Genesesi 31:1-55
31 Pali papite ndaŵi, Yakobo ŵapikene ŵanache ŵachalume ŵa Labani ali mkuŵecheta kuti, “Yakobo ajigele yindu yosope ya baba ŵetu soni chipanje chosope chachasosekwaga kuŵa cha baba ŵetu, jwalakwe achijigele ni kuliwunjichila.”
2 Yakobo paŵalolite ngope ja Labani, ŵamanyilile kuti jwalakwe achenjile soni ngakumnonyela jwalakwejo mpela muŵatendelaga pandanda.
3 Pambesi pakwe, Yehofa ŵamsalile Yakobo kuti, “Mwujile ku chilambo cha achinangolo ŵenu soni kwa achalongo achimjenu, mwamti une chinjiŵape ni mmwejo.”
4 Kaneko Yakobo ŵatumisye utenga kwa Lakele ni Leya kuti ayiche kwitinji kwele jwalakwejo ŵalisyaga yilango yakwe.
5 Jwalakwe ni ŵasalile jemanjajo kuti:
“Nayiweni kuti baba ŵenu ngakumbona chenene, nambo Mlungu aŵele ni une ndaŵi josopeji.
6 Atamose jemanjasoni mkumanyilila kuti une nakamulile masengo baba ŵenu ni machili gangu gosope.
7 Nambo baba ŵenu aŵele ali mkuloŵesya une soni aŵele ali mkuchenga malipilo gangu kwa maulendo gakwana 10. Nambope Mlungu nganakunda kuti baba ŵenuwo ambulasye m’litala lililyose.
8 Baba ŵenu paŵechete kuti, ‘Yilango yosope yamaŵalamaŵala chiyiŵeje malipilo genu,’ yasimanikwaga kuti yilango yosope yiŵeleche ŵanache ŵamaŵalamaŵala. Nambosoni paŵechete kuti, ‘Yilango yosope yamiselemisele chiyiŵe malipilo genu,’ yasimanikwaga kuti yilango yosopeyo yiŵelechesoni ŵanache ŵamiselemisele.
9 Myoyo Mlungu ŵaliji mkujigala yilango ya baba ŵenu ni kumbaga une.
10 Yilango payamemesyaga, nakwesisye meso gangu ni nayiweni musagamisi kuti mbusi syelume syasyakwelanaga ni mbusi syekongwe syaŵaga syamiselemisele, syamaŵalamaŵala, soni syamadondomadondo.
11 Kaneko lilayika lya Mlungu jwakuwona, lyambilasile une musagamisi kuti, ‘Yakobo!’ Une ni najanjile kuti, ‘Une ndili apano.’
12 Lilayika lila lyapitilisye kuŵecheta kuti, ‘Mkwesye meso genu, soni chimyiwone kuti mbusi syosope syelume syasikukwelana ni syekongwe sili syamiselemisele, syamaŵalamaŵala soni syamadondomadondo, pakuŵa une nayiweni yosope yele Labani akumtendela mmwejo.
13 Une ndili Mlungu jwakuwona jwa ku Beteli, kwele mmwejo mwatasile mawuta paliganga soni mwatesile chilanga ni une. Sambano mnyakuche, mkopoche m’chilambo achino ni mwujile ku chilambo chamwapagwile.’”
14 Pelepo Lakele ni Leya ŵajanjile kuti, “Ana pana chipanje chachisigele chele m’we mpaka tupate kutyochela m’nyumba ja baba ŵetu?
15 Ana ngati paja jwalakwe akusatujigala m’we mpela achalendo, pakuŵa ŵatusumisye soni aŵele ali mkulya mbiya syaŵapochele ligongo lya m’weji?
16 Chipanje chosope chele Mlungu ajigele kwa baba ŵetu, chili chetu soni cha ŵanache ŵetu. Myoyo wawojo atende chilichose chiŵasalile Mlungu.”
