LIJIGANYO 5
Ana Chakulinga cha Mlungu cha Chilambo Chapasi Chili Chichi?
1. Ligongo chichi Mlungu ŵapanganyisye chilambo chapasi?
Yehofa ŵapeleche chilambo chapasi kwa ŵandu kuti atamejemo mpela kumangwawo. Myoyo, liŵasa lyandanda lya Adamu ni Hawa, nganalipanganya kuti liŵelecheje ŵanache ŵakutama kwinani. Mlungu ŵaliji ali apanganyisye kala malayika kuti gatameje kwinani. (Yobu 38:4, 7) Mlungu ŵamŵisile mundu jwandanda mu paladaiso jwakolanjidwa kuti mgunda wa Edeni. (Genesesi 2:15-17) Yehofa ŵampele jwalakwe ni ŵanache ŵakaŵeleche chembecheyo chakutama ni umi wangamala pachilambo chapasi.—Aŵalanje Salimo 37:29; 115:16.
Pandanda, mgunda wa Edenipe waliji paladaiso. Adamu ni Hawa ŵasosekwaga gumbasya chilambo chapasi ni ŵanache ŵawo. M’kupita kwa ndaŵi ŵasosekwagasoni kuchitenda chilambo chosope kuŵa paladaiso. (Genesesi 1:28) Chilambochi ngasichijonasika. Chipitilisye kuŵa kumangwawo ŵandu.—Aŵalanje Salimo 104:5.
Alolele fidiyo jakuti Ligongo Chichi Mlungu Ŵapanganyisye Chilambo Chapasi?
2. Ligongo chichi chilambo chapasi nganichiŵa paladaiso?
Adamu ni Hawa nganampikanila Mlungu, myoyo Yehofa ŵatopwele mumgunda wa Edeni. Paladaiso jwajasiche, soni pangali mundu jwakombwele kuchitenda chilambochi kuŵasoni paladaiso. Baibulo jikusaŵecheta kuti, “Chilambo chapasi ŵachipeleche m’miyala mwa jwakusakala.”—Yobu 9:24.—Aŵalanje Genesesi 3:23, 24.
Ana chakulinga Yehofa chapandanda kwa ŵandu chamasile? Iyayi. Jwalakwe ali jwamachiligose, ngaŵa mkulepela. (Yesaya 45:18) Chachakamuchisya ŵandu kuŵa ni umi wangamala soni wakusangalala mpela muŵasoselaga pandanda.—Aŵalanje Salimo 37:11, 34.
3. Ana Paladaiso jichiwujilasoni chamtuli?
Yesu pachachilamulilaga mpela Mwenye jwa Mlungu, paladaiso jichiwujila pachilambo chapasi. Pangondo ja Alamagedo, Yesu chachilongolela malayika ga Mlungu kukonanga wosope ŵakusisya Mlungu. Kaneko Yesu chachimtaŵa Satana kwa yaka 1,000. Ŵandu ŵa Mlungu chachikulupuka chonasikocho ligongo Yesu chachalongolela ni kwachenjela. Ŵanduwo chachikola umi wangamala mu Paladaiso pachilambo chapasi.—Aŵalanje Chiwunukuko 20:1-3; 21:3, 4.
4. Ana yipwetesi yichimala chakachi?
Ana Mlungu chachimasya yakusakala pachilambo chapasi chakachi? Yesu ŵapeleche “chimanyilo” pakusaka kulosya ndaŵi jele mbesi jichiŵa jiŵandichile. Yayikutendekwa pachilambopa yikutendekasya umi wa ŵandu kuŵa pangosi, soni yikulosya kuti tukutama mundaŵi ja “mbesi ja chilambo chapasi.”—Aŵalanje Mateyu 24:3, 7-14, 21, 22.
Yesu chachimasya yakusawusya yosope mkati mwa ulamusi wakwe wa yaka 1,000, pachilambo chapasi. (Yesaya 9:6, 7; 11:9) Yesu chachilamulilaga mpela Mwenye, soni chachiŵa mpela Jwambopesi Jwamkulungwa jwachachimasya ulemwa wa ŵandu ŵakumnonyela Mlungu. Myoyo, kupitila mwa Yesu, Mlungu chachimasya yilwele, kalambala, soni chiwa.—Aŵalanje Yesaya 25:8; 33:24.
5. Ana ŵani ŵachachitama mu Paladaiso?
Pa Nyumba ja Uchimwene, chakasimane ŵandu ŵakusamnonyela Mlungu, soni ŵakusaka kulijiganya yampaka atende kuti amsangalasye
Ali ŵandu ŵakusampikanila Mlungu. (1 Yohane 2:17) Yesu ŵatumisye ŵakumkuya ŵakwe kukusosasosa ŵambone mtima, soni kukwajiganya yampaka atende kuti aŵe ŵakuŵajilwa kwa Mlungu. Lelo jino, Yehofa akwakamuchisya ŵandu kuti chakole umi mu Paladaiso pachilambo chapasi. (Sefaniya 2:3) Pa Nyumba sya Uchimwene sya Mboni sya Yehofa, ŵandu akusalijiganya kuŵa achalume ni achibaba ŵambone, soni kuŵa achakongwe ni achimama ŵambone. Ŵanache ni achinangolo akusalambila yimpepe, soni akusalijiganya yampaka atende kuti ngani syambone syakamuchisyeje.—Aŵalanje Mika 4:1-4.
