Ekisodo 12:1-51
12 Sambano Yehofa ŵamsalile Mose soni Aloni m’chilambo cha Iguputo kuti,
2 “Mwesi awuno chiwuŵeje mwesi wandanda pa myesi jenu ja pachaka, mwamti chaka chenu chichitandeje ni mwesi welewu.
3 Myoyo mŵechetane ni gulu josope ja Ayisalayeli. Mwasalile kuti, ‘Palisiku lya 10 lya mwesi awuno jwalijose ajigaleje ngondolo jimpepe mwakamulana ni nyumba sya achinangolo ŵakwe, panyumba jilijose ajigaleje ngondolo jimpepe.
4 Nambo naga m’nyumbamo mwana ŵandu ŵamnono ŵakuti nganaŵa akombwele kumalisya kulya ngondolo jamtundu, jemanjajo agaŵaneje nyamajo ni mundu jwakuŵandikana najo nyumba mwakamulana ni winji wa ŵandu ŵa m’nyumba jilijose. Pamkugaŵana nyamajo mgaŵaneje mwakamulana ni mwakusalila mundu jwalijose.
5 Ngondolojo jiŵeje jambone, jelume soni ja chaka chimo. Mpaka msagule mwanache jwa ngondolo kapena jwa mbusi.
6 Mkusosekwa kujisunga chenene mpaka pa lisiku lya 14 lya mwesi awuno. Kaneko Ayisalayeli wosope awulajeje ngondolojo ligulo.*
7 Pelepo jemanjajo ajigaleje myasi jine ja ngondolojo ni kujimisa pa mafelemu gaŵili ga mumbali mwa mlango soni penani pa mlango wa nyumba syachalile nyamajo.
8 “‘Jemanjajo akusosekwa alyeje nyamajo chilo cha lisiku lyelelyo. Ajijocheje nyamajo pamoto soni alyeje pampepe ni mikate* jangali yakusasaŵisya soni pampepe ni masamba gakuŵaŵa.
9 Ngamkusosekwa kulya nyamajo jili jeŵisi, jakutokotesya kapena jakuteleka ni mesi, nambo mjijocheje pamoto pampepe ni mtwe wakwe, yiboda ni yosope yamkati.
10 Ngamkusosekwa kusigasya nyamajo mpaka kwika kundaŵi. Nambo naga nyamajo jisigele ni kwika kundaŵi mjijocheje pamoto kuti jitiniche.
11 Pandaŵi jamkulyajo mtendeje ayi: M’waleje lamba ni kujitaŵa mwakulimbagana, m’waleje sapato kusajo syenu soni mjigaleje ndodo mmyala mwenu nambosoni mlyeje nyamajo mwachitema. Jeleji jili Pasika ja Yehofa.
12 Pakuŵa chinjende m’chilambo cha Iguputo chilochi ni kuwulaga mwanache jwalijose jwandanda kupagwa jwa m’chilambo cha Iguputo, kutandila mwanache jwa mundu mpaka jwa chinyama, soni chimbeleche chilango* kwa milungu josope ja mu Iguputo. Une ndili Yehofa.
13 Myasijo jichiŵa chimanyisyo chakulosya nyumba syamkutama jemanja. Pachinjijiwona myasijo chinjigamba kumpita, mwamti mliliwo ngasiwuyika pa jemanja kuti umjonanje pandaŵi janguchijonanga chilambo cha Iguputo.
14 “‘Lisiku lyeleli chiliŵeje lyakuti jemanja mlikumbuchileje, soni pa lisiku lyeleli mumtendeleje Yehofa chisangalalo ku mibado* jenu josope. Lyeleli lili lilamusi lyampaka kalakala, lyakuti mtendeje chisangalalo chelechi.
15 Kwa masiku 7 mlyeje mkate wangali yakusasaŵisya. Pa lisiku lyandanda lya masiku gelega, mtyosyeje mtanda wawuli wesasaŵe m’nyumba syenu, ligongo mundu jwalijose jwakulya chindu chesasaŵe kutyochela pa lisiku lyandanda mpaka kwika pa lisiku lya 7 akusosekwa kumwulaga.*
16 Pa lisiku lyandandalyo chimsonganeje pampepe kuti mumtumichile Mlungu. Pa lisiku lya 7 chimsonganejesoni pampepe kuti mumtumichile Mlungu. Pangali jwakusosekwa kukamula masengo pamasiku gelega. Nambo yakulya yakusaka mundu kuti alye, yele peyo ni yampaka mtelecheje.
17 “‘Mtendeje chisangalalo cha mikate jangali yakusasaŵisya pakuŵa palisiku lyeleli chinjimkoposya jemanja wosope m’chilambo cha Iguputo. Mkusosekwa mlikumbuchileje lisikuli ku mibado jenu josope, soni lyeleli lili lilamusi lyampaka kalakala.
