Yakulinga Yausimu Mpaka Yakamuchisye Kumchimbichisya Mlungu

“Naga mundu ngakumanyilila kwakwawula, mpaka ajigalidwe ni mbungo.” Maloŵe gelega gaŵechetedwe ni mundu jwakumanyilila yindu jwa ku Loma m’yaka 100 yandanda. Maloŵega gakulosya kuti kola yakulinga kuli kwakusosekwa.

Baibulo jikusasala yisyasyo ya ŵandu ŵaŵaliŵichile yakulinga paumi wawo. Kwa yaka 50, Nowa ‘ŵapanganyisye chombo kuti akulupusye wosope wa mwiŵasa mwakwe.’ Jwakulochesya Mose “meso gakwe galiji kusyene pa mbote ja kusogolo.” (Ahebeli 11:7, 26) Yoswa juŵajinjile mmalo mwa Mose, ni chikamuchisyo cha Mlungu jwawugomeche msinda wa Kanani.—Detulonomo 3:21, 22, 28; Yoswa 12:7-24.

M’yaka 100 yandanda, ndumetume Paulo jwaliŵichile yakulinga ligongo lyakulimbikasidwa ni maloŵe gaŵaŵechete Yesu gakuti, “ngani syambone syakwamba Uchimwene wa Mlungu tisichilalichidwa pa chilambo chosope chapasi.” (Mateyu 24:14) Paulo jwalimbikasidwe ni meso mkulola gagaweni kutyochela kwa Yesu kupwatikapo utumiki wapochele wakuti ‘akalalichile ya lina lyakwe kwa ŵandu ŵamitundu jine.’ Paulo ŵakamwile masengo gamakulungwa pakutamilikasya mipingo ja Chiklistu ku Asia Minor mpaka ku Europe.—Masengo 9:15; Akolose 1:23.

Ŵakutumichila ŵa Yehofa ŵa yaka yakulekanganalekangana akusaliŵichila yakulinga yakumtumichila Mlungu. Nambo ana mpaka tuliŵichele chamtuli yakulinga yeleyi? Ana ni yakulinga yapi yatukusosekwa kuyikwanilisya? Soni ana ni matala gapi gampaka tutende kuti tukwanilisye?

Kukola Nganisyo Syambone Kuli Kwakamuchisya

Ŵanduwe mpaka tuliŵichile yakulinga yakulekanganalekangana. Sonitu pachilambopa ŵandu akusaliŵichila yakulinga yakulekanganalekangana. Nambo kukola yakulinga yakumtumichila Mlungu kuli kwakulekangana ni yampaka akole ŵandu ku chilamboku. Ŵandu ŵajinji kuchilamboku akusakola chakulinga pakusaka kuti akole chipanje ni maudindo gapenani. Mpaka uŵe ungali lunda naga tukola chakulinga chakusaka kola machili soni kuŵa ŵakumanyika. Yakulinga yampaka yimsangalasye Yehofa Mlungu yikusapwatikapo kumtumichila jwalakwe soni kamuchisya pamasengo ga Uchimwene wa Mlungu. (Mateyu 6:33) Tukusakola yakulingayi ligongo lyakumnonyela Mlungu soni ŵandu ŵane. Mwamti chikusaŵa chakulinga chetu kuti tulipeleche kwa Mlungu.—Mateyu 22:37-39; 1 Timoteo 4:7.

Myoyo tukusosekwa kuliŵichila yakulinga yambone patukusaka kwanilisya yakulinga yetu yausimu. Ni chinga yakulingayo yili yakumtumichila Mlungu kapena yakulinga yine. Nambope atamose tuli tukwete yakulinga yambone, ndaŵi sine nganituŵa tukwanilisye. Ana mpaka tuliŵichile chamtuli yakulinga ni kulingalinga kuti tuyikwanilisye?

Tukoleje Nganisyo Syakwanilisya Yakulinga

Aganichisyeje yaŵatesile Yehofa pakwanilisya chakulinga chakwe pandaŵi jiŵapanganyaga yindu yakwinani ni pachilambo chapasi. Pakuŵecheta kuti, “kwaswele ni kwachele,” yikulosya kuti Yehofa ni juŵalekangenye masiku gakupanganya yinduyi. (Genesesi 1:5, 8, 13, 19, 23, 31) Kundanda kwa ndaŵi jilijose jakupanganyila yindu, jwalakwe jwamanyililaga chakulinga chakutendela yinduyo soni jwasakaga kuchikwanilisya. Mwamtitu Mlungu jwakwanilisye chakulinga chakwe chakupanganya yindu (Chiwunukuko 4:11) Yobu jwasasile kuti, “Yakusasaka [Yehofa] akusayitenda.” (Yobu 23:13, NWT) Kusala yisyene Yehofa jwasangalele paŵayiweni “yosope yaŵapanganyisyeyo” soni jwasasile kuti ‘yili yambone mnope.’—Genesesi 1:31.

