Mu likuga lyetu nganitukola alaliki ŵakulipigwa mbiya. Mmalo mwakwe, mpela muyaŵelele pakutanda kwa mpingo wa Ciklistu, ŵakulolela ŵakuŵajilwa akusasaguligwa kuti ‘aŵe ŵakucinga ŵa mpingo wa Mlungu.’ (Mase. 20:28) Acakulungwaŵa ali acalume ŵakomangale mwausimu ŵakusalongolela mumpingo ni kuwucinga, ‘ngaŵaga mwangasacilila nambo mwakusacilila. Akusagatenda masengo gawo, ngaŵaga pakuyicisya malipilo, nambo pakusaka kutumicila.’ (1 Pet. 5:1-3) Ana akusatukamulila masengo gatuli?

Akusasamala ya m’weji ni kutulolela. Acakulungwa akusalongolela ni kukamucisya kuti mpingo ukole citeteyo causimu. Pakumanyilila kuti Mlungu ŵapele masengo gakusosekwaga, acakulungwa ŵangalamulila ŵandu ŵa Mlungu, nambo akusatukamucisya kuti yindu yitujendeleje pa umi, soni kuti tuŵeje ŵakusengwa. (2 Akoli. 1:24) Mpela mwayikusaŵela kuti jwakucinga akusasamalila ngondolo jakwe jilijose mwamtawu, acakulungwa akusalingalinga kwamanyilila ŵandu wosope ŵa mumpingo, jwalijose pajika.—Miyambo 27:23.

Akusatujiganya kutenda lisosa lya Mlungu. Mlungu wuliwose, acakulungwaŵa akusatendesya misongano ja mpingo pakusaka kulimbikasya cikulupi cetu. (Masengo 15:32) Acalume ŵakulipelekaŵa akusalongolelasoni masengo gakulalicila, tukusakamula nawo yimpepe masengoga ni kutujiganya mbali syosope sya undumetumewu.

Akusatulimbikasya. Pakusaka kutukamucisya kulimbikasya unasi wetu ni Yehofa, acakulungwa ŵa mumpingo wetu akusakombolekaga kutusimana kumangwetu kapena pa Nyumba ja Ucimwene kuti atukamucisye ni kutulimbikasya mwa Malemba.—Yakobo 5:14, 15.

Acakulungwa ŵajinji akwetesoni masengo gakucilu, soni akusosekwa kusamalila maŵasa gawo, yeleyi yikusasaka ndaŵi jawo ni kulolecesya kuti yikwenda cenene. Abale ŵakamula mnope masengoŵa tukusosekwa kwacimbicisya.—1 Atesalonika 5:12, 13.

• Ana acakulungwa ŵa mumpingo akwete masengo gatuli?

• Ana acakulungwa akusalosya catuli lung’wanu kwa jwalijose jwetuwe?