Genesesi 27:1-46
27 Sambano Isaki paŵakalambele soni meso gakwe pagalepelaga kulola chenene, ŵamŵilasile Esawu mwanache jwakwe jwamkulungwa kuti, “Mwanangu!” Jwalakwe ni ŵajanjile kuti, “Une baba!”
2 Kaneko Isaki jwapitilisye kuŵecheta kuti, “Unetu ngusile sambano, mwamti mpaka mbwe lisiku lililyose.
3 Myoyo mjigale yida yenu soni kachikwama kakuŵika yidayo ni ukunje wenu. Kaneko mjawule kwitinji ni mkambulajile nyama.
4 Pachimwujepo, mulinganyile nyamajo mpela mungusajinonyelela mula. Pachimtende yeleyi, myiche najo nyamajo kuti ndye. Pachindyepo ngusaka nampe upile mmwejo mkanimbe kuwa.”
5 Nambope pandaŵi jele Isaki ŵamsalilaga yeleyi mwanache jwakwe Esawu, Labeka ŵaliji mkupikana. Pelepo Esawu ŵanyakwiche ni kwawula kwitinji kukusakula nyama kuti ayiche najo.
6 Pelepo Labeka ŵamsalile Yakobo mwanache jwakwe jula kuti, “Napikene baba ŵenu pamkaŵapa ali mkuŵechetana ni mkulugwenu, Esawu. Amsalileje kuti,
7 ‘Mjawule mkambulajile nyama, ni mulinganyile chenene kuti jiŵe jakunong’a. Kaneko myiche najo kuti ndye ni chakulinga chakuti nampe upile pameso pa Yehofa mkanimbe kuwa.’
8 Sambano mumbikane mwanangu. Ngumŵenda kuti mtende yosope yachinamsalile.
9 Mjawule kwayili yilangoko ni mkanjigalile ŵanache ŵa mbusi ŵaŵili ŵambone chenene kuti nalinganye chenene mpela mwakusayinonyelela baba ŵenu mula.
10 Kaneko mjawusye kwa baba ŵenu kuti akalye ni chakulinga chakuti ampe upile mkanaŵe kuwa.”
11 Pelepo Yakobo ŵamjanjile Labeka mamagwe ŵala kuti, “Nambo achimwene ŵangu Esawuŵa chilu chawo chili chawumbowumbope, pele une chilu changu chili changali wumbo.
12 Nambi uli naga babawo akuja kungwaya? Nikutitu chakayikopochele kuti ngwalambusya, soni mpaka mbate matembelelo mmalo mwa upile.”
13 Pelepo mamagwewo ŵamsalile jwalakwe kuti, “Matembelelo gelego gayiche pa une mwanangu mmalo mwa mmwejo. Mgambe kutenda yanamsalileyi. Mjawule mkanjigalile ŵanache ŵambusiwo.”
14 Myoyo jwalakwe ŵapite ni kuja kujigala ŵanache ŵa mbusiwo ni kwapeleka kwa mamagwewo. Mwamti mamagwewo ŵalinganyisye chenene nyamajo mpela mwakusayinonyelela babagwe.
15 Kaneko Labeka ŵajigele yakuwala yambone mnope ya Esawu mwanache jwakwe jwamkulungwa ni kum’wecha Yakobo mwanache jwakwe jwamnandi jula.
16 Jwalakwe ŵam’wechichesoni mwanachejo yikopa ya mbusi m’makono gakwe soni mumbali sine sya mulukosi mwakwe mumwaliji mwangali wumbo.
17 Kaneko jwalakwe ŵajigele nyama jelinganye chenene jila pampepe ni mkate* ni kuyipeleka kwa Yakobo mwanache jwakwe.
18 Myoyo Yakobo ŵapite kuŵaliji babagwe, ni ŵatite, “Baba!” Pelepo babagwe ŵajanjile kuti, “Une apano! Ana mli ŵani mwanangu?”
19 Yakobo ŵajanjile babagwewo kuti, “Une ndili Esawu, mwanache jwawo jwandanda kupagwa. Ndesile yosope yasalile kuti ndende yila. Ajimuchetu sambano kuti alye nyamaji, soni kuti kaneko ambe upile.”
