Genesesi 9:1-29
9 Kaneko Mlungu ŵampele upile Nowa ni ŵanache ŵakwe, soni ŵasalile jemanjajo kuti, “Mŵelekane soni mtupe mnope nambosoni mgumbale pachilambo chapasi.
2 Chaumi chilichose cha pachilambo chapasi soni chaguluka mwinani chilichose nambosoni chilichose chakwenda pachilambo chapasi ni somba syosope sya m’nyasa chiyimjogopeje jemanja. Sambano nguyipeleka yosopeyi mmyala mwenu.
3 Chinyama chakwenda chilichose chachikwete umi chiŵe chakulya chenu. Yosopeyi nampele jemanja mpela munampelele yakulya yamasamba.
4 Mkalya nyama pampepe ni myasi jakwe ligongo myasijo jili umi wakwe.
5 Nambosoni chinjimjimba magambo jwalijose jwakusulusya myasi jenu.* Naga chinyama chikuwulaga mundu, nombenacho chichisosekwa kuchiwulaga. Chinjimjimbasoni magambo mundu jwalijose jwakumwulaga mlongo mjakwe.
6 Jwalijose jwakuwulaga mundu, nombenajo chachiwulajidwa ni mundu, ligongo Mlungu ŵampanganyisye mundu mu chiwanichisyo chakwe.
7 Nambo jemanja mŵelekane soni mtupe nambosoni mgumbalane pachilambo chapasi.”
8 Kaneko Mlungu ŵamsalile Nowa ni ŵanache ŵakwe ŵachalume ŵala kuti:
9 “Sambano ngutenda chilanga ni jemanja soni ni ŵanache ŵenu ŵakwika pasogolo penu,
10 nambosoni ni chaumi chilichose chachili ni jemanja kutandila yijuni, yinyama soni yaumi yosope ya pachilambo chapasi ni yosope yayakopweche mu chombo mula.
11 Elo, une ngutenda chilanga ni jemanja chakuti: Yaumi yosope ngasiyijonanjidwasoni ni mesi ga chigumula soni chigumula ngasichijonangasoni chilambo chapasi.”
12 Mlungu ŵasasilesoni kuti, “Achi ni chimanyisyo cha chilanga changutenda ni jemanja soni ni chaumi chilichose chachili ni jemanja mpaka ku mibado* josope ja msogolo.
13 Nguŵika utawalesa* m’mawunde kuti chiŵe chimanyisyo cha chilanga changu ni chilambo chapasi.
14 Pandendekasisye kuti kwinani kutende mawunde ga wula, nombenawo utawalesa chiwuwonecheleje m’mawundemo.
15 Pelepo chingumbuchileje chilanga chandesile ni jemanja soni yaumi ya mtundu uliwose, nambosoni mesi ngasigatenda chigumula kuti gajonanje yaumi yosope.
16 Utawalesawo chiwuwonecheleje m’mawunde, soni une panawuweni utawalesawo chingumbuchileje chilanga changamala chapasikati pa Mlungu ni chaumi cha mtundu uliwose cha pachilambo chapasi.”
17 Kaneko Mlungu ŵawilisye kumsalila Nowa kuti, “Achi ni chimanyisyo cha chilanga changuŵika pasikati pa une ni yaumi yosope ya pachilambo chapasi.”
18 Ŵanache ŵa Nowa ŵaŵakopweche mu chombo mula ŵaliji Semu, Hamu soni Yafeti. Kaneko Hamu ŵaŵeleche Kanani.
19 Ŵanache ŵatatuŵa ni ŵaŵaliji ŵanache ŵa Nowa, soni ŵandu wosope ŵali pachilambo chapasi ŵatyochele mwa jemanjaji.”
20 Sambano Nowa ŵatandite kulima, mwamti ŵalimile mgunda wa mipeleya.
21 Lisiku line jwalakwe jwamwele finyo ni jwakolelwe, mwamti jwawusile yakuwala ali mutenti jakwe.
22 Sambano Hamu babagwe Kanani ŵala ŵaweni babagwewo ali makonope, ni ŵapite pasa kuja kumsalila Semu ni Yafeti.
23 Pelepo Semu soni Yafeti ŵajigele chakuliwunichila ni kuchikoleka m’makoyo gawo ni kwendaga mwakuwujila munyuma. Myoyo jemanjajo ŵawunichile baba ŵawowo nambo ali mkulola kumbali mwamti nganalola umakonope wa baba ŵawowo.
24 Sambano finyo jula pajwasungunukwiche mumtwe, Nowa jwapikene yosope yaŵatesile mwanache jwakwe jwamnondiju.
25 Pelepo jwalakwe jwatite:
“Kanani aŵe jwamlweseche.*
Jwalakwe aŵesoni kapolo jwakutuluka mnope kwa achalongo achimjakwe.”
26 Jwalakwe jwaŵechetesoni kuti:
“Achimbichikwe Yehofa Mlungu jwa Semu,Soni Kanani aŵe kapolo jwa Semu.
27 Mlungu ampe Yafeti malo gekulungwa mnope,Soni jwalakwe atameje m’matenti ga Semu.
Nambo Kanani aŵesoni kapolo jwa Yafeti.”
28 Nowa ŵatemi ni umi kwa yaka yinesoni yakwana 350 Chigumula chili chitendekwe.
29 Myoyo yaka yosope ya Nowa yakwanile 950, kaneko jwawile.
Maloŵe Gamwiŵanda
^ Kapena kuti, “jwalijose jwakumwulaga jemanja.”
^ Ku Mozambique akusati “geração.”
^ Ŵane akusati “chakulekasya wula; mlungulungu.”
^ Ŵane akusati “kutapana; kutembelela.”
