Jweleju ali Yesu Petumbi lya Maolifi. Acalume mcece ŵali nawoŵa ali ŵandumetume ŵakwe. Andileya ni Petulo ali ŵapaulongo, soni Yakobo ni Yohane nombenawo ali ŵapaulongo. Capalutandopo akujiwona nyumba jakulambilila ja ku Yelusalemu.

Papite masiku gaŵili Yesu cijinjilile mu Yelusalemu ali akwesile mwanace jwa bulu jila. Sambano lili Lyaŵili. Kundaŵi kwa lisikuli Yesu ŵaliji kunyumba jakulambilila. Paŵaliji kweleko ŵambopesi ŵasakaga kuti amkamule Yesu ni kum’wulaga. Nambo ŵajogopaga kutenda yeleyi ligongo ŵandu ŵamnonyelaga Yesu.

‘Majokamwe soni ŵanace ŵamajoka!’ Yesu akwakolanga m’yoyo acimlongola ŵa dini. Soni Yesu akwasalila kuti Mlungu cacapa cilango ligongo lya yindu yakusakala yatesile. Kaneko Yesu akukwela penani pa litumbi lya Maolifi. Ni ŵandumetume mceceŵa akutanda kum’wusya yiwusyo. Ana akumanyilila yakum’wusya Yesu?

Ŵandumetumeŵa akuwusya yindu yayicitendekwa m’bujo. Jemanjaji akumanyilila kuti Yesu cacimasya yakusakala yosope pacilambo. Nambo akusaka kumanyilila ndaŵi jakwe. Ana Yesu caciyikasoni cakaci kukulamulila mpela Mwenye?

Yesu akumanyilila kuti ŵakulijiganya ŵakwe ngasakombola kum’wona pacaciyakagasoni pacilambo capasi. Yili m’yoyo ligongo jwalakwe caciŵa ali kwinani, ni jemanjajo ngasakombola kum’wona kwinaniko. M’yoyo Yesu akwasalila ŵandumetume ŵakwe yindu yayicitendekwaga pacilambo capasi pacacilamulilaga mpela Mwenye kwinani. Ana yine mwa yindu yeleyi yili yapi?

Yesu akusala kuti kuciŵa ngondo syekulungwakulungwa, ŵandu ŵajinji cacilwalaga, soni kuciŵa sala, yitendo yangalumbana yicitupa, soni kuciŵa yisicinya yekulungwakulungwa. Yesu akusalasoni kuti ngani syambone sya ucimwene wa Mlungu sicilalicikwa palipose pacilambo capasi. Ana tuyiweni yinduyi yili mkutendekwa mu ndaŵi jetu? Elo! Sambano mpaka tuŵe ŵakusimicisya kuti Yesu akulamulila sambano jino kwinani. Pacangakaŵapa jwalakwe camasye yakusakala yosope pacilambo capasici.