Masengo ga Ŵandumetume 1:1-26
1 Che Teofilo, mungani jandanda jila nalembile yindu yosope yele Yesu ŵatesile soni kwiganya kutandila pandanda
2 mpaka pa lisiku lyele Mlungu ŵamjigele kwawula kwinani. Jwalakwe ŵamjigele ali ŵasalile ŵandumetume ŵaŵasagwile ŵala yindu yakuti akuyeje. Ŵasalile yeleyi kupitila mwa msimu weswela.
3 Panyuma pakusimana ni yakusawusya soni kuwa, Yesu ŵalilosisye kwa jemanjajo ndaŵi syejinji kuti asimichisye kuti jwalakwejo ajimwiche. Mkati mwa masiku 40, ŵawonechelaga kwa jemanjajo soni ŵasalilaga ya Uchimwene wa Mlungu.
4 Jwalakwe paŵasimene pampepe ni jemanjajo, ŵasalile kuti, “Mkatyoka mu Yelusalemu, nambo mjembecheyeje chindu chele Atati ŵasasile kuti chachipeleka, chelesoni jemanja mwachipikene kwa une.
5 Pakuŵa Yohane ŵabatisyaga nditu ni mesi, nambo jemanja chim’batisidwe ni msimu weswela mkanipapite masiku gejinji.”
6 Myoyo jemanjajo paŵasongene pampepe, ŵamwusisye jwalakwejo kuti, “Ambuje, ana chawuchisye uchimwene kwa Ayisalayeli pandaŵi ajino?”
7 Jwalakwejo ŵajanjile jemanjajo kuti, “Nganiyiŵa yakuŵajilwa kwa jemanja kumanyilila ndaŵi kapena lisiku lyakutendekwa kwa yindu, pakuŵa yeleyi yili mmyala mwa Atati.
8 Nambo msimu weswela pawuchiyika pa jemanja, chimchipochela machili, soni chimchiŵa mboni syangu mu Yelusalemu, mu Yudeya mosope, mu Samaliya, soni mpaka kumbesi kwa chilambo chapasi.”
9 Paŵamalisisye kuŵecheta yeleyi, Mlungu ŵamnyakwile jwalakwejo ni kwawula najo kwinani jemanjajo ali mkulola, kaneko liwunde lyamwunichile mwamti nganakombola kumwonasoni.
10 Jemanjajo paŵamlolaga jwalakwejo ali mkwawula kwinani, mwakusisimuchisya pawoneche achalume ŵaŵili ŵaŵawete yeswela ali ajimi pambali pawo.
11 Achalumewo ŵatite, “Jemanja achalume ŵa ku Galileya, ligongo chichi mjimi ni kulolaga kwinani? Yesu jwele amjigele pasikati penu kwawula kwinani chachiyikasoni mwakulandana ni yamkuti pakumwona ali mkwawula kwinani.”
12 Kaneko jemanjajo ŵawujile ku Yelusalemu kutyochela ku Litumbi lya Maolifi, lyalili mwakuŵandikana ni Yelusalemu, pamkuli wakulandana ni wele mundu ŵamkundaga kwenda pa lisiku lya Sabata.*
13 Paŵayiche, ŵapite m’chipinda chamwinani chaŵatamaga. M’chipindamo mwaliji mwana Petulo, Yohane, Yakobo, Andileya, Filipo, Tomasi, Batolomeyo, Mateyu, Yakobo mwanache jwa Alifeyo, Simoni jwakulimbichila mnope, nambosoni Yudasi mwanache jwa Yakobo.
14 Wosopeŵa ŵaliji mkupopelela pampepe. Papalisoni achakongwe ŵane soni Maliya mamagwe Yesu nambosoni achapwakwe Yesu.
15 Sambano lisiku line pa masiku gelego Petulo ŵajimi pasikati pa achalongo achimjakwewo (ŵandu wosopewo pampepe ŵapali 120) ni ŵaŵechete kuti,
16 “Achalongo achimjangu, kupitila mwa Daudi, msimu weswela wasasile yakwamba Yudasi, soni yaliji yakusosekwa kuti maloŵego gatendekwe. Yudasi jweleju ni juŵalongolele ŵandu ŵaŵamtaŵile Yesu ŵala.
17 Jwalakweju jwaliji jumo mwa m’weji soni jwatumichilaga pampepe ni m’weji.
18 (Mundu jweleju jwapochele mbiya pa yindu yangalumbana yaŵatesile, soni mbiya syelesyo ŵasumile mgunda. Jwalakweju jwagwile mwakulongosya mtwe mwamti lutumbo lwawuliche, mpaka matumbo gakwe gosope gakusuchile pasi.
19 Yeleyi yamanyiche kwa ŵandu wosope ŵakutama mu Yelusalemu, mwamti mgundawo ŵawukolasile mu chiŵecheto chawo kuti Akeledama, kugopolela kuti, “Mgunda wa Myasi.”)
20 Pakuŵa yalembedwe m’buku ja Masalimo kuti, ‘Malo gakwe gakutama gaŵe masame, soni pakasimanikwa jwalijose jwakutama pelepo.’ Yalembedwesoni kuti, ‘Udindo* wakwe ajigale mundu jwine.’
21 Myoyo yili yakuŵajilwa kuti mundu jwine ajinjile mmalo mwa jwalakwe. Mundujo aŵe jumo mwa ŵandu ŵaŵele ali ni m’weji pandaŵi josope jele Ambuje Yesu ŵatendaga masengo gawo pasikati petu,
22 kutandila paŵabatisidwe ni Yohane mpaka palisiku lyaŵamjigele pasikati petu. Mundujo aŵesoni jwakuti twaliji najo patwamwonaga Yesu ali ajimwiche.”
23 Myoyo jemanjajo ŵasagwile ŵandu ŵaŵili, Yosefe jwakolanjidwa kuti Balasaba, jwele ŵamkolangagasoni kuti Yusito, soni jwine Matiyasi.
24 Kaneko ŵapopesile kuti, “Wawo Yehofa, ŵakusamanyilila mitima ja ŵandu wosope, tukwaŵenda kuti atulosye mundu jwamsagwile pasikati pa achalume ŵaŵiliŵa
25 kuti apochele utumiki welewu soni kuti aŵe jwandumetume mmalo mwa Yudasi jwele ŵayilesile yeleyi ni kwenda m’litala lyakwe.”
26 Myoyo ŵatesile kalotalota* pa ŵaŵiliwo, mwamti ŵamsagwile Matiyasi ni jwaŵele jwandumetume pampepe ni ŵane 11 ŵala.
Maloŵe Gamwiŵanda
^ Lutandolu lwaliji chiŵandika kilomita jimo.
^ Pelepa akwamba udindo wakulolela mpingo.
^ Ŵane akusati “mayele.”
