Maloŵe Gakumbesi
“Ŵasyasyeje ŵandu ŵele mwacikulupi soni mwakuwusimana mtima akupocela yindu yaŵasalile Mlungu.”—AHEBELI 6:12.
1, 2. Ana ligongo cici tukusosekwa kulimbisya cikulupi cetu moŵa agano? Apelece cakuwanicisya.
CIKULUPI jili ndamo jakusangalasya mnope. Nambo naga nganitukola ndamoji, tukusosekwa kulingalinga kuti tujipate. Naga tukwete, tukusosekwa kujisamalila kuti jikamala. Ana ligongo cici tukuŵeceta yeleyi?
2 Aganicisye ali mkwenda mu cipululu cekulungwa. Ni njota jakwete mnope. Ni papatile mesi gakumwa mpaka agasamale cenene kuti gakajumula ni lyuŵa. M’yoyo kuti yeleyi yikatendekwa mpaka asosekwe konjecesyaga mesigo kuti gaŵe gakwanila mpaka akayice kwakwawula. Moŵa aganosoni tukutama m’cipululu causimu, kapena kuti m’cilambo cele cikulupi cili cakusoŵa soni mpaka cimale mwacitema. Nambo kuti cikamala tukusosekwa kucisamalilaga. Mpela mwayiŵelele kuti nganiyiŵa yikombolece kuŵa cijumi pali pangali mesi, yili yangakombolekasoni kuŵa paunasi ni Yehofa tuli ŵangali cikulupi.—Alom. 1:17.
3. Ana Yehofa atupele cici pakusaka kulimbikasya cikulupi cetu, soni ana yindu yiŵili yapi yatukusosekwa kuyikumbucilaga?
3 Yehofa akusamanyilila kuti m’weji tukusosekwa cikulupi, soni akusamanyilila kuti nganiyiŵa yamasanje kuti mundu akole cikulupi ni kwendelecela kucisamalila moŵa agano. Lyelelyo ni ligongo lyakwe jwalakwe atupele yisyasyo ya ŵandu ŵakuti twasyasyeje. Ni cikamucisyo ca Yehofa, Paulo ŵalembile kuti, “Ŵasyasyeje ŵandu ŵele mwacikulupi soni mwakuwusimana mtima akupocela yindu yaŵasalile Mlungu.” (Ahe. 6:12) Ni ligongo lyakwesoni likuga lya Yehofa liŵele mkutulimbikasya kuti tulinjejelinjeje kusyasya acalume ni acakongwe ŵakulupicika, mpela ŵatulijiganyisye m’buku ajino. Ana sambano jino tutendeje cici? Kwende tulole yindu yiŵili: (1) Tukusosekwa kwendelecela kulimbikasya cikulupi cetu; (2) Tukumbucileje yatukwembeceya msogolo.
4. Ana Satana alosisye catuli kuti ali mmagongo jwa cikulupi, nambo ana ligongo cici ngatukusosekwa kola woga?
4 Tukusosekwa kwendelecela kulimbikasya cikulupi cetu. Mmagongo jwamkulungwa jwa cikulupi ali Satana. Jwalakwe mpela jwakulamulila jwa cilamboci, atendekasisye kuti yakutendekwa ya m’cilamboci yiŵe mpela cipululu campaka cijonanje cikulupi cetu. Jwalakwe ali jwamacili kupunda m’weji. Ana tukoleje woga wakuti yili yangakomboleka kola cikulupi soni kucilimbikasya? Iyayi. Yehofa akusiŵanonyela mnope ŵandu ŵakusasosaga kola cikulupi cisyesyene. Jwalakwe akusatusimicisya kuti cacitukamucisya kumsisya Satana soni cacitutila. (Yak. 4:7) Mpaka tumsisye Satana mwakupata ndaŵi lisiku lililyose jakulimbikasya cikulupi cetu. Ana mpaka tutende yeleyi catuli?
