Mose ni Aloni ŵapite kwa Falao kuja kumsalila utenga wa Mlungu wakuti, ‘Naga ngamkwakunda ŵandu ŵangu kuti ajawuleje cindumisye membe syekulungwakulungwa.’ M’yoyo, membesyo syajinjilaga m’nyumba sya Aiguputo ŵakusicila ni ŵakulaga ŵakwe. Mwamti cilamboco cagumbele ni membe syekulungwakulungwasyo. Nambo ku Gosheni kwele Ayisalayeli ŵatamaga kwaliji kwangali membesyo. Kwamba kutandila ni mlili wa mcecewu, milili jakuyicisya jawulasyaga Aiguputope. Ni Falao ŵamsalile Mose kuti, ‘Am’ŵende Yehofa kuti atyosye membesi. Kaneko Ŵandu ŵawo cajawuleje.’ Nambo Yehofa ali atyosisye membesyo jwalakwe jwacenjile nganisyo. Ana pelepa mpaka tujile kuti Falao jwalijiganyisye cilicose?

Yehofa ŵatite, ‘Naga Falao ngaŵakunda ŵandu ŵangu kwawula, yilango ya Aiguputo ciyilwale soni kuwa.’ Ni lisiku lyakuyicisya yilangoyo yatandite kuwa. Nambo yilango ya Ayisalayeli nganiyiwa nawo. Falao jwajendelecele kulikwesya mwamti nganiŵakunda Ayisalayeli kuti ajawuleje.

Kaneko Yehofa ŵamsalile Mose kuti ajawulesoni kwa Falao ni akaponye liwu mwinani. Liwulyo lyasandwice luwundu ni lwagumbele mwinani mosope mnopemnope kuŵatamaga Aiguputo. Luwundulo lwatendekasisye Aiguputo soni yilango yawo kola maŵanga gakupweteka mnope. Atamose yaliji m’yoyo, Falao jwakanilepe kwakunda Ayisalayeli kuti ajawuleje.

Yehofa ŵamtumisyesoni Mose kwa Falao ni utenga wakuti, ‘Ana mkwendelecelape kwakanya ŵandu ŵangu kuti ajawuleje? Malaŵi cikugwe wula ja  matalila.’ Lisiku lyakuyicisya Yehofa ŵagwisisye wula ja matalila soni kwaliji kwana njasi ni moto. Jaliji wula jakogoya mnope janganijigweje citandilile mu Iguputo. Mwambone, mbeju soni yitela yosope yajonasice nambo ku Gosheni kuŵatamaga Ayisalayeli nganiyitendekwa. Falao ŵamsalile Mose kuti, ‘Am’ŵende Yehofa kuti alekasye wulaji. Kaneko cajawuleje.’ Nambo pajagambile kuleka wula ja matalilajo Falao jwacenjilesoni nganisyo.

Kaneko Mose jwamsalile Falao kuti, ‘Sambano sombe cisilye yakumela yayisigele ku wula ja matalila.’ Ni mamiliyoni ga sombe galile cilicose cacasigele m’migunda soni m’yitela. Falao ŵam’ŵendile Mose kuti, ‘Amsalile Yehofa kuti atyosye sombesi.’ Nambope Yehofa ali agambile kutyosya sombesyo, Falao ŵajendelecelepe kumusya mtima wakwe.

Yehofa ŵamsalile Mose kuti, ‘Mkwesye mkono wenu mwinani.’ Mwangakaŵa kwinani kwatesile cipi. Kwa masiku gatatu Aiguputo nganakombolaga kulola cilicose. Nambo kuŵatamaga Ayisalayeli nganikutenda cipi.

Sambano Falao ŵamsalile Mose kuti, ‘M’mwejo ni ŵandu ŵenu mpaka mnyakuce. Nambo mkajigala yilango yenu.’ Mose jwatite, ‘Tukusosekwa kujigala yilango yetu kuti tukapelece mbopesi kwa Mlungu jwetu.’ Falao jwatumbile mnope. Jwalakwe jwakalipe kuti, ‘Mtyoce kwa une! Naga ngum’wonasoni cinam’wulaje.’