LIJIGANYO 55
Awukamuchisyeje Mpingo Wawo
Pachilambo chosope, ŵakutumichila ŵa Yehofa akumtumichila jwalakwe mwakusangalala m’mipingo jakusasongana. Jemanjaji akusayamichila yindu yakusalijiganya soni akusawukamuchisya mpingo mwakusachilila mmatala gakulekanganalekangana. Ana wawojo akusaŵaga ŵakusachilila kuwukamuchisya mpingo?
1. Ana mpaka akamulichisye masengo chamtuli ndaŵi soni machili gawo pakuwukamuchisya mpingo?
Wosopewe mpaka tuwukamuchisye mpingo. Mwachisyasyo, ana mumpingo mwawo mwana ŵakalambale soni ŵakulwala? Ana mpaka ŵakamuchisye kuti asimanikweje pamisongano? Ana kapena pana yine yampaka atende kuti ŵakamuchisye, mpelaga kwasumila yindu kapena kwakamuchisya masengo ga panyumba? (Aŵalanje Yakobo 1:27.) Mpaka tukamuchisyesoni kuswejesya soni kulinganya yindu yayijonasiche pa Nyumba ja Uchimwene. Pangali jwampaka atukanganichisye kutenda yeleyi. Kumnonyela Mlungu soni abale ŵetu ni kwampaka kutulimbikasye ‘kulipeleka [achimsyewe].’—Salimo 110:3.
Panasoni yindu yine yampaka atende Aklistu ŵabatisidwe pakusaka kuwukamuchisya mpingo. Abale ŵakuŵajilwa mwausimu mpaka atumichile mpela ŵakutumichila ŵakamuchisya, soni mkupita kwandaŵi mpaka aŵe achakulungwa ŵa mumpingo. Yili yakombolekasoni abale ni alongo kukamuchisya mwakwanila masengo gakulalichila mwakutumichila mpela apayiniya. Abale ni alongo ŵane mpaka akamuchisyeje nawo pamasengo gakutaŵa malo gakusonganila kapena mpaka ajawule kukutumichila ku mipingo kwakukusochesechela chikamuchisyo.
2. Ana mpaka tukamulichisye masengo chamtuli yindu yetu pakuwukamuchisya mpingo?
Mpaka ‘twachimbichisye AMBUJE ni yipanje yetu.’ (Misyungu 3:9) Tukusawuwona kuŵa upile wekulungwa kamulichisya masengo mbiya syetu soni yindu yine pakamuchisya mpingo soni masengo gakulalichila ga pachilambo chosope chapasi. (Aŵalanje 2 Akolinto 9:7.) Yakupeleka yetu, yikusakamuchisyasoni pasitendekwe ngosi syachilengedwe. Ŵandu ŵajinji akusasagula kuti “aŵicheje pajika” kanekakwe kakuti akapeleche ku mpingo. (Aŵalanje 1 Akolinto 16:2.) Mpaka tupeleche yakupeleka m’mabokosi gagakusaŵa mmalo gatukusalambila kapena kupitila donate.jw.org pa webusayiti jetu. Yehofa akusasaka kuti tulosyeje kuti tukusamnonyela patukamulichisya masengo yindu yetu pakamuchisya mpingo.
KULIJIGANYA YEJINJI
Chitulijiganye yampaka tutende pakuwukamuchisya mpingo.
3. Mpaka tukamulichisye masengo yindu yetu
Yehofa ni Yesu akusasangalala ni ŵandu ŵakusapeleka ni mtima wosope. Mwachisyasyo, Yesu jwamyamichile jwamkongwe jwamasije juŵatesile yakomboleka kupeleka tumbiya twamnono kwa Yehofa. Aŵalanje Luka 21:1-4, kaneko akambilane yiwusyo ayi:
-
Ana tukusasosechela kupeleka mbiya syejinji kuti tumsangalasye Yehofa?
-
Ana Yehofa soni Yesu akusapikana wuli mumtima patukupeleka mwakusangalala?
Kuti amanyilile masengo ga mbiya syatukusapeleka, alolele FIDIYO. Kaneko akambilane chiwusyo achi.
-
Ana yakupeleka yetu, yikusakamuchisya mwamtuli mipingo ja pachilambopa?