Myoyo kuti yakulinga yetu yiŵe yisyesyene tukusosekwa kola nganisyo syakwanilisya yakulingayo. Ana ni chichi champaka chitukamuchisye kuti tukusye nganisyo syelesi? Atamose pandaŵi jele chilambo chapasi chaliji changali kandu kalikose, Yehofa jwayiwonaga kuti pachiŵa yakuyichisya yambone yayichitendekasya kuti lina lyakwe lichimbichikwe. Mwakulandana ni yeleyi chakulinga chetu chiŵeje kukwanilisya yakulinga yatwaliŵichile. Yeleyi mpaka yikomboleche patukuganichisya umbone wakwanilisya yakulingayo. Yeleyi ni yaŵasimene nayo Tony jwa yaka 19. Jwalakwe jwangaliŵalilaga yaŵayiweni ali apite kukulola malo ku ofesi ja Nyambi ja Mboni sya Yehofa jajili kundiŵililo lyuŵa kwa chilambo cha Europe. Kutyochela pandaŵijo chiwusyo chaŵakwete Tony mu nganisyo mwakwe chaliji chakuti, ‘Ana mpaka mbikane uli pangutumichila pamalo mpela gegala?’ Tony nganaleka kuganichisya upile wawakwete kuti akwanilisye chakulinga chakwe. Jwalakwe jwasangalele mnope ali amjitichisye kuti akatumichileje pa beteli

Kunguluka ni ŵandu ŵaŵakwanilisye yakulinga yawo, mpaka kutukamuchisyesoni m’weji kuti tukwanilisye yakulinga yetu. Jayson jwa yaka 30, nganasangalalaga kukamula masengo gakulalichila pandaŵi jiŵaliji jwachinyamata. Nambo ali amalisisye majiganyo gakwe ga ku sukulu, jwalakwe jwatandite upayiniya. Mwamti jwaliji jwakulalichila jwa ndaŵi syosope. Ana ni chichi chachamkamuchisye Jayson kuti akole nganisyo syakutenda upayiniya? Jwalakwe jwatite, “Kunguluka ni ŵandu ŵaŵatendaga upayiniya soni kwenda nawo mu utumiki, ni yayangamuchisye mnope.”

Kulemba Yakulinga Yatukwete Mpaka Kutukamuchisye

Yatukusaganichisya mpaka tuyikwanilisye naga tukuyilemba panepakwe. Solomoni jwasasile kuti maloŵe ga mundu jwalunda gali mpela yisongole gagakusamlongolela mundu ku umi. (Jwakulalichila 12:11) Maloŵega pagalembedwe panepakwe gakusamtendekasya mundu kuti akaliŵalila soni gatamilichiche mu nganisyo mwakwe. Yehofa ŵalamwile mayimwene ga ku Isalayeli kuti alembeje Chilamusi. (Detulonomo 17:18) Myoyo tukusosekwa kulembaga yakulinga yatukwete soni kulingalilinga kuti tukwanilisye. Mpaka tutende yeleyi pakulemba yakusawusya yampaka tusimane nayo soni yampaka tutende pakumalana nayo. Mpaka yiŵesoni yakamuchisya mnope naga tukumanyilila yatukusosekwa kutenda, chikamuchisyo champaka tusosechele soni ŵandu ŵampaka atukamuchisye.

Kola yakulinga yausimu kwamkamuchisye Geoffrey juŵatumichilaga mpela mpayiniya jwa pa dela ku dela kwakwasosechelaga ŵakulalichila ŵajinji ku Asia. Chakutesya chanasa chaliji chakuti ŵamkwakwe ŵajasiche mwangajembecheya. Yeleyi yili yitendekwe jwalakwe jwaganichisye yakuti apitilisye kutenda utumiki wakwe wa upayiniya mwakukola yakulinga. Ali alembile yakulingayi, jwalakwe jwapopesile kwa Yehofa kuti akwanilisye chakulinga chakwe chakuti kumbesi kwa mwesi welewo atendesye majiganyo ga Baibulo gakwana gatatu. Lisiku lililyose jwalolaga yatesile soni pagamasile masiku 10 jwalolaga naga jukwawula pasogolo. Ana jwalakwe jwakwanilisya chakulinga chakwe? Elo. Ligongo lyakuti jwakwete majiganyo ga Baibulo gakwana mcheche.

