Yobu 29:1-25
29 Yobu ŵapitilisye kuŵecheta kuti:
2 Yikaŵele chenene yikaŵe kuti ndili m’myesi jamunyuma,Masiku gele Mlungu ŵandolelaga une.
3 Pandaŵi jele jwalakwe jwatendekasyaga kuti lilanguka lya nyali jakwe liŵaleje pamtwe pangu,Pandaŵi jele jwalakwe jwamulichilaga pangwenda m’chipi.
4 Pandaŵi jele naliji mnyamata soni panaliji jwamachili,M’masiku gele naliji paunasi wambone ni Mlungu.
5 Pandaŵi jele Jwamachiligosopejo jwaliji ni une,Pandaŵi jele ŵanache ŵangu* ŵaliji chiŵela umi.
6 Pandaŵi jele sajo syangu nasijojesyaga m’mawuta,Soni pandaŵi jele malwala ngambungulilaga une sulo syamawuta.
7 Pandaŵi jele une nanonyelaga kwawula ku geti ja msindaNi kuja kutama mu luŵala lwa msindawo,
8 Anyamata pambweni une ŵasepukaga pakulosya kunjimbichisya,Atamose achalume ŵachikulile ŵajimukaga ni kwima pakulosya kunjimbichisya.
9 Ŵandu ŵakulongolela nganaŵechetaga chilichose.Jemanjaji ŵakamulaga pakamwa pawo.
10 Ŵandu ŵakumanyika ŵatamaga ngaŵecheta.Lulumi lwawo lwamatililaga kwinani kwa mkamwa mwawo.
11 Jwalijose jwambikene une ndili mkuŵecheta jwaŵechetaga yambone yakwamba une,Soni jwalijose jwambweni une jwapelekaga umboni wambone wakwamba une.
12 Pakuŵa une nakulupusyaga ŵakulaga ŵaŵaŵendaga chikamuchisyo,Namkamuchisyagasoni mwanache jwanganakola babagwe soni jwalijose jwanganakola ŵakumkamuchisya.
13 Mundu jwasigele panandi kuwa jwambaga une upile,Soni natendekasyaga mtima wa jwamkongwe jwamasije kusangalala.
14 Chilungamo nachiwalaga mpela chakuwalaSoni chilungamo changu chaliji mpela mkanjo* soni nduŵila.
15 Kwa ŵandu ŵangalola, une naŵele meso gawo,Soni kwa ŵandu ŵalemale, une naŵele sajo syawo.
16 Naliji nangolo kwa ŵandu ŵakulagaSoni nawungunyaga magambo ga ŵandu ŵele ngangwamanyilila.
17 Une natemangulaga yipundi ya ŵandu ŵakutenda yakusakalaSoni nasumulaga nyama jalumile ni meno gawo.
18 Une nanonyelaga kuŵecheta kuti, ‘Chinjiwila m’nyumba jangu,Soni masiku ga umi wangu gachiŵa gejinji mpela mchenga.
19 Michiga jangu jichimwasikana m’mesi,Soni mangame gachitama chilo chosope pa nyambi syangu.
20 Uchimbichimbi wangu ngasiwumala,Soni ukunje wawuli mmyala mwangu chiwupitilisye kuponya mipamba.’
21 Ŵandu ŵajembecheyaga kuti apikane maloŵe gangu,Ŵatamaga ngaŵecheta ni kwembecheyaga maloŵe gakamuchisya gachimbechete.
22 Panyuma pakuti une mbechete, jemanjajo nganakolagasoni maloŵe.Maloŵe gangu gasangalasyaga jemanjajo m’mawiwi mwawo.
23 Jemanjajo ŵanjembecheyaga une mpela yakusati mundu pakwembecheya wula.Ŵawugulaga mnope pakamwa pawo mpela kuti akwembecheya wula jakumalisya.
24 Une panasechelele, jemanjaji nganakulupililaga.Nambo kuŵala kwa ngope jangu kwasimichisyaga jemanjaji.
25 Nasalilaga jemanjaji yakutenda mpela jwakulongolela jwawo,Naliji mpela mwenye jwali pasikati pa magulu gakwe ga asilikali,Naliji mpela mundu jwakusiŵalimbikasya ŵandu ŵakulila.
