Ngani Syambone Syaŵalembile Yohane 12:1-50
12 Kuli kusigele masiku 6 kuti chisangalalo cha Pasika chitendekwe, Yesu ŵayiche ku Betaniya. Kweleku ni kuŵatamaga Lasalo, mundu jwele Yesu ŵamjimwisye ku chiwa jula.
2 Kweleko ŵamtelechele jwalakwejo chakulya chaligulo, soni Malita ŵaliji mkutumichila, nambo Lasalo ŵaliji jumo mwa ŵandu ŵaŵalyaga ni jwalakwejo.
3 Kaneko Maliya ŵajigele libotolo* lya mawuta gakununjila mnope gakupanganyidwa ni nado* jusyesyene soni gakudula mnope. Mawutago ŵagatasile pa sajo sya Yesu ni kupukutaga sajosyo ni wumbo syakwe, mwamti m’nyumbamo mwagumbele liwungo lyakununjila lya mawutago.
4 Nambo Yudasi Isikaliyoti, jumo mwa ŵakulijiganya ŵakwe ŵala, jwele ŵaliji ali asigele panandi kumpeleka jwalakwejo, ŵatite,
5 “Ana mawuta gelega ngati tukasumisye pamtengo wa mbiya syakwana madinali 300 soni mbiyasyo ni kwapa ŵandu ŵakulaga?”
6 Yudasi nganaŵecheta yeleyi ligongo lyakwatendela chanasa ŵandu ŵakulaga, nambo ligongo lyakuti jwaliji jwawiyi. Jwalakweju jwaliji jwakusunga libokosi lya mbiya soni ndaŵi ni katema ŵajiŵaga mbiya syaŵasungaga mwibokosimo.
7 Pelepo Yesu ŵatite, “Mumleche jwamkongweju atende yeleyi pakungosechelesya lisiku lyangu lyakusichidwa m’malembe.
8 Pakuŵa ŵakulagawo chimtameje nawo ndaŵi syosope, nambo une ngasimba ni jemanja mpaka kalakala.”
9 Kaneko, Ayuda ŵajinji ŵayimanyi kuti Yesu ali ku Betaniya. Myoyo jemanjajo ŵapite kweleko ngaŵa ligongo lya Yesupe nambo kuti akamwonesoni Lasalo, jwele Yesujo ŵamjimwisye ku chiwa.
10 Sambano ŵakulolela ŵakutaga mbopesi ŵakamulene yakuti amwulajesoni Lasalo,
11 ligongo lyakuti Ayuda ŵajinji ŵajawulaga kweleko ni kumkulupililaga Yesu ligongo lya Lasalojo.
12 Palisiku lyakuyichisya, gulu ja ŵandu ŵaŵayiche ku Yelusalemu, ku chisangalalo kula, ŵapikene yakuti Yesu akwika.
13 Myoyo jemanjajo ŵajigele nyambi sya kanjesa ni ŵakopweche kukumchingamila jwalakwejo. Kaneko jemanjajo ŵatandite kugumila kuti, “Mlungu jwetu, tukwaŵenda kuti amkulupusye! Jwana upile mundu jwakwika m’lina lya Yehofa, Mwenye jwa Yisalayeli!”
14 Sambano Yesu paŵamsimene mwanache jwa bulu, ŵakwesile pa bulujo, mwakamulana ni yayalembedwe kuti,
15 “Mkatenda woga, mmwe mwanache jwamkongwe jwa Siyoni. Mlole! Mwenye jwenu jukwika soni jukwesile mwanache jwa bulu jwamlume.”
16 Ŵakulijiganya ŵakwe nganapikanichisya kugopolela kwa yindu yeleyi pandanda. Nambo Yesu paŵapochele uchimbichimbi, jemanjajo ŵakumbuchile kuti yindu yeleyi yalembedwe pakwamba ya jwalakwejo soni kuti yindu yeleyi ŵamtendelaga jwalakwejo.
