Ngani Syambone Syaŵalembile Luka 5:1-39
5 Pandaŵi jine Yesu paŵaliji mkwiganya mungulugulu nyasa ja Genesaleti,* ŵandu ŵajinji ŵaliji mkupikanila maloŵe ga Mlungu soni ŵajimi mwakumkanganika.
2 Kaneko jwalakwe ŵagaweni maboti gaŵili pa chiko,* nambo achimsyene ŵaliji ali atulwiche m’mabotimo ni kuchapaga makoka gawo.
3 Yesu ŵakwesile liboti limo, lyalyaliji lya Simoni, ni ŵamsalile jwalakwejo kuti alipalasile chapasogolo panandi. Kaneko ŵatemi mwibotimo, ni kutanda kwajiganya ŵanduwo.
4 Paŵamalisisye kuŵecheta, ŵamsalile Simoni kuti, “Mpalasile libotili kwakusokoka, ni mponye likoka lyenu kuti mwulaje somba.”
5 Simoni ŵamjanjile jwalakwejo kuti, “Mwalimu, m’weji tulasile chilo chosopechi nambo nganituwulaga chilichose, nambo pakuŵa wawojo ni ŵaŵechete, chimbonye likokali.”
6 Myoyo paŵatesile yeleyi, ŵawuleje somba syejinji mnope, mpaka likoka lyawo lyatandite kupapuka.
7 Pelepo ŵaŵendile achimjawo ŵaŵaliji mu liboti line kuti ayiche kukwakamuchisya. Paŵayiche, ŵagumbesye sombasyo m’maboti gaŵiligo mpaka gatandite kutiŵila.
8 Simoni Petulo paŵayiweni yeleyi, ŵatindiŵele pameso pa Yesu ni kuŵecheta kuti, “Ambuje, akambandichila, ligongo une ndili mundu jwakulemwa mnope.”
9 Ŵaŵechete yeleyi ligongo jwalakwe yimpepe ni achimjakwewo ŵasimonjile mnope ni winji wa somba syaŵawulejesyo.
10 Yakobo ni Yohane, ŵanache ŵa Sebedayo, ŵaŵawulagaga somba yimpepe ni Simoni, nombenawo ŵasimonjile. Nambo Yesu ŵamsalile Simoni kuti, “Mkatenda woga. Kutandila apano chimsosejesoseje ŵandu mmalo mwa somba.”
11 Pelepo ŵayiche nago mabotigo kumkuli kaneko ŵalesile chilichose ni kutanda kumkuya jwalakwejo.
12 Pandaŵi jinesoni paŵaliji mumsinda wine kweleko, ŵasimene ni mundu juŵakwete matana chilu chosope. Paŵam’weni Yesu, jwalakwe ŵatindiŵele ni kwinama mpaka ngope pasi ni kumŵenda kuti, “Ambuje, naga akusaka, mpaka aswejesye.”
13 Myoyo Yesu ŵatambasukwile mkono wakwe ni kumkamula mundujo, ni ŵamsalile kuti, “Elo ngusaka! Mŵe ŵaswela.” Ndaŵi jijojo ulwele wamatanawo wamasile.
14 Kaneko ŵamsalile mundujo kuti akamsalila jwalijose yayitendekweyo. Ŵamsalilesoni kuti, “Nambo mjawule mkalilosye kwa ŵakutaga mbopesi, soni mkapeleche mbopesi jaŵalamwile Mose pakulosya kuti mswejele, kuti uŵe umboni kwa jemanjajo.”
15 Nambo mbili jakwamba Yesu jaliji palipose, soni ŵandu ŵajinji ŵayikaga kwa jwalakwe kukumpikanila soni kuti ŵaposye* yilwele yawo.
16 Nambope, ndaŵi syejinji jwalakwe ŵajawulaga kwajika kukupopela.
17 Lisiku line Yesu paŵaliji mkwiganya, Afalisi soni ŵakwiganya Chilamusi ŵaŵatyochele m’misi josope ja ku Galileya soni ku Yudeya nambosoni ŵakutyochela ku Yelusalemu ŵatemi nawo papopo. Pelepo machili ga Yehofa galiji pa jwalakwe kuti ŵaposye ŵandu.
18 Kaneko kwayiche ŵandu ali anyakwile mundu jwa ulwele wakuwa yiŵalo pamachila,* soni ŵaliji mkulingalinga kuti ajinjile najo mundujo mkati muŵaliji Yesu.
19 Ligongo lya winji wa ŵandu, jemanjaji ŵalepele kwinjila najo. Myoyo ŵakwesile pamsakasa ni kuwamula msakasawo kaneko ŵamjinjisye mundujo pelepo ali amgoneche pamachila ni kumŵika pasikati pa ŵandu, pasogolo pa Yesu.
