Yobu 1:1-22
1 Kwapali mundu jwine ku chilambo cha Usi lina lyakwe Yobu.* Jwalakwe nganatendaga yakulemwa, soni jwaliji mundu jwakulupichika. Nambosoni jwalakwe jwaliji jwakumjogopa Mlungu soni jwaŵambalaga kutenda yindu yakusakala.
2 Yobu ŵakwete ŵanache ŵachalume ŵakwana 7 soni ŵanache ŵachakongwe ŵakwana ŵatatu.
3 Jwalakwe ŵakwete ngondolo syakwana 7,000, ngamila syakwana 3,000, ng’ombe syakwana 1,000 soni abulu* ŵakwana 500. Ŵakwetesoni ŵamasengo ŵajinji, mwamti jwalakwe jwaŵele jwakumanyika mnope pasikati pa ŵandu wosope ŵa Kungopokolyuŵa.
4 Ŵanache ŵakwe ŵachalume ŵatendaga pwando ku nyumba syawo, jwalijose pa lisiku lyasagwile.* Jemanjaji ŵaŵilangaga achalumbuŵawo ŵatatu ŵala kuti ayiche kukulya soni kumwa nawo yimpepe.
5 Panyuma pakuti ŵanache wosopewo atesile pwando ku nyumba syawo, Yobu ŵaŵilangaga jemanjajo kuti ŵaswejesye. Kaneko jwalakwe ŵajimukaga kundaŵindaŵipe ni kumpelechela mwanache jwalijose mbopesi jakutinisya. Ŵatendaga yeleyi ligongo jwalakwe ŵaganisyaga kuti, “Mwine ŵanache ŵangu alemwisye soni amnyosisye Mlungu mumtima mwawo.” Yeleyi ni yaŵatendaga Yobu ndaŵi syosope.
6 Sambano lyayiche lisiku lyele ŵanache ŵa Mlungu jusyesyene* ŵapite kuja kuwonechela pameso pa Yehofa. Nombenajo Satana ŵayiche pasikati pa jemanjajo.
7 Kaneko Yehofa ŵamwusisye Satanajo kuti, “Ana mmweji mkutyochela kwapi?” Satanajo ni ŵamjanjile Yehofa kuti, “Naliji mkusyungulilasyungulila pachilambo chapasi soni kwendajenda m’chilambomo.”
8 Yehofa ni ŵamwusisye Satanajo kuti, “Ana mtima wenu uli pa jwakutumichila jwangu Yobu? Jwalakwe ngakusatenda yakulemwa soni ali mundu jwakulupichika. Nambosoni jwalakwe ali mundu jwakumjogopa Mlungu soni akusaŵambala kutenda yindu yakusakala.”
9 Pelepo Satana ni ŵamjanjile Yehofajo kuti, “Ana wawo akupela Yobu agamba kumjogopa Mlungu lulele?
10 Ana ngati wawojo akumchenjela jwalakwejo mwakumsyunguchisya lutenje lwakumchenjela? Wawojotu akujichenjelasoni nyumba jakwe ni yindu yosope yakwete jwalakwejo. Sonitu wawojo agapele upile masengo ga makono gakwe, mwamti atamose yilango yakwe yitupile m’chilambomo.
11 Nambo agambe kulinga kunyakula mkono wawo ni konanga yindu yosope yakwete jwalakwe. Nditu ngwasalila, jwalakwe chiŵatukane wawojo ali mkulola.”
12 Kaneko Yehofa ŵamsalile Satanajo kuti, “Mpikane, chilichose chakwete jwalakwe nguchipeleka mmyala mwenu.* Nambo mkono wenu ukamkwaya jwalakwejo.” Pelepo Satana jwatyosile pameso pa Yehofa.
13 Sambano lisiku lyele ŵanache ŵakwe ŵachalume soni ŵachakongwe ŵaliji mkulya soni kumwa finyo ku nyumba ja mchimwenegwawo jwamkulungwa,
14 kwayiche mundu kwa Yobujo ni kumsalila utenga wakuti, “Ng’ombe syaliji mkulima soni abulu ŵaliji mkulya pambali pa ng’ombesyo.
15 Kaneko ŵayiche Asabeya ni kusijigala ng’ombe soni abuluwo, mwamti ŵamasengo ŵaŵaliji kweleko ŵawuleje ni upanga.* Unepe ni jwangulupwiche, mwamti mbiche kuti nasalile yeleyi.”
16 Jweleju ali mkuŵecheta, kwayiche mundu jwine ni utenga wakuti, “Moto wa Mlungu* wagwile kutyochela kwinani, mwamti wakolele pasikati pa ngondolo soni ŵamasengo ni kwatinisya. Unepe ni jwangulupwiche, mwamti mbiche kuti nasalile yeleyi.”
17 Jweleju ali mkuŵecheta, kwayiche mundu jwinesoni ni utenga wakuti, “Akalideya ŵayiche m’magulu gatatu ni kusisyungulila ngamila, kaneko ŵasijigele. Mwamti ŵawuleje ŵamasengo ŵawo ni upanga. Unepe ni jwangulupwiche, mwamti mbiche kuti nasalile yeleyi.”
18 Jwelejusoni ali mkati mwakuŵecheta kwayichesoni mundu jwine ni utenga wakuti, “Ŵanache ŵawo ŵachalume soni ŵachakongwe ŵaliji mkulya soni kumwa finyo m’nyumba ja mchimwenegwawo jwamkulungwa.
19 Mwangamanyika chenene, kwayiche chimbungo chamachili kutyochela ku chipululu, mwamti chaputile mapupa mcheche ga nyumbajo. Soni nyumbajo jagwilile ŵanachewo ni kwawulaga. Unepe ni jwangulupwiche, mwamti mbiche kuti nasalile yeleyi.”
20 Pelepo Yobu jwajimwiche ni kupapula chakuwala chakwe soni jwasenjile wumbo mumtwe mwakwe. Kaneko jwalakwe ŵatindiŵele ni kwinama mpaka ngope jakwe pasi.
21 Jwalakwe ni jwaŵechete kuti:
“Nakopweche m’chitumbo cha mama ŵangu ndili makonope,Mwamti chinjiwujilasoni ndili makonope.
Yehofa apeleche, soni Yehofa pejo ajigele.
Lina lya Yehofa lipitilisye kuchimbichika.”
22 Atamose kuti Yobu jwasimene ni yakusawusya yosopeyi, nambo jwalakwe nganalemwa kapena kumdandawula Mlungu pa yindu yakusakala yajwasimene nayoyo.*
Maloŵe Gamwiŵanda
^ Komboleka kuti linali likugopolela chindu chakuchiŵenga.
^ Mu Chihebeli ŵatiga, “abulu ŵachakongwe.”
^ Kapena kuti “jwalijose ŵatendelaga kunyumba jakwe mwakuchenganachengana.”
^ Gelega gali maloŵe gakuluŵika ga Chihebeli gagakusajimila malayika, ŵali ŵanache ŵa Mlungu.
^ Kapena kuti “mpaka mtende nacho yamkusaka.”
^ Upanga ukusawoneka mpela chipula chekulungwa chakutema kosekose.
^ Kagopolele kanesoni “njasi jagwile.”
^ Kapena kuti “kumjimba Mlungu magambo kuti ni jwamtendele yakusakala.”
