Lisiku line cilo, Mwenye Nebukadinesala ŵasagamile sagamisi syakogoya. Ni ŵalasile mnope mwamti nganapatasoni lugono. Jwalakwe ŵaŵilasile ŵamasenga ni ŵasalile kuti, ‘Asalile ngopolelo sya sagamisi syangu.’ Jemanjajo ŵatite, ‘Atusalile kaje yasagamileyo.’ Nambo Nebukadinesala ŵatite, ‘Iyayi. Asalile yisagamileyo, naga ngasala cinawulaje.’ Ni jemanjajo ŵatite, ‘Tutite atusalile yasagamileyo, ni m’weji citwasalile gopolela kwa sagamisisyo.’ Nambo mwenyewo ŵatite, ‘Jemanja akusaka kundoŵesya. Nguti asalile yisagamile!’ Nambo ŵanduwo ŵasalile mwenyewo kuti, ‘Pangali mundu jwacijumi jwampaka akombole kutenda yeleyo. Yakusakayo yili yangakomboleka.’

Mwenye Nebukadinesala ŵatumbile mnope mwamti ŵalamwile kuti ŵandu wosope ŵalunda m’cilamboco awulajidwe. Yeleyi yapwatikagapo Daniyele, Sadilaki, Mesaki soni Abedinego. Nambo Daniyele jwaŵendile kwa mwenye kuti ampe ndaŵi. Kaneko jwalakwe yalumo ni acimjakwe ŵala ŵapopesile kwa Yehofa ni kum’ŵenda kuti ŵakamucisye. Ana Yehofa ŵatesile cici?

Kupitila mu sagamisi, Yehofa ŵamlosisye Daniyele sagamisi sya Nebukadinesala soni ŵamkamucisye kumanyilila ngopolelo jakwe. Lisiku lyakuyicisya, Daniyele ŵapite kwa jwakutumicila jwa mwenye ni kumsalila kuti, ‘Akawulaga acalume ŵalunda. Une cinasalile mwenye gopolela kwa sagamisisyo.’ Jwakutumicila jwa mwenyejo ŵamjigalile Daniyele kwa Nebukadinesala. Ni Daniyele ŵasalile mwenyewo kuti, ‘Mlungu ajuwile kwa wawojo yindu yaciyitendekwe kusogolo.’ Sagamisi syawo ni asi, ‘Ŵalakwe ŵaciweni ciwanicisyo cekulungwa cacakwete mtwe wa golidi, pamtima soni makono yaliji ya silifa, lutumbo soni yiga yaliji ya kopa, ngongolo sya cisyano, soni sajo syakwe syaliji syewanganicilane cisyano ni lilongo. Kaneko liganga lyakatidwe kutyocela kwitumbi, ni lyaputile sajo sya ciwanicisyo cila. Ciwanicisyo cila casyajice ni kuŵa  luwundu, kaneko mbungo jagulwisye luwundulo. Ni liganga lila lyaŵele litumbi lyekulungwa mwamti lyagumbele cilambo cosope capasi.’

Kaneko Daniyele jwatite, ‘Gopolela kwa sagamisisi ni aku, Ucimwene wawo uli mtwe wa golidi. Silifa uli ucimwene wawuciyika panyuma pa wawojo. Kaneko kuciŵa ucimwene mpela wa kopa wawucilamulila cilambo cosope. Panyuma pa ucimwenewu paciyika wine wakulimba mpela cisyano. Pambesi pakwe paciŵa ucimwene wegaŵikane, wawuciŵa wakulimba mpela cisyano mbali sine, nambo mbali sine uciŵa wangalimba mpela lilongo. Liganga lyalyatyocele kwitumbi lila lili Ucimwene wa Mlungu. Ucisyaga maucimwene gosopega ni ucitama mpaka kalakala.’

Nebukadinesala ŵatindiŵele pameso pa Daniyele mpaka ngope jakwe pasi. Ni ŵatite kwa jwalakwe, ‘Mlungu jwenu ni jwamjuwulile sagamisisi. Pangalisoni Mlungu jwakulandana ni jwalakwe.’ M’malo mwakum’wulaga, Nebukadinesala ŵamsagwile Daniyele kuŵa jwamkulungwa jwa ŵandu wosope ŵalunda soni ŵakulamulila ŵa mu Babulo. Ana m’yiweni yaŵatesile Yehofa pakwanga lipopelo lya Daniyele?