MTWE 18
Ana Mbiya Syakamucisya Pamasengo ga Ucimwene Sikusatyocela Kwapi?
1, 2. (a) Ana M’bale Russell, ŵamjanjile camtuli m’busa juŵasakaga kumanyilila yakusatenda Ŵakulijiganya Baibulo kuti masengo gawo gajendeje cenene? (b) Ana mu mtwe awuno citukambilane cici?
NDAŴI JINE, m’busa jwa calici cine (Reformed Church) jwapite kwa M’bale Charles T. Russel. Jwalakwe jwasakaga kumanyilila yakusatenda Ŵakulijiganya Baibulo kuti masengo gawo gajendeje cenene.
M’bale Russell jwatite, “Ngatukusasonjesya mbiya.”
M’busa jula jwawusisye kuti, “Sambano mbiya akusasipata camtuli?”
M’bale Russell jwajanjile kuti, “Atamose ndili namsalile yisyesyene yakwe panganiji nganimŵa mkulupilile. Ŵandu ŵalung’wanu payice kumisongano jetu akusasimonga ligongo ngatukusajendesya mbale jakusonjesya mbiya. Nambo payice akusayiwona yindu ya mbiya syejinji. Ni akusasimonga kuti, ‘Nyumbaji kuti jitaŵidwe papite mbiya syejinji. . . Ana mpaka ngamucisye ni mbiya silingwa pamasengoga?’”
M’bale Russell paŵaŵecete yeleyi, m’busajo nganapikanicisya.
M’bale Russell jwapitilisye kuti, “Nditu yangumsalilayi ni yisyesyene yakwe, ŵandu akusambusya ciwusyoci. Mwamti jwalijose payiweni kuti Mlungu akumjaliwa soni akwete mbiya, akusasaka kamulicisya masengo mbiyasyo pakwatumicila Ambuje. Naga nganakola mbiya, pangali ligongo lyakumkanganicisya kuti apelece.” a
2 Kusala yisyene M’bale Russell jwasalaga “yisyesyene yakwe” panganiji. Ŵandu ŵa Mlungu aŵele mkukamucisya kulambila kusyesyene mwakupeleka yakupeleka ya ufulu. Mumtwe awuno, citukambilane yisyasyo yine ya m’Malemba soni ya masiku agano panganiji. Patukulijiganya yalikusatenda likuga kuti lipate mbiya syakamucisya pamasengo ga Ucimwene, jwalijose akusosekwa kuliwusyaga kuti, ‘Ana mpaka ndende cici pakamucisya nawo masengo ga Ucimwene?’
“Jwalijose Jwakwete Mtima Wakusaka Kupeleka . . . Ayice Nayo Yakupeleka”
3, 4. (a) Ana Yehofa akusakulupilila kuti ŵakulambila ŵakwe mpaka akombole kutenda cici? (b) Ana Aisalaeli ŵatesile yamtuli pakamucisya nawo masengo gakutaŵa citenti cakulambilila?
3 Yehofa akusiŵakulupililaga ŵakulambila ŵakwe ŵasyesyene. Akusakulupilila kuti naga ŵapele upile wakutenda masengo gane gakwe, mpaka asangalale kupeleka yakupeleka ya ufulu pakamucisya masengogo. Kwende tulole yisyasyo yiŵili ya mundaŵi ja Aisalaeli.
4 Panyuma pakwakoposya Aisalaeli mu Iguputo, Yehofa ŵasalile kuti ataŵe citenti cakulambilila. Kuti citentici citaŵidwe pasosekwaga yindu yejinji pamasengogo. Yehofa jwamsalile Mose kuti ŵape ŵandu upile wakamucisya masengoga. Jwalakwe jwatite, “Jwalijose jwakwete mtima wakusaka kupeleka kwa une [Yehofa], ayice nayo yakupeleka.” (Eks. 35:5) Ana ŵandu ŵele ŵaliji ali agambile kuleka kwene ‘kukamula masengo gamakulungwa mwa ngalwe ni mwa ukapolo,’ ŵatesile yamtuli? (Eks. 1:14) Aisalaeli ŵalipelece mnope pamasengoga. Mwakusacilila ŵapelece golidi, silifa, soni yindu yine ya mtengo wapenani yaŵayipatile kutyocela ku Iguputo. (Eks. 12:35, 36) Jemanjaji ŵapelece yindu yejinji kupunda yindu yayasosecelaga, mwamti mpaka ŵalekasisye “kwika ni yakupeleka.”—Eks. 36:4-7.
