1, 2. (a) Ana ŵakutumicila ŵakulupicika ŵa Yehofa aŵele mkamula masengo gapi mwakusangalala? (b) Ana ni cici cakusaciwonaga Yehofa kuŵa cakusosekwa mnope?

 ŴAKUTUMICILA ŵakulupicika ŵa Yehofa, aŵele mkukamula masengo ga yakutaŵataŵa mwakusangalala. Masengoga gakusacimbicisya lina lya Mlungu. Mwacisyasyo, Aisalaeli mwakusacilila ŵajigele nawo mbali pamasengo gakutaŵa citenti cakulambilila. Ŵatesile yeleyi mwakupeleka yindu yakamucisya pamasengoga mwakoloŵa magasa.—Eks. 35:30-35; 36:1, 4-7.

² Yehofa ngakusayiwonaga yakutaŵataŵa kuti ni yampaka yiyikasyepe Ucimbicimbi kwa jwalakwe. Yeleyi yikulosya kuti yinduyi pajika nganiyiŵa yakusosekwa mnope kwa jwalakwe. (Mat. 23:16, 17) Yakusayiwonaga Yehofa kuti yili yakusosekwa mnope, yili kumlambila jwalakwe, soni msimu wakusacilila wakusalosyaga ŵakutumicila ŵakwe soni kulipeleka kwawo pamasengo. (Eks. 35:21; Mak. 12:41-44; 1 Tim. 6: 17-19) Yeleyi yili yisyene, ligongo lyakuti yakutaŵataŵayi mkupita kwandaŵi yikusamala. Mwacisyasyo, citenti nambosoni nyumba jakulambilila yaŵataŵile Aisalaeli apano kwangali. Nambo Yehofa nganaliŵalila koloŵa magasa soni masengo gamacili gaŵakamwile ŵakutumicila ŵakwe ŵakulupicika pamasengo gakutaŵa yinduyi.—Aŵalanje 1 Akolinto 15:58; Ahebeli 6:10.

3. Ana mtwe awuno citukambilane cici?

³ Nombe nawo ŵakutumicila ŵa Yehofa ŵa masiku agano, aŵele ali mkukamula masengo mwakulimbicila pakutaŵa malo gakulambilila. Kusala yisyene yatutesile pamasengo ga yakutaŵataŵa mwakulongoleledwa ni Mwenye jwetu Yesu Klistu yili yangaliŵalicika. Yeleyi yikulosya kuti Yehofa ajaliwe kulimbicila kwetu. (Sal. 127:1) Mu mtwe awuno citukambilane gane mwa masengo ga yakutaŵataŵa soni yagatite kuyikasya ucimbicimbi kwa Yehofa. Citulolesoni yaŵecete Abale ŵane ŵakamwile masengoga.

4. (a) Ligongo cici tukusosekwa kukola malo gejinji gakulambilila? (b) Ligongo cici maofesi ga nyambi gane ŵagapwatikenye? (Alole libokosi lyakuti, “Kutaŵa Ofesi ja Nyambi Mwakamulana ni Mwayiŵelele Yindu.”)

⁴ Mpela mutwayiwonele mu Mtwe 16, Yehofa akusasakaga kuti tumlambileje. (Aheb. 10:25) Misongano jetu jikusalimbisya cikulupi cetu, nambosoni jikusatukamucisya kola mtima wakulipeleka pamasengo ga kulalicila. Yehofa akutendekasya kuti masengoga gajendeje mwacitema m’masiku gambesi gano. Yakuyicisya yakwe yili yakuti, ŵandu ŵajinji akwika mu likuga lya Mlungu caka cilicose. (Yes. 60:22) Ciŵalanjilo ca ŵandu ŵali pasi pa Ucimwene pacikukwela,  nombe ciŵalanjilo ca maofesi gakulinganyicisya mabuku cikukwelasoni. Tukusosekwasoni malo gejinji gakulambilila.

5. Ligongo cici lina lyakuti Nyumba ja Ucimwene lili lyakuŵajilwa? (Alole libokosi lyakuti, “Calici Cakuŵala Kwasambano.”)