17 Myoyo Yakobo ŵanyakwiche ni kwakwesya ŵanache ŵakwe soni achiŵamkwakwe pa ngamila.
18 Kaneko jwalakwe ŵatandite kuchinga yilango yakwe yosope soni ŵajigele katundu jwakwe josope jiŵapatile pandaŵi jiŵaliji ku Padani-alamu, ni kuwutanda ulendo wakwawula ku chilambo cha Kanani kwaŵaliji Isaki, babagwe ŵala.
19 Sambano Labani ali apite kukusenga ubweya* wa ngondolo, Lakele ŵajiŵile atelafi* ŵa babagwe.
20 Kaneko Yakobo ŵanyakwiche mwakumsyemba Labani juŵaliji Mualamu ligongo jwalakwe nganamsalila kuti akutyoka.
21 Myoyo Yakobo ŵatisile pampepe ni yindu yosope yaŵakwete, ni ŵajombweche Lusulo.* Kaneko jwalakwe ŵapitilisye ulendo wakwe ni kwinjililaga ku dela jamatumbi ja ku Giliyadi.
22 Palisiku lyatatu, Labani ŵapikene kuti Yakobo atisile.
23 Myoyo jwalakwe ŵajigele achalongo achimjakwe ni kuwutanda ulendo wakwenda masiku gakwana 7 kumkuya Yakobo. Panyuma pakwe jwalakwe ŵamsimene Yakobojo ku dela jamatumbi ja Giliyadi.
24 Nambo chilo cha lisiku lyelelyo, Mlungu ŵayiche kwa Labani Mualamu jula musagamisi ni kumsalila kuti, “Msamale ni yiliyose yachimŵechete kwa Yakobo, chinga yiŵe yambone kapena yakusakala.”
25 Myoyo Labani ŵamsimene Yakobo. Pandaŵiji Yakobo ŵaliji ali akunjile tenti jakwe mwitumbimo, soni Labani ni achalongo achimjakwewo ŵakunjile matenti gawo mudela jamatumbi ja ku Giliyadi pejo.
26 Paŵamsimene, Labani ŵamwusisye Yakobo kuti, “Sambano ayi ni yapi yamtesileyi? Ligongo chichi mtyosile mwakusyemba une ni kwajigala ŵanache ŵangu ŵachakongweŵa mwakwatisya mpela achikapolo ŵele ŵagomeche kungondo?
27 Ligongo chichi mtyosile mwakusyemba soni ngasalila une? Yikaŵe kuti mwasalile, ngamkundile kwawulatu mwamtendele, soni tukasangalele mwakwimba nyimbo ni yida yakwimbila soni yitolilo.
28 Ligongo chichi nganimumba upile wakuti langangane mwachinonyelo* ni yisukulu yangu soni ŵanache ŵangu ŵachakongweŵa? Mmwetu mtesile yakuloŵela kwabasi.
29 Unetu ngwete machili gakumtenda mmwejo yakogoya. Nambo mkwete upile, ligongo chilo chipitechi Mlungu jwa baba ŵenu asalile une kuti, ‘Msamale ni yiliyose yachimŵechete kwa Yakobo, chinga yiŵe yambone kapena yakusakala.’
30 Apatu sambano mnyakwiche basi, ligongo lyakuti mwasachililaga kuwujila kunyumba ja baba ŵenu. Nambi ligongo chichi mjiŵilesoni milungu jangu?”
31 Pelepo Yakobo ni ŵamjanjile Labani kuti, “Natesile yeleyi ligongo natendaga woga, soni naganisyaga kuti, ‘Wawojo mpaka asumule ŵanache ŵawo ŵachakongweŵa.’
32 Naga pasikati petu akumsimana jwine ali ajigele milungu jawo, amwulaje. Pameso pa achalongo achimjetuŵa, wawojo awungunye pa yindu yangweteyi, soni naga akuchipata chindu chilichose chakuchiwona kuti chili chawo, ajigale.” Nambo Yakobo nganamanyililaga kuti Lakele ni juŵajiŵile milungujo.
