LIJIGANYO 16
Ana Yesu Ŵatesile Yamtuli ali Pachilambo Chapasi?
Ŵandu ŵajinji akusammanyililaga Yesu. Nambo ŵane akusagamba kumanyilila yayatendekwe paŵaliji likandi. Ŵane akusammanyilila kuŵa jwakulochesya jwalunda, pele ŵane akusagamba kumanyilila yakwamba chiwa chakwe. Nambo mpaka tulijiganye ya jwalakwe patukuwungunya yajwatesile ali pachilambo chapasi. Mu nganiji, chitukambilane yindu yakusosekwa mnope yajwatesile Yesu. Soni chitulole kusosekwa kwa yindu yeleyi paumi wetu.
1. Ana ni masengo gapi gagaliji gakusosekwa mnope kwa Yesu?
Masengo gakusosekwa mnope ga Yesu galiji “kulalichila Ngani Syambone syakwamba ya Uchimwene wa Mlungu.” (Aŵalanje Luka 4:43.) Jwalakwe jwalalichile kuti uchimwene wa Mlungu, kapena kuti boma jakwe jichimasya yipwetesi yosope yakusasimana nayo ŵandu. a Yesu jwalalichile ya ngani syambonesi kwa yaka yitatu ni hafu.—Mateyu 9:35.
2. Ana ligongo chichi Yesu jwatendaga yakusimonjesya?
Baibulo jikusasala yindu “ya machili, yakusimonjesya ni yimanyisyo” yiŵatesile Mlungu kupitila mwa Yesu. (Masengo 2:22) Ni machili ga Mlungu, Yesu jwakombwele kulekasya mbungo ja machili, kulisya ŵandu ŵajinji, kuposya ŵakulwala atamosesoni kwajimusya ŵandu ŵawe. (Mateyu 8:23-27; 14:15-21; Maliko 6:56; Luka 7:11-17) Yakusimonjesya yajwatesile Yesu yalosisye kuti Mlungu ŵamtumile jwalakwe. Yalosisyesoni kuti Yehofa akwete machili gakumachisya yakusawusya yetu.
3. Ana mpaka tulijiganye chichi kutyochela pa yaŵatendaga Yesu?
Yesu jwampikanilaga Yehofa pachilichose. (Aŵalanje Yohane 8:29.) Atamose kuti ŵandu ŵamsisyaga, nambope jwatendaga chilichose mwakulupichika chaŵamtumaga Atatigwe mpaka chiwa chakwe. Jwalakwe jwalosisye kuti yili yakomboleka ŵandu kumtumichila Mlungu atamose ali mkusimana ni yipwetesi. Myoyo, Yesu jwatulechele ‘chisyasyo kuti tukuyeje sajo syakwe.’—1 Petulo 2:21.
KULIJIGANYA YEJINJI
Chitukambilane yaŵatendaga Yesu pakulalichila ngani syambone soni pakutenda yakusimonjesya.
4. Yesu jwalalichile ngani syambone
Yesu jwajesile ma ulendo gelewu wapasi soni m’misewu ja luwundu kuti akalalichile utenga wambone kwa ŵandu ŵajinji. Aŵalanje Luka 8:1, kaneko akambilane yiwusyo ayi:
-
Ana Yesu jwalalichilaga kwa ŵandu pewo ŵaŵasonganaga kuti ampikanileje?
-
Ana Yesu jwatendaga yamtuli kuti ŵapate ŵandu ŵakwalalichila?
Mlungu jwasasile kuti Mesiya chachilalichilaga ngani syambone. Aŵalanje Yesaya 61:1, 2, kaneko akambilane yiwusyo ayi:
-
Ana Yesu jwakwanilisye uli maloŵe ga palilembali?
-
Ana akuganisya kuti masiku agano ŵandu akusosechela ngani syambone?
5. Yesu jwajiganyisye yindu yakusosekwa mnope
Kupwatika pakulalichila ngani syambone syakwamba Uchimwene wa Mlungu, Yesu jwajiganyisyesoni yindu yakusosekwa paumi. Kwende tukambilane yisyasyo yamnono kutyochela pa ulaliki wakwe wa petumbi. Aŵalanje Mateyu 6:14, 34 soni 7:12, kaneko akambilane yiwusyo ayi:
-
Ana ni yindu yapi yakusosekwa yajwasasile Yesu palilembali?
-
Ana akuganisya kuti yajwasasile Yesuyi yili yakamuchisya masiku agano?
