Chiwunukuko Chakwawula kwa Yohane 19:1-21
19 Panyuma pa yeleyi, napikene kugumila kwinani mpela kugumila kwa gulu jekulungwa. Ŵagumilaga kuti, “Amkwesye Ya* jemanja wosope. Chikulupusyo, uchimbichimbi soni machili yili ya Mlungu jwetu,
2 ligongo jwalakwejo akusawelusya mwakuŵajilwa soni mwachilungamo. Pakuŵa jwalakwe alipele chilango* lihule lyakumanyika mnope lila lyele lisokonasisye chilambo chapasi ni ndamo jakwe ja chikululu.* Alipele chilango chelechi pakuliwuchisya ligongo lya myasi ja achikapolo ŵa Mlungu jajili mmyala mwakwe.”
3 Ndaŵi jijojo ŵagumisilesoni kane kuti, “Amkwesye Ya* jemanja wosope. Lyosi lya kutinika kwa jwamkongwejo ligambeje kutuka mpaka kalakala.”
4 Pelepo achakulungwa 24 soni yaumi mcheche yila ŵatindiŵele ni kumchimbichisya Mlungu jwakusatama pa mpando waumwenye. Jemanjaji ŵaŵechetaga kuti, “Ame. Amkwesye Ya* jemanja wosope.”
5 Napikenesoni maloŵe gane kutyochela kumpando waumwenye gali mkuti, “Amkwesyeje Mlungu jwetu ndaŵi syosope, jemanja achikapolo ŵakwe wosope ŵamkusimumjogopa jwalakwe, ŵangachimbichika soni ŵakuchimbichika.”
6 Pelepo napikene maloŵe mpela ga gulu jekulungwa. Maloŵego gapikanikagasoni mpela mkokomo wa mesi gejinji soni mpela kulindima kwekulungwa. Ŵagumilaga kuti, “Amkwesye Ya* jemanja wosope, ligongo Yehofa Mlungu jwetu Jwamachiligosope atandite kulamulila mpela mwenye.
7 Kwende tusangalale mnope soni tumchimbichisye jwalakwe, ligongo ndaŵi ja ukwati wa Mwanache Jwangondolo jikwanile soni ŵamkwakwe akoseche kala.
8 Jwamkongwejo amkundile kuti awale yakuwala yambone, yakunyesimila soni yetakate. Yakuwala yamboneyo yikwimila ndamo syambone sya ŵaswelawo.”
9 Lilayika lila lyasalile kuti, “Mlembe kuti, Ŵana upile wosope ŵaŵaŵilasile ku chakulya chaligulo cha pa ukwati wa Mwanache Jwangondolo.” Lyasalilesoni kuti, “Maloŵe gelega gali ga Mlungu soni gali gasyesyene.”
10 Pelepo une natindiŵele pameso pa lilayikalyo kuti nalichimbichisye. Nambo lyasalile kuti, “Iyayi, mkatenda yeleyo. Unetu ngambile kuŵa kapolo mpela mwamŵelele mmwejo ni achalongo achimjenu ŵele ŵamkwete masengo gakutendela umboni yakwamba Yesu. Mumtindiŵalileje Mlungu. Pakuŵa chakulinga cha yakulochesya chili kutendela umboni yakwamba Yesu.”
11 Kaneko nakuweni kwinani kuli kuwugwiche, ni najiweni hachi jeswela. Juŵakwesile pahachijo lina lyakwe ali Jwakulupichika soni Jwakuwona. Jwalakwejo akusawelusya mwachilungamo soni akusaputa ngondo jachilungamo.
12 Meso gakwe gali mpela lilamba lya moto, soni ŵawete yisoti yaumwenye yejinji kumtwe kwakwe. Jwalakwe akwete lina liŵamlembile lyele pangali jwalijose jwakusalimanyilila nambo msyenejo basi.
13 Pa chakuwala chakwe chakusa chaŵawete paliji madondo ga myasi. Jwalakwejo akwete lina lyakuti Maloŵe ga Mlungu.
14 Nambosoni magulu ga ngondo gakwinani galiji mkumkuya jwalakwejo pa mahachi geswela, soni jwalijose ŵawete yakuwala yambone, yeswela soni yetakate.
15 Mkamwa mwakwe mwakopweche upanga welewu wakutema mnope wakuti akajijonanjile mitundu ja ŵandu, soni chachijilamulila mitundujo ni ndodo jachisyano. Jwalakwe chachipondapondasoni mu chakuminyila mipeleya, chachikwimila ukali wekulungwa wa Mlungu Jwamachiligosope.
16 Pa chakuwala chakwe chakusa, chapachiyiga ŵalembile lina lyakuti, Mwenye jwa mamwenye soni Ambuje ŵa achambuje.
17 Naliwenisoni lilayika lili lijimi pa lyuŵa. Lilayikali lyagumisile mwakwesya maloŵe pakuyiŵilanga yijuni yosope yaguluka mwinani. Lyagumisile kuti, “Myiche akuno, msongangane pampepe ku pwando jekulungwa ja chakulya chaligulo cha Mlungu.
18 Myiche kuti mlye minowu ja mamwenye, ja achakulungwakulungwa ŵa asilikali, minowu ja ŵandu ŵamachili, soni minowu ja mahachi ni ŵakwelapo ŵakwe. Elo, minowu ja wosope, chinga ja mfulu* kapena achikapolo, chinga ja ŵangachimbichika kapena ŵakuchimbichika.”
19 Kaneko nachiweni chilombo chila soni mamwenye ga pachilambo chapasi ni asilikali ŵawo ali asongene pampepe kuti apute ngondo ni jwakwela pa hachi jula yimpepe ni asilikali ŵakwe.
20 Pelepo chilombocho ŵachikamwile yimpepe ni jwakulochesya jwaunami jula jwele ŵatesile yakusimonjesya yejinji pameso pa chilombocho. Ni yakusimonjesya yeleyi ŵasokonasisye nayo ŵandu ŵaŵapochele chimanyisyo cha chilombo chila soni ŵaŵachitindiŵalile chiwanichisyo chakwe. Chilombo ni jwakulochesyajo ŵaponyisye ali ŵa umi mu nyasa jakolela moto wa sulufule.
21 Nambo ŵane wosope ŵaŵasigalilewo ŵawuleje ni upanga welewu wawakopweche mkamwa mwa jwele juŵakwesile hachi jula, mwamti yijuni yosope yajikwite ni minowu jawo.
Maloŵe Gamwiŵanda
^ Kapena kuti, “Aleluya.” “Ya” kali kasale kakata ka lina lyakuti Yehofa.
^ Ŵane akusati “chamuko.”
^ Mu Chigiliki akusati, por·neiˈa. Alole Kugopolela kwa Maloŵe Gane.
^ Kapena kuti, “Aleluya.” “Ya” kali kasale kakata ka lina lyakuti Yehofa.
^ Kapena kuti, “Aleluya.” “Ya” kali kasale kakata ka lina lyakuti Yehofa.
^ Kapena kuti, “Aleluya.” “Ya” kali kasale kakata ka lina lyakuti Yehofa.
^ Ŵane akusati “alukosyo.”
