Numeli 14:1-45
14 Pelepo Ayisalayeli wosope ŵatandite kulila mnope. Ŵanduwo ŵapitilisye kulilako mwagumila mpaka chilo chosope.
2 Ayisalayeli wosope ŵatandite kudandawula mwakusisyana ni Mose soni Aloni, mwamti Ayisalayeli ŵaŵasongenewo ŵaŵechete mwakusisyana ni jemanjajo kuti, “Yikalijitu chenene tukagambe kuwila m’chilambo cha Iguputo kapena kwamba kuwila m’chipululu muno.
3 Ligongo chichi Yehofa ŵatuyikasisye m’chilambo achino? Chituwetu ni upanga* akuno, soni achiŵamkwetu ni ŵanache ŵetu chachiŵa achikapolo. Kuli chenenetu kuti tugambe kuwujila ku Iguputo kula.”
4 Jemanjajo ŵayikene pakukambilana kuti, “Kwende tupate mundu jwakuti atulongolele kuti tuwujile ku Iguputo!”
5 Pelepo Mose soni Aloni ŵatindiŵele mpaka ngope syawo pasi, mwamti Ayisalayeli wosope ŵaŵasongene pelepowo ŵayiweni yeleyo.
6 Yoswa mwanache jwa Nuni soni Kalebe mwanache jwa Yefune, ŵaŵaliji nawo mu gulu ja ŵandu ŵaŵapite kukusonda chilambo ŵala, ŵapapwile yakuwala yawo.
7 Kaneko jemanjajo ŵasalile Ayisalayeli wosopewo kuti, “Chilambo chatwapitaga mchichisondacho chili chilambo chambone kwabasi.
8 Naga Yehofa akusangalala ni m’weji nditu jwalakwe chatujinjisye m’chilambocho ni kutupa kuti chiŵe chetu, chilambo chakwenda mkaka ni uchi.
9 Nambo jemanja mkamjimuchila Yehofa soni mkajogopa ŵandu ŵakutama m’chilambocho, pakuŵa chitukajonanje jemanjajo. Ŵanduwo ŵangali jwalijose jwakwachenjela, nambo Yehofa ali ni m’weji. Kwende tukajogopa jemanjajo.”
10 Nambope ŵanduwo ŵatandite kukambilana yakuti ŵaponye maganga jemanjajo. Nambo mwakusisimuchisya, kuŵala kwa uchimbichimbi wa Yehofa kwawonechele kwa Ayisalayeli wosope penani pa chitenti chakusimanilana.
11 Kaneko Yehofa ŵaŵechetene ni Mose kuti, “Ŵandu ŵeleŵa une nalosisye yimanyisyo yejinji nambo ngakunjimbichisya kose soni ngakungulupilila. Ana jemanjaji chapitilisye kutenda yeleyi mpaka chakachi?
12 Uli mungunde nagwichisye milili jemanjaji soni najonanje, kaneko namtende mwejo kuŵa mtundu wekulungwa soni wamachili kwapunda jemanjajo.”
13 Pelepo Mose ŵamjanjile Yehofa kuti, “Ana Aiguputo chachijila uli pachachipikana kuti wawojo ŵatendele ŵandu ŵawo yindu yeleyi? Pakuŵa wawojo ni machili gawo, ŵakopwesye ŵanduŵa m’chilambo cha jemanjajo.
14 Jemanjajo chachasalilaga ŵandu ŵa m’chilambo achino pakwamba yeleyi. Nombe ŵandu ŵa m’chilambo achinoŵa apikene yakuti wawojo Yehofa ali pasikati pa ŵandu aŵa soni kuti akusawonechela kwa ŵandu ŵeleŵa pameso ni pameso. Apikenesoni kuti wawojo ali Yehofa, soni kuti liwunde lyawo likusajimaga penani pa ŵandu ŵeleŵa, nambosoni kuti wawojo akusiŵalongolela ŵandu ŵeleŵa. Musi akusiŵalongolela ni liwunde lyakwima mpela chipilala soni chilo ni moto wakwima mpela chipilala.