6. Yesu jwatendaga yakusimonjesya
Yehofa ŵampele Yesu machili gakuti atendeje yakusimonjesya. Kuti alole chimo mwa yakusimonjesyayi, aŵalanje Maliko 5: 25-34 kapena alolele FIDIYO. Kaneko akambilane yiwusyo yakuyichisyayi.
-
Kutyochela mu fidiyoji, ana jwamkongwe jwakulwalaju jwakulupililaga chichi?
-
Ana ni chindu chapi chachikwasangalasya mu chakusimonjesyachi?
Aŵalanje Yohane 5:36, kaneko akambilane chiwusyo achi:
-
Ana yakusimonjesya yaŵatesile Yesu yalosisye “umboni” wamtuli wakwamba jwalakwe?
Ana akumanyilila?
Tukusamanyilila yejinji yakwamba umi wa Yesu kutyochela m’mabuku mcheche ga m’Baibulo gakumanyika kuti Ngani Syambone. Mabukuga gali Mateyu, Maliko, Luka soni Yohane. Ŵakulembaŵa ŵalembaga ngani syakulandana. Nambo pangani sine, ŵalondesyaga yejinji yakwamba Yesu kupunda mwalondechesye ŵakulemba ajawo. Yindu yaŵalembileyi yikusatukamuchisya kumanyilila yindu yakusangalasya yakwamba Yesu.
-
MATEYU
jwaliji jwandanda kulemba Ngani Syambone. Jwagombelechesye mnope yaŵajiganyaga Yesu, mnopemnope yakwamba Uchimwene wa Mlungu.
-
MALIKO
jwalembile buku jamwana mnope ja Ngani Syambone. Bukuji jikusatusalila yindu yejinji yakusangalasya yayatendekwe pandaŵijo.
-
LUKA
akusatusalila mwaŵajiwonelaga Yesu ngani ja lipopelo soni chanasa chiŵatendelaga achakongwe.
-
YOHANE
akusatusalila yindu yejinji yaŵasasile Yesu paŵaliji ni achimjakwe soni ŵandu ŵane. Yeleyi yikusatukamuchisya kumanyilila ndamo syaŵakwete Yesu.
YAKUSAŴECHETA ŴANDU ŴANE: “Yesu jwagambile kuŵa jumo mwa atumiki ŵa Mlungu.”
-
Ana akuganisya uli?
YALIJIGANYISYE
Yesu jwalalichilaga ya Uchimwene wa Mlungu, jwatendaga yakusimonjesya soni jwampikanilaga Mlungu pa chilichose.
Yiwusyo Yakuwilisya
-
Ana masengo gakusosekwa mnope ga Yesu ali pachilambo chapasi galiji gapi?
-
Ana yakusimonjesya yaŵatesile Yesu yalosisye chichi?
-
Ana Yesu ŵajiganyisye yindu yakusosekwa mnope yapi?
YAKULINGA YINESONI
Ana ngani jiŵanonyelaga kulalichila Yesu jaliji jamtuli?
“Yesu Jwawuwonaga Uchimwene wa Mlungu Kuŵa Wakusosekwa Mnope” (Sanja ja Mlonda, Okotoba 1, 2014)
Kwende tulole ligongo lyakwe tukusosekwa kukulupilila kuti yakusimonjesya yaŵatesile Yesu yaliji yisyesyene.
“Ana Tukulijiganya Chichi pa Yakusimonjesya Yaŵatesile Yesu?” (Sanja ja Mlonda, Julayi 15, 2004)
Aŵalanje ya mundu jwine jwaŵachenjile umi wakwe panyuma pakulijiganya yaŵatendelaga Yesu ŵane.
Alole yindu yakusosekwa mnope yiŵatesile Yesu pakuya ndaŵi jiŵatendelaga yinduyo.
a Mu Lijiganyo 31 mpaka 33 tuchikambilana yejinji yakwamba Uchimwene wa Mlungu.
You May Also Like
YIWUSYO YAKUSANONYELA ŴANDU KUWUSYA
Ana Ljiganyo lya Baibulo Lyakusatendesya Ŵamboni sya Yehofa Likusatendekwa Mwamtuli?
Muyakambilana ni Ŵamboniyi akwete ufulu ŵakamulichisya masengo Baibulo jawo. Yili yakomboleka kwaŵilanga achimjawo soni ŵamwiŵasa mwawo kuti atende nawo lijiganyoli.
