LIJIGANYO 08
Ana Mpaka Aŵe Paunasi ni Yehofa?
Yehofa akusasaka kuti wawojo ammanyilile chenene. Ligongo chichi? Jwalakwe akusasaka kuti wawojo amanyilile ndamo syakwe, yakusatenda soni chakulinga chakwe. Yeleyi mpaka yalimbikasye kuti aŵe najo paunasi. Ana yili yakomboleka kuŵa paunasi ni Mlungu? (Aŵalanje Salimo 25:14.) Ana akusosekwa kutenda chichi kuti aŵe najo paunasi? Baibulo jikusajanga yiwusyoyi. Jikusasalasoni kuti kuŵa paunasi ni Mlungu kuli kwambone mnope kupunda unasi uliwose.
1. Ana Yehofa akwaŵenda kuti atende chichi?
‘Amŵandichile Mlungu, nipo jwalakwe tachaŵandichila jemanja.’ (Yakobo 4:8) Ana yeleyi yikugopolela chichi? Yehofa akwaŵenda wawojo kuti aŵe najo paunasi. Ŵandu ŵane akusaganisya kuti yili yangakomboleka kuŵa paunasi ni Mlungu ligongo jwalakwe ali jwangawoneka. Nambope m’Baibulo, Yehofa akusatusalila yatukusosekwa kutenda kuti tumanyilile ndamo syakwe ni chakulinga chakuti tuŵe najo paunasi. Patukuŵalanga Baibulo, unasi wetu ni Yehofa ukusakula atamose kuti nganitumwoneje.
2. Ligongo chichi kuŵa paunasi ni Yehofa kuli kwambone mnope?
Pangali mundu jwakusiŵanonyela mnope wawojo kupunda Yehofa. Jwalakwe akusasaka kuti wawojo asangalaleje soni kuti amŵendeje naga akusaka chikamuchisyo. Mpaka ‘atule pa jwalakwejo yidandaulo yawo yosope, pakuti jwalakwejo ni jwakusiŵasamalila jemanja.’ (1 Petulo 5:7) Ndaŵi syosope Yehofa akusaŵa jwakoseka kwakamuchisya, kwalimbikasya soni kwapikanila ŵandu ŵali nawo paunasi.—Aŵalanje Salimo 94:18, 19.
3. Ana Yehofa akusasaka kuti ŵandu ŵali najo paunasi atendeje chichi?
Yehofa akusiŵanonyela ŵandu wosope, “nambo ŵandu ŵakulungama” ni ŵakusiŵanonyela mnope. (Misyungu 3:32) Yehofa akusajembecheya kuti ŵandu ŵali paunasi ni jwalakwe atendeje yindu yambone soni aŵambaleje kutenda yindu yakusakala. Ŵandu ŵane akusaganisya kuti yili yangakomboleka kutendaga yindu yambone yakusasaka Yehofa, soni kuŵambala yindu yakusakala. Nambope Yehofa akusatupikanichisya. Jwalakwe akusampochela jwalijose jwakusamnonyela yisyesyene soni jwakusalingalinga kutenda yakumsangalasya.—Salimo 147:11; Masengo 10:34, 35.
KULIJIGANYA YEJINJI
Chitulijiganye mwampaka tuŵele paunasi ni Yehofa soni ligongo lyakwe kuŵa paunasi ni jwalakwe kuli kwambone mnope.
4. Abulahamu jwaliji paunasi wambone ni Yehofa
Ngani ja Abulahamu (juŵamanyikagasoni kuti Abulamu) jikusatukamuchisya kupikanichisya yayikusagopolela kuŵa paunasi ni Mlungu. Aŵalanje ngani ja Abulahamu pa Genesesi 12:1-4. Kaneko akambilane yiwusyo ayi:
-
Ana Yehofa ŵamŵendile Abulahamu kutenda chichi?
-
Ana Yehofa ŵamsalile kuti chamtendele chichi?
-
Ana Abulahamu ŵatesile chichi Yehofa paŵamsalile yakuti atende?
5. Ana Yehofa akusajembecheya chichi kwa ŵandu ŵali najo paunasi?
Ndaŵi syosope tukusajembecheya yindu yine yakwe kutyochela kwa achimjetu.
-
Ana wawojo akusajembecheya yamtuli kutyochela kwa achimjawo?