Aliŵicheleje Yakulinga Yamwanamwana

Yakulinga yine mpaka yiwonecheje kuŵa yakusawusya kuyikwanilisya. Tony, jwatumkolasile kundanda jula, jwalipikene mpela kulugono paŵatandite kutumichila pa ofesi ja nyambi ja Mboni sya Yehofa. Yaliji myoyo ligongo lyakuti pandanda nganakola yakulinga yakumtumichila Mlungu. Nambo jwalakwe jwaganisisye kuti ndamo syakwe sikamulaneje ni yakusasaka Yehofa soni akole chakulinga chakubatisidwa. Panyuma pakuti akwanilisye chakulinga chakwe chakubatisidwa, jwatandite upayiniya wakamuchisya kaneko wakutamilichika. Ali atesile upayiniya kwa kandaŵi, jwatandite kutumichila pa ofesi ja nyambi. Yeleyi yaliji mpela kulugono kwa jwalakwe.

M’wejisoni tukusosekwa kutenda yakuti yakulinga yetu yekulungwakulungwa tuyichenje ni kuŵa yamwanamwana. Yakulinga yamwanamwana mpaka yitukamuchisye kumanyilila naga mpaka tukwanilisye yakulinga yekulungwakulungwa. Kulola mwatukutendela yindu mpaka kutukamuchisye kuti tukasokonasidwa ni yindu yine patukwanilisya yakulinga yetu. Kumŵenda Yehofa mwakuwilisyawilisya pakwamba yakulinga yatukwete, mpaka kutukamuchisye kuti nganisyo syetu siŵeje pa yakulingayo. Ndumetume Paulo jwatite, “Mpopeleje mwangalechesya ndaŵi syosope.”—1 Atesalonika 5:17.

Kusachilila Soni Kupilila Yili Yakusosekwa Mnope

Atamose kuti mpaka tukole yakulinga yejinji yatukusaka kuyikwanilisya, nambope pana yine yakuti nganituŵa tuyikwanilisye. Jwakulijiganya Yohane Maliko, jwatengwiche pandaŵi jele ndumetume Paulo nganamjigala pa ulendo wakwe waŵili wa umishonale. (Masengo 15:37-40) Komboleka kuti Maliko jwalijiganyisye kanekakwe kutyochela pa yayatendekweyi soni nganachenga chakulinga chakwe chakumtumichila Mlungu. Kaneko Paulo jwasasile yindu yambone yakwamba Maliko. Konjechesya pelepa Maliko jwakamulanaga mnope ni Petulo ku Babeloni. (2 Timoteo 4:11; 1 Petulo 5:13) Komboleka kuti jwalakwe jwakwete upile wakulemba nawo ngani jakwamba umi wa Yesu soni utumiki wakwe.

Mwejisoni patukwete yakulinga yausimu, mpaka tusimane ni yakuwujikasya munyuma. Mmalo mwakuwujila munyuma tukusosekwa kulolasoni yatwatendaga soni kuchenga yindu yine kuti tukwanilisye chakulinga chetu. Patusimene ni yindu yakuwujikasya panyuma, tukusosekwape kulingalinga kuti tukawujila panyuma. Mwenye jwalunda Solomoni akutusalila kuti, “Chilichose chamkutenda, mchiŵiche m’magasa ga AMBUJE, ni yamkuganisyayo tichimjendela chenene.”—Misyungu 16:3.

Ndaŵi sine yakutendekwa ya paumi mpaka yitendekasye kuti yakulinga yine tukayikwanilisya. Mwachisyasyo naga tukulwalalwala kapena tukwete maudindo ga panyumba, nikuti yakulinga yine nganituŵa tuyikwanilisye. Ngatusosekwa kwasa mtima ligongo mbote jetu jili umi wangamala chinga kwinani kapena pachilambo chapasi. (Luka 23:43; Afilipi 3:13, 14) Ana mpaka tutende yamtuli kuti chitupochele yeleyi? Ndumetume Yohane jwalembile kuti, “jwakutenda yakusaka Mlungu akusatama chitamile kwa ndaŵi syosope. ” (1 Yohane 2:17) Chinga ndamo jetu mpaka jitulepelekasye kukwanilisya chakulinga chinechakwe nambope mpaka ‘tumpikanileje Mlungu ni kusunganga malamusi gakwe.’ (Jwakulalichila 12:13) Kola yakulinga yausimu yikusatukamuchisya kuti nganisyo syetu siŵeje pakumtumichila Mlungu. Myoyo kwende tukoleje yakulingayi kuti tumchimbichisyeje mkupanganya jwetu.

[Libokosi pa peji 22]

Yakulinga Yausimu Yatukusosekwa Kuyiganichisya

○ Kuŵalanga Baibulo lisiku lililyose

○ Kuŵalanga Sanja ja Mlonda soni Ajimuche jilijose

○ Kupeleka mapopelo gakamula mtima

○ Kulosya yisogosi ya msimu weswela

○ Kupata matala gakonjechesya utumiki

○ Kulalichila soni kwiganya mwakamula mtima

○ Kulijiganya matala gane gakulalichilila mpelaga kulalichila pa foni, mwaupile soni kumalo kwakutendela malonda