17 Sambano gulu ja ŵandu ŵaŵaliji ni Yesu paŵamŵilangaga Lasalo m’malembe ni kumjimusya ku chiwa, ŵaliji mkwasalila ŵane ya yindu yeleyi.
18 Ni ligongo lyakwe guluji japite kuti jikasimane ni jwalakwejo, ligongo japikene kuti jwalakwejo atesile chakusimonjesya chelechi.
19 Myoyo Afalisi ŵatandite kukambilana kuti, “Pelepatu ni tulepele basi. Alole! Chilambo chosopetu chikumkuya jwalakwejo.”
20 Sambano pagulu ja ŵandu ŵaŵayiche ku chisangalaloko kukumtindiŵalila Mlungu papalisoni Agiliki.
21 Myoyo jemanjajo ŵapite kwa Filipo, juŵaliji jwakutyochela mu msinda wa Betisaida ku Galileya, ni kutanda kumŵenda kuti, “Amwene, tukusaka kumwona Yesu.”
22 Filipo ŵapite kuja kumsalila Andileya. Kaneko Andileya pampepe ni Filipojo ŵapite kuja kumsalila Yesu.
23 Nambo Yesu ŵajanjile jemanjajo kuti, “Sambano ndaŵi jikwanile jakuti Mwanache jwa mundu achimbichikwe.
24 Nditu ngumsalichisya jemanja kuti, naga kambeju ka tiligu nganikagwila petaka ni kuwa, kakusaŵaga kambeju kamo peko basi. Nambo pakawile, kakusasogola yejinji.
25 Jwalijose jwakuwunonyela umi wakwe akuwujonanga. Nambo jwalijose jwakuŵengana ni umi wakwe m’chilambochi akuwusunga kuti chapate umi wangamala.
26 Jwalijose jwakusaka kuŵa jwakutumichila jwangu, anguyeje une. Soni kwachinjiŵa uneko, jwakutumichila jwangu chachiŵasoni kukoko. Jwalijose jwachachindumichila une, Atati ŵangu chachimchimbichisya.
27 Sambano umi wangu ukulaga, ana mbechetesoni chichi? Atati, angulupusye mundaŵi jakusawusyaji. Nambope ngusosekwa kusimana ni ndaŵi jeleji, pakuŵa ni yanayichile.
28 Atati, alichimbichisye lina lyawo.” Kaneko kwinani kwapikaniche maloŵe kuti, “Nalichimbichisye soni chinjilichimbichisya.”
29 Gulu ja ŵandu ŵaŵajimi pelepowo paŵapikene yeleyi ŵatandite kuŵecheta kuti papikaniche kulindima. Nambo ŵane ŵatite, “Lilayika liŵechete ni jwalakwejo.”
30 Pelepo Yesu ŵajanjile kuti, “Maloŵe gelega gapikaniche, ngaŵa ligongo lya une, nambo ligongo lya jemanja.
31 Sambano chilambochi chikulamulidwa. Jwakulamulila jwa chilambochi chachimponya kusa.
32 Nambope une, pachachigamba kungwesya mwinani mwakungomela pachitela, kaneko chinjawutila kwa une ŵandu ŵa mitundu josope.”
33 Jwalakwe ŵaŵechete yeleyi pakulosya mtundu wa chiwa chaŵasigele panandi kusimana nacho.
34 Kaneko ŵanduwo ŵajanjile kuti, “M’weji twapikene m’Chilamusi kuti Klistu chachitama mpaka kalakala. Nambi wuli wawojo akuŵecheta kuti Mwanache jwa mundu akusosekwa kumkwesya mwinani? Ana Mwanache jwa mundu jweleju ali ŵani?”
35 Pelepo Yesu ŵajanjile kuti, “Lilanguka chiliŵepe ni jemanja kwakandaŵi. Myoyo mjendeje mu lilangukali palili chiŵela ni jemanja, ni chakulinga chakuti chipi chikamgomeka. Jwalijose jwakwenda mu chipi jwangamanyilila kwakwawula.
