Ngani Syambone Syaŵalembile Yohane 6:1-71
6 Kaneko Yesu ŵajombochele ku lisi line lya Nyasa ja Galileya, kapena kuti Nyasa ja Tibeliya.
2 Pelepo ŵandu ŵajinji ŵamkuyaga, ligongo ŵayiweni yakusimonjesya yaŵatendaga jwalakwejo pakwaposya* ŵandu ŵakulwala.
3 Myoyo Yesu ŵakwesile mwitumbi ni kutama mwelemo pampepe ni ŵakulijiganya ŵakwe.
4 Sambano chisangalalo cha Ayuda chakolanjidwa kuti Pasika chaliji chili chiŵandichile.
5 Yesu paŵakwesisye meso gakwe, ŵaweni ŵandu ŵajinji ali mkwika kwa jwalakwejo. Kaneko ŵamwusisye Filipo kuti, “Ana mpaka tukasume kwapi mikate* jakwanila kwalisya ŵandu wosopeŵa?”
6 Nambo Yesu ŵaŵechete yeleyi pakusaka kumlinga ligongo jwamanyililaga kala yachatende.
7 Filipo ŵamjanjile jwalakwejo kuti, “Atamose tuli tusumile mikate ja mbiya syakwana 200 sya dinali nganijiŵa jikwanile. Soni atamose tuli twagaŵile ŵanduŵa panandipanandi, nganijiŵa jikwanilepe.”
8 Jumo mwa ŵakulijiganya ŵakwe, lina lyakwe Andileya, mpwakwe Simoni Petulo, ŵamsalile Yesu kuti,
9 “Apano pana kamnyamata kele kakwete mikate ja balele msano ni tusomba tuŵili. Nambo ana yeleyi mpaka yikwanile ŵandu wosopeŵa?”
10 Sambano Yesu ŵatite, “Ŵasalile ŵanduŵa kuti atame pasi.” Pamalopo papali manyasi gejinji mwamti ŵanduwo ŵatemi pelepo. Pagulujo papali achalume ŵakwana 5,000.
11 Yesu ŵajigele mkate ni kupopela. Kaneko ŵatandite kwagaŵila ŵandu ŵaŵatemi pelepowo. Ŵatesilesoni myoyo ni tusomba tula. Ŵandu wosopewo ŵalile mpaka kwikuta.
12 Nambo ŵanduwo paŵajikwite, Yesu ŵasalile ŵakulijiganya ŵakwe kuti, “Mlokotele yakusigalila yosope, kuti pakasimanikwa yakonasika.”
13 Myoyo jemanjajo ŵalokotele yakusigalayo ni yagumbele yitundu 12 kutyochela pa mikate msano jiŵalile ŵandu jila.
14 Ŵanduwo paŵayiweni yakusimonjesya yaŵatesile jwalakwe, ŵatandite kuŵecheta kuti, “Nditu jweleju ali Jwakulochesya juŵamsasile kuti chachiyika pachilambo.”
15 Kaneko Yesu paŵayimanyi kuti ŵanduwo akusaka kwika kukumkamula kuti am’weche umwenye, ŵatyosile ni kwawulasoni kwitumbi jikajikape.
16 Ligulo, ŵakulijiganya ŵakwe ŵapite kunyasa.
17 Kweleko ŵakwesile liboti ni kuwutanda ulendo wakomboka nyasajo kwawula ku Kapelenawo. Pandaŵiji kusa kwaliji kuli kutesile chipi, nambo Yesu ŵaliji mkanayichepe kwa jemanjajo.
18 Kaneko panyasapo patandite chimbungo chamachili mwamti patendaga matumbela.
19 Nambope, paŵapalese libotilyo pa lutando lwa makilomita 5 kapena 6, ŵam’weni Yesu ali mkwenda panyasapo ni kuŵandichilaga libotilyo. Pelepo jemanjajo wakamwile mnope woga.
20 Nambo Yesu ŵasalile jemanjajo kuti, “Ndili une, mkatenda woga!”
21 Myoyo jemanjajo ŵamkundile kuti akwele mwibotimo. Kaneko m’kandaŵi kamnono libotilyo lyayiche pamkuli, kuŵajawulaga jemanjajo.
22 Palisiku lyakuyichisya, ŵandu ŵaŵaliji ku lisi line lya nyasa kula, ŵayimanyi kuti pelepo paliji pana liboti limope lyamwana. Ŵayimanyisoni kuti Yesu nganakwela nawo libotilyo yimpepe ni ŵakulijiganya ŵakwe, nambo kuti ŵakulijiganya ŵakwewo ŵatyosile jika.
23 Kaneko maboti gakutyochela ku Tibeliya gayiche chiŵandika pamalo pele ŵandu ŵalile mikate, panyuma pakuti Ambuje apopesile kwa Mlungu.