20 Pelepo Isaki ŵamwusisye mwanache jwakwejo kuti, “Yikomboleche wuli kuti mjipate mwachitemachitema myiyi mwanangu?” Jwalakwe ni ŵajanjile kuti, “Yehofa Mlungu jwawo ni jwatendekasisye kuti najipate nyama jeleji baba.”
21 Kaneko Isaki ŵamsalile Yakobo kuti, “Mumbandichile mwanangu kuti namkwaye ni chakulinga chakuti manyilile naga yisyene mli mwanangu Esawu.”
22 Pelepo Yakobo ŵaŵandichile babagwewo, Isaki, mwamti babagwewo ŵamkwayiye jwalakwe ni ŵatite, “Maloŵega gakupikanika kuti gali ga Yakobo, nambo makonoga gali makono ga Esawu.”
23 Jwalakwe nganammanyilila Yakobo ligongo lyakuti makono gakwe galiji gana wumbo mpela makono ga Esawu mkulugwe. Myoyo ŵampele upile jwalakwe.
24 Kaneko Isaki ŵamwusisye jwalakwe kuti, “Yisyene mmwejo mli mwanangu Esawu?” Yakobo ni ŵajanjile kuti, “Elo ndili une.”
25 Pelepo Isaki ŵatite, “Myiche najo akuno nyamajo mwanangu kuti ndye, kaneko ni chinampe upile.” Myoyo Yakobo ŵapele babagwe nyamajo ni ŵalile. Kaneko ŵapele finyo babagwewo ni ŵamwele.
26 Kaneko Isaki, babagwe ŵala, ŵamsalile jwalakwejo kuti, “Mumbandichile mwanangu soni mungumbatile mwachinonyelo.”*
27 Myoyo Yakobo ŵaŵandichile babagwewo ni kwakumbatila mwachinonyelo* mwamti babagwewo ŵapikene kaliwungo ka yakuwala ya mwanache jwawojo. Panyuma pakwe Isaki ŵampele upile jwalakwe, ni ŵatandite kuŵecheta kuti:
“Kununjila kwa mwanache jwangu kukupikanika mpela kaliwungo ka mumgunda wele Yehofa awupele upile.
28 Nguŵenda kuti Mlungu jwakuwona ampe mmwejo mangame gakutyochela kwinani soni ampe litaka lyachajila lya pachilambo chapasi, soni ampeje yagowola yejinji pampepe ni finyo jwasambano.
29 Ŵandu wosope amtumichile mmwejo, soni mitundu ja ŵandu jimtindiŵalile mmwejo. Mŵe ŵakwalamulila achalongo achimjenu, soni ŵanache ŵa mama ŵenu amtindiŵalile mmwejo. Jwalijose jwachachimtembelela mmwejo nombenajo chachimtembelela, soni jwalijose jwachachimpa upile mmwejo nombenajo chachipochela upile.”
30 Sambano Isaki paŵagambile kumalisya kumpa upile Yakobo soni Yakobojo paŵagambile kutyoka kwene kwaŵaliji Isaki babagwe ŵala, ŵakopochele Esawu mkulugwe jula kutyochela kukusakula.
31 Nombenajo Esawu ŵajilinganyisye chenene nyama jiŵawuleje ni ŵapite najo kwa babagwe. Kaneko ni ŵasalile babagwewo kuti, “Ajimuche baba kuti alye nyama jele une mwanagwawo nawulajile ni chakulinga chakuti ambe upile.”
32 Pelepo Isaki babagwe ŵala ŵamwusisye jwalakwe kuti, “Ana mmwejo ŵani?” Jwalakwe ni ŵajanjile kuti, “Une ndili Esawu, mwanache jwawo jwandanda kupagwa.”
33 Pelepo Isaki ŵatandite kutetemela mnope ni ŵatite, “Sambano ana jwambulajile nyama ni kwika najo kuti ndye jula ali ŵani? Unetu ndile kala nyamajo mmwejo mkaniŵe kwika, soni nampele upile jwalakwe. Mwamti jwalakwejo chachipochela upile nditu.”
34 Esawu paŵapikene yaŵaŵechete babagwewo ŵatandite kulila mwakwesya maloŵe mnope soni mwakutesya chanasa. Ni ŵasalile babagwewo kuti, “Ambe upile, chonde unesoni ambe upile baba!”