33 Myoyo Labani ŵajinjile mutenti ja Yakobo soni mutenti ja Leya nambosoni mu tenti ja asikana ŵakwe ŵaŵili ŵamasengo ŵala. Nambo ali asosile milungujo mwelemo, nganajipata. Kaneko jwalakwe ŵakopweche mutenti ja Leya ni kuja kwinjila mutenti ja Lakele.
34 Pandaŵiji Lakele ŵaliji ali ajigele milungu ja atelafijo ni kujisisa mu chakutamila pangamila, kaneko jwalakwe ŵatemi penani pakwe. Myoyo Labani ŵawungunyisye mutenti mosopemo nambo nganajipata milungujo.
35 Kaneko Lakele ŵasalile babagwewo kuti, “Akasandumbilila une ambuje ŵangu, pakuŵa une nganimba ngombwele kwimuka pandemipa ligongo lya ulwele wetu wachikongwewu.” Myoyo Labani ŵawungunyisye palipose nambo nganajipata milungu ja atelafijo.
36 Pelepo Yakobo ŵatumbile mnope soni ŵatandite kumŵechetela Labani mwawukali. Mwamti jwalakwe ŵamwusisye Labani kuti, “Ana une naleŵele chichi, soni nalemwechesye chichi wawojo kuti alondejelondeje mwawukali chamti myiyi?
37 Apa ngati awungunyisye mu katundu jwangu josope, sambano apatile chichi chachili chawo? Achiŵichetu pasogolo pa achalongo achimjangu soni achalongo achimjawo wawojo, kuti jemanjajo asale jwali jwakulemwa pasikati pa wawojo ni une.
38 Mu yaka 20 yosope yandemi ni wawojo, ngondolo syawo soni mbusi syawo, nganisipolosyeje. Soni une nganindyeje ngondolo jelume atamose jimpepe pa ngondolo sya wawojo.
39 Une nganinjigaleje chilango ni kwika nacho kwa wawojo chakuti chilumidwe ni yilombo yakwitinji. Ndaŵi syosope yeleyi payitendekwe, nasosekwaga kulipila. Chinga chilango chijiŵidwe musi kapena chilo, wawojo ŵasalilaga kuti ngusosekwa kulipila basi.
40 Musi lyuŵa lyamalilaga pachilu, soni chilo nalagaga ni kusisima, nambosoni lugono nganinalupataga.
41 Yaka yosope yandemi m’nyumba mwawo yikwanile 20. Une nakamulile masengo wawojo kwa yaka 14 kuti ambe ŵanache ŵawo ŵaŵili ŵachakongweŵa, soni nakamulile masengo kwa yaka yine 6 kuti ambe yilango. Nambo wawojo aŵele ali mkuchenga malipilo gangu kwa maulendo gakwana 10.
42 Yikaŵe kuti Mlungu jwa baba ŵangu, Mlungu jwa Abulahamu soni Mlungu jwele Isaki akusamjogopa nganaŵa kumbali jangu, wawojo akasalile kuti njaje kunyumba yalayalape. Nambo Mlungu akuweni kulagasika kwangu soni masengo gakupweteka gambele ndili mkukamula, mwamti ni ligongo lyakwe ŵajamwiche wawojo chilochi.”
43 Pelepo Labani ŵamjanjile Yakobo kuti, “Ŵanache ŵachakongweŵa ali ŵanache ŵangu, soni ŵanache ŵa jemanjaji ali ŵanache ŵangusoni. Nambosoni yilangoyi yili yangu, soni chilichose chamkuchiwona pelepa chili changu soni cha ŵanache ŵangu ŵachakongweŵa. Sambano ana mpaka yikomboleche chamtuli kuti une lelo natendele yangaŵajilwa ŵanache ŵanguŵa soni ŵanache ŵaŵeleche jemanjaji?
