LIJIGANYO 11
Ana Malamusi ga Mlungu Gakusatukamuchisya Chamtuli?
1. Ligongo chichi tukusasosekwa kulongoleledwa?
Ana usyesyene wa m’Baibulo mpaka utukamuchisye chamtuli kuŵambala ngosi?—SALIMO 36:9.
Mkupanganya jwetu ali jwalunda kupunda m’weji. Mpela Mtati jwachinonyelo jwalakwe akusatusamalilaga. Jwalakwe nganasakaga kuti tulijimileje pajika. (Yelemiya 10:23) Myoyo, mpela mwayikusaŵela kuti kamwanache kakusasosekwa achinangolo ŵakwe kuti akalongoleje, m’weji tukusosekwasoni kuti Mlungu atulongoleleje. (Yesaya 48:17, 18) Malamusi ga Mlungu gali mtuka wakutyochela kwa jwalakwe.—Aŵalanje 2 Timoteo 3:16.
Malamusi ga Yehofa gakusatukamuchisya kumanyilila yampaka tutende kuti tuŵe ŵakusangalala soni tupochele umi wangamala. Pakuŵa Mlungu ni juŵatupanganyisye, tukusosekwa kumpikanila.—Aŵalanje Salimo 19:7, 11; Chiwunukuko 4:11.
2. Ana maloŵe ga Mlungu gakusatulongolela chamtuli?
Usyesyene wa m’Baibulo ukusatukamuchisya kumanyilila yakusasaka Mlungu muyakutendekwa yejinji. Nambo malamusi komboleka kwamba kwaya mbali sine. (Detelonomo 22:8) Tukusasosekwa kukamulichisya masengo lunda lwetu lwakuganisya kuti tupikanichisye soni tukamulichisye masengo usyesyene wa m’Baibulowu. (Misyungu 2:10-12) Mwachisyasyo, Baibulo jikusajiganya kuti umi uli mtuka wakutyochela kwa Mlungu. Usyesyene wa m’Baibulowu mpaka utukamuchisye kuŵa ŵakusamala pamasengo, panyumba, soni patukwendesya galimoto.—Aŵalanje Masengo 17:28.
3. Ana malamusi gaŵili gapi gagali gakusosekwa mnope?
Yesu ŵaŵechete ya malamusi gaŵili gakusosekwa mnope. Lyandanda likusalosya chakulinga chisyesyene cha umi chachili kummanyilila Mlungu, kumnonyela soni kumtumichila mwakulupichika. Malamusiga gakusosekwa gatulongoleleje pa yosope yatukusagula kutenda. (Misyungu 3:6) Ŵakusapikanila malamusi ga Mlungu ni mtima wosope akusakola unasi wambone ni Mlungu, akusaŵa ŵakusangalala soni chachipata umi wangamala.—Aŵalanje Mateyu 22:36-38.
Lilamusi lyaŵili likusatukamuchisya kutama ni ŵane mwamtendele. (1 Akolinto 13:4-7) Kuti tukamulichisye masengo lilamusili tukusosekwa kumsyasya Mlungu mwakusatendela yindu ni ŵandu.—Aŵalanje Mateyu 7:12; 22:39, 40.
4. Ana malamusi ga Mlungu gakusatukamuchisya chamtuli?
Malamusi ga Mlungu gakusakamuchisya maŵasa kuti ganonyelaneje. (Akolose 3:12-14) Maloŵe ga Mlungu gakusachenjela maŵasa ligongo gakusasala kuti ŵandu palombene akusosekwa kutamaga yalumo kwa umi wawo wosope.—Aŵalanje Genesesi 2:24.
Yajikusajiganya Baibulo mpaka yitukamuchisye kuti yindu yitujendeleje chenene paumi soni kuti tukalagaga nganisyo. Mwachisyasyo, mabwana ndaŵi syejinji gakusasaka ŵamasengo ŵakusapikanila malamusi ga Mlungu mpela kutenda yindu mwachilungamo soni kulimbichila masengo. (Misyungu 10:4, 26; Ahebeli 13:18) Maloŵe ga Mlungu gakusatukamuchisya kuŵa ŵakwikutila ni yindu yakusosekwa mnope, soni kuti tuwuwoneje unasi wetu ni Mlungu kuŵa wakusosekwa mnope kupundana ni yindu yatukwete paumi wetu.—Aŵalanje Mateyu 6:24, 25, 33; 1 Timoteo 6:8-10.
Kupikanila malamusi ga Mlungu mpaka kutukamuchisye kola umi wambone. (Misyungu 14:30; 22:24, 25) Mwachisyasyo, lilamusi lya Mlungu lyakulekasya kolelwa likusatukamuchisya kuti tukalwalaga yilwele yine yakogoya, soni kuŵambala ngosi. (Misyungu 23:20, 29, 30) Yehofa akusatukunda kumwa ukana, nambo mwangapundanganya. (Salimo 104:15; 1 Akolinto 6:10) Malamusi ga Mlungu gakusatukamuchisya kuŵambala nganisyo soni yitendo yakusakala. (Salimo 119:97-100) Nambotu Aklistu ŵasyesyene ŵangagamba kuya malamusi ga Mlungu pakwamba kusaka kuti yindu yajendeleje chenene. Akusagakuya pakusaka kumchimbichisya Yehofa.—Aŵalanje Matayo 5:14-16.