35 Nambo babagwewo ŵatite, “Mpwenu ŵayiche mwachinyengo ni chakulinga chakuti apochele upile wamsosekweje kupochela mmwejo.”
36 Pelepo Esawu jwatite, “Ana ngaŵa ni ligongo lyakwe jweleju ŵampele lina lyakuti Yakobo?* Aka sambano kali kaŵili ali mkusumula yindu yangu. Upile wangu wakuŵa jwandanda kupagwa ŵajigele. Apa sambano ajigele upile wangu wakuti mbochele kutyochela kwa wawojo.” Kaneko jwalakwe ŵapitilisye kuŵecheta kuti, “Ana yisyene nganasunjila upile uliwose?”
37 Nambo Isaki ŵamjanjile Esawu kuti, “Unetu namŵisile jwalakwe kuŵa jwakumlamulila, soni nampele jwalakwe achalongo achimjakwe wosope kuti aŵe ŵakumtumichila. Nambosoni nayipele upile yagowola yakwe ni finyo jwakwe jwasambano. Nambi pelepa chisigele chichisoni mwanangu chakuti namtendele mmwejo?”
38 Pelepo Esawu ŵasalile babagwewo kuti, “Baba yisyene pangali upile atamose umpepe wawusigele? Ambe upile. Chonde unesoni ambe upile baba!” Pelepo Esawu ŵalisile mnope mpaka misosi lakatalakata.
39 Myoyo Isaki babagwewo ŵamjanjile jwalakwe kuti,
“Mmwejo chimchitamaga kwakutalikangana ni litaka lyachajila, soni chimchitama mwakutalikangana ni mangame gakutyochela kwinani.
40 Umi wenu wuchiŵa wakutamila kukamula upanga* basi, mwamti mmwejo chimchitumichila mpwenuju. Nambo pachimchipelapo chimchitemangula likongwa lyakwe ni kulityosya m’lukosi mwenu.”
41 Nambo Esawu ŵamsunjile chakulukosi Yakobo ligongo lya upile waŵapochele kutyochela kwa babagwe. Mwamti jwalakwe ŵagambaga kuŵecheta mumtima mwakwe kuti, “Masiku gakulila malilo ga baba ŵangu gasigele panandi. Panyuma pakwe chinjimwulaga mpwanga, Yakobo.”
42 Labeka paŵamanyilile maloŵe gaŵaŵechete Esawu mwanache jwakwe jwamkulungwaju, ndaŵi jijojo ŵamŵilasile Yakobo, mwanache jwakwe jwamnondi jula ni kumsalila kuti, “Mpikane mwanangu. Mkulugwenu Esawu akusaka kumwulaga mmwejo* kuti awuchisye.
43 Sambano mwanangu, mtende yachinamsalileyi. Mnyakuche ni mjawule kwa mjomba ŵenu Labani ku Halana.
44 Mkatame ni mjomba ŵenuwo kwakandaŵi mpaka mtima wamchimwenegwenu uli utemi mmalo.
45 Chonde mkatame kweleko mpaka kutumbila kwa mchimwenegwenu kuli kumasile soni ali aliŵalile yosope yamumtendeleyi. Pelepo une chinjimtumichisya mmwejo utenga wakuti mwujile. Ngangusaka une kuti chinjase ŵanache ŵaŵili palisiku limo.”
46 Panyuma pa yeleyi, Labeka ŵatamilaga kumsalila Isaki kuti, “Umi wangu uyiche pakusakalisya sambano ligongo lya ŵanache ŵa Hetiŵa. Naga nombenajo Yakobo chalombele jwamkongwe kutyochela pa ŵanache ŵa Heti mpela ŵeleŵa, ŵali ŵanache ŵa m’chilambochi, nguyiwona kuti bola ngambe kuwa.”
Maloŵe Gamwiŵanda
^ Mikate jakala ŵajipanganyaga ni utandi wa tiligu kapena balele.
^ Mu Chihebeli ŵatiga, “mumbe kisi.”
^ Mu Chihebeli ŵatiga, “ni kwapa kisi.”
^ Kugopolela kuti “Jwakukamula chindende; Jwakusumula.”
^ Upanga ukusawoneka mpela chipula chekulungwa chakutema kosekose.
^ Kapena kuti, “akusaka kutamika mtima wakwe pasi mwakumwulaga mmwejo.”