24 Myoyo ŵanduwo paŵayiweni kuti Yesu ni ŵakulijiganya ŵakwe pangali, ŵakwesile maboti gala ni kwawula ku Kapelenawo kukumsosasosa Yesu.
25 Paŵamsimene jwalakwejo ku lisi line lya nyasalyo, ŵamwusisye kuti, “Labi, ana ayiche ndaŵichi akuno?”
26 Yesu ŵajanjile jemanjajo kuti, “Nditu ngumsalichisya kuti, mkusosasosa une ngaŵa ligongo lyakuti mwayiweni yakusimonjesya, nambo ligongo lyakuti mwalile mikate ni kwikuta.
27 Mkakamulaga masengo kuti mpate yakulya yampaka yijonasiche, nambo mkamuleje masengo kuti mpate yakulya yakutamilisya yakupeleka umi wangamala, yele Mwanache jwa mundu chachimpa. Pakuŵa Atati, Mlungu msyenejo, aŵisile pa jwalakweju chimanyisyo chakumjitichisya.”
28 Myoyo jemanjajo ŵamwusisye jwalakwejo kuti, “Ana tukusosekwa kukamula masengo gamtuli kuti Mlungu atujitichisye?”
29 Yesu ŵajanjile jemanjajo kuti, “Mlungu akusaka kuti mkulupilileje mwa jwele juŵamtumile jwalakwejo.”
30 Kaneko ŵanduwo ŵatite, “Sambano ana wawojo chatende chakusimonjesya chamtuli kuti tuchiwone soni kuti twakulupilile? Chatende chichi?
31 Achinangolo ŵetu ŵalile mana m’chipululu, mpela mugakusaŵechetela Malemba kuti, ‘Jwalakwejo ŵapele jemanjajo mikate jakutyochela kwinani kuti alye.’”
32 Yesu ŵasalile jemanjajo kuti, “Nditu ngumsalichisya kuti, Mose nganampa jemanja mkate wakutyochela kwinani, nambo Atati ŵangu ni ŵakumpa mkate usyesyene wakutyochela kwinani.
33 Pakuŵa mkate wakusapeleka Mlungu uli mkate wawayiche kutyochela kwinani soni ukusapeleka umi ku chilambo.”
34 Myoyo jemanjajo ŵamsalile jwalakwejo kuti, “Ambuje, atupeje mkate welewu ndaŵi syosope.”
35 Yesu ŵasalile jemanjajo kuti, “Une ndili mkate wakupeleka umi. Jwalijose jwakwika kwa une ngasijimkola sala ata panandi, soni jwalijose jwakungulupilila une ngasijimkola njota ata panandi.
36 Nambo une sasile kala kwa jemanja kuti, atamose mumbweni une nambo ngamkungulupilila.
37 Wosope ŵele Atati ambele chachiyika kwa une, soni une ngasinamtopola jwalijose jwakwika kwa une.
38 Pakuŵa nayiche kutyochela kwinani kuti ndende yakusaka ya jwele juŵandumile unejo, ngaŵaga yakusaka yangu.
39 Yakusaka ya jwele juŵandumile unejo yili yakuti ngajasa jwalijose pa ŵandu wosope ŵaŵambele une, nambo kuti chinajimusye ku chiwa pa lisiku lyakumalisya.
40 Pakuŵa yakusaka ya Atati ŵangu yili yakuti, jwalijose jwakumjitichisya Mwanache soni kumkulupilila chapate umi wangamala, nambosoni une chinjimjimusya jwalakwejo pa lisiku lyakumalisya.”
41 Kaneko Ayuda ŵatandite kunyinyita pakwamba ya jwalakwejo ligongo jwaŵechete kuti, “Une ndili mkate wawayiche kutyochela kwinani.”
42 Myoyo jemanjajo ŵaŵechetaga kuti, “Ana jweleju ngati ali Yesu mwanache jwa Yosefe? M’wetu tukwamanyilila chenene babagwe soni mamagwe. Sambano ligongo chichi akuŵecheta kuti, ‘Une nayiche kutyochela kwinani’?”
43 Yesu ŵajanjile jemanjajo kuti, “Mleche kunyinyitako jemanja.
44 Pangali mundu jwampaka ayiche kwa une naga Atati ŵaŵandumile nganamwuta jwalakwejo, soni une chinjimjimusya jwalakwejo pa lisiku lyakumalisya.
45 Mu yakulemba ya ŵakulochesya ŵalembile kuti, ‘Wosope chachijiganyidwa ni Yehofa.’ Myoyo jwalijose jwakusapikanila maloŵe ga Atati soni kunda kwiganyidwa ni jwalakwejo akusayika kwa une.
46 Pangali mundu juŵaweni Atati, akaŵe jwele jwatyochele kwa Mlungujo. Jweleju ni juŵaweni Atati.
47 Nditu ngumsalichisya jemanja kuti, jwalijose jwakungulupilila une chachipata umi wangamala.
48 “Une ndili mkate wakupeleka umi.
