“Mkajenele kuŵa ŵakwiganya.” (Aheb. 5:12) Agambe ganicisya. Yehofa jwali Mkwiganya jwambone mnope pacilambo cosope, atupele masengo gakwajiganya ŵane yakwamba jwalakwe. Wuli upile wekulungwa soni ukumu wapajika kukamula masengo gakwiganya usyesyene wakwamba Yehofa, cinga mwiŵasa, mu mpingo kapena mu undumetume. Ana mpaka tuyitende camtuli yeleyi?

Kwanga kwa ciwusyoci kukusimanikwa m’maloŵe ga ndumetume Paulo paŵamlembele Timoteyo kuti, “Mlipelece pakwaŵalanjila ŵandu Malemba, kwalalicila ni kwajiganya.” Jwajonjecesye kuti, “Naga mkutenda yeleyi timcilikulupusya mwasyene nambosoni ŵandu ŵakusagapikanila maloŵe genu.” (1 Tim. 4:13, 16) Akwete masengo gakulalicila utenga wakulupusya. M’yoyo akusosekwa kongolela kaŵalanje soni kajiganye kawo. Kabukuka akalinganyisye kuti kakamucisye kutenda yeleyi. Kwende tulole yindu yamnono yayili m’kabukuka:

Yehofa ali “Mkwiganya Jwamkulungwa.” (Yes. 30:20, NW) Kabukuka cikakamucisye kukusya umanyilisi wakwiganya ni kuŵalanga. Nambope, akaliŵalila kuti Msyene utenga watukusalalicilaga ni kwiganya ali Yehofa soni jwalakwe ni jwakusawuta ŵandu. (Yoh. 6:44) M’yoyo, ndaŵi ni katema aŵendeje msimu weswela soni kamulicisya masengo Maloŵe ga Mlungu. Akusosekwa kumjegamila mnope Yehofa m’malo mwakulijegamila. Alinjelinjeje kwalimbikasya ŵandu kuti amnonyeleje mnope Yehofa.

Apocele masengo gakwiganya utenga wakusosekwa mnope wanganiwupelecedweje kwa ŵandu munyumamu. Tuli ŵakusimicisya kuti naga akwegamila “macili gakusapeleka Mlungu,” cacikombola kuya yeleyi.

M’weji ŵakwiganya acimjawo,

Likuga Lyakulongolela lya Mboni sya Yehofa