5. Ana Aisalaeli ŵatesile yamtuli Daudi ali ŵaŵendile kuti akamucisye nawo pamasengo gakutaŵa nyumba jakulambilila?
5 Pali pamasile yaka 475, Daudi jwapelece ‘cipanje cakwe’ pakamucisya masengo gakutaŵa nyumba jakulambilila. Nyumbaji jaliji malo gandanda gakulambilila kweswela pacilambo capasi. Kaneko jwapele Aisalaeli acimjakwe upile wakuti apelece yakwete pakamucisya masengoga. Jwalakwe ŵaŵendile kuti, “Ŵani ŵatasapule mwalisosa kapena kuti mwakusaka kwakwe yindu yakwe, ni kuyipeleka kwa Ambuje?” Ŵanduwo paŵapikene yeleyi, “ŵapelece mwakusosa kwawo kwa Ambuje.” (1 Mbi. 29:3-9) Daudi pakumanyilila kuti yakupelekayi yatyocele kwa Yehofa, jwapopesile kuti, “Yosopeyi yili mtuka wakutyocela kwa wawo nipo uwe tupelece soni yele yayili ya wawo Ambuje.”—1 Mbi. 29:14.
6. (a) Ana ligongo cici masiku aganosoni pakusasosekwa mbiya kuti masengo ga Ucimwene gajendeje cenene? (b) Ana panganiji mpaka papagwe yiwusyo yamtuli?
6 Mose soni Daudi nganiŵakanganicisya ŵandu ŵa Mlungu kuti apelece yakupeleka. M’malo mwakwe ŵanduwo ŵapelekaga mwakusaka kwawo kutyocela pasi pamtima. Nambi wuli masiku agano? Tukumanyilila kuti masengo ga Ucimwene kuti gajendeje cenene pakusasosekwa mbiya. Pakusasosekwa yindu yakudula kuti tupanganye soni kuwandisya Mabaibulo nambosoni mabuku. Kuti tutaŵe kapena kulinganyasoni malo gakulambilila soni ofesi sya nyambi pakusasosekwa yindu yejinji. Nambosoni kuti tupelece cikamucisyo pandaŵi jajitendekwe ngosi ja m’cipago pakusasosekwasoni mbiya. Ligongo lya yinduyi, mpaka papagwe ciwusyo cakuti, Ana mbiya syakamucisya pamasengoga tukusasipata mwamtuli? Ana ŵakumkuya ŵa Yesu akusasosekwa kwakanganicisya kuti apeleceje yakupeleka?
“Ngasituŵenda Mbiya Kapena Kwacondelela Ŵandu Kuti Akamucisye”
7, 8. Ana ligongo cici ŵandu ŵa Yehofa ngakusaŵenda soni kwacondelela ŵandu kuti ŵapeje mbiya?
7 M’bale Russell ni acimjakwe nganasonjesyaga mbiya mpela mwaŵatendelaga ŵa dini sine. Mu Sanja ja Mlonda jaŵili kopoka, pamtwe waŵili wakuti, “Ana akusaka magasini ja ‘Zion’s Watch Tower’?” M’bale Russell jwasasile kuti, “Tukulupilila kuti jwakutukamucisya kuti tukoposyeje magasini ja Zion’s Watch Tower ali YEHOFA. Paligongo lyeleli ngasituŵenda mbiya kapena kwacondelela ŵandu kuti akamucisye. Yehofa akusasala kuti, ‘Silifa ni golide yosope yili yakwe.’ M’yoyo, pacacileka kutukamucisya pamasengoga tucimanyilila kuti ndaŵi jakuti tulece masengoga jikwanile.” (Hag. 2:7-9) Apano pamasile yaka yakupunda 130 nambope likuga likupitilisyape kwawula pasogolo soni kuwandisya Sanja ja Mlonda.
