Yesebele ali apikene yayatendecele ŵakulocesya ŵa Baala, ŵatumbile mnope. Jwalakwe ŵatumisye utenga kwa Eliya wakuti, ‘Malaŵi cim’wulajidwe mpela mwayiŵelele ni ŵakulocesya ŵa Baala.’ Eliya wamkamwile mnope woga mwamti jwatilile kucipululu. Jwalakwe jwapopesile kuti, ‘Yehofa ngangombolasoni kupilila. Atyosye umi wangu.’ Eliya ŵagonile pasi pacitela ligongo ŵaliji ali apesile mnope.

Kaneko lilayika lyayice kwa jwalakwe ni kumsalila kuti, ‘Mjimuce mlye.’ Eliya jwawuweni mgawo wa mesi soni mkate uli pamaganga ga moto. Jwalile mkatewo soni kumwa mesigo kaneko jwagonilesoni. Lilayika lila lyamjimwisyesoni ni kumsalila kuti, ‘Mlye ligongo mkusosekwa macili kuti mkombole kwenda ulendowu.’ Ni Eliya jwalilesoni. Kaneko jwajesile ulendo wa masiku 40 musi ni cilo, mpaka paŵakopocele pa Litumbi lya Holebe. Ali ayice kumaloga Eliya ŵajinjile kumbanga ni gona kweleko. Nambo Yehofa ŵam’wusisye jwalakwe kuti, ‘Ana Eliya mkutenda cici akuno?’ Jwalakwe jwajanjile kuti, ‘Ayisalayeli akasile cilanga caŵatesile kwa wawojo. Ajonasile malo ga wawojo gakupelecela mbopesi soni awuleje ŵambopesi ŵawo. Sambano akusaka kuti ambulaje.’

Yehofa ŵamsalile Eliya kuti, ‘Mjawule mkajime pa litumbilyo.’ Pandanda kwapujile cimbungo camacili ni capitile pambangapo. Kaneko kwatesile cisicinya soni moto wakolele. Pambesi pakwe, Eliya jwapikene maloŵe gapasipasi. Jwalakwe jwasiŵile ngope jakwe ni cakuwala cakwe capenani ni jwajimi kusa kwa mbangajo. Sambano Yehofa ŵam’wusisye cacamtendekasisye kuti atile. Eliya jwajanjile kuti, ‘Sigele jika.’ Pelepo Yehofa ŵamsalile kuti, ‘Nganimsigala jika. Pana ŵandu 7,000 ku Yisalayeli ŵakwendelecela kulambila une. Mjawule mkamsagule Elisa kuŵa jwakulocesya m’malo mwa mmwejo.’ Ndaŵi jijojo Eliya ŵanyakwice kuja kutenda yaŵamsalile Yehofa yila. Ana mkuganisya kuti Yehofa mpaka amkamucisye mmwejo naga mkutenda yakusasaka jwalakwe? Elo mpaka amkamucisye. Kwende tulole cindu cine cacatendekwe pandaŵi ja cilala cila.