AMLOLE Yesu apano pajangete kamwanaceko. Pelepa komboleka kuyiwona kuti Yesu yisyene akusanonyela tuŵanace. Acalume ŵakulolawo ali ŵandumetume ŵakwe. Ana Yesu akwasalila cici ŵakulijiganyawo? Kwende tulole.

Yesu ni ŵandumetume ŵakwe agambile kuwuja kwene ku ulendo wawulewu. Paulendowo ŵandumetume ŵakwe ŵaliji mkukangana. Sambano paŵayice kwaŵajawulaga, Yesu akwawusya kuti: ‘Ana petala pala mwakanganaga ligongoci?’ Yesu akumanyilila ligongo lyakwe. Nambo akwamba kuwusya kuti alole naga ŵandumetume ŵakwewo mpaka amsalile.

Ŵandumetumewo ngakwanga, ligongo petalapo ŵaliji mkukangana kuti amanyilile jwali jwamkulungwa pasikati pawo. Ŵandumetume ŵane akusaka kuŵa ŵakusosekwa mnope kupunda acimjawo. Ana Yesu ciŵasalile catuli kuti ngaŵa yambone kuti mundu asaceje kuŵa jwamkulungwa?

Akukaŵilanga kamwanace kakalume, nikukajimika pameso pawo. Kaneko akuŵeceta kwa ŵandumetume ŵakwe kuti: ‘Ngusaka yisyene kuti amanyilile ayi, naga ngakusinda nikuŵa mpela mwanace, ngasajinjila mu ucimwene wa Mlungu. Mundu jwamkulungwa mnope mu ucimwene ali mundu jwakusaŵa mpela kamwanaceka.’ Ana akumanyilila ligongo lyakwe Yesu ŵaŵecete yeleyi?

Kamwanace kamwana kangadandawula kuti kaŵe jwamkulungwa, kapena kuti kaŵe kakusosekwa mnope kupunda ŵane. M’yoyo ŵandumetumewo akusosekwa kulijiganya kuŵa mpela ŵanace kuti akakanganilaga kuŵa jwamkulungwa kapena jwakusosekwa.

Sipali ndaŵi sinesoni, syakulosya Yesu kuti ŵatunonyelaga tuŵanace. Pali papite miyesi jakuŵalanjika ŵandu ŵane akwika ni ŵanace ŵawo kwa Yesu kuti amlole. Ŵandumetume akulingalinga kwatopola. Nambo Yesu akwasalila ŵandumetume ŵakwewo kuti: ‘Ŵakunde ŵanace ayice kwa une, soni akasiŵalekasya, ligongo ucimwene wa Mlungu uli wa ŵandu mpela tuŵanacetu.’ Kaneko Yesu akwanyakula ŵanacewo m’miyala mwakwe, nikwajaliwa. Ana ngaŵa yakusangalasya kumanyilila kuti Yesu akusanonyela tuŵanace?