44 Sambano mmwejo ni une kwende tutende chilanga kuti chiŵe umboni pasikati petu.”
45 Pelepo Yakobo ŵajigele liganga ni kulijimika mpela chipilala.
46 Kaneko Yakobo ŵasalile achalongo achimjakwewo kuti, “Ajigale maganga.” Ni jemanjajo ŵajigele maganga ni kugaŵika pamo mpela liwunjili. Kaneko jemanjajo ŵatemi pa liwunjili lya magangalyo ni kulyaga yakulya.
47 Pelepo Labani ŵalipele liwunjililyo lina lyakuti Yegala-sahaduta.* Nambo Yakobo ŵalipele liwunjililyo lina lyakuti Galedi.*
48 Kaneko Labani ŵamsalile Yakobo kuti, “Liwunjili lya maganga lyeleli lili umboni pasikati pa mmwejo ni une lelo.” Ni ligongo lyakwe liwunjililyo ŵalipele lina lyakuti Galedi,
49 soni lyakuti Sanja ja Mlonda, pakuŵa jwalakwejo ŵatite, “Yehofa apitilisye kulolela yakutenda yetu pandaŵi jele mmwejo ni une tulekangene mwamti ngatukuwoneganasoni.
50 Naga mkutanda kwalagasya ŵanache ŵangu ŵachakongweŵa, soni naga mkujigala achakongwe ŵane konjechesya pa ŵanache ŵanguŵa, atamose kuti pangali mundu jwine pasikati petupa, mmanyilile kuti Mlungu chachiŵa mboni pasikati pa mmwejo ni une.”
51 Labani ŵapitilisye kumsalila Yakobo kuti, “Ngati mliweni liwunjili lya magangali, soni chipilalachi chatujimiche mmwejo ni unechi ngati mchiweni?
52 Liwunjili lya maganga lyeleli lili umboni, soni chipilala chelechi chikutendela umboni wakuti, unejo ngasimbita pa liwunjili lya maganga lyeleli kuti ngamtendele yakusakala mmwejo, soni kuti mmwejo ngasimpita pa liwunjili lya magangali soni pa chipilala chelechi kuti myiche kwa une kukundendela yakusakala.
53 Mlungu jwa Abulahamu, soni Mlungu jwa Naholi jwalisoni Mlungu jwa atati ŵawo, aŵe jwakwelusya pasikati pa mmwejo ni une.” Pelepo Yakobo ŵalumbile pa lina lya Mlungu jwele Isaki baba ŵakwe, akusamjogopa.
54 Panyuma pa yeleyi, Yakobo ŵapeleche mbopesi mwitumbimo, ni ŵaŵilasile achalongo achimjakwe kuti alye nawo mkate. Myoyo jemanjajo ŵalile soni ŵagonile mwitumbi mula.
55 Nambo Labani ŵajimwiche kundaŵindaŵipe ni kulangangana mwachinonyelo* ni yisukulu yakwe ni ŵanache ŵakwe ŵachakongwe ŵala, soni ŵapele upile. Kaneko Labani ŵanyakwiche ni kuwujilaga kumangwakwe.
Maloŵe Gamwiŵanda
^ Ŵane akusati “manyunya.”
^ Kapena kuti, “milungu jakusepa.”
^ Lwelelu lwaliji lusulo lwa Filate.
^ Mu Chihebeli ŵatiga, “upile wakuti mbeleche kisi kwa.”
^ Lyeleli lili lina lya Chialamu lyalikusagopolela kuti “Liwunjili lya Umboni.”
^ Lyeleli lili lina lya Chihebeli lyalikusagopolela kuti “Liwunjili lya Umboni.”
^ Mu Chihebeli ŵatiga, “ni ŵapeleche kisi kwa.”
