ŴANDU ŵajinji akusasala kuti akwete chikulupi. Nambo Yesu ŵasasile kuti ŵandu ŵakuŵalanjikape ni ŵachachikola chikulupi chisyesyene. Jwalakwe ŵaŵechete kuti: “Jinjilani pachipata chakuŵijikana, pakuti chipata chili cha chitipa, ni litala lyakwe lili lyangasausya lyele lyalikulongolela ku wonasi, nipo ŵandu ŵele ŵakupita ali ŵajinji. Nambo chipata chakwinjila ku umi chili chakanganika, ni litala lyakwe lili lyakusawusya, ŵandu ŵele ŵakulisimana ali ŵakuŵalanjika.”—Mateyu 7:13, 14.

Ana masiku agano ŵandu akusalosya chamtuli kuti akwete chikulupi chisyesyene? Yesu ŵaŵechete kuti: “Timchamanyilila ni yisogosi yawo, ayo yili yitendo yawo. Ana mkusakaŵa mipeleya mu msondoka, kapena nguju mu mkolokolo? Iyoyopeyo soni chitela chilichose chambone chikusogola yisogosi yambone, nambo chitela changalumbana chikusogola yisogosi yangalumbana.” (Mateyu 7:16, 17) M’yoyo, chikulupi chisyesyene chikusasogola “yisogosi yambone.” Chikusakamuchisya ŵandu kola ndamo syakusaka Mlungu kuti ŵandu akoleje. Ana chikusakamuchisya chamtuli?

Ŵandu ŵakwete chikulupi chisyesyene akusakamulichisya masengo machili gawo pakumchimbichisya Mlungu, soni pakwakamuchisya ŵane. Yesu ŵatite, “Pakuti jwalijose jwakusaka kuŵa jwamkulungwa pasikati penu aŵeje jwakutumichila jwenu.” (Maliko 10:43) M’yoyo, achalume ŵakwete chikulupi chisyesyene ngakusakamulichisya masengo machili gawo mwangalwe mwiŵasa mwawo kapena kwa ŵane. Akusanonyela achiŵamkwawo, akusiŵapa uchimbichimbi, soni akusiŵapaga yakusosechela yawo. Malemba gakusaŵecheta kuti, “Achalumemwe, mwanonyeleje achiŵamkwenu, nipo mkasimwatendelaga ngalwe.” (Akolose 3:19) “Ŵanganyamwe achalume ŵalombelemwe, mbajilwene kutama ni achiŵamkwenu ni umanyilisi usyene kuti ali mtundu wakulopotoka. Mwatendeleje uchimbichimbi, pakuŵa nombe nawo tachipochela pampepe ni mmwejo mtuka wa umi wakutyochela kwa Mlungu. Mtendeje iyoyo, kasikawoneka kane kakumlekasya mapopelo genu.”—1 Petulo 3:7.

Nambosoni, jwamkongwe jwakwete chikulupi chisyesyene ‘akusakumbuchila kwachimbichisya ŵamkwakwe.’ (Aefeso 5:33) Achakongwe akusosekwa “ŵanonyeleje achiŵamkwawo ni ŵanache ŵawo.” (Tito 2:4) Achatati ni achimmasyeto ŵakwete chikulupi akusapata ndaŵi jakwajiganya ŵanache ŵawo malamusi ga Mlungu ni maloŵe gakwe gakutulongola. Akusiŵachimbichisya ŵane pali kunyumba, kumasengo, soni kwine kulikose. Akusakuya maloŵe ga m’Malemba gakuti: “Mkuchimbichisyana mumbicheje mjenu pawujo.”—Aloma 12:10.

Ŵakutumichila Mlungu akusakuya chilamusi cha m’Malemba chakuti, “Mkapochela yipupu.” (Ekisodo 23:8) Ŵangakamulichisya masengo ukumu wawo pakusaka kupata kane kakwe. Nambo, akusalingalinga kwakamuchisya ŵane, mnopemnope ŵakusosekwa chikamuchisyo. Akusapikanila maloŵe gakuti: “Mkasimliŵalila kutenda yambone ni kusyoŵekana pakuŵa kutenda iyoyoku jili mbopesi jakwasangalasya Mlungu.” (Ahebeli 13:16) Myoyo, akusayiwona yaŵasasile Yesu kuti: “Kupeleka kukutupa upile kulekangana ni kupochela.”—Masengo 20:35.

