Jwakulalichila 8:1-17
8 Ana ŵani ŵali mpela mundu jwalunda? Ana ŵani ŵakusamanyilila litala lyakumachisya yakusawusya? Lunda lwa mundu lukusatendekasya ngope jakwe kuŵa jakuŵala, soni ngope jakwe jakutumbila jikusatanda kuwoneka chenene.
2 Une nguŵecheta kuti, “Mpikanileje malamusi ga mwenye ligongo lya chilanga chamwatesile kwa Mlungu.
3 Mkajanguyaga kutyoka pameso pa mwenyewo. Mkatendaga nawo yindu yakusakala, pakuŵa mwenyewo mpaka atende chilichose chakusaka.
4 Ligongo maloŵe ga mwenye gakusasosekwa kutendekwa. Ana ŵani ŵampaka ŵawusye mwenyewo kuti, ‘Ana wawo akutenda chichi?’”
5 Mundu jwakusapikanila malamusi ngasasimana ni yakusawusya. Nambo mtima walunda ukusamanyilila ndaŵi jakuŵajilwa soni litala lyakutendela chindu chilichose.
6 Pakuŵa chindu chilichose chikwete ndaŵi jakwe soni litala lyakwe lyakuchitendela, ligongo yakusawusya ya ŵandu yipali yejinji.
7 Pangali jwakusamanyilila yayichitendekwa msogolo. Myoyo, ŵani ŵampaka asale mwayichitendechela yinduyo?
8 Mpela mwayikusaŵela kuti pangali jwampaka awulamulile msimu kapena kuwulekasya kuti ukatyoka, myoyosoni pangali jwakwete machili gakulekasya lisiku lyakwe lyakuwa. Mpela mwayikusaŵela kuti pangali jwakusamkunda kutyoka palisiku lya ngondo, myoyosoni yakusakala ngasiyakunda ŵandu ŵakusatenda yakusakalayo kuti atile.
9 Une nayiweni yosopeyi, soni mtima wangu waganichisye ya masengo gosope gele ŵandu agakamwile pachilambo chapasi pano,* pandaŵi jele mundu ampweteche mundu mjakwe pakumlamulila.
10 Soni une naweni ŵandu ŵakusakala ali mkwasilila m’malembe, ŵandu ŵele ŵajinjilaga ni kopoka m’malo geswela. Nambo ŵandu ŵa mumsinda wele jemanjajo ŵatendelaga yindu yakusakala nganachelewa kwaliŵalila jemanjajo. Yeleyisoni yili yangali mate.
11 Ligongo lyakuti chilango* cha ŵandu ŵakusakala nganichitendekwa mwachitema, mitima ja ŵandu jisimichisye kutenda yindu yakusakala.
12 Atamose jwakulemwa ali atesile yakulemwayo kwa maulendo 100 ni kupitilisya kutama ni umi kwandaŵi jelewu, nambo une ngumanyilila kuti ŵandu ŵakusamjogopa Mlungu jusyesyene yindu yichajendela chenene ligongo lyakuti jemanjaji akusamjogopa Mlungu.
13 Nambo mundu jwakusakala yindu ngasiyimjendela chenene, soni ngasakombola kugalewuya masiku gakwe gagali mpela m’bulili ligongo lyakuti jwalakwe jwangamjogopa Mlungu.
14 Pana chindu chine changali mate* chachikusatendekwa pachilambo chapasi pano:* Pana ŵandu ŵakulungama ŵele akusiŵatendela yindu mpela kuti atesile yakusakala. Soni pana ŵandu ŵakusakala ŵele ŵakusiŵatendela yindu mpela kuti atesile yindu yakulungama. Une nguŵechetasoni kuti yeleyisoni yili yangali mate.
15 Myoyo une nayiweni kuti kusangalala kuli kwambone, ligongo pangalisoni chindu chine chambone kwa mundu pachilambo chapasi pano* chakupunda kulya, kumwa ni kusangalalaga. Jwalakwe atendeje yeleyi pakukamula masengo gakwe mwakulimbichila m’masiku ga umi wakwe gele Mlungu jusyesyene ampele pachilambo chapasi pano.*
16 Nasimichisye mumtima mwangu kuti mbate lunda soni kuti ndole yindu yosope yayikutendekwa pachilambo chapasi pano,* mwamti nayikanaga pangagona chilo ni musi.*
17 Kaneko naganisisye ya masengo gosope ga Mlungu jusyesyene ni namanyilile kuti ŵandu nganaŵa apikanichisye yayikusatendekwa pachilambo chapasi pano.* Atamose ali alinjilile chamtuli, nganaŵa apikanichisye ata panandi. Atamose ali aŵechete kuti ali ŵalunda mnope soni akuyimanyilila chenene yosopeyi, jemanjaji nganaŵa akombwelepe kuyipikanichisya.
Maloŵe Gamwiŵanda
^ Kapena kuti “pasi pa lyuŵa.”
^ Ku Mozambique akusati “chamuko.”
^ Kapena kuti “chakutengusya.”
^ Kapena kuti “pasi pa lyuŵa.”
^ Kapena kuti “pasi pa lyuŵa.”
^ Kapena kuti “pasi pa lyuŵa.”
^ Kapena kuti “pasi pa lyuŵa.”
^ Kagopolele kanesoni, “yayikusiyatendekasya ŵandu ngagona chinga musi kapena chilo.”
^ Kapena kuti “pasi pa lyuŵa.”
