Jwakulalichila 10:1-20
10 Membe syewe ni syasikusatendekasya kuti mawuta ga mundu jwakupanganya mawuta gakununjila gawole. Myoyosoni kuloŵela panandi kukusajonanga lunda soni uchimbichimbi wa mundu.
2 Mtima wa mundu jwalunda ukusamlongolela ku litala lyakuŵajilwa, nambo mtima wa mundu jwakuloŵela ukusamlongolela ku litala lyangaŵajilwa.
3 Mulimose mwakusajendela mundu jwakuloŵela, akusatenda yindu mwangali lunda soni jwalakwe akusatenda yakuti jwalijose amanyilile kuti jwalakwejo ali chisilu.
4 Ukali wa mundu jwakulamulila pawukolele pa mmwejo mkatyoka pamalo genu, pakuŵa kuwusimana mtima kukusanondiya yakulemwa yekulungwa.
5 Pana chindu chine chakulagasya nganisyo chanachiweni pachilambo chapasi pano,* chindu chakusalemwesya ŵandu ŵali pamaudindo.
6 Pana ŵandu ŵakuloŵela ŵajinji ŵaŵichidwe m’maudindo gapenani, nambo ŵandu ŵakuŵajilwa* akusagamba kutamape m’maudindo gakutuluka.
7 Une naweni ŵamasengo ali akwesile pamgongo wa mahachi, nambo ŵakulongolela ali mkwenda wapasi mpela kuti ali ŵakutumichila.
8 Jwakusasola lisimbo mpaka agwile msyenepejo, soni mundu jwakugumulanya lutenje lwamaganga lijoka mpaka limlume.
9 Mundu jwakusakasa maganga mpaka aliwulasye ni magangago, soni mundu jwakusala yipika mpaka aliwulasye ni yipikayo.*
10 Naga liŵago ngalikutema soni mundu ngakulinola, jwalakwe chachimala machili gejinji pakulikamulichisya masengo. Nambo lunda lukusakamuchisya kuti yindu yijende chenene.
11 Naga lijoka likumluma mundu mkanaŵe kulinyenjelela kuti aling’andileje, nikuti lunda lwa mundu jwakung’andila majokajo luli lwangali mate.
12 Maloŵe ga pakamwa pa mundu jwalunda gakusaŵa gakusangalasya, nambo ngomo sya chisilu sikusamjonanga msyenejo.
13 Maloŵe gandanda gagakusakopoka pakamwa pakwe gali gakuloŵela, soni maloŵe gakwe gakumalisya gakusaŵaga masoka gakonanga.
14 Nambope chisilu chikusagamba kupitilisyape kuŵecheta.
Mundu ngakusamanyilila champaka chitendekwe. Sambano ŵani ŵampaka amsalile yindu yayichitendekwa panyuma pakuti jwalakwejo awile?
15 Masengo gele chisilu chikusakamula mwakulimbichila gakusagamba kuchipesya, ligongo chisilucho ngachikusamanyilila ata panandi litala lyakwawulila kumsinda.
16 Yikusaŵaga yakogoya mnope naga mwenye jwakulamulila chilambo ali mnyamata soni naga nduna syakwe sikusatanda kutenda pwando kundaŵindaŵipe.
17 Yikusaŵaga yakusangalasya naga mwenye jwakulamulila chilambo ali mwanache jwakupagwila ku liŵasa lyakuchimbichika, soni naga ŵakulongolela akulya pandaŵi jakuŵajilwa kuti apate machili ngaŵaga kuti akolelwe.
18 Ligongo lya ulesi wekulungwa msakasa ukusawowochela, soni ligongo lya magasa gagamba kugatamika nyumba jikusasulula.
19 Mkate* akusawupanganya kuti ŵandu asecheleleje, soni finyo jukusatendekasya umi kuŵa wakusangalala. Nambo mbiya sikusamkamuchisya mundu kupata chilichose chakusosechela.
20 Mkasimlinga kumtembelela mwenye atamose munganisyo mwenu,* soni mkasimumtembelela mundu jwakusichila pamli kuchipinda chenu chagona. Pakuŵa chijuni mpaka chikasale maloŵe genugo, kapena kachilombo kanekakwe kakola mapapiko mpaka kakasale yamŵecheteyo.
Maloŵe Gamwiŵanda
^ Kapena kuti “pasi pa lyuŵa.”
^ Mu Chihebeli ŵatiga, ‘ŵakusichila.”
^ Kagopolele kanesoni, “akusosekwa kusamala nayo.”
^ Mikate jakala ŵajipanganyaga ni utandi wa tiligu kapena balele.
^ Kagopolele kanesoni, “atamose pamli pabedi jenu.”
