Masiku agano, ngani sikuwanda mwachitema kupitila m’mabuku, pawayilesi, pa TV, soni pa Intaneti. Wosope ŵakusamtumichila “Mlungu jwa usyesyene,” ngakusawandisya ngani syaunami, atamose mwangosi. (Sal. 31:5; Eks. 23:1) Kuwandisya ngani syaunami mpaka kujonanje mbili ja mundu. Kuliwusya yiwusyo yakuyichisyayi mpaka kutukamuchisye kumanyilila naga ngani jili jakuwona kapena jaunami.

• ‘Ana nganijo aŵechete ŵani?’ Komboleka kuti mundu jwakutusalila nganijo ngakumanyilila yosope. Soni tukumbuchileje kuti ŵandu ŵane pakwasalile ŵane ngani ngakusasala ndendende mujaŵelele. Myoyo tukusosekwa kusamala naga ngatukumanyilila mujatandile nganijo. Ligongo lyakuti ŵandu mumpingo akusajembecheya kuti ŵakwete maudindo chiŵasalileje yisyesyene, myoyo jemanjaji ngakusosekwa kuwandisya ngani syangali maumboni.

• ‘Ana nganijo chijijonanje mbili ja mundu jwine?’ Naga nganijo chijitendekasye kuti ŵandu am’woneje mundu jwine kapena gulu ja ŵandu mwakulemwecheka, kuli chenene ngajiŵecheta.—Mis. 18:8; Afil. 4:8

• ‘Ana nganijo jili jisyesyene?’ Tukusosekwa kusamala naga nganijo jikuwoneka kuti jili jakutesya chidwi, kapena jikusala yakutendekwa yine yakwe.

ALOLELE FIDIYO JAKUTI, ANA MPAKA NDENDE WULI KUTI NDECHE YAMISECHE? KANEKO AJANJE YIWUSYO AYI:

• Mwakamulana ni Misyungu 12:18, ana maloŵe mpaka gaŵe gakogoya chamtuli?

• Ana lilemba lya Afilipi 2:4, mpaka litukamuchisye chamtuli kuŵa ŵakusamala patukuŵecheta ya ŵane?

• Ana tukusosekwa kutenda chichi naga ŵandu atandite kuŵecheta yakusakala ya ŵandu ŵane?

• Ana tukusosekwa kuliwusya yiwusyo yapi mkanitutande kuŵecheta ya ŵandu ŵane?