⁵ Kundanda kwa mbili ja ŵandu ŵa Yehofa ŵa masiku agano, Ŵakulijiganya Baibulo ŵatandite kukuwona kusosekwa kwakola nyumba jakulambilila. Yikuwoneka kuti, malo gandanda kutaŵidwa gakutendela misongano galiji ku West Virginia, m’cilambo ca United States. Maloga ŵagataŵile m’caka ca 1890. Pakwika ca m’ma 1930, ŵandu ŵa Yehofa ŵaliji ali ataŵile kapena kulinganya nyumba syakulambilila syejinji. Nambo nyumbasi ŵaliji mkanasipe lina lyakusimanyikasya. Mu 1935, M’bale Rutherford jwajendele malo gakulambilila gagataŵidwaga pandawi jaŵataŵaga ofesi ja nyambi ku Hawaii. Ali am’wusisye kuti ana nyumbaji cijikolanjidwe ni linaci, M’bale Rutherford jwatite, “Nguganisya kuti mpaka yiŵe cenene nyumbaji kujikolanga kuti ‘Nyumba ja Ucimwene.’ Ligongo masengo gatukukamula gali kulalicila ya Ucimwene.” (Mat. 24:14) Lina lyakuŵajilwali, lyaŵele lina lya nyumba jakulambilila ja Mboni sya Yehofa pacilambo cosope.

6, 7. Ana kutaŵa Nyumba sya Ucimwene mwacitema kukamucisye camtuli?

 ⁶ Pakwikaga ca m’ma 1970, pasosekwaga Nyumba sya Ucimwene syejinji. M’yoyo, Abale m’cilambo ca United States, ŵatandisye litala lyangasawusya pakutaŵa Nyumba sya Ucimwene syakutesya lung’wanu soni syakusalala. Litalali lyakamucisyaga kuti nyumbasi sitaŵidweje kwa masiku gamnono. Pacayikaga caka ca 1983, Nyumba sya Ucimwene ciŵandika 200 syaliji sili sitaŵidwe ku United States ni ku Canada. Kuti masengoga gakombolece, abale ŵalinganyisye makomiti gakutaŵa gaupande. Litala lyeleli lyaliji lyakamucisya, mwamti mu 1986, Likuga Lyakulongolela lyajiticisye yakutamilikasya makomitiga. Mu caka ca 1987, ciŵalanjilo ca ma Komiti Gakutaŵa Gaupande cakwanile 60 m’cilambo ca United States. a Mu 1992, makomitiga ŵaliji ali agatamilikasisye m’yilambo mpela Argentina, Australia, France, Germany, Japan, Mexico, South Africa, soni Spain. Kusala yisyene, abale ŵakusakamula masengo gakutaŵa Nyumba sya Ucimwene soni Malo ga Misongano, akusasosekwa cikamucisyo cetu. Tukuŵeceta yeleyi ligongo lyakuti masengo gakusatendaga jemanjaji gali mbali ja undumetume wapajika.

⁷ Kutaŵa Nyumba sya Ucimwene mwacitema, kupelece umboni wamacili kwa ŵandu ŵali mumkuli wasitaŵidwe nyumbasi. Mwacisyasyo, nyusipepala ja ku Spain jakwete mtwe wakuti “Cikulupi Cikusatukusya Matumbi.” Pakuŵicila ndemanga pamasengo gakutaŵa Nyumba sya Ucimwene m’tawuni ja Martos, nyusipepalaji jakwete ciwusyo cakuti, “M’cilambo ca ŵandu ŵakulinonyelaci, ana yikombolece uli kuti ŵandu alipelece kutyocela m’maupande gakulekanganalekangana [ga mu Spain] ni kwawula m’tawuni ja Martos  kuti akataŵe nyumba jakuwoneka cenene mwacitema soni mwakulondeka m’yiyi?” Pakwanga ciwusyoci, nyusipepalaji jakamwile maloŵe ga m’bale jwine juŵakamulaga nawo masengoga mwakulipeleka. Maloŵe gakwe galiji gakuti, “Masengoga gakombolece ligongo lyakuti tukusajiganyidwaga ni Yehofa.”