15 Naga akwawulaga ŵandu wosopeŵa pampepe, mitundu josope jajipikene yakwamba mbili ja wawojo jichiŵechetaga kuti,
16 ‘Yehofa jula ŵalepele kwayikasya ŵandu aŵa m’chilambo chiŵalumbile kuti chachapa. Myoyo ŵagambile kwasikitasikita m’chipululu.’
17 Sambano wawo Yehofa, chonde atende yakuti machili gawo gawonechele mpela muŵaŵechetele mula kuti,
18 ‘Yehofa ali jwangatumbila chitema soni jwakugumbala ni chinonyelo changamala, jwakwakululuchila ŵandu ŵatesile yakusakala. Nambo jwalakwe ngasamlechelela mundu jwakulemwa ngampa chilango.* Jwalakwe akusakunda kuti ŵanache, yisukulu soni ŵanache ŵa yisukuluyo asimane ni yakusawusya yakwika ligongo lya ulemwa wa achinangolo ŵawo.’
19 Chonde ŵakululuchile ŵandu ŵeleŵa mwakamulana ni chinonyelo chawo changamala chachili chekulungwa, mpela mwaŵele ali mkwakululuchila kutyochela ku Iguputo kula mpaka apano.”
20 Pelepo Yehofa ŵatite, “Chambone, nakululuchile ligongo lya maloŵe gamŵechetego.
21 Nambope ngulumbila paumi wangu kuti chilambo chosope chapasi chichigumbala ni uchimbichimbi wa Yehofa.
22 Nambo pa achalume wosope ŵawuweni uchimbichimbi wangu soni yimanyisyo yanatesile m’chilambo cha Iguputo ni mu chipululu, ŵele aŵele ali mkulinga mwakuwilisyawilisya* soni nganapikanila maloŵe gangu, pangali atamose mundu jumo
23 juchachichiwona chilambo chinalumbile kwa achinangolo ŵawo kuti chinjapa. Pangali atamose mundu jumo mwa ŵandu ŵatesile yanganjimbichisyaŵa ŵachachichiwona chilambocho.
24 Nambo jwakutumichila jwangu Kalebe, nditu chinjimjinjisya m’chilambo chaŵapite kukuchisondacho, soni ŵanache ŵakwe chachichijigala chilambocho ni kuŵa chawo. Chinjimtendela yeleyi ligongo lyakuti jwalakwejo ŵaliji ŵakulekangana ni ŵandu ŵanewo soni aŵele ali mkumbikanila ni mtima wakwe wosope.
25 Sambano pakuŵa Aamaleki soni Akanani akutama m’chitiŵi,* malaŵi mgalawuche ni kuwujila ku chipululu kupitila m’litala lyakwawula ku Nyasa Jechejewu.”
26 Kaneko Yehofa ŵaŵechete kwa Mose soni Aloni kuti,
27 “Ana ŵandu ŵakusakalaŵa chapitilisye kudandawula mwakusisyana ni une mpaka chakachi? Nayipikene yosope yakuŵecheta Ayisalayeli mwakusisyana ni unejo.
28 Sambano mwasalile jemanjajo kuti, ‘Yehofa akuŵecheta kuti, “Ngulumbila paumi wangu kuti, mbikene yosope yamŵecheteyo mwamti chinamtendele yeleyo.
29 Chim’wile m’chipululu muno, nditu jemanja wosope ŵakutandila yaka 20 kwawulaga msogolo ŵamwalembesye mena genu, wosope ŵamŵele mli mkudandawula mwakusisyana ni une.
30 Pangali atamose jumo jwa jemanja juchachijinjila m’chilambo chinalumbile kuti chinjimpa kuti mtameje, nambo Kalebe mwanache jwa Yefune soni Yoswa mwanache jwa Nuni ni ŵachakajinjile.