8 Ŵandu ŵa Yehofa ngakusaŵenda mbiya. Ngakusajendesya mbale kapena kwalembela ŵandu yikalata yakuŵenda mbiya. Ngakusatenda nawo maseŵela, malonda soni mipikasano kuti apateje mbiya. Mpaka apano akusatenda yindu mwakamulana ni maloŵe ga mu Sanja ja Mlonda jajakopwece yaka yejinji munyumamo. Nsanjaji jasasile kuti, “Nganikuŵa kwakuŵajilwa kuti tuŵendeje mbiya syakamucisya pamasengo ga Ambuje mpela mwasikusatendela dini sine . . . Tukuyiwona kuti kupata mbiya syakamucisya pamasengo ga Ambuje kupitila m’matala gelega kuli kulemwa soni yangakundidwa. Nambosoni kutenda yeleyi kwangayikasya majali kwa ŵandu ŵakupelekawo kapena pamasengogo.” b
“Jwalijose Apelece Mwakusacilila Mpela Yiŵatite Paganisya mu Mtima Mwakwe”
9, 10. Ana ligongo limpepe lyapi lyalikusatutendekasya kuti tupeleceje yakupeleka ya ufulu?
9 Mpela ŵandu ŵakulamulidwa ni Ucimwene wa Mlungu, ngatukusosekwa kuti tupeleceje yakupeleka mwakutukanganicisya. M’malo mwakwe, tukusasosekwa kupeleka mbiya soni yindu yakamucisya pamasengo ga Ucimwene mwakusangalala. Ana ligongo cici tukusosekwa kuŵa ŵakusacilila kupeleka yakupeleka? Kwende tulole magongo gatatu.
10 Candanda, tukusapeleka yakupeleka mwakusaka kwetu ligongo tukusamnonyela Yehofa soni tukusasaka ‘kutenda yakumsangalasya.’ (1 Yoh. 3:22) Kusala yisyene, Yehofa akusasangalala ni ŵakulambila ŵakwe ŵakusapeleka mwakusaka kwawo kutyocela pasi pamtima. Sambano kwende tulole maloŵe ga Paulo panganiji. (Aŵalanje 2 Akolinto 9:7.) Mklistu jusyesyene ngakusapeleka mwakudandawula kapena mwakumkanganicisya. Mmalo mwakwe jwalakwe akusapeleka mwakusacilila mwakamulana ni “yiŵatite pakuganisya kapena kuti kusimicisya mu mtima mwakwe.” c Yeleyi yikugopolela kuti jwalakwe akusaganicisya kaje cikamucisyo cacikusosecela ni kulola mwampaka atendele pakamucisya. Yehofa akusasangalala ni mundu jwamti m’yoyo ligongo lyakuti “Mlungu akusamnonyela mundu jwakupeleka mwakusangalala.” Baibulo jine palilembali jatite, “Mlungu akusiŵanonyela ŵandu ŵakusanonyela kupeleka.”
Ŵanace ŵa ku Mozambique nombe nawo akusanonyela kuponya mbiya mu libokosi lya yakupeleka
11. Ana cici cacikusatutendekasya kuti tumpeje Yehofa mtuka wambone?
11 Caŵili, tukusapeleka yakupeleka pakulosya kuyamicila Yehofa ligongo lya majali gejinji gatupele. Kwende tulole ciwundo cine ca mu Cilamusi ca Mose campaka citukamucisye pakuwungunya mtima wetu. (Aŵalanje Detulonomo 16:16, 17.) Pa yisangalalo yitatu yapacaka, jwamlume jwalijose jwa Ciyisalayeli jwapelekaga mtuka “mwakulandana ni mwapelecele upile Ambuje Mlungu” kwa jwele mundujo. Mkanajawule ku cisangalaloci, jwamlume jwalijose jwasosekwaga kulola yatite Yehofa pakumjaliwa soni kuwungunya mtima wakwe kaneko ni kulola mtuka wambone wampaka akapelece. Mwakulandana ni yeleyi, m’wejisoni mpaka tuganicisye yatite Yehofa pakutujaliwa. Yeleyi mpaka yitulimbikasye kuti tupeleceje mtuka wambone kwa jwalakwejo. Mtuka wetu watukusapeleka kutyocela pasi pamtima, kupwatikapo yindu yakucilu, yikusalosya kuyamicila kwetu Yehofa pamajali gatupele.—2 Akoli. 8:12-15.
12, 13. (a) Ana yakupeleka yetu yikusalosya mwamtuli kuti tukusamnonyela Mwenye jwetu? (b) Ana jwalijose akusasosekwa kupeleka mwamtuli?