8. Ana Likuga Lyakulongolela lyajiticisye pologalamu jamtuli mu 1999, soni ligongo cici?

⁸ Patwaŵandicilaga m’yaka ya m’ma 1900, ŵandu ŵajinji ŵa m’yilambo yakulaga ŵajinjile m’likuga lya Yehofa. Abale m’yilamboyi ŵalinjililaga kutenda yampaka akombole pakutaŵa nyumba sya kulambilila. Ligongo lyakulaga, Nyumba sya Ucimwene syaŵataŵaga abaleŵa syaliji syangawoneka cenene pakulandanya ni yalici ya dini sine. M’yoyo ŵapililaga ni yaŵatendaga ŵandu ŵa dini sine pakwaseka soni kwanyosya. Nambo kutandila mu 1999, Likuga Lyakulongolela lyajiticisye pologalamu jakutaŵa Nyumba sya Ucimwene m’yilambo yakulaga. Yakupeleka yakutyocela m’yilambo yakusicila yakamucisye kuti paŵe “kulandana” pangani ja malo gakulambilila. (Aŵalanje 2 Akolinto 8:13-15.) Konjecesya pelepa abale soni alongo ŵakutyocela mu yilambo yine, ŵalipelece kuti akamucisye nawo masengoga.

9. Ana ni masengo gapi gagawonece kuŵa gakusawusya, soni gakwete yakuyicisya yamtuli?

⁹ Pandanda, masengoga gawonekaga kuŵa gakusawusya. Lipoti lya mu 2001, lyalosisye kuti Nyumba sya Ucimwene syakupunda 18,300 syasosekwaga kutaŵidwa m’yilambo yakulaga 88. Nambo ni cikamucisyo ca msimu wa Mlungu soni Mwenye jwetu Yesu Klistu, pangali masengo gampaka galepecekwe. (Mat. 19:26) M’yoyo kutyocela mu 1999 kwika mu 2013, kupitila mu pologalamuji,  ŵandu ŵa Mlungu ŵakombwele kutaŵa Nyumba sya Ucimwene 26,849. b Yehofa akupitilisya kujaliwa masengo gakulalicila, mwamti pakwika m’caka ca 2013, pasosekwagasoni Nyumba sya Ucimwene sine 6,500 m’yilamboyi. Nambosoni apano, pakusosekwa Nyumba sya Ucimwene syejinji caka cilicose.

10-12. Ana masengo gakutaŵa Nyumba sya Ucimwene gatendekasisye camtuli kuti lina lya Yehofa licimbicikwe?

¹⁰ Ana masengo gakutaŵa Nyumba sya Ucimwenega gacimbicisye mwamtuli lina lya Yehofa? Lipoti lyakutyocela ku ofesi ja nyambi ja ku Zimbabwe lyatite, “Nyumba ja Ucimwene pajimasile kutaŵidwa, ciŵalanjilo ca ŵakusongana cikusatupaga kuwilisya maulendo gaŵili mkati mwa mwesi umo.” Mu yilambo yejinji, ŵandu ŵajinji akusakola lung’ŵanu lwakusongana ni Ŵamboni sya Yehofa panyuma pakuti Nyumba ja Ucimwene jambone jitaŵidwe. M’yoyo panyuma pakuti Nyumba ja Ucimwene jitaŵidwe, ŵandu ŵakusongana m’nyumbajo akusatupa mnope mwamti pakusasosekwasoni jine. Nambope, ngaŵa kusalala kwa nyumbasi ni kwakukusikwatendekasya ŵandu kuti ayice mu likuga lya Yehofa. Ŵanduŵa akusatenda lung’wanu ni cinonyelo cakusalosya abale ni alongo pakukamula masengoga. Kwende tukambilane yisyasyo yakuŵalanjika pa nganiji.

¹¹ Indonesia. Mundu jwine m’cilamboci, ali amanyilile kuti ŵandu ŵaŵakamulaga masengo gakutaŵa Nyumba ja Ucimwene ŵagambile kulipeleka, jwatite, “Jemanja mli ŵandu ŵakusimonjesya kwabasi. Nayiweni kuti mkukamula masengo ni mtima wosope soni mwakusangalala, nambo citamileco ngamkupocela malipilo galigose. Nguganisya kuti pangali dini jilijose jampaka jitende yindu mwakulandana ni jemanja.”