20 Jwalakwe paŵachiweni chikulupi chawo jwatite, “Bwanawe, yakulemwa yenu yikululuchidwe.”
21 Pelepo alembi ni Afalisiwo ŵatandite kuŵecheta m’mitima mwawo kuti, “Ana mundu jwakuŵecheta yakunyosya Mlunguju ali ŵani? Ana panasoni jwine jwampaka akululuchile yakulemwa kupunda Mlungu?”
22 Nambo Yesu, pakumanyilila nganisyo syawo, ŵajanjile kuti, “Ana jemanja mkuganisya chichi m’mitima mwenu?
23 Ana kusala kuti, ‘Yakulemwa yenu yikululuchidwe,’ kapena kusala kuti, ‘Mjimuche mjawuleje,’ yangasawusya ni yapi?
24 Nambo kuti jemanja mmanyilile kuti Mwanache jwa mundu akwete machili pachilambo chapasi gakululuchila yakulemwa . . .” Jwalakwe ŵamsalile mundu jwakulwala ulwele wakuwa yiŵalo jula kuti, “Ngumsalila mmwejo kuti, mjimuche, mjigale machila genuga, mjawuleje kumangwenu.”
25 Pelepo mundujo jwajimi pameso pawo, kaneko ŵanyakwile machila gakwe ni kwawulaga kumangwakwe ali mkumyamichila Mlungu.
26 Jwalijose juŵaliji pelepo jwasimonjile mnope, soni wosopewo ŵatandite kumyamichila Mlungu, soni woga wakamwile mnope, ni ŵaŵechetaga kuti, “Lelo tuyiweni yindu yakusimonjesya kwabasi!”
27 Sambano payamasile yeleyi, Yesu ŵatyosile kweleko. Kaneko ŵam’weni jwakomesya msongo jwine lina lyakwe Lefi ali atemi mu ofesi jakomesya msongo, ni ŵamsalile kuti, “Myiche, mŵe jwakulijiganya jwangu.”
28 Pelepo jwalakwe ŵalesile yindu yosope, kaneko ŵanyakwiche ni kutanda kumkuya Yesu.
29 Kaneko Lefi ŵamlinganyile Yesu pwando jekulungwa ku nyumba jakwe. Kweleko kwapalisoni ŵakomesya msongo ŵajinji nambosoni ŵane ŵaŵaliji mkulya nawo yimpepe.
30 Pelepo Afalisi ni alembi ŵa Afalisiwo ŵatandite kudandawula ni kwawusyaga ŵakulijiganya ŵa Yesu kuti, “Ligongo chichi jemanja mkusalya soni kumwa yimpepe ni ŵakomesya msongo soni ŵandu ŵakutenda yakulemwa?”
31 Nambo Yesu ŵajanjile jemanjajo kuti, “Ŵandu ŵambonembonepe ŵangasosekwa dokotala, nambo ŵakulwala.
32 Une nganimbika kukwaŵilanga ŵandu ŵakulungama, nambo ŵakulemwa kuti agalawuche mtima.”
33 Jemanjajo ŵamsalile Yesu kuti, “Ŵakulijiganya ŵa Yohane akusalijimaga kulya soni akusapeleka mapopelo gakuchondelela, nombenawo ŵakulijiganya ŵa Afalisi akusatendasoni myoyo, nambo ŵakulijiganya ŵenu akusalyaga soni kumwa.”
34 Yesu ŵajanjile kuti, “Nganimŵa mwatendekasisye achimjakwe ŵa mlombela kulijima kulya mlombelajo pali ni jemanjajo, mpaka mtende yeleyo mpela?
35 Nambo gachiyika masiku gakuti mlombelajo amtyosye pasikati pawo, pandaŵi jelejo ni pachachilijima kulya.”
36 Jwalakwe ŵapele jemanjajo chiwanichisyo chakuti, “Pangali mundu jwakusakata chakuwala chakusa chanyuwani ni kuchitotelela mpela chigamba pa chakuwala chakala. Naga akutenda myoyo, chigamba chanyuwanicho chikusapapula chakuwalacho, soni chigambacho ngachikusaŵajilana ni chakuwala chakalacho.
37 Nambosoni ŵandu ŵangaŵika finyo jwasambano m’misaku jalipende jakala. Naga akutenda yeleyo, finyo jwasambanojo jukusawulisya misaku jalipendejo, mwamti finyojo jukusajasika soni misakujo jikusajonasika.
38 Nambo finyo jwasambano jukusasosekwa kumŵika m’misaku jalipende jasambano.
39 Mundu pamwele finyo jwakala jwangasakasoni jwasambano, ligongo akusati, ‘Jwakalaju juli jwambone.’”
Maloŵe Gamwiŵanda
^ Lyeleli lili lina line lya Nyasa ja Galileya.
^ Ŵane akusati “doko.”
^ Kapena kuti, “ŵalamisye.”
^ Ŵane akusati “chitandala.”