5. Ana acalume ni acakongwe ŵacikulupi ŵa m’Baibulo ŵaŵele catuli ni cikulupi? Atagulile.
5 Mpela mwatuyiwonele, acalume ni acakongwe ŵacikulupi ŵa m’Baibuloŵa nganapagwa ali ŵakulupicika. Jemanjaji ali yisyasyo yakulosya kuti msimu weswela wa Yehofa wakamucisyaga kuti akole cikulupi. (Aga. 5:22, 23) Ŵam’ŵendaga Yehofa kuti ŵakamucisye. Yakuyicisya yakwe yaliji yakuti Yehofa ŵakamucisyaga kola cikulupi cakulimba. Kwende twasyasyeje jemanjaji, soni tukaliŵalila kuti Yehofa akusapeleka msimu wakwe mwakoloŵa makono kwa wosope ŵakusam’ŵenda soni ni kutenda yindu mwakamulana ni mapopelo gawo. (Luk. 11:13) Ana panasoni yine yampaka tutende?
6. Ana mpaka tutende cici kuti kulijiganya Baibulo kwetu kuŵeje kwakamucisya mnope?
6 M’bukuji tutagulilene ya ŵandu ŵakuŵalanjika ŵaŵalosisye cisyasyo cambone pakwamba ya cikulupi. Nambo panasoni ŵane ŵajinji. (Aŵalanje Ahebeli 11:32.) Patukulijiganya mwakusokoka ya jwalijose mwa jemanjaji yicitukamucisya kuti tukole cikulupi cakulimba. Naga tukwamba kuŵalanga ngani sya ŵandu ŵacikulupiŵa mwakuwutuka, nikuti ngasitulimbikasya cikulupi cetu. Kuti kuŵalanga ngani sya jemanjaji kuŵeje kwakamucisya, tukusosekwa kupata ndaŵi jakwanila jakulijiganya mwakusokoka mnope ya nganijo soni kupikanicisya muyaŵelele yindu pa umi ŵa jemanjaji. Naga ndaŵi syosope tukusakumbucila kuti jemanjaji ŵaliji ŵandu ŵangali umlama soni kuti ‘ŵaliji ŵandu mpela m’weji,’ nikuti yaŵatesile jemanjaji yiciŵa yisyesyene kwa m’weji. (Yak. 5:17) Nambosoni mpaka tupikanicisye muŵapikanilaga jemanjaji paŵasimanaga ni yakusawusya yakulandana ni yatukusasimana nayo m’weji.
7-9. (a) Ana ŵandu ŵacikulupi ŵa m’Baibulo akapikene catuli yikaŵe kuti akutumicila Yehofa mpela mwatukutendela moŵa agano? (b) Ana ligongo cici tukusosekwa kulimbikasya cikulupi cetu mwa yitendo yetu?
7 Tukusalimbikasyasoni cikulupi cetu ni yitendo yetu. Tukaliŵalila kuti Baibulo jikusati, “Cikulupi cangali yitendo yakwe cili cewe.” (Yak. 2:26) Agambe ganisya mwakasangalalile ŵandu ŵatutagulilene m’bukuji yikaŵe kuti apegwile masengo gatuŵendile Yehofa kuti tugatende moŵa agano?
8 Mwambone, mwakulekangana ni muŵalambililaga Yehofa pamalo gakupelecela mbopesi, Abulahamu akasangalele yikaŵe kuti akulambila Yehofa yimpepe ni likuga lyakamulana m’Nyumba sya Ucimwene syakusalala, soni m’misongano jekulungwa, acipikanilaga yilanga yaŵayiweni ‘pakutalicila’ ali mkuyitagulila mwakupikanika cenene. (Aŵalanje Ahebeli 11:13.) Mwakulekangana ni masengo gaŵampele Yehofa gakuwulaga ŵakulocesya ŵaunami ŵa Baala pasi pa ulamusi wa mwenye jakusakala, aganicisyesoni mwakasangalalile Eliya yikaŵe kuti agambile kumpa masengo gakwajendela ŵandu ni kwasalilaga utenga wakwatondoya soni wakupeleka cembeceyo. Mwangakayicila, ŵandu ŵakulupicikaŵa akajiciticisye mwacitema kumtumicila Mlungu mpela mwatukusatendelasoni moŵa agano.
