Chikalata Chakwawula kwa Aloma 7:1-25
7 Sambano ngusaka kuŵecheta ni jemanja achalongo achimjangu ŵamkusamanyilila malamusi. Ana ngamkumanyilila kuti Chilamusi chikusakamula masengo pa mundu naga mundujo ali umi?
2 Mwachisyasyo, mwakamulana ni malamusi, jwamkongwe jwamlombedwe akusaŵape ni ŵamkwakwe pandaŵi josope jele ŵamkwakwewo ali umi. Nambo naga ŵamkwakwe awile, jwalakwe akusaŵa jwagopoka ku ulamusi wa ŵamkwakwewo.
3 Myoyo, naga akulombedwa ni mundu jwine ŵamkwakwe ali umi, nikuti akutenda chikululu.* Nambo naga ŵamkwakwewo awile, nikuti jwalakwe ali jwagopoka ku ulamusi wawo, mwamti pandaŵiji naga akulombedwa ni mundu jwine, jwalakwejo ngasaŵa jwachikululu.*
4 Mwakulandana ni yeleyi, chilu cha Klistu chamgopwelesoni jemanja achalongo achimjangu ku Chilamusi cha Mose. Yeleyi yaŵele myoyo kuti jemanja mŵe ŵa Klistu, jwele juŵajimwiche ku chiwa, ni chakulinga chakuti tusogole yisogosi yambone kwa Mlungu.
5 Pakuŵa patwatamaga ni umi wakamulana ni yakusaka ya chilu chetu, Chilamusi chatulosisye kuti yakumbila yetu yakusakala yikutendekasya chilu chetu kulemwa, soni yakuyichisya yakwe yili chiwa.
6 Nambo apano tuli ŵagopoka ku Chilamusi soni yiŵele mpela tuwile ku Chilamusicho pakuŵa chatutaŵaga. Sambano msimu weswela ukutulongolela kuti tuŵe achikapolo m’litala lyasambano, ngaŵaga m’litala lyakala lila lyakulongoleledwa ni malamusi gakulembedwa.
7 Sambano tujile uli pelepa? Ana tujile kuti Chilamusi chili ulemwa? Iyayi. Kusala yisyene, yikaŵe kuti paliji pangali Chilamusi ngalepele kuwumanyilila ulemwa. Mwachisyasyo, ngamkanimanyilila kuti pana kukumbila kwakulemwecheka yikaŵe kuti Chilamusi nganichisala kuti, “Mkakumbilaga yindu ya ŵane mwakulemwecheka.”
8 Nambo ligongo lya lilamusili, ulemwa wapatile upile wakundendekasya kukumbila yindu yiliyose mwakulemwecheka. Yikaŵe kuti lilamusili paliji pangali, ulemwa ukalijisoni wangali machili.
9 Mwamtitu, une naliji jwaumi Chilamusi mkanichiyiche. Nambo Chilamusi pachagambile kwika, ulemwa waŵelesoni waumi, nambo naŵele mpela mbwile.
10 Soni Chilamusi chele naganisyaga kuti chichilongolele ku umi, yasimanikwe kuti chikulongolela ku chiwa.
11 Sambano ligongo lyakwika kwa Chilamusi, ulemwa wapatile upile wakunyenjelela une ni kumbulaga.
12 Atamose yili myoyo, Chilamusicho chili cheswela, soni malamusi gakwe gali geswela, gakulungama soni gambone.
13 Sambano, ana Chilamusi, chachili chindu chambone, ni chachambuleje? Iyayi. Nambo ulemwa ni wele wambuleje. Chilamusi chili chambone nditu, nambo chagambile kulosya kuti ulemwa ni wawukutendekasya kuti mbwe. Myoyo Chilamusicho chalosisye kusakala kwa ulemwa.
14 Tukumanyilila kuti Chilamusi chatyochele kwa Mlungu kupitila mwa msimu weswela, nambo une ndili jwakulemwa, jwakusumisidwa ku ulemwa.
15 Ni ligongo lyakwe jwangapikanichisya yangusatenda. Pakuŵa mmalo mwakutenda yindu yanguyisachilila, ngusatendaga yindu yangusaŵengana nayo.
16 Myoyo, naga ngusatenda yindu yele nganguyisaka, ngwitichisya kuti Chilamusi chili chambone.
17 Nambotu jwakusatendaga yakusakalayo ngaŵa une, nambo uli ulemwa wawuli mwa une.
18 Pakuŵa ngumanyilila kuti mwa unejo, ngwambatu m’chilu mwangumu, mwangali chilichose chambone. Ligongo ngusasachilila kutenda yambone, nambo ngusalepelaga kuyitenda.
19 Pakuŵa yindu yambone yangusayisakaga jwangayitenda, nambo yindu yakusakala yele jwangayisaka ni yangusatendaga.
20 Sambano naga ngusatendaga yindu yele jwangayisaka, nikutitu jwakutenda yeleyo ngaŵa une, nambo uli ulemwa wawuli mwa unejo.
21 Myoyo, mwa une likusayika lilamusi ali lyakuti, Pangusaka kutenda chindu chambone, nganisyo syakusaka kutenda chindu chakusakala sikusaŵa ni une.
22 Mumtimamu ngusinaganonyela nditu malamusi ga Mlungu.
23 Nambo m’chilu mwangu likusayika lilamusi line lyalikusalimbana ni lilamusi lya mumtima mwangu. Lilamusili likusandaŵa une mpela mkayidi, ni kulongolela ku lilamusi lya ulemwa lyalili m’chilu mwangu.
24 Mundu jwakutesya chanasa une! Ana ŵani ŵachachingulupusya ku chilu chachikuwachi?
25 Ngumyamichila Mlungu ligongo lyakungulupusya kupitila mwa Yesu Klistu Ambuje ŵetu. Myoyo mumtima mwangu ndili kapolo jwa malamusi ga Mlungu, nambo mwakuchilu ndili kapolo jwa lilamusi lya ulemwa.
Maloŵe Gamwiŵanda
^ Mu Chigiliki akusati, moi·kheiʹa. Alole Kugopolela kwa Maloŵe Gane.
^ Mu Chigiliki akusati, moi·kheiʹa. Alole Kugopolela kwa Maloŵe Gane.