36 Lilangukalyo palili chiŵela ni jemanja, mlikulupilileje, ni chakulinga chakuti chimŵe ŵanache ŵa lilanguka.”
Yesu paŵaŵechete yeleyi ŵatyosile pelepo ni kwawula kumalo kwakusisika kuti jemanjajo akamwona.
37 Atamose jwalakwejo ŵatesile yakusimonjesya yejinji pameso pawo, nambo jemanjajo nganamkulupililape.
38 Yeleyi yatendekwe pakwanilisya maloŵe ga jwakulochesya Yesaya. Jwalakwe ŵatite, “Yehofa, ana ŵani ŵakulupilile yindu yatwaŵechete m’weji? Ana Yehofa alosisye kwa ŵani machili gakwe?”*
39 Yesaya jwasasilesoni ligongo lyakwe jemanjaji nganakulupililaga. Jwalakwe ŵatite,
40 “Jwalakwejo ŵakundile kuti meso gawo gawugaliche soni kuti mitima jawo jijumule, ni chakulinga chakuti akalola chilichose ni meso gawo soni kuti akapikanichisya yindu m’mitima jawo, ni kugalawuka mtima kuti naposye.”*
41 Yesaya jwaŵechete yindu yeleyi ligongo jwawuweni uchimbichimbi wa jwalakwejo, soni jwaŵechete yakwamba jwalakwejo.
42 Atamose yaliji myoyo, ŵandu ŵajinji pampepe ni ŵakulamulila ŵakwe, ŵamkulupilile jwalakwejo. Nambo jemanjaji nganalosyaga yeleyi ligongo lya Afalisi, pakogopa kuti chiŵatyosye mu sunagoge.
43 Pakuŵa jemanjaji ŵanonyele uchimbichimbi wa ŵandu kupunda uchimbichimbi wa Mlungu.
44 Nambo Yesu ŵaŵechete mwakwesya maloŵe kuti, “Jwalijose jwakungulupilila une, ngakungulupilila unepe nambo akumkulupililasoni jwele juŵandumile une.
45 Soni jwalijose jwambweni une, am’wenisoni jwele juŵandumile une.
46 Une mbiche m’chilambo mpela lilanguka, ni chakulinga chakuti jwalijose jwakungulupilila une akaŵasoni m’chipi.
47 Nambo mundu jwakugapikana maloŵe gangu ni ngagakuya, une ngangum’welusya jwalakwejo. Ligongo nayiche kuti nachikulupusye chilambo, ngaŵa kuti nachiwelusye.
48 Jwalijose jwakungana une soni jwangapikanila maloŵe gangu apali jumo juchachim’welusya jwalakwejo. Maloŵe gambechete unega ni gagachim’welusya mundu jwelejo pa lisiku lyakumalisya.
49 Pakuŵa nganimbecheta yakutyochela mumtwe mwangu, nambo Atati ŵaŵandumile unewo ŵasalile* yindu yangusosekwa kuŵecheta soni kwiganya.
50 Soni ngumanyilila kuti jwalijose jwakukuya yindu yeleyi* chachipata umi wangamala. Myoyo chilichose changusaŵecheta, ngusachiŵecheta ndendende mwele Atati ŵasalilile une.”
Maloŵe Gamwiŵanda
^ Libotolo lyakwe lyaliji chiŵandika hafu lita.
^ Nado uli mtundu wa chakumela chinechakwe chele chikusaŵa chakununjila chenene.
^ Maloŵe gakwe gandanda, “mkono wakwe?”
^ Kapena kuti, “nalamisye.”
^ Maloŵe gakwe gandanda, “ŵambele lilamusi lyakwamba.”
^ Maloŵe gakwe gandanda, “lilamusi lyakweli.”
