Ku Filipi, kwaliji msikana jwine jwamasengo juŵakwete msimu wakusakala. Msimuwu wamtendekasyaga msikanaju kuti asaleje ya msogolo, mwamti acambujegwe ŵapataga yipanje ligongo lya yeleyi. Paulo ni Sila ali ayice ku Filipi, msikanaju jwagambaga kwakuya jemanjaji kwa masiku gejinji. Msimu wakusakalawu wamtendekasyaga gumila kuti, “Ŵanduŵa ali acikapolo ŵa Mlungu Jwakwinani Mnope.” Kaneko, Paulo ŵawusalile msimuwo kuti, ‘M’lina lya Yesu, mkopoce mwa jwalakwe!’ Kaneko msimu wula wakopwece mwa msikanajo.

Nambo acambujegwe ali ayimanyi kuti ngapatagasoni mbiya kutyocela kwa msikanajo, ŵatumbile mnope. Kaneko jemanjaji ŵamkamwile Paulo ni Sila ni kwawula nawo kwa ŵakulamula. Ŵanduwo ŵatite, ‘Ŵanduŵa akasa malamusi, soni akusokonasya msinda wosope!’ Ŵakulamula ŵala ŵalamwile kuti Paulo ni Sila aputidwe soni ŵawugalile m’nyumba ja ukayidi. Jwakulolela akayidi ŵam’ŵisile Paulo ni Sila m’yipinda yamkati mnope soni yacipi. Ŵataŵilesoni makono ni ngongolo pakamulicisya masengo matabwa.

Paulo ni Sila ŵajimbaga nyimbo syakumlumba Yehofa. Pandaŵiji akayidi ŵane ŵapikanilaga. Nambo pasikati cilo patendekwe yindu yakusupusya. Cisicinya camacili catenganyisye nyumba ja ukayidijo. Kaneko matanga gawugwice soni ngwambala syaŵataŵile akayidiwo syagopwece. Jwakulolela nyumba ja ukayidi jula jwawutucile m’yipinda yamkati ni jwagaweni matanga gakwe gali gewugule. Paganisya kuti akayidi wosope atisile, jwalakwe jwajigele upanga kuti aliwulaje.

Ndaŵi jijojo, Paulo jwagumisile kuti, ‘Mkaliwulaga! Wosopewe tupali!’ Kaneko jwakulolela nyumba ja ukayidi jula jwatindiŵele pameso pa Paulo ni Sila. Ni jwawusisye kuti, “Ana ndende cici kuti ngulupuce?” Jemanjajo ŵamsalile kuti, ‘Mmwejo yalumo ni liŵasa lyenu mkusosekwa kulupilila mwa Yesu.’ Kaneko Paulo ni Sila ŵalijiganyisye liŵasalyo maloŵe ga Yehofa, mwamti liŵasa lyosopelyo lyabatiswe.