Ngani Syambone Syaŵalembile Yohane 20:1-31
20 Pa lisiku lyandanda* lya wikijo, Maliya jwa ku Magadala jwayiche kumalembe kula chakumasikusiku. Kweleko ŵalisimene liganga lyaŵawugalile palilembelyo ali alityosisye.
2 Pelepo jwalakwe jwawutuchile kuŵaliji Simoni Petulo soni jwakulijiganya jwele Yesu ŵamnonyelaga mnope jula. Jwalakwe ŵasalile jemanjajo kuti, “Ambuje ŵala ŵatyosisyemo mwilembe mula, soni ngatukumanyilila kuti ŵaŵisile kwapi.”
3 Kaneko Petulo ni jwakulijiganya jwinejo ŵanyakwiche ni kwawula kumalembeko.
4 Wosope ŵaŵili ŵatandile yimo kuwutuka. Nambo jwakulijiganya jwinejo jwawutwiche mnope kumpunda Petulo, mwamti jwaliji jwandanda kuja kwika kumalembeko.
5 Paŵajineme ni kulola mkati, ŵagambile kusiwona nguwope nambo jwalakwe nganajinjilamo.
6 Panyuma pakwe Simoni Petulo ŵakopochele ni ŵayichile kwinjila m’malembemo. Jwalakwe ŵasiwenisoni nguwo sila mwelemo.
7 Nguwo jiŵamkulunjile Yesu kumtwe nganijiŵa pampepe ni nguwo sine sila, nambo jaliji jepinde soni ŵajiŵisile pajika.
8 Kaneko jwakulijiganya juŵatandite kwika kumalembe jula jwajinjilesoni mwilembemo. Jwalakwe ŵalilolele jika soni ŵakulupilile yaŵapikene yila.
9 Jemanjaji ŵaliji mkanapikanichisyepe lilemba lyalikusati Yesu akusosekwa kwimuka ku chiwa.
10 Kaneko ŵakulijiganyawo ŵawujile jwalijose kumangwakwe.
11 Nambo Maliya jula ŵagambile kwima kusa kwa lilembelyo ni kulilaga. Ali mkulila myoyo, ŵajineme kuti alole mwilembemo.
12 Mwelemo ŵagaweni malayika gaŵili gewale yeswela gali gatemi pamalo pachagonile chilu cha Yesu. Lilayika line lyatemi chakumtwe, line chakusajo.
13 Malayikago gamwusisye jwalakwe kuti, “Wawo mayi, akulila chichi?” Jwalakwe ŵajanjile kuti, “Mundu jwine ŵajigele Ambuje ŵangu, soni ngangumanyilila kuti ŵaŵisile kwapi.”
14 Paŵaŵechete yeleyi, jwalakwe ŵagalawiche ni ŵam’weni mundu jwine ali ajimi pamti myoyo. Mundujo ŵaliji Yesu, nambo jwalakwe nganammanyilila kuti ali Yesu.
15 Yesu ŵamwusisye jwalakwejo kuti, “Wawo mayi, akulila chichi? Ana akwasosasosa ŵani?” Jwalakwe paganisya kuti mundujo ali jwakusamalila mgundawo, jwajanjile kuti, “Baba, naga wawojo ni ŵajigele chilucho, asalile kwachiŵisile, kuti njawule ngachijigale.”
16 Pelepo Yesu ŵatite, “Maliya!” Paŵagalawuchile kuŵaliji Yesu, Maliya ŵajanjile mu Chihebeli kuti, “Laboni!” (kugopolela kuti “Mwalimu!”)
17 Yesu ŵamsalile jwalakwejo kuti, “Mleche kungakamila, ligongo nganimbepe kwawula kwa Atati. Nambo mjawule kwa achalongo achimjangu ni mkasalile kuti, ‘Une ngwawula kwa Atati ŵangu ŵalisoni Atati ŵenu, soni kwa Mlungu jwangu jwalisoni Mlungu jwenu.’”