Aŵalanje 1 Yohane 5:3, kaneko akambilane chiwusyo achi:
-
Ana Yehofa akusajembecheya yamtuli kutyochela kwa ŵandu ŵali najo paunasi?
Kuti tumpikanileje Yehofa, tukusosekwa kuchenga ndamo syetu. Aŵalanje Yesaya 48:17, 18, kaneko akambilane chiwusyo achi:
-
Ligongo chichi Yehofa akusasaka kuti ŵandu ŵali paunasi ni jwalakwe achenje ndamo syawo?
Mjetu jwambone akusatukumbusya kutenda yindu yampaka yitukamuchisye soni kutuchenjela. Yehofa akusatendasoni yeleyi kwa ŵandu ŵali najo paunasi.
6. Ana Yehofa akusiŵatendelaga yamtuli ŵandu ŵali paunasi ni jwalakwe?
Yehofa akusiŵakamuchisya ŵandu ŵali paunasi ni jwalakwe kuti apilileje yakusawusya. Alolele FIDIYO, kaneko akambilane chiwusyo achi.
-
Ana Yehofa ŵamkamuchisye uli jwamkongwe jwa mu fidiyoji kulimbana ni kulagasika nganisyo?
Aŵalanje Yesaya 41:10, 13, kaneko akambilane yiwusyo ayi:
-
Ana Yehofa chachatendela chichi ŵandu wosope ŵali najo paunasi?
-
Ana akuganisya kuti kuŵa paunasi ni Yehofa kuli kwambone mnope? Ligongo chichi akwanga myoyo?
Mjetu jusyesyene akusatukamuchisya pandaŵi jatukusaka chikamuchisyo. Yehofa chachakamuchisyasoni wawojo.
7. Kuŵa paunasi ni Yehofa kukusapwatikapo kuŵechetana najo
Kuti unasi uŵe ŵakulimba ni mundu jwine, pakusasosekwa kuŵechetanaga. Aŵalanje Salimo 86:6, 11, kaneko akambilane yiwusyo ayi:
-
Ana mpaka tuŵechetane ni Yehofa chamtuli?
-
Ana Yehofa akusaŵechetana chamtuli ni m’weji?
Tukusaŵechetana ni Yehofa kupitila mwipopelo. Yehofa akusaŵecheta ni m’weji kupitila m’Baibulo
YAKUSAŴECHETA ŴANDU ŴANE: “Yili yangakomboleka kuŵa paunasi ni Mlungu.”
-
Ana lilemba lyapi lyampaka akamulichisye masengo pakwasimichisya ŵandu ŵakusakayichila yakuŵa paunasi ni Mlungu?
YALIJIGANYISYE
Yehofa akusasaka kuti aŵe najo paunasi soni mpaka ŵakamuchisya kutenda yeleyo.
Yiwusyo Yakuwilisya
-
Ana Yehofa akusiŵakamuchisya chamtuli ŵandu ŵali najo paunasi?
-
Ligongo chichi Yehofa akusasaka kuti ŵandu ŵali najo paunasi achenje ndamo syawo?
-
Ana yili yakusawusya kuŵa paunasi ni Yehofa? Ligongo chichi akwanga myoyo?
YAKULINGA YINESONI
Ana kuŵa paunasi ni Mlungu, mpaka kukwaye uli umi wawo?
“Umbone Wakummanyilila Yehofa Mlungu” (Sanja ja Mlonda, Febuluwale 15, 2003)
Alijiganye yakusosekwa kutenda kuti aŵe paunasi ni Mlungu.
Alole ligongo lyakwe jwamkongwe jwine jwayiweni kuti kuŵa paunasi ni Yehofa kuli kwakamuchisya.
Ŵapikanileje ŵachinyamata pakusala nganisyo syawo pakwamba ya Yehofa.
You May Also Like
YIWUSYO YAKUSANONYELA ŴANDU KUWUSYA
Ana Ljiganyo lya Baibulo Lyakusatendesya Ŵamboni sya Yehofa Likusatendekwa Mwamtuli?
Muyakambilana ni Ŵamboniyi akwete ufulu ŵakamulichisya masengo Baibulo jawo. Yili yakomboleka kwaŵilanga achimjawo soni ŵamwiŵasa mwawo kuti atende nawo lijiganyoli.
