Genesesi 12:1-20
12 Sambano Yehofa ŵamsalile Abulamu kuti, “Mtyoche m’chilambo mwenu soni mlekangane ni achalongo achimjenu, nambosoni mtyoche m’nyumba ja baba ŵenu ni kwawula ku chilambo chachinamlanjile.
2 Chinjimtendekasya kuŵa mtundu wekulungwa soni chinjimpa upile ni kulitendekasya lina lyenu kuŵa lyakumanyika, nambosoni ŵandu wosope chachipata upile kupitila mwa mmwejo.
3 Chinjapa upile ŵandu ŵachachimpa upile mmwejo, nambosoni chinjimtembelela jwalijose jwakumtembelela mmwejo soni maŵasa gosope ga pachilambo chapasi gachikola upile kupitila mwa mmwejo.”
4 Myoyo Abulamu ŵanyakwiche mwakamulana ni yaŵamsalile Yehofa. Nombenajo Loti ŵalongene nawo. Abulamu paŵatyokaga ku Halana ŵaliji ali ni yaka 75.
5 Abulamu ŵanyakwiche kwawula ku chilambo cha Kanani. Paulendowu ŵamjigele Salai juŵaliji ŵamkwakwe soni Loti juŵaliji mwanache jwa mchimwenegwe ni yindu yawo yosope yaŵakwete, nambosoni ŵamasengo ŵawo wosope ŵaŵakwete paŵaliji ku Halana. Jemanjaji paŵayiche ku chilambo cha Kanani,
6 Abulamu ŵajesile m’chilambomo mpaka kuja kwika ku Sekemu chiŵandika ku yitela yekulungwakulungwa ya Mole. Pandaŵi jeleji Akanani ŵaliji mkutama m’chilambomo.
7 Kaneko Yehofa ŵawonechele kwa Abulamu ni kumsalila kuti, “Chinjipeleka chilambo chelechi kwa ŵanache* ŵenu.” Myoyo Abulamu jwataŵile malo gakupelechela mbopesi kwa Yehofa jwele ŵawonechele kwa jwalakwe.
8 Kaneko jwalakwe ŵasamile kwawula ku dela ja matumbi jajaliji kungopokolyuŵa kwa Beteli. Kweleko ŵakunjile tenti jakwe pasikati pa msinda wa Beteli wawaliji chakungapililolyuŵa soni msinda wa Ai wawaliji chakungopokolyuŵa. Kaneko ŵataŵile malo gakupelechela mbopesi kwa Yehofa ni kutanda kuŵilanjila pa lina lya Yehofajo.
9 Panyuma pakwe Abulamu ŵatyosisye tenti jakwe ni kuwutanda ulendo wakwinjilila cha ku Negebu. Paulendowu ŵatamilaga kukunga matenti malo gakulekanganalekangana.
10 Sambano m’chilambomo mwagwile sala. Myoyo Abulamu ŵawutandite ulendo wakwawula ku Iguputo kuti akatame kweleko kwakandaŵi, ligongo salajo jayiche pakogoya mnope.
11 Paŵaŵandichilaga kwinjila m’chilambo cha Iguputo Abulamu ŵamsalile Salai ŵamkwakwe kuti, “Mpikane ŵamkwangu. Ngumanyilila kuti mmwejo mli ŵakongwe ŵakusalala.
12 Myoyo ŵandu ŵa ku Iguputo pachakamwone mmwejo chakaŵecheteje kuti, ‘Jweleju ali ŵamkwakwe.’ Ni chakambulaje une nambo mmwejo chakamleche ni umi.
13 Chonde mkasaleje kuti ndili mlumbugwenu kuti yindu yikanjendele chenene soni kuti akaja kumbulaga ligongo lya mmwejo.”
14 Abulamu paŵagambile kwinjila m’chilambo cha Iguputo, ŵandu ŵa mu Iguputowo ŵayiweni kuti Salai ali jwamkongwe jwakusalala mnope.
15 Nombenasyo nduna sya Falawo pasyam’weni jwamkongwejo syatandite kumlapilila mnope pameso pa Falawo. Myoyo jwamkongwejo ŵamjigele ni kwika najo kunyumba kwa Falawo.
16 Falawo ŵamtendele yindu yambone mnope Abulamu ligongo lya jwamkongwejo, mwamti ŵampele ngondolo, ng’ombe, abulu ŵachalume ni ŵachakongwe, ŵamasengo ŵachalume ni ŵachakongwe soni ngamila.
17 Kaneko Yehofa ŵamtendekasisye Falawo soni ŵamwiŵasa mwakwe kulwala yilwele yakulekanganalekangana ligongo lya Salai ŵamkwakwe Abulamu ŵala.
18 Pelepo Falawo ŵamŵilasile Abulamu ni kumwusya kuti, “Ana yamtesileyi ni yapi? Ligongo chichi nganimusalila kuti ŵeleŵa ali ŵamkwenu?
19 Ligongo chichi mwaŵechetaga kuti, ‘Ŵeleŵa ali alumbuŵangu’? Unetu nasigele panandi kwajigala kuti aŵe ŵamkwangu. Ŵamkwenu aŵa, mwajigale mjawuleje nawo.”
20 Pelepo Falawo ŵalamwile ŵamasengo ŵakwe kuti ampechesye Abulamu. Myoyo jemanjajo ŵampechesye jwalakwe pamo ni ŵamkwakwe soni yindu yosope yaŵakwete.
Maloŵe Gamwiŵanda
^ Mu Chihebeli ŵatiga, “mbeju.”
