochela muyakusawusyayo.
YATUKUSOSEKWA KUTENDA: Tulinjeje kuganichisya yindu yambone yachiyitendekwe msogolo. Atamose kuti mpaka tusachilileje kuti yindu yitujendeleje chenene soni nikutendaga yindu mwakamulana ni yakulinga yetu, nambope tukaliŵalila kuti “yakutendekwa yangayijembecela” yikusiyatendechela wosope. (Jwakulalicila 9:11) Kusala yisyene atamose yili myoyo, ndaŵi syejinji yindu yikusatujendelaga chenene kulekangana ni mwatukwembecheya. Pakusaka kusala yeleyi, Baibulo jikusakamulichisya masengo chisyasyo cha namalima kuti, “Mpande mbeju syenu kundaŵi, nipo mkamuleje masengo mpaka ligulo. Pakutipo ngamkumanyilila kuti timchipata chichi, ana mbeju aji kapena ajo? Mwine soni mbeju siŵilisyo komboleka kutenda chenene.”—Jwakulalicila 11:6.
KWANGA KWA YIWUSYO YAKUSOSEKWA MNOPE YAKWAYANA NI UMI
CHIWUNDO CHA M’BAIBULO: “Ambe lunda lwakupikanichisya . . . Maloŵe gawo gali gakuwonawonape.”—Salimo 119:144, 160.
ANA YELEYI YIKUGOPOLELA CHICHI?: Baibulo jikusajanga yiwusyo yakusawusya mundu jwalijose. Mwachisyasyo, jikusajanga yiwusyo mpela ayi
-
Ana ŵanduwe twatyochele kwapi?
-
Ligongo cici twapali?
-
Ana chichi chachikusatendekwa mundu pawile?
-
Ana umi ni uwuwupe basi?
Ŵandu ŵajinji pachilambopa yindu yikwajendela chenene paumi wawo ligongo lyakupata kwanga kwa yiwusyoyi soni yine kutyochela m’Baibulo.
YATUKUSOSEKWA KUTENDA: Awungunye yajikusajiganya Baibulo. Mpaka ŵaŵende ŵa Mboni sya Yehofa kuti ŵakamuchisye kujipikanichisya Baibulo. Ajinjile pa webusayiti jetu ja jw.org, kapena atende nawo umo mwa misongano jetu jajili jalulele soni jikusatendekwa wiki jilijose.
YIWUNDO YINE YA M’BAIBULO
Alolele fidiyo jakuti Ligongo Cici Tukusosekwa kulijiganya Baibulo? Jajikusimanikwa pa jw.org. jikusimanikwa m’yiŵecheto yakupunda 880
TUMANYILILEJE YAKUSOSECHELA YETU YAUSIMU.
“Ŵakusangalala ali ŵandu ŵakusamanyilila yakusosecela yawo yausimu.”—MATEYU 5:3, NW.
TULIJIGANYEJE YEJINJI PAKWAMBA YA MLUNGU M’BAIBULO.
“Msoseje jwalakwe [Mlungu] . . . nikumsimana . . . Mlungu nganaŵa kose pakutalika ni jwalijose mwa jwetuwe.”—MASENGO 17:27.
TUŴALANJEJE NI KUGANICHISYA UTENGA WA M’BAIBULO.
“Akusimana lukondwa pakugapikanila malamusi ga Ambuje, ni akugaganichisya malamusigo musi ni chilo. . . . Jwelejo akusapunda mu yosope yakutenda.”—SALIMO 1:2, 3.
You May Also Like
SANJA JA MLONDA
Ana Baibulo Mpaka Jingamucisye Wuli?
Baibulo jili buku jakalakala nambo mpaka jitukamucisye masiku agano.