¹² Ukraine. Jwamkongwe jwine jujwakangalaga kupita pamalo gaŵataŵaga Nyumba ja Ucimwene, jwamanyilile kuti ŵanduwo ŵaliji Ŵamboni sya Yehofa soni kuti nyumba jaŵataŵagajo jiciŵa Nyumba ja Ucimwene. Jwalakwe jwatite, “Napikene yakwamba ya Ŵamboni sya Yehofa kutyocela kwa cemwali ŵangu ŵaŵaŵele Ŵamboni sya Yehofa. Mwakamulana ni yatite kakamule masengoga, nganisisye kuti none mbe jwa Mboni sya Yehofa. Nayiweni kuti jemanja mkusanonyelana mnope.” Kaneko jwamkongweju jwakundile kuti alijiganyeje Baibulo, mwamti jwabatiswe mu 2010.

13, 14. (a) Ana alijiganyisye yamtuli kutyocela pa yalyatesile liŵasa line panyuma pakulola yayatendekwaga pakutaŵa Nyumba ja Ucimwene? (b) Ana mpaka atende cici kuti malo gawo gakulambilila gapeleceje ucimbicimbi ku lina lya Yehofa?

¹³ Argentina. Liŵasa line m’cilamboci, lyam’yicile m’bale juŵalolelaga masengo gakutaŵa Nyumba ja Ucimwene. Jwamlume jwa liŵasali jwatite, “Tuŵele mkutenda lung’wanu ni masengo gawo. M’yoyo . . . tuganisisye kuti tutande kulijiganya yakwamba Mlungu pa maloga.” Kaneko ni jwawusisye kuti, “Ana tukusosekwa kutenda cici kuti tupopeleje nawo pa nyumbaji?” M’baleju ali ajanjile, ŵanduŵa ŵasasile kuti mpaka alijiganye Baibulo naga abalewo akwiticisya kuti calijiganyeje liŵasa lyosope lyene. Mwamti abale, ŵasangalele mnope ni yeleyi.

¹⁴ Komboleka kuti wawojo nganakamula nawo masengo pandaŵi jiŵataga Nyumba ja Ucimwene jakusasongana. Atamose kuti yili m’yoyo, mpaka atendeje yejinji pakamucisya nawo kuti malo gakulambililaga  gacimbicisyeje lina lya Yehofa. Mwacisyasyo, mpaka ŵaŵilanjileje ŵandu ŵakusalijiganya nawo Baibulo, ŵakusiŵajawulila pa maulendo gakuwilisya soni ŵandu ŵane kuti akatende nawo misongano ku Nyumba ja Ucimwene. Nambosoni akwete upile wakuswejesya soni kulinganya yayijonasice panyumbaji. Akwetesoni upile wakupeleka yakupeleka yakusamalilila Nyumba ja Ucimwene jawo kapena yakamucisya kutaŵa malo gakulambilila m’mikuli jine pacilambo cosope. (Aŵalanje 1 Akolinto 16:2.) Yakutendekwayi yikusapeleka ucimbicimbi ku lina lya Yehofa.

15-17. (a) Ana ni ŵani ŵakusakamula masengo gejinji pa masengo ga yakutaŵataŵa? (b) Ana tukulijiganya cici kutyocela ku maŵasa gane gakutyocela kuyilambo yine gagakamulaga masengo ga yakutaŵataŵa?

¹⁵ Masengo gejinji gakutaŵa Nyumba sya Ucimwene, Malo ga Misongano soni nyambi, gakusatendekwa ni abale ni alongo ŵa m’mipingo. Nambope ndaŵi sine, abaleŵa akusakamula masengoga yalumo ni abale ni alongo ŵakutyocela m’yilambo yine ŵele ŵakusagamanyilila cenene masengoga. Kuti abale ni alongo ŵeleŵa akombole kuja kamula masengoga m’yilambo yine kwa wiki syakuŵalanjika, akusaŵa kuti alinganyisye cenene yindu paumi wawo. Ŵane akusalipeleka kuti akatumicile pa masengoga kwa yaka yejinji soni m’mikuli jejinji.

