Afalisi ŵam’ŵengaga mnope Yesu mwamti ŵasakaga kumpatila magongo kuti amtaŵe. Jemanjajo ŵatiga kuti Yesu ngakusosekwa kwaposya ŵandu palisiku lya Sabato. Ŵaŵecetaga yeleyi ligongo lyaliji lisiku lyele ŵandu nganakamulaga masengo. Lisiku line lya Sabato, Yesu ŵasimene ni mundu jwangalola ali mkuŵenda mumsewu. Yesu ŵasalile ŵakulijiganya ŵakwe kuti, ‘Alole yacigajile macili ga Mlungu pakumkamucisya mundu jweleju.’ Kaneko jwalakwe ŵawunyile litaka ni mata gakwe ni ŵampakesye m’meso mundujo. Yesu ŵamsalile mundujo kuti, ‘Mjawule mkasukusule m’meso ku litanda lya Silowamu.’ Mundu jula ali atesile yeleyi, jwatandite kulola.

Ŵandu ŵasimonjile mnope ni yayatendekweyo. Ni ŵawusyanaga kuti, ‘Ana aju ngaŵa mundu juŵatamaga mumsewu ni kuŵendaga jula? Kapena akwamba kulandana?’ Nambo mundujo jwatite, ‘Ndili une!’ Ni ŵam’wusisye kuti, ‘Yikombolece uli kuti mtande kulola?’ Jwalakwe ali asasile yayamtendecele, jemanjajo ŵamjawisye mundu jula kwa Afalisi.

Mundujo ŵasalile Afalisiwo kuti, ‘Yesu ŵambakesye litaka lyewunye m’meso ni ŵasalile kuti ngasukusule.’ Ndili ndesile yeleyo, natandite kulola.’ Nambo Afalisiwo ŵatite, ‘Naga Yesu akuposya ŵakulwala pa Sabato, nikuti macili gakwe nganigaŵa gakutyocela kwa Mlungu.’ Nambo ŵane ŵatite, ‘Yikaŵe kuti macili gakwe nganigatyocela kwa Mlungu, ngamkanakombola kumposya munduju.’

Afalisi ŵaŵilasisye acinangolo ŵa mundujo ni ŵawusisye kuti, ‘Ana yikombolece uli kuti mwanace jwawoju atande kulola?’ Pakogopa  yaŵaŵecete Afalisi kuti jwalijose jwakumkulupilila Yesu cacimtopola m’nyumba jakulambilila, acinangolowo pakwanga ŵatite, ‘Ngatukumanyilila. Am’wusye msyenejo.’ Kaneko Afalisi ŵala ŵam’wusisye mundu jula yiwusyo yejinji mpaka mundujo jwayikene pakuŵeceta kuti, ‘Nasalile yosopetu, sambano ligongo cici akwamba kumbusyape?’ Afalisiwo ŵatumbile mwamti ŵamponyisye mundujo pasa.

Yesu ŵapite kukumsosasosa mundu jula. Ali ampatile ŵam’wusisye kuti, ‘Ana mkukulupilila Mesiya?’ Mundu jula ŵajanjile kuti, ‘Ngamanyilile kuti jwalakwe ali ŵani, ngamkulupilile.’ Ni Yesu ŵatite, ‘Une ndili Mesiya.’ Ana panasoni jwine jwampaka alandane ni Yesu? Jwalakwe nganagamba kumlamisya mundu jula, nambo ŵamkamucisyesoni kuti akole cikulupi.