18 Mwesi wandanda, pa lisiku lya 14 lya mwesiwo, ligulo lyakwe, mlyeje mikate jangali yakusasaŵisya mpaka ligulo lya lisiku lya 21 lya mwesiwo.
19 Mtanda wesasaŵe ukasimanikwa m’nyumba syenu kwa masiku 7, ligongo jwalijose jwakulya chindu chesasaŵe, chinga ali mlendo kapena ali jwakutama m’chilambo pemo akusosekwa kumwulaga.*
20 Ngamkusosekwa kulya chilichose chesasaŵe. M’nyumba syenu syosope chimlyeje mikate jangali yakusasaŵisya.’”
21 Ndaŵi jijojo Mose ŵaŵilasile achakulungwakulungwa wosope ŵa Ayisalayeli ni kwasalila kuti, “Mjawule mkasagule ŵanache ŵa yilango* m’nyumba syenu, soni kaneko mkawulaje kuti jiŵe mbopesi ja Pasika.
22 Kaneko mjigale kachitela ka hisope* ni kukaloŵeka m’myasi jajili mu libeseni, ni kumisila myasijo penani pa mlango soni pa mafelemu gaŵili ga mumbali mwa mlangowo. Soni pakasimanikwa jwalijose jwakopoka m’nyumba jakwe mpaka kundaŵi.
23 Kaneko Yehofa pachapiteje ni kwawulaga Aiguputo ni mlili, ni akujiwona myasi penani pa mlangowo soni pa mafelemu gaŵili gala, Yehofajo chachigamba kupita panyumba jelejo soni jwalakwe ngasakunda kuti mlili wakuwulagawu* ujinjile m’nyumba syenu.
24 Mkusosekwa mtendeje yeleyi, soni lyeleli lili lilamusi kwa jemanja soni kwa ŵanache ŵenu mpaka kalakala.
25 Pachimchijinjila m’chilambo chele Yehofa chachimpa mwakamulana ni mwaŵaŵechetele jwalakwe, chimchisosekwa kutendaga mwambo welewu.
26 Ŵanache ŵenu pachachimwusyaga kuti, ‘Ana yeleyi yikugopolela chichi?’
27 Pelepo jemanja chimwajanjeje kuti, ‘Welewu uli mwambo wakupeleka mbopesi ja Pasika kwa Yehofa, jwele juŵasipitile nyumba sya Ayisalayeli ku Iguputo pandaŵi jiŵawulagaga Aiguputowo ni mlili. Nambo jwalakwe nganiŵawulaga ŵandu ŵaŵaliji m’nyumba syetu ni mliliwo.’”
Paŵapikene yeleyi ŵanduwo ŵatindiŵele ni kwinama mpaka ngope syawo pasi.
28 Myoyo Ayisalayeli ŵapite ni kuja kutenda yosope yele Yehofa ŵamlamwile Mose ni Aloni. Jemanjajo ŵatesile mmomo.
29 Kaneko pasikati pa chilo, Yehofa ŵamwuleje mwanache julijose jwandanda kupagwa m’chilambo cha Iguputo. Kutandila ni mwanache jwandanda kupagwa jwa Falawo jwakutama pampando wakwe waumwenye mpaka mwanache jwandanda kupagwa jwa kapolo jwali mundende soni mwanache jwandanda kupagwa jwalijose jwa yilango.
30 Pelepo Falawo ŵajimwiche chilo chelecho yimpepe ni ŵakutumichila ŵakwe wosope soni Aiguputo ŵane wosope, mwamti kwaliji kulila mnope pasikati pa Aiguputo ligongo nganikupagwa atamose nyumba jimpepe jele nganikuŵa malilo.
31 Chilo chichocho Falawo ŵamŵilasile Mose ni Aloni ni kwasalila kuti, “Mnyakuche, mtyoche pasikati pa ŵandu ŵangu, jemanja pampepe ni Ayisalayeli ŵane wosope. Mjawuleje mkamtumichile Yehofa mpela mumŵechetele.
32 Mjigale ngondolo syenu soni ng’ombe syenu ni mjawuleje mpela mumŵechetele. Nambo mkusosekwasoni kumba une upile.”
33 Aiguputo ŵatandite kwasalila Ayisalayeliwo kuti atyoche mwachitemachitema m’chilambomo, mwamti ŵaŵechetaga kuti “ligongo ŵandu wosope mpaka tuwe.”
34 Myoyo ŵanduwo ŵajigele utandi wawo wewunye wangali yakusasaŵisya mu yakuwunyila* utandiwo ni kuwuŵijilila ni nguwo syawo, kaneko ni kutwichila m’makoyo mwawo.