4. Mpaka tutende yiliyose pakamuchisya
Kalakala, ŵakutumichila ŵa Yehofa ŵakamulaga masengo mwakulimbichila pakulinganya malo gakulambilila. Yeleyi yapwatikagapo yejinji ngaŵa kwamba kupeleka mbiya. Aŵalanje 2 Mbili 34:9-11, kaneko akambilane chiwusyo achi:
-
Ana mwisalayeli jwalijose jwatendaga yamtuli pakusamalila nyumba ja Yehofa kapena malo gakulambilila?
Kuti alole yakusatenda ŵa Mboni sya Yehofa pakukuya chisyasyo cha ŵandu ŵakala, alolele FIDIYO. Kaneko akambilane yiwusyo yakuyichisyayi.
-
Ligongo chichi yili yakusosekwa kuti Nyumba syetu sya Uchimwene siŵeje syachasa soni syakuwoneka chenene?
-
Ana mpaka akamuchisye nawo mwamtuli?
5. Abale mpaka atende yakuti aŵajilwe maudindo
Malemba gakusalimbikasya abale kutenda yiliyose yampaka akombole kuti aŵajilwe maudindo pakusaka kuwukamuchisya mpingo. Kuti alole chisyasyo pa nganiji, alolele FIDIYO. Kaneko akambilane chiwusyo chakuyichisyachi.
-
Mu fidiyoji, ana m’bale Layani jwatesile yamtuli kuti awukamuchisyeje mpingo mwakwanila?
Baibulo jikusasala yindu yakusosekwa mundu kutenda kuti aŵe jwakutumichila jwakamuchisya kapena jwamkulungwa jwamumpingo. Aŵalanje 1 Timoteo 3:1-13, kaneko akambilane yiwusyo ayi:
JWINE MPAKA ŴAWUSYE KUTI: “Ana ŵa Mboni sya Yehofa akusapata mwamtuli mbiya syakwendechesya masengo gawo?”
-
Ana mpaka ajanje yamtuli?
YALIJIGANYISYE
Yehofa akusayamichilaga mnope patukamulichisya masengo ndaŵi, machili soni yindu yetu pakuwukamuchisya mpingo.
Yiwusyo Yakuwilisya
-
Ana mpaka tukamulichisye masengo chamtuli ndaŵi soni machili getu pakuwukamuchisya mpingo?
-
Ana mpaka tukamulichisye masengo chamtuli yindu yetu pakuwukamuchisya mpingo?
-
Ana wawojo akusaka kuwukamuchisya mpingo mwamtuli?
YAKULINGA YINESONI
Amanyilile ligongo lyakwe Mlungu jwangasakasoni kuti ŵakutumichila ŵakwe apelecheje chalikumi.
“Ana Baibulo Jikusasala Yamtuli Pakwamba ya Chakupeleka Chalikumi?” (Ngani ja pa intaneti)
Baibulo jikusasala kuti pana masengo gane gagakusasosekwa kukamulidwa ni achalume ŵabatisidwe. Nambo ana yili yakomboleka achakongwe ŵabatisidwe kukamula masengoga?
“Tumanyilileje Udindo Watukwete Mumpingo” (Sanja ja Mlonda ja Febuluwale, 2021)
Alole yiŵatendaga abale pakulosya kulimba mtima pakutumisya mabuku kwa ŵakulupilila achimjawo.
Kugaŵila Mabuku Gakusala ya Baibulo m’Cilambo ca Congo (4:25)
Amanyilile mwatukusapatila mbiya syakamuchisya pa masengo getu yayili yakulekangana mnope ni yagakusatendaga madini gane.
Mwine Mpaka Ayisache Ayi
YIWUSYO YAKUSANONYELA ŴANDU KUWUSYA
Ana Ljiganyo lya Baibulo Lyakusatendesya Ŵamboni sya Yehofa Likusatendekwa Mwamtuli?
Muyakambilana ni Ŵamboniyi akwete ufulu ŵakamulichisya masengo Baibulo jawo. Yili yakomboleka kwaŵilanga achimjawo soni ŵamwiŵasa mwawo kuti atende nawo lijiganyoli.