¹⁶ Abale ŵakusakamula masengo gakutaŵaga m’yilambo yine, akusasimana ni yakusawusya yejinji. Atamose kuti yili m’yoyo, abaleŵa akusapatasoni majali gejinji. Mwacisyasyo, Timo ni Lina aŵele mkukamula masengo gakutaŵa Nyumba sya Ucimwene, Malo ga Misongano, soni mofesi ga nyambi m’yilambo ya ku Asia, Europe, soni ku South America. Timo jwasasile kuti, “Undumetume wangu uŵele mkucenga panyuma pa yaka yiŵili yiliyose kwa yaka 30.” Lina juŵalombedwe ni Timo yaka 25 yipiteyo jwatite, “Ngamwile masengo ni ŵamkwanguŵa m’yilambo yakulekanganalekangana yakwana 10. Yikusaŵa yakusawusya kuti usyoŵelele yakulya yasambano,  nyengo jasambano, ciŵeceto casambano, mkuli wakulalicila wasambano soni kuti ukole acimjakwe ŵasambano.” c Ana kulimbicila kwawo kwakwete yakuyicisya yakusangalasya? Lina jwatite, “Kusala yisyene, majali gatupatile ngaŵa mkugalandanya ni yakusawusya yatusimene nayo. Tuyiweni yatite Yehofa pakutusamalila mwacinonyelo. Abale ni alongo atulosisye koloŵa magasa soni cinonyelo ca Ciklistu m’matala gejinji. Tukuwenisoni kukwanilicikwa kwa maloŵe ga Yesu gaŵasalile ŵakulijiganya ŵakwe, ga pa Maliko 10:29, 30. Tupocele yindu yejinji, yayikupwatikapo abale, alongo, soni acimama ŵausimu.” Timo jwatite, “Yitukamucisye kukola mtima wakwikutila, pakumanyilila kuti tukukamulicisya masengo umanyilisi wetu pamasengo gakusosekwa mnope. Tutesile yeleyi pakwawusya pasogolo yindu yayili pasi pa Mwenye jwetu Yesu Klistu.”

¹⁷ Darren soni Sarah aŵele mkukamula masengo ga yakutaŵataŵa m’yilambo ya mu Africa, Asia, Central America, Europe, South America, soni South Pacific. Jemanjaji akusalipikana kuti apocele yindu yejinji kupunda yindu yatesile. Mwangasamala kandu ya yakusawusya yasimene nayo, Darren akuti, “Uŵele upile wekulungwa kukamula masengo yalumo ni abale ŵakutyocela m’mikuli jakulekanganalekangana pacilambopa.” Nayiweni kuti cinonyelo catukulosya kwa Yehofa cili mpela ulusi wawukutukamulanya pacilambo cosope.” Sarah akuti, “Nalijiganyisye yejinji kutyocela kwa abale ni alongo ŵandamo syakulekanganalekangana. Kulipeleka kwa abaleŵa pakumtumicila Yehofa kungamucisye kuti mbitilisye kutenda yampaka ngombole pakumtumicila Yehofa.”

18. Ana yakulocesya ya pa Salimo 110:1-3 yikwanilicikwa camtuli?

¹⁸ Mwenye  Daudi jwalocesye mkanipaŵe kuti ŵakutumicila ŵa Ucimwene wa Mlungu “tacilipeleka acimsyene” kuti akamule masengo ga Ucimwene atamose kuti jemanjaji cacisimanaga ni yakusawusya. (Aŵalanje Salimo 110:1-3.) Wosope ŵakusajigala mbali pakamucisya masengo ga Ucimwene, akusaŵa ali mkukwanilisya yakulocesyayi. (1 Akoli. 3:9) Kutaŵidwa kwa maofesi ga nyambi gejinji, Malo ga Misongano, soni Nyumba sya Ucimwene syejinji pacilambo cosope, yikulosya umboni wamacili kuti Ucimwene wa Mlungu uli usyesyene soni kuti ukulamulila. Uli upile wekulungwa kutumicila Mwenye jwetu Yesu Klistu pamasengo gagakusayikasya ucimbicimbi wekulungwa mnope kwa Yehofa.