YEHOFA ŵamanyilile kuti Juŵamnonyelaga mnope cacisimana ni yipwetesi, soni lisiku line caciwa. Kulocesya kwakukusimanikwa pa Genesis 3:15 kwalosisye yeleyi. Ana Mlungu akalosisye catuli kuti ciwa ca juŵamnonyelagaju caliji cakupweteka kwa jwalakwe? Baibulo jikutulosya yeleyi mwakutusalila yiyatendekwe kwa mundu jwine ni mwanagwe jwamlume. Mlungu ŵamsalile Abulahamu kuti ampelece mbopesi Isaki, juŵaliji mwanace jwakwe.

Abulahamu ŵakwete cikulupi cekulungwa mnope. Akumbucile kuti Mlungu ŵamsalile Abulahamu kuti Mkulupusyo, kapena Mbeju jila, jaliji jakuti jipagwe kutyocela mu yisukulu ya Isaki. Abulahamu pakumpikanila Mlungu ŵakundile kumpeleka mwanace jwakwe mbopesi, ligongo ŵakulupililaga kuti Mlungu akakombolece kumjimusya Isaki ku ciwa, naga yikaŵe yakusosekwa. Nambo lilayika lya Mlungu lyamlekasisye Abulahamu mkanam’wulaje mwanacejo. Pakum’yamicila Abulahamu ligongo lyakupikanila maloŵe gakuti apelece mwanace jwakwe mbopesi, Mlungu ŵawilisye kumsalila cilanga ciŵatesile najo nangolo jwakulupicikaju.

Panyuma pakwe, Isaki ŵakwete ŵanace ŵaŵili ŵacalume, Esawu ni Yakobo (Yakubu). Yakobo ŵayamicilaga yindu yausimu, kulekangana ni Esawu, ni ŵapatile upile. Mlungu ŵasindile lina lya Yakobo kuti liŵe Isalayeli, soni ŵanace 12 ŵa Isalayeliju ŵaŵele acinangolo ŵa lukosyo lwa Ayisalayeli. Nambo ana liŵasa lyeleli lyaŵele catuli mtundu wekulungwa?

Ŵanace ŵajinji ŵa Yakobo paŵatandite kuŵengana ni Yusufu mpwawo, yindu yejinji yatendece. Ŵamsumisye kuti aŵe kapolo, soni ŵaŵamsumilewo ŵapite najo ku Eguputo. Nambo Mlungu ŵampele upile mcanda jwakulupicika ni jwakulimba mtimaju. Atamose kuti Yusufu ŵasimene ni yipwetesi yekulungwa mnope, Falawo juŵaliji Jwakulamulila jwa ku Eguputo, ŵamsagwile ni kumpa ulamusi wekulungwa. Yeleyi yatendekwe pandaŵi jambone, ligongo pajapali sala, Yakobo ŵatumisye ŵane mwa ŵanace ŵakwe kukusuma yakulya ku Eguputo, ni ndaŵi jeleji Yusufu ni juŵaliji mkulolela yakulya yosope! Paŵamanyigene mwangajembeceya ni acanasi ŵakwe ŵaŵaliji ali apitikwice mtima, Yusufu ŵalinganyisye yakuti liŵasa lyosope lisamile ku Eguputo. Ŵapele malo gambone gakutama, ni mtundu wawowo wakusile, soni yindu yajendelaga cenene. Yusufu ŵayiweni kuti Mlungu ŵajendesye yindu yosopeyi kuti yiŵaŵecete yitendekwe.

Yakobo juŵaliji ali akalambele, ŵamalile yaka yakwe yine yosope ali ku Eguputo ni liŵasa lyakwe lilyaliji mkukula. Ali asigele panandi kuwa, ŵalocesye kuti Mbeju jila, kapena kuti Mkulupusyo, caciŵa Jwakulamulila jwamacili, soni cacipagwila mu lukosyo lwa Yuda mwanace jwakwe. Yaka yejinji panyuma pakwe, Yusufu mkanawe ŵalocesye kuti lisiku line Mlungu cacikoposya yisukulu ya Yakobo mu Eguputo.

—Nganiji jityocele mu Genesis macaputala 20 mpaka 50; Ahebeli 11:17-22.