Ŵandu ŵa chikulupi chisyesyene akusapikanila mwakusangalala malamusi ga Mlungu,  soni kwa jemanjajo “malamulo gakwe nganigaŵa kose gakusitopa.” (1 Yohane 5:3) Akusamanyilila kuti “Chilamusi cha Yehofa chili chamlama, . . . Malamusi ga Yehofa gali gagoloka, gakutendekasya mtima kusangalala; Lilamusi lya Yehofa lili lyeswela, lyakutendekasya meso kuŵala.”—Salimo 19:7, 8.

Chikulupi chisyesyene chikusatendekasyasoni jemanjaji kuŵambala mtundu wuliwose wa lusagu. Ŵangawuwona mtundu wine, chilambo chine, kapena upate wa mundu jwine kuŵa wakusosekwa mnope kupundana ni wine, nambo mmalo mwakwe akusamsasya Mlungu. “Mlungu jwangali lusagu kwa mundu jwalijose, nambo mundu mwalukosyo lulilose, jwelejo jwakumjogopa ni kutenda yambone, Mlungu akumpochela, yangali kandu kuti ali jwa lukosyo lwati uli.”—Masengo 10:34, 35.

Chikulupi chisyesyene chikusatendekasya ŵandu ‘kusosa kutenda yosope mwachilungamo.” (Ahebeli 13:18) Mundu jwakwete chikulupi akusaŵambalasoni kwasogoda ŵane, soni mabosa. Pakwamba ya mtundu wa ŵandu ŵakusiŵanonyela Mlungu, Daudi ŵalembile kuti: “Nganaŵecheta yakumlambuchisya mjakwe ni lulumi lwakwe. Ngamtendela chakusakala chilichose mjakwe.”—Salimo 15:3.

Yakusakulupilila ŵakwete chikulupi chisyesyene yikusatyochelaga M’malemba Geswela. Akusakulupilila kuti, ‘yosope yayili m’Malemba yapelechedwe ni Mlungu, yili yakamuchisya pakwiganya usyenesyene, pakwamuka, pakolosya, nipo soni pakwalanjisya ŵandu ya chilungamo.’ (2 Timoteo 3:16) Katame kawo ni ŵandu kakusalosya, “lunda lwakutyochela kwinani,” lwaluli “lwakulenjela, konjechesya pelepo, luli lwamtendele, lwakuweŵa, ni lwakupikana chenene. Lwegumbale ni chanasa chapawinji, nipo yisogosi yakwe yambone yili yapawinji.” (Yakobo 3:17) Akusaŵambala ndamo syakusakala sya ŵandu, ni yamisimu, soni akusaŵambala kulambila milungu jakukupanganyidwa.”—1 Yohane 5:21.

Jwakulochesya Musa ŵaŵechete kuti, “Mumnonyeleje Yehofa Mlungu jwenu ni mtima wenu wosope, ni umi wenu wosope, ni machili genu gosope.” (Detulonomo 6:5) Ŵandu ŵakwete chikulupi akusalosya chinonyelo mpela chelechi kwa Mlungu. Akusachimbichisyaga lina lya Mlungu lyakuti Yehofa. Jemanjaji “akusamtogolela Yehofa,” soni mwa chikulupi ‘akusaŵilanjila pa lina lyakwe.’ (Salimo 105:1) Ŵakutumichila Mlungu akusapikanilasoni lilamusi lyakwe lyakuti, “Mumnonyeleje mjenu mpela mwamkusalinonyela mwasyene.” (Lefitiko 19:18) Ngakusiŵatendelaga ŵane yangalwe kapena ya chiwawa, soni akusalingalinga kutama “mwamtendele ni ŵandu wosope.” (Aloma 12:18) Mwakuwanichisya “jemanjajo akusasyana mawupanga gawo kuti gaŵe yakulimila, ni mikondo jawo kuti jiŵe yikwakwa.” (Yesaya 2:4) Yakuyichisya yakwe yili yakuti ‘akusanonyelana,’ soni akusasangalala ni unasi wa pachilambo chosope. (Yohane 13:35) Ana mpaka yikomboleche kwamanyilila ŵandu ŵeleŵa masiku agano?