35 Ayisalayeli ŵatesile yaŵasalile Mose, mwamti ŵaŵendile Aiguputowo yindu yasilifa, yagolide soni yakuwala.
36 Yehofa ŵatendekasisye Aiguputo kuti ŵasalalile mtima ŵanduwo, mwamti Aiguputowo ŵapele jemanjajo chilichose chaŵaŵendile, soni Ayisalayeliwo ŵajigele yindu yejinji ya Aiguputo.
37 Kaneko Ayisalayeli ŵanyakwiche ku Lamesi ni kwawulaga ku Sukoti. Paulendowu ŵapali achalume ŵakwenda wapasi chiŵandika 600,000, ngaŵalanjila ŵanache.
38 Gulu ja ŵandu ŵamitundu jakulekanganalekangana* jalijisoni yimpepe ni jemanjaji paulendowu, pamo ni ngondolo soni ng’ombe. Yilango yawo yaliji yejinji mnope.
39 Jemanjajo ŵatandite kujigala utandi wewunye waŵatyochele nawo ku Iguputo wula ni kutelekaga mikate jakusyungulila jangali yakusasaŵisya. Utandi wewunyewo waliji wangali yakusasaŵisya ligongo lyakuti jemanjajo ŵatopwele m’chilambo cha Iguputo mwakusisimuchisya, mwamti ŵalepele kuteleka yakulya.
40 Pandaŵi jaŵatyokaga ku Iguputo, Ayisalayeli ŵaliji ali atemi ku Iguputoko kwa yaka 430.
41 Pali pamasile yaka 430 soni palisiku lyakumalisya lya chakachi, magulu ga ŵandu gosope ga Yehofa gakopweche m’chilambo cha Iguputo.
42 Pa chilo chelechi jemanjaji ŵasosekwe kusangalala ligongo lyakuti Yehofa ŵakopwesye m’chilambo cha Iguputo. Soni pa chilo chelechi ŵandu wosope ŵa Isalayeli mpaka kumibado jawo josope ŵasosekwaga kumtendela Yehofa chisangalalo.
43 Kaneko Yehofa ŵamsalile Mose soni Aloni kuti, “Lilamusi lya Pasika lili lyakuti: Mlendo akalya nawo.
44 Nambo naga mundu jwine akwete kapolo jwamlume juŵamsumile ni mbiya, akusosekwa amwumbasyeje kaje kapolojo. Patesile yeleyi nikuti mpaka alye nawo Pasikajo.
45 Mlendo jwakutama najo panyumba kapena jwaganyu, ngakusosekwa kulya nawo.
46 Nyamajo mkusosekwa mlileje munyumba jimo, nambo mkasimkopoka pasa pa nyumba jenu mli mjigele nyama jine, soni ngamkusosekwa kukasa liwupa lililyose lya nyamajo.
47 Gulu josope ja Ayisalayeli jikusosekwa kutendaga chisangalalo chelechi.
48 Naga mlendo jwamkutama najo akusaka kutenda nawo chisangalalo cha Pasika ja Yehofa, jwamlume jwalijose jwa m’nyumba jakwe akusosekwa kuwumbala. Patesile yeleyi nikuti chachiŵa jwakuŵajilwa kutenda nawo chisangalalocho, mwamti chachiŵa jwakulandana ni ŵandu ŵali ŵakupagwila m’chilambocho. Nambo mundu jwalijose jwali jwangawumbala ngakusosekwa kulya.
49 Lilamusili likusosekwa kukamula masengo kwa wosope, chinga ali jwakupagwila m’chilambomo kapena mlendo jwakutama pasikati penu.”
50 Myoyo Ayisalayeli wosope ŵatesile mwakamulana ni yele Yehofa ŵamlamwile Mose soni Aloni. Ŵatesile mmomo.
51 Palisiku lyeleli, Yehofa ŵakopwesye Ayisalayeli wosope pampepe ni magulu gawo kutyochela m’chilambo cha Iguputo.
Maloŵe Gamwiŵanda
^ Pelepa akwamba lyuŵa lili likapile nambo chipi mkanichitande.
^ Mikate jakala ŵajipanganyaga ni utandi wa tiligu kapena balele.
^ Ŵane akusati “chamuko.”
^ Ku Mozambique akusati “geração.”
^ Mu Chihebeli ŵatiga, “akusosekwa kumtyosya pasikati pa Ayisalayeli.”
^ Mu Chihebeli ŵatiga, “akusosekwa kumtyosya pagulu ja Ayisalayeli.”
^ Pelepa akusala ya ŵanache ŵa ngondolo kapena ŵa mbusi.
^ Alole Kugopolela kwa Maloŵe Gane.
^ Mu Chihebeli ŵatiga, “mlili wakonangawu.”
^ Kapena kuti, “mbale.”
^ Pelepa akwamba gulu ja ŵandu ŵangaŵa Ayisalayeli kupwatikapo Aiguputo.