18 Pelepo Maliya jwa ku Magadala jwapite kwa ŵakulijiganya ŵala ni kwasalila kuti, “Une naweni Ambuje!” Kaneko ŵasalile yaŵaŵechete Ambujewo kwa jwalakwejo.
19 Palisiku lilyolyo chakumagulo, lyelesoni lyaliji lisiku lyandanda lya wikijo, ŵakulijiganyawo ŵasongangene m’nyumba ni kuwugala matanga pakwajogopa Ayuda. Kaneko Yesu ŵayiche ni kwima pasikati pawo ni kwasalila kuti, “Mtendele uŵe ni jemanja.”
20 Paŵaŵechete yeleyi, jwalakwe ŵalosisye jemanjajo magasa gakwe nambosoni mumbalati mula. Pelepo ŵakulijiganyawo ŵasangalele mnope pakwawona Ambujewo.
21 Yesu ŵasalilesoni jemanjajo kuti, “Mtendele uŵe ni jemanja. Mpela mwele Atati ŵandumisye une, unesoni ngumtumisya jemanja.”
22 Paŵaŵechete yeleyi, jwalakwe ŵapepelele mpweya pa jemanjajo ni kwasalila kuti, “Mpochele msimu weswela.
23 Naga jemanja mkukululuchila yakulemwa ya mundu jwalijose, nikuti Mlungu amkululuchile kala mundu jwelejo. Nambo naga ngamkumkululuchila, nikuti Mlungu nganamkululuchilasoni.”
24 Nambo Tomasi, jumo mwa ŵakulijiganya 12 ŵala, juŵakolanjidwagasoni kuti Didimo, nganaŵapo pandaŵi jele Yesu ŵayiche.
25 Sambano ŵakulijiganya ŵanewo ŵaliji mkumsalila jwalakwe kuti, “M’weji twaweni Ambuje!” Nambo jwalakwe ŵajanjile kuti, “Une nganimba ngulupilile yeleyo mpaka ndili nagaweni maŵasi ga misomali mmyala mwawo soni naga ngwinjisya chala changu m’maŵasi ga misomaligo, nambosoni naga ngukamula ni magasa gangu mumbalati mwawo.”
26 Pali papite masiku 8, ŵakulijiganya ŵakwe ŵala ŵasongangenesoni m’nyumba ni kuwugala matanga. Nombenajo Tomasi ŵaliji papopo. Kaneko Yesu ŵayiche ni kwima pasikati pawo atamose kuti matanga galiji gewugale, ni ŵasalile kuti, “Mtendele uŵe ni jemanja.”
27 Kaneko ŵamsalile Tomasi kuti, “Mlole mmyala mwangumu, soni mjinjisye chala chenu. Mungamulesoni mumbalatimu ni magasa genu, soni mleche kukayichila nambo mkulupilile.”
28 Pelepo Tomasi ŵajanjile kuti, “Ambuje ŵangu, soni Mlungu jwangu.”
29 Nambo Yesu ŵamsalile kuti, “Ana mkulupilile ligongo lyakuti mumbweni? Ŵana upile ŵandu ŵakusakulupilila atamose kuti nganayiwona.”
30 Kusala yisyene, Yesu ŵatesilesoni yakusimonjesya yine yejinji pameso pa ŵakulijiganyawo yele nganiyilembedwa mu buku* ajino.
31 Nambo yeleyi yilembedwe kuti jemanja mkulupilile kuti Yesu ali Klistu, Mwanache jwa Mlungu, soni kuti pachimkulupililepo, chimpate umi kupitila m’lina lyakwe.
Maloŵe Gamwiŵanda
^ Lyeleli lili lisiku lyatukusalikolanga apano kuti Lyamlungu. Kwa Ayuda, lyeleli lyaliji lisiku lyandanda lya wiki.
^ Maloŵe gakwe gandanda, “mpukutu.” Alole Kugopolela kwa Maloŵe Gane.