9 M’yoyo tukusosekwa kwendelecela kulimbisya cikulupi cetu mwa yitendo yetu. Patukutenda yeleyi tuciŵa kuti tukwasyasya ŵandu ŵacikulupi ŵakusasimanikwa m’Maloŵe ga Mlungu. Mpela mutwasasile m’Maloŵe Gandanda ga m’bukuji, yeleyi yicitukamucisya kuti twawoneje jemanjaji kuŵa acimjetu ŵa pamtima. Nambosoni pacangakaŵapa jemanjaji caciŵa acimjetu ŵasyesyene.
10. Ana cacisangalala catuli mu Paladaiso?
10 Tukumbucileje yatukwembeceya msogolo. Acalume ni acakongwe ŵacikulupi aŵele ali mkulimbisya cikulupi cawo ligongo lya cembeceyo ciŵapele Mlungu. Ana jemanjasoni akusayiwonaga camti m’yoyo? Mwambone, aganisye cisangalalo cacicipagwa patucisimanasoni ni ŵakutumicila ŵakulupicika ŵa Mlungu ‘pakwimuka kwa ŵakulungama.’ (Aŵalanje Masengo 24:15.) Ana yiwusyo yapi yacacawusya jemanjajo?
11, 12. Ana m’cilambo casambano, yiwusyo yatuli yacacim’wusya (a) Abele? (b) Nowa? (c) Abulahamu? (d) Lute? (e) Abigayeli? (f) Esitele?
11 Ana pacacisimana ni Abele, cacisacilila kum’wusya yakwamba acinangolo ŵakwe? Kapena cacim’wusya kuti, “Ana pakwete pam’ŵecetene ni akelubi ŵaŵacenjelaga mgunda wa Edeni kuti ŵandu akajinjilagamo? Ana ŵamjangaga?” Nambi uli pakwamba ya Nowa? Mwine cacim’wusya kuti, “Ana nganimwajogopaga Anefili? Ana mwapakombolaga catuli kuyisamalila yinyama yosope yayaliji m’combo mula?” Pacacisimana ni Abulahamu, mwine cacim’wusya kuti, “Ana pakwete paŵasimene ni Semu? Ana ŵani ŵaŵamjiganyisye ya Yehofa? Soni ana kutyoka ngakuŵa kwakusawusya kwa wawojo?”
12 Kombolekasoni kuganicisyaga yiwusyo yacacawusya acakongwe ŵakulupicika ŵacacijimuka kuŵawe. Mpela Lute mwine cacim’wusya kuti, “Cici cacamtendekasisye kuti m’ŵe jwakulambila jwa Yehofa?” “Abigayeli mwine cacim’wusya kuti, “Ana nganimjogopaga kumsalila Nabala yakwamba cikamucisyo cimwampele Daudi?” Esitele mwine cacim’wusya kuti, “Ana camtendecele cici m’mwejo ni Moledekayi panyuma pa ngani syenu syasili m’Baibulo?”
13. (a) Ana ŵacacijimuka kuŵawe cacisaka kumanyilila yindu yatuli? (b) Ana akupikana wuli mumtima pakwembeceya kusimana ni ŵandu ŵakulupicika ŵakalakala?
13 Mwangakayicila ŵandu ŵakulupicikaŵa cacikolasoni yiwusyo yejinji yacaciwusya. Yiciŵa yakusangalasya kwasalila jemanjaji yakwamba mugaŵelele moŵa gambesi soni muŵatite Yehofa kwakamucisya ŵandu ŵakwe pandaŵi jakusawusyaji. Soni cacisangalala mnope kumanyilila muŵatite Yehofa kwanilisya yilanga yakwe yosope. Mu cilambo casambano ngasiyiŵa yakusawusya kuganicisya ya ŵakutumicila ŵa Mlungu ŵakala ŵaŵakolasile m’Baibulo, ligongo tucitamaga nawo yalumo. M’yoyo, kwende tutendeje yiliyose yampaka tuyikombole kuti jemanjaji aŵeje mpela acimjetu ŵasyesyene. Tusyasyeje cikulupi cawo. Kwende twawoneje jemanjaji mpela acimjetu ŵatukutumicila nawo Yehofa mwakusangalala mpaka kalakala.