12 Catatu, yakupeleka yetu yikusalosya kuti tukusamnonyela Mwenye jwetu Yesu Klistu. Mwamtuli? Alole yaŵasalile Yesu ŵakulijiganya ŵakwe pacilo cakumalisya ca umi wakwe wa pacilambo capasi. (Aŵalanje Yohane 14:23.) Jwalakwe jwatite, “Jwakunonyela une taciyitenda yindu yinamlamwile kuti ayitende.” “Yindu” yaŵalamwile Yesu yikupwatikapo lilamusi lyakuti, tulalicileje ngani syambone syakwamba Ucimwene wa Mlungu pacilambo cosope capasi. (Mat. 24:14; 28:19, 20) Tukusatendasoni “yindu” yaŵalamwile Yesu patukutenda yiliyose yampaka tukombole. Tukusatenda yeleyi pakamulicisya masengo ndaŵi jetu, macili getu, soni cipanje cetu pakwawusya pasogolo masengo gakulalicila ya Ucimwene. Patukutenda yeleyi tukusalosya kuti tukusamnonyela Mwenye jwetu jwa Umesiya.
13 Mpela ŵandu ŵakulupicika ŵatuli pasi pa Ucimwene wa Mlungu, mwakutyocela pasi pamtima tukusapeleka mbiya pakamucisya nawo masengo ga Ucimwene. Ana tukusatendaga mwamtuli yeleyi? Jwalijose akusasosekwa kulisagulila jika yakutenda. Jwalijose akusapeleka yampaka akombole. Ŵajinji mwa ŵakulupilila acimjetu nganakola yindu yejinji. (Mat. 19:23, 24; Yak. 2:5) Nambope jemanjaji yikusiyalimbikasya pakumanyilila kuti Yehofa soni Mwanace jwakwe, akusayamicila yindu yamnono yakusapeleka kutyocela pasi pamtima.—Mak. 12:41-44.
Matala Gakupelecela Mbiya
14. Kwa yaka yejinji, ana Ŵamboni sya Yehofa aŵele ali mkugaŵila mabuku gawo mwamtuli?
14 Kwa yaka yejinji, ŵandu kuti apate mabuku gakusala ya Baibulo ŵasosekwaga kupeleka mbiya. Nambope mbiya syaŵasosekwaga kuti ŵanduwo apelece syaliji syamnono mwamti ŵakulaga ŵakombolaga kupata mabuku. Atamose yaliji m’yoyo, nambope naga msyenenyumba alosisye lung’wanu nambo nganakola mbiya syakuti apelece, yakombolekaga kumpa bukujo. Cakulinga cekulungwa caliji kupeleka mabukuga kwa ŵandu ŵamitima jambone ŵampaka aŵalanje ni kupindula nago.
15, 16. (a) Ana mu 1990, Likuga Lyakulongolela lyacenjile mwamtuli litala lyakagaŵile ketu ka mabuku? (b) Ana mundu akusapeleka mwamtuli yakupeleka ya ufulu? (Alolesoni libokosi lyakuti, “Ana Yakupeleka Yetu Yikusakamula Masengo Gamtuli?”)
15 Kutandila mu caka ca 1990 Likuga Lyakulongolela lyacenjile litala lyakagaŵile ka mabuku getu. Kutandila m’cakaci, mabuku getu gosope ku United States, ŵagaŵilaga mwa cakupeleka ca ufulu. Cikalata cakwawula ku mipingo josope ja m’cilamboci casasile kuti, “Citupeleceje kwalulele magasini soni mabuku kwa ŵakulalicila nambosoni kwa ŵandu ŵalosisye lung’wanu. . . . Jwalijose jwakusaka kupeleka ca ufulu pakamucisya masengoga mpaka apelece mwakusaka kwakwe. Nambope, cinga akwete mbiya kapena nganakola mpaka apocele buku.” Yeleyi yalosisye cenene cakulinga ca masengo getu gakulipeleka soni kuti ‘uwe nganituŵa mpela ŵandu ŵajinji ŵakusatenda malonda ni maloŵe ga Mlungu.’ (2 Akoli. 2:17) Mkupita kwandaŵi kupeleka mabuku mwaluleleku kwatanditesoni kukamula masengo mu nyambi syakulekanganalekangana pacilambo cosope.
16 Ana yakupeleka mwa ufuluyi yikusatendekwa mwamtuli? Mu Nyumba sya Ucimwene sya Mboni sya Yehofa akusaŵika mabokosi gakuponya yakupeleka mwa ufulu pamalo gambone. Mundu mpaka akamulicisye masengo mabokosi gelega pakuponya yakupeleka. Nambosoni mpaka atumisye yakupeleka yakwe ku ofesi ja nyambi pakamulicisya masengo litala lyakuŵajilwa lyakusakamulicisya masengo Ŵamboni sya Yehofa. Caka cilicose mu Sanja ja Mlonda akusalemba ngani jakusala mwampaka tupelecele yakupelekayi.