49 Achinangolo ŵenu ŵalile mana m’chipululu nambope ŵawile.
50 Nambo jwalijose jwakulya mkate wakutyochela kwinani ngasawa.
51 Une ndili mkate wakupeleka umi wawayiche kutyochela kwinani. Naga mundu akulya mkate welewu chachitama ni umi mpaka kalakala. Sonitu mkate welewu ukwimila chilu changu, chele chinjichipeleka kuti chilambochi chipate umi.”
52 Kaneko Ayudawo ŵatandite kukangana kuti, “Ana mpaka yikomboleche chamtuli mundu jweleju kutupa chilu chakwe kuti tulye?”
53 Pelepo Yesu ŵasalile jemanjajo kuti, “Nditu ngumsalichisya kuti, naga ngamkulya chilu cha Mwanache jwa mundu soni kumwa myasi jakwe, ngasimpata umi.*
54 Jwalijose jwakulya chilu changu soni kumwa myasi jangu chachikola umi wangamala, soni une chinjimjimusya ku chiwa pa lisiku lyakumalisya.
55 Pakuŵa chilu changu chili chakulya chisyesyene soni myasi jangu jili chakumwa chisyesyene.
56 Jwalijose jwakusalya chilu changu soni kumwa myasi jangu akusaŵa jwakamulana ni une, soni une ngusaŵa jwakamulana ni jwalakwejo.
57 Atati ŵa umi ŵandumile une soni une ngusatama ni umi ligongo lya Atatiwo, myoyosoni jwalijose jwakulya chilu changu chachitama ni umi ligongo lya une.
58 Mwelemu ni mwawuŵelele mkate wawatyochele kwinani. Mkate welewu nganiwuŵa mpela waŵalile achinangolo ŵenu ŵele mkupita kwa ndaŵi ŵawile. Nambo jwalijose jwakulya mkate welewu chachitama ni umi mpaka kalakala.”
59 Yesu jwaŵechete yindu yeleyi paŵaliji mkwiganya mu sunagoge* ku Kapelenawo.
60 Ŵakulijiganya ŵakwe ŵajinji paŵapikene yeleyi ŵatite, “Maloŵe gelega gali gakusokonasya. Ŵani ŵampaka apikanile yeleyi?”
61 Nambo Yesu paŵamanyilile kuti ŵakulijiganya ŵakwewo ŵadandawulaga ni ngani jeleji, ŵawusisye kuti, “Ana maloŵe gelega gamkuŵesye?
62 Sambano ni yichiŵa uli patimchimwona Mwanache jwa mundu ali mkwawula kwinani kuŵaliji pandanda?
63 Msimu ni wawukusapeleka umi, nambo chilu nganichikola masengo galigose. Maloŵe gambechetega gali gakulongoleledwa ni msimu weswela soni gali gakupeleka umi.
64 Nambo pana ŵane mwa jemanja ŵele ngakukulupilila.” Yesu ŵaŵechete yeleyi ligongo lyakuti kutandila pandanda ŵaliji mkwamanyilila ŵandu ŵele nganamkulupililaga, soni jwele juchachimpeleka jwalakwejo.
65 Jwalakwe ŵaŵechetesoni kuti, “Ni ligongo lyakwe mbechete kala kuti, pangali mundu jwampaka ayiche kwa une naga Atati nganamkunda jwalakwejo.”
66 Ligongo lya yeleyi, ŵakulijiganya ŵakwe ŵajinji ŵawujile ku yindu yawo yiŵatendaga pandanda soni nganapitilisya kwenda ni jwalakwejo.
67 Myoyo Yesu ŵawusisye ŵakulijiganya ŵakwe 12 ŵala kuti, “Ana kapenasoni jemanja mkusaka mjawuleje?”
68 Simoni Petulo ŵamjanjile jwalakwejo kuti, “Ambuje, ana mpaka tujawulesoni kwa ŵani? Wawojotu ni ŵakwete maloŵe gakupeleka umi wangamala.
69 M’weji tukukulupilila soni tukumanyilila kuti wawojo ali ŵaswela soni Mlungu ni juŵatumile.”
70 Pelepo Yesu ŵasalile jemanjajo kuti, “Une namsagwile jemanja ŵandu 12, ngaŵa myoyo? Nambotu jumo mwa jemanja ali jwakwaŵechetela achimjakwe yakusakala.”
71 Pelepatu Yesu ŵaliji mkuŵecheta ya Yudasi mwanache jwa Simoni Isikaliyoti. Jwalakweju ni jwele kaneko ŵampeleche Yesu, atamose kuti jwaliji jumo mwa ŵakulijiganya 12 ŵala.
Maloŵe Gamwiŵanda
^ Kapena kuti, “pakwalamisya.”
^ Mikate jakala ŵajipanganyaga ni utandi wa tiligu kapena balele.
^ Maloŵe gakwe gandanda, “mwa jemanja mwangali umi.”
^ Alole Kugopolela kwa Maloŵe Gane.
