Ali asagwile ŵandumetume 12, Yesu ŵatulwice mwitumbi nikwawula ku malo kuŵasongene ŵandu ŵajinji. Ŵanduŵa ŵatyocelaga ku Galileya, Yudeya, Tulo, Sidoni, Siliya, ni mbali sine sya Yolodani. Jamanjaji ŵayice nawo ŵandu ŵakulwala soni ŵane ŵaŵalagaga ni misimu jakusakala. Yesu ŵaposisye wosopewo. Kaneko jwatemi mungulugulu litumbi ni jwatandite kuŵeceta. Jwalakwe ŵasasile yatukusosekwa kutenda kuti tuŵe acimjakwe ŵa Mlungu. Jwalosisyesoni kuti Yehofa ali jwakusosekwa soni tukusosekwa kumnonyelaga. Nambo ngakomboleka kumnonyela jwalakwe naga ngatukwanonyela ŵane. Tukusosekwa kuŵa mundu jwambone kwa jwalijose atamose kwa acimmagongo ŵetu.

Yesu jwatite, ‘Nganikuŵa kwakwanila kwamba kwanonyela acimjenupe. Mkusosekwasoni kwanonyela acimmagongo ŵenu soni kwakululucila ŵandu kutyocela pasi pamtima. Naga mumtumbilikasisye mjenu, mjawule ndaŵi jijojo mkapepesye. Mwatendeleje ŵane yindu yamkusaka kuti jemanjajo amtendeleje.’

 Yesu ŵakamucisyesoni ŵandu mwampaka ayiwoneleje yindu yakucilu. Jwalakwe ŵatite, ‘Kuŵa paunasi ni Yehofa kuli kwakusosekwa mnope kupundana ni kola mbiya syejinji. Jwawiyi mpaka ajiŵe mbiya syetu nambo pangali jwampaka ajiŵe unasi wetu ni Yehofa. Mkasimdandawula kuti cimcilya cici, cimcimwa cici kapena cimciwala cici. Alole yijuni, Mlungu ndaŵi syosope akusalolecesya kuti yikwete yakulya yakwanila. Kudandawula nganikuŵa kumkamkucisye mundu konjecesya lisiku paumi wakwe. Mkumbucile kuti Yehofa akusamanyilila yamkusosecela.’

Ŵandu ŵala ŵaliji mkanapikane mundu jwalijose ali mkuŵeceta mpela muŵaŵecetele Yesu. Paliji pangali mlongola jwa dini juŵajiganyisye yindu mpela yeleyi. Ana ligongo cici Yesu ŵaliji mkwiganya jwamkulungwa? Ligongo lyakuti yiliyose yaŵajiganyaga yaliji yakutyocela kwa Yehofa.