DAUDI paŵagambile kum’wulaga Goliyati, Abineli mlongola jwa asilikali ŵamjigalile Daudi kwa Sauli. Sauli ŵasangalele mnope ni Daudi. Jwalakwe ŵam’ŵisile Daudi kuŵa mlongola jwa asilikali ŵakwe, soni ŵamjigele kuti atameje kunyumba jakwe ja ucimwene.

Kaneko, asilikali pakuwuja kukuputana ngondo ni Afilisiti, acakongwe akwimba nyimbo kuti: ‘Sauli ŵawuleje masawusande, nambo Daudi masawusande gamajinji.’ Yeleyi Sauli yikumtendekasya jelasi, ligongo lyakuti ŵandu akumpa Daudi ucimbicimbi mnope kupundana ni Sauli. Nambo Yonatani mwanagwe Sauli ngakutenda jelasi. Jwalakwe akumnonyela mnope Daudi, nombe najo Daudi akumnonyela Yonatani. Sambano ŵaŵiliŵa akulangana cilangano cakuti caciŵa mundu ni mjakwe ndaŵi syosope.

Daudi akukombola kwimba cenene pangwe, ni Sauli akusinonyela nyimbo syakwimba Daudi. Nambo lisiku line Sauli akutenda jelasi, nipo yeleyi yikumtendekasya kutenda cindu cakogoya. Daudi pakwimba pangwe, Sauli akujigala lipanga nikuliponya ali mkuŵeceta kuti: ‘Cinjimsomela pampepe kulipupa Daudi!’ Nambo Daudi akulisyemba ni ngalikumsoma lipangalyo. Sambano Daudi akumanyilila kuti akusosekwa kuŵa jwakusamala.

Ana akukumbucila cilangano caŵatesile Sauli? Ŵasasile kuti mundu jwakam’wuleje Goliyati akampele mwanagwe jwamkongwe kuti aŵe ŵamkwakwe. Kaneko Sauli akumsalila Daudi kuti camjigale Mikala mwanagwe, nambo candanda awulaje kaje Afilisiti ŵane ŵakwana 100. Agambe ganisya yeleyi! Sauli akukulupilila kuti Afilisiti cacim’wulaga Daudi. Nambo akulepela kum’wulaga, ni Sauli akumpeleka mwanagwe jula kwa Daudi kuti aŵe ŵamkwakwe.

Lisiku line Sauli akumsalila Yonatani ni ŵamasengo ŵakwe wosope kuti akusaka kum’wulaga Daudi. Nambo Yonatani akwasalila babagwe kuti: ‘Akam’wulaga Daudi. Jwalakwe nganatenda cakulemweceka cilicose. Nambo, yiliyose yatesile yili yakwakamucisya wawojo. Jwalakwe ŵaŵisile umi wakwe pangosi mwakum’wulaga Goliyati, soni wawojo paŵayiweni yeleyi ŵaliji ŵakusengwa.’

Sauli akumpikanila mwanagwe, soni akusimicisya kuti ngasam’wulaga Daudi. Daudi akuwujilasoni kunyumba ja Sauli, ni akutanda kumtumicila Sauli mpela muŵatendelaga pandanda. Nambope lisiku line, Daudi ali mkwimba nyimbo syakwe, Sauli akuponyasoni lipanga kwa Daudi. Daudi akulisyemba, ni lipangalyo likusoma lipupa. Aka kali katatu kutendekwa yeleyi! Sambano Daudi akumanyilila kuti akusosekwa kutila!

Lisiku lilyolyo cilo Daudi ŵapite kunyumba jakwe. Nambo Sauli akwatuma acalume kuti akam’wulaje. Mikala akumanyilila yakusaka kutenda babagwe. Ni akwasalila ŵamkwakwe kuti: ‘Naga wawo ngakutila cilo cino, malaŵi caŵe ali awile.’ Cilo cicoco Mikala akumkamucisya Daudi kutilila paliwindo. Kwayaka ciŵandika msano ni yiŵili Daudi ŵasosekwaga kuuŵa malo gakulekanganalekangana kuti Sauli akampata.