LIJIGANYO 15
Ligongo Chichi Ngakusosekwa Kuleka Kulijiganya ya Mlungu?
1. Ligongo chichi kupitilisya kulijiganya Baibulo mpaka kwakamuchisye?
Mwangakayichila, yijiganyo ya m’Baibulo yalijiganyisye m’kabukuka chiyakamuchisye kuti amnonyeleje Yehofa. Akusosekwa kutenda yakuti chinonyelo chawo pa Yehofa chikamala. (1 Petulo 2:2) Kuti akapate umi wangamala akusosekwa kupitilisya kuŵa pa unasi ni Mlungu mwakulijiganya Maloŵe gakwe.—Aŵalanje Yohane 17:3; Yuda 21.
Pakumanyilila yejinji yakwamba Mlungu, chikulupi chawo chichiŵa chakulimba. Chikulupichi chichakamuchisya kumsangalasya Mlungu. (Ahebeli 11:1, 6) Chichakamuchisya kupitikuka mtima soni kuchenga umi wawo.—Aŵalanje Masengo 3:19.
2. Ana mpaka atende yamtuli kuti yayimanyi pakwamba ya Mlungu yakamuchisyesoni ŵane?
Wawojo komboleka kuŵapaunasi wapajika ni Yehofa
Yili yakusosekwa kuti ŵasalileje ŵane yalijiganyisye. Wosope tukusasangalala kwasalila ŵane ngani syambone. Pakwendelechela kulijiganya Baibulo, chachilijiganya kujikamulichisya masengo mwakwasalila ŵane ya chikulupi chawo pa Yehofa, soni yakwamba ngani syambone.—Aŵalanje Aloma 10:13,-15.
Ŵandu ŵajinji akusatanda kwasalila ngani syambone achimjawo kapena achanasi ŵawo. Nambo pakusosekwa lunda kuti atende yeleyi. Mmalo mwakwasalila ŵane kuti akwete chikulupi chakulemwecheka, ŵasalileje yachachitenda Mlungu msogolo. Akumbuchilesoni kuti ŵandu mpaka asache kulijiganya ya Mlungu mnopemnope ligongo lya ndamo syambone syakwete wawojo ngaŵa yakusaŵechetape. —Aŵalanje 2 Timoteo 2:24, 25.
3. Ana mpaka asangalale chamtuli kuŵa paunasi ni Mlungu?
Kulijiganya Maloŵe ga Mlungu kuchakamuchisya kukula mwausimu. Pandaŵi ajino chachiŵa paunasi wapajika ni Yehofa. Komboleka kuŵa mu liŵasa lyakwe.—Aŵalanje 2 Akolinto6:18.
4. Ana mpaka apitilisye chamtuli kwawula pasogolo?
Komboleka kwawula pasogolo mwausimu mwakulijiganya Maloŵe ga Mlungu. (Ahebeli 5:13, 14) Aŵende jumo jwa Mboni sya Yehofa kuti alijiganye najo Baibulo pakamulichisya masengo buku jakuti Ana Baibulo Jikusatujinganya Yatuli? Pakulijiganya yejinji pakwamba ya Maloŵe ga Mlungu, yindu chiyajendeleje chenene pa umi wawo.—Aŵalanje Salimo 1:1-3; 73:27, 28.
Ngani syambone sikusatyochela kwa Yehofa, Mlungu jwakusangalala. Komboleka kuŵa paunasi ni jwalakwe mwakuŵa paunasi ni ŵandu ŵakwe. (Ahebeli 10:24, 25) Pakupitilisya kumsangalasya Yehofa, nikuti akulingalingasoni kuti apate umi usyesyene, wawuli umi wangamala. Kuŵa paunasi ni Mlungu kuli chindu chambone mnope champaka atende.—Aŵalanje 1 Timoteo 1:11; 6:19.
You May Also Like
MISONGANO
Ana ku Nyumba ja Uchimwene Kukusatendekwa Yatuli?
Akagambe kwinjila m’kati ni kulola yayikusatendekwa.
YAKWAMBA M’WEJI
Ligongo Chichi Tukusosekwa Kulijiganya Baibulo?
Baibulo jikwakamuchisya ŵandu ŵajinji pachilambo chosope kupata kwanga kwa yiwusyo yakusosekwa mnope paumi. Ana akusaka kuŵa jumo mwa ŵandu ŵelewa?
