Chiwunukuko Chakwawula kwa Yohane 22:1-21
22 Kaneko ŵandosisye lusulo lwa mesi gaumi gakunyesimila mpela liganga lya mtengo wapenani. Lusulolo lwaliji mkwenda kutyochela ku mpando waumwenye wa Mlungu soni wa Mwanache Jwangondolo,
2 mwamti lwapitaga pasikati pa msewu wekulungwa wa mumsindawo. Mbali syosope sya mungulugulu lusulolo mwaliji yitela ya umi yayasogolaga yisogosi maulendo 12 chaka chilichose, mwesi uliwose yasogolaga kampepe. Soni masamba ga yitelayo galiji mtela wakuposya* mitundu ja ŵandu.
3 Nambosoni mumsindawo ngasimupagwa malweso* galigose. Nambo mpando waumwenye wa Mlungu soni wa Mwanache Jwangondolo uchiŵa mumsindawo, mwamti achikapolo ŵa Mlungu chachimtumichilaga jwalakwe mwakulipeleka.
4 Soni jemanjajo chachijiwona ngope jakwe nambosoni lina lyakwe lichiŵa pausyo pawo.
5 Ngasipapagwasoni chilo soni ngasasosechela kuŵala kwa nyali kapena lyuŵa, ligongo lyakuti Yehofa Mlungu chachamulichilaga jemanjajo, soni jemanjajo chachilamulila mpela mamwenye mpaka kalakala.
6 Kaneko lilayika lila lyasalile kuti, “Maloŵe gelega gali gakudalilichika soni gasyesyene. Elo yisyene, Yehofa Mlungu jwakusaŵecheta kupitila mwa ŵakulochesya, jwatumisye lilayika lyakwe kuti lyalosye achikapolo ŵakwe yindu yachiyitendekwe pachangakaŵa.
7 Apikane, une ngwika mwachitema. Jwana upile mundu jwakugapikanila maloŵe gakulochesya gagali mumpukutuwu.”
8 Nditu une Yohane ni junaliji mkupikana soni kulola yindu yeleyi. Panapikene soni kulola yeleyi, natindiŵele pasi pasajo sya lilayikalyo kuti nalichimbichisye. Lilayika lyeleli ni lyalyaliji mkundosya une yindu yeleyi.
9 Nambo lyasalile kuti, “Iyayi, mkatenda yeleyo. Unetu ngambile kuŵa kapolo mpela mwamŵelele mmwejo ni achalongo achimjenu ŵali ŵakulochesya, soni mpela mwaŵelele ŵele ŵakupikanila maloŵe ga mumpukutuwu. Mumtindiŵalileje Mlungu.”
10 Lilayikalyo lyasalilesoni kuti, “Mkawugalila maloŵe gakulochesya ga mumpukutuwu, ligongo ndaŵi jiŵaŵisile Mlungu kuti yeleyi yitendekwe jiŵandichile.
11 Jwalijose jwakutenda yangalungamika apitilisye kutenda yangalungamika, soni jwakutenda yakunyalaya apitilisye kutenda yakunyalayayo. Nambo jwakutenda yakulungamika apitilisye kutenda yakulungamika, soni jwakutenda yeswela apitilisye kutenda yeswelayo.
12 “‘Apikane, une ngwika mwachitema, soni ngwete mboto* jakuti mbeleche kwa jwalijose mwakamulana ni masengo gakwe.
13 Une ndili Alefa soni Omega,* jwandanda soni jwakumalisya, ndanda soni mbesi.
14 Ŵana upile ŵele ŵachapile mikanjo jawo, kuti akole ufulu wakulya yisogosi ya m’yitela ya umi soni kuti akajinjile mumsindawo kupitila pa mageti gakwe.
15 Kusa kwa msindawo kuchiŵa ŵandu ŵakutenda yindu mpela mbwa,* ŵakutenda yamisimu, ŵakutenda yachikululu,* ŵakuwulaga, ŵakutindiŵalila milungu jakusepa, soni jwalijose jwakusanonyela kuŵecheta soni kutenda yachinyengo.’
16 “‘Une Yesu natumisye lilayika lyangu kuti litendele umboni yindu yeleyi kwa jemanja kuti yikamuchisye mipingo. Une ndili mchiga soni mwanache jwa Daudi nambosoni ndondwa jakuŵala mnope jakundaŵi.’”*
17 Msimu soni jwamkongwe jwakwembecheya kulombela akuŵechetape kuti, “Myiche,” soni jwalijose jwakupikana yeleyi aŵechete kuti, “Myiche.” Jwalijose jwajimkwete njota ayiche, soni jwalijose jwakusaka ayiche kuti amwe mesi gaumi kwalulele.
18 “Kwa jwalijose jwakupikanila maloŵe gakulochesya gagali mumpukutu awuno, une nguŵichila umboni wakuti, naga jwine akonjechesya yindu yeleyi, Mlungu chachimjonjechesya milili jajilembile mumpukutu welewu.
19 Soni jwalijose jwakutyosya kandu m’maloŵe gakulochesya ga mumpukutu welewu, Mlungu ngasamkunda mundu jwelejo kuti apochele yindu yambone yayisasile mumpukutu awuno. Yeleyi yikugopolela kuti Mlungu ngasamkunda mundujo kulya yisogosi ya m’yitela ya umi soni ngasamkunda kwinjila mumsinda weswela.
20 “Jwele jwakuŵichila umboni yakwamba yindu yeleyi akuŵecheta kuti, ‘Nditu, une ngwika mwachitema.’”
“Ame. Ayiche Ambuje Yesu.”
21 Umbone mtima wekulungwa wa Ambuje Yesu uŵe ni ŵaswelawo.
Maloŵe Gamwiŵanda
^ Kapena kuti, “wakulamisya.”
^ Ŵane akusati “kutapana; kutembelela.”
^ Ŵane akusati “mbote; chakupochela.”
^ Kapena kuti, “Une ndili A ni Z.” Alefa chili chilembo chandanda mu alifabeti ja Chigiliki soni Omega chili chilembo chakumalisya.
^ Pelepa akwamba ŵandu ŵakusatenda yindu yakunyalaya pameso pa Mlungu.
^ Mu Chigiliki akusati, por·nei′a. Alole Kugopolela kwa Maloŵe Gane.
^ Ŵane akusati “mng’andu.”