31 “‘“Chingajinjisyesoni m’chilambocho ŵanache ŵenu ŵamteje ŵala kuti chachiŵa achikapolo. Jemanjajo ni ŵachakasangalale ni chilambo chamkuchikanacho.
32 Nambo jemanja chim’wile mu chipululu munomuno.
33 Sambano ŵanache ŵenuwo chaŵe ali mkulanga yilango mu chipululu muno kwa yaka 40. Jemanjajo chasimaneje ni yakuyichisya ya ungakulupichika wenu soni chasimanejepe ni yeleyo mpaka jemanja wosope mli mmasile kuwa mu chipululu muno.
34 Pakuŵa jemanja mwamasile masiku gakwana 40 mli kumsonda chilambocho, mwakamulana ni winji wa masiku gelego chimsimanesoni ni yakuyichisya ya kulemwa kwenuko kwa yaka 40, lisiku limo kwimilaga chaka chimo. Pelepo ni pachimchimanyilila kogoya kwakusisyana ni une.*
35 “‘“Une Yehofa ni jwambechete yeleyi. Ŵandu wosope ŵakusakalaŵa ŵasongene kuti alimbane ni une chinatende ayi: Jemanjaji chamalile mu chipululu munomuno, nditu chawile munomuno.
36 Achalume wosope ŵaŵatumile Mose kuti akasonde chilambocho, ŵele paŵawusile ŵaŵechete yakusakala yakwamba chilambocho yayatendekasisye kuti Ayisalayeli wosope atande kumdandawulila Mose mwakusisyana najo,
37 elo, achalume ŵaŵasasile yakusakala yakwamba chilambocho, achalume ŵelewo chinjapa chilango* mwamti chachiwa pameso pa Yehofa.
38 Nambo Yoswa mwanache jwa Nuni soni Kalebe mwanache jwa Yefune, ŵele ŵapite nawo kukusonda chilambocho, nditu jemanjaji chachisigala ŵaumi.”’”
39 Mose paŵagambile kwasalila Ayisalayeli wosope maloŵe gelega, Ayisalayeliwo ŵatandite kulila mnope.
40 Konjechesya pelepo, ŵanduwo ŵajimwiche kundaŵindaŵipe ni kuwutanda ulendo wakwawula kwitumbi. Jemanjajo ŵaŵechetaga kuti, “Atamose kuti tulemwisye nambo kwende tujawulepe ku chilambo chaŵatusalile Yehofa kuti chachitupa chila.”
41 Nambo Mose ŵaŵechete kuti, “Ligongo chichi jemanja mkutenda yindu yakusisyana ni yaŵechete Yehofa? Yamkusaka kutendayitu ngayimkamuchisya.
42 Mkajawula kweleko ligongo Yehofa nganaŵa ni jemanja, soni adani ŵenuwo chakamgomeche.
43 Aamaleki soni Akanani amkosechele jemanja kweleko mwamti chimkawe ni upanga. Pakuŵa mlesile kumkuya Yehofa, nombenajo Yehofajo ngaŵa ni jemanja.”
44 Nambope jemanjajo mwakulikwesya ŵapitilisyepe kwawula penani pa litumbi pala, nambo libokosi lya Chilanga lya Yehofa nganilityoka pasikati pa matenti gawo, nombenajosoni Mose nganatyoka.
45 Kaneko Aamaleki soni Akanani ŵaŵatamaga mu litumbilyo ŵatulwiche ni kutanda kwagomeka jemanjajo mwamti ŵatopwesye mpaka kuja kwika ku Holima.
Maloŵe Gamwiŵanda
^ Upanga ukusawoneka mpela chipula chekulungwa chakutema kosekose.
^ Ŵane akusati “chamuko.”
^ Mu Chihebeli ŵatiga, “kwa maulendo 10 gelega.”
^ Chitiŵi chakusala pelepa chaliji chana malo gekulungwa gafulati.
^ Kapena kuti, “kogoya kwakumbona une mpela mdani jwenu.”
^ Ŵane akusati “chamuko.”