Ana Mbiyasi Sikusakamula Masengo Mwamtuli?
17-19. Alondesye mwasikusakamulila masengo mbiya syatukusapeleka mwa ufulu (a) pamasengo ga kulalicila ga pacilambo cosope, (b) pamasengo gakutaŵa Nyumba sya Ucimwene pacilambo cosope (c) pa yakusosecela ya pampingo.
17 Masengo ga pacilambo cosope. Mbiyasi sikusakamucisya pamasengo gakulalicila ga pacilambo cosope. Mbiyasi akusasikamulicisya masengo pakupanganya mabuku, kutaŵa ni kulinganyasoni ofesi sya nyambi soni nyumba sya Beteli. Nambosoni sikusakamucisya pasukulu syakwiganya ya Mlungu. Kupwatika pa yeleyi mbiyasi akusasikamulicisya masengo pakwakamucisya amishonale, ŵakulolela mikuli, soni apayiniya ŵapajika. Yakupeleka yetu yikusakamucisyasoni ŵakulupilila acimjetu pandaŵi jajitendekwe ngosi ja m’cipago. d
18 Kutaŵidwa kwa Nyumba sya Ucimwene pacilambo cosope. Mbiyasi sikusakamula masengo pakujikamucisya mipingo kuti jitaŵe kapena kulinganya Nyumba sya Ucimwene. Mipingo pajikupitilisya kupeleka mbiyasi yikusakamucisya mipingo jine kuti jitaŵeje soni kulinganya Nyumba sya Ucimwene. e
19 Yindu yakusosecela pampingo. Mbiya sya mu libokosi lya mpingo sikusakamula masengo pakulipilila yindu yine soni kulinganyicisya Nyumba ja Ucimwene kuti jipitilisye kuwoneka cenene. Acakulungwa ŵa mumpingo mpaka asagule yakuti mbiya sine asitumisye ku ofesi ja nyambi kuti sikakamucisye pamasengo ga pacilambo cosope. Nambo mkanatumisye mbiyasi akusawusalila kaje mpingo kuti ujiticisye. Pawujiticisye mpingo, mbiyasyo akusasitumisya. M’bale jwakusasamalila mbiya sya mpingo akusalemba lipoti lyakusala mwasijendele mbiya mwesi uliwose. Lipotili likusaŵalanjidwa kumpingo.
20. Ana wawojo mpaka amcimbicisye camtuli Yehofa ni “yipanje” yawo?
20 Patukuganicisya yosope yayikusatendekwa pamasengo gakupanganya ŵakulijiganya soni gakulalicila ya Ucimwene pacilambo cosope, tukusaŵa ŵakusacilila ‘kwacimbicisya Ambuje ni yipanje [yetu].’ (Mis. 3:9, 10) Yipanjeyi yikupwatika yindu mpela macili getu, kaganisye ketu, soni ndamo syetu syambone sya Ciklistu. Tukusosekwa kukamulicisya masengo yeleyi mwakwanila pamasengo ga Ucimwene. Tukumbucilejesoni kuti yipanje yetu yikupwatika yindu yetu yakucilu. Kwende tuŵeje ŵakusimicisya kupeleka yampaka tukombole soni pandaŵi jampaka tukombole. Yakupeleka yetu yikusacimbicisya Yehofa soni kulosya kuti tukukamucisya Ucimwene wa Umesiya.
a Sanja ja Mlonda ja July 15, 1915, mapeji 218-219.
b Sanja ja Mlonda ja August 1, 1899, peji 201.
c Jwamlijiganye ya Baibulo jwine jwasasile kuti maloŵe ga Cigiliki gagagopoleledwe kuti “kusimicisya” “gakusasala ya cakulinga.” Jwalakwe jwasasilesoni kuti “Atamose kuti mwacipago mundu akusasangalala ligongo lyakupeleka, nambope akusasosekwa kuganicisya soni kosocela yacapeleceyo.”—1 Akoli. 16:2.
d Kuti amanyilile yejinji pangani ja cikamucisyo pajitendekwe ngosi ja m’cipago, alole mtwe 20 wa bukuji.
e Kuti amanyilile yejinji pangani jakutaŵa Nyumba sya Ucimwene alole mtwe 19 wa bukuji.
