Nyimbo ja Solomo 2:1-17
2 “Unetu ngambile kuŵa liluŵape basi lya m’chitiŵi cha mungulugulu nyasa,Ndili liluŵape basi lya m’chitiŵi.”
2 “Mwakulandana ni liluŵa lyalili pasikati pa miŵa,Ni mwaŵelelesoni jwakunonyelwa jwangu pasikati pa ŵanache ŵachakongwe.”
3 “Mpela mwachiŵelele chitela cha maapulo pasikati pa yitela ya mungalango,Ni mwaŵelelesoni jwakunonyelwa jwangu pasikati pa ŵanache ŵachalume.
Ngukumbila mnope kutama mu m’bulili wa jwakunonyelwa jwangujo,Mwamti chisogosi chakwe chili chakulyolyopela mnope kwa une.
4 Jwalakwe ŵanjigalile une m’nyumba jakutendela pwando,Soni chinonyelo chakwe ŵachijimiche pa une mpela mbendela.
5 Mumbe makeke ga nguju syejumu kuti gandamiche mtima pasi.Mumbeje maapulogo kuti mbate machili,Pakuŵa une ngwete chinonyelo champaka kulwala nacho.
6 Mkono wakwe wamchiji uli pasi pa mtwe wangu,Soni mkono wakwe wamlyo ungumbatile une.
7 Une ngumlumbilikasya jemanja ŵanache ŵachakongwe ŵa ku Yelusalemu,Mlumbile mwakolanga mbaŵala soni ngolombwe syakwitinji:
Mkalinga kuchijimusya chinonyelo mwa une ndaŵi jakwe mkanijikwane.
8 Kukupikanika masegwe ga jwakunonyelwa jwangu.
Apikane, jwalakwe akwika,Jwalakwe akukwela matumbi soni akuyiguluka yikwesya.
9 Jwakunonyelwa jwangu ali mpela ngolombwe, jwalakwe ali mpela mbaŵala jelume.
Ngati ni jwali apopojo, jwajimi kusyeto kwa nyumba jetujo,Jwalakwe akulingulila pewindo,Akulingulila m’tumipita twa pewindo.
10 Jwakunonyelwa jwangu akuŵecheta, jwalakwe akusalila une kuti:
‘Mjimuche, mmwe jwakunonyelwa jwangu,Mmwetu mli ŵakusalala mnope kwa une, kwende tujawuleje.
11 Mlole, nyengo jakusisima* jimasile.
Soni wula jimasile soni jipite.
12 Maluŵa gatandite kuwoneka m’chilambochi,Ndaŵi jakwangulila yitela jiyiche,Soni kwimba kwa njuŵa kutandite kupikanika m’chilambo chetu.
13 Yisogosi yandanda ya chitela cha mkuju yitandite kwiwula.Soni mipeleya jitandite uluŵa mwamti jikununjila.
Mjimuche mmwe jwakunonyelwa jwangu, myiche akuno.
Mmwetu mli ŵakusalala mnope kwa une, kwende tujawuleje.
14 Mmweji njuŵa jangu, ŵamli m’malo gakusisika ga lwala,Mmwe ŵamsisiche m’mipata ja maganga,Chonde mungunde kuti namlole soni mbikane maloŵe genu,Pakuŵa tumaloŵe twenu tuli twakusangalasya soni kawoneche kenu kali kakujigala mtima.’”
15 “Mtukamulile makule,Mtukamulile ŵanache ŵa makule ŵakuwutuka m’migunda ja mipeleyawo,*Ligongo migunda jetu ja mipeleya jitesile uluŵa.”
16 “Jwakunonyelwa jwangu ali jwangu basi, soni unejo ndili jwakwe.
Jwalakwe akulisya yilango pasikati pa maluŵa gakusalala.
17 Mpaka kusa kutande kupuga kambepo soni mpaka m’bulili uli utisile,Mwujile mwachitemachitema, mmweji jwakunonyelwa jwangu,Mwutuche mpela ngolombwe soni mbaŵala pa matumbi gagakutulekanganya.*
Maloŵe Gamwiŵanda
^ Kapena kuti “nyengo ja wula.”
^ Mipeleya jili mtundu winewakwe wa yisogosi yakusayikamulichisya masengo pakupanganya finyo.
^ Kapena kuti “matumbi ga Belita.”
