Chikalata Chakwawula kwa Ahebeli 12:1-29
12 Myoyo, pakuŵa tukwete liwunde lyekulungwa lya mboni lyamti myiyi lyele litusyungulile, kwende tutyosye chakusitopesya chilichose, soni ulemwa wawukusatutega mwangasawusya ula. Kwendesoni tuwutuche mwakupilila mpikisano watukusosekwa kuwutukawu.
2 Tutende yeleyi patukumlolechesya Yesu jwali Mtumiki Jwamkulungwa soni Jwakwanilisya chikulupi chetu. Ligongo lya kusangalala kuŵamŵichile pasogolo pakwe, jwalakwe ŵapilile pa chitela chakulagasichila,* soni nganasamalaga kuti yakutesya sooni chiyimtendechele. Apano jwalakwe atemi kumkono wamlyo kwa mpando waumwenye wa Mlungu.
3 Mganichisyeje mwakusamala yakwamba mundu jweleju, jwele juŵapilile maloŵe gakunyosya gakutyochela kwa ŵandu ŵakulemwa, ŵele ŵatesile yeleyi ni kulipwetekasya achimsyene. Mtendeje yeleyi kuti mkapela ni kwasa mtima.
4 Jemanja mkulimbanape ni ulemwa welewo, nambope pakulimbana kwenu nganimyika pakwasa myasi.
5 Nambo jemanja ngamkukumbuchila ata panandi maloŵe gangumdadawulila aga gagakusamkolanga jemanja kuti ŵanache, gakuti, “Mwanangu, mkachembulusyaga maloŵe gakumjamuka gakutyochela kwa Yehofa, kapena kwasa mtima pakumjamuka jwalakwejo.
6 Pakuŵa Yehofa akusiŵajamukaga ŵandu ŵakusiŵanonyela, sonitu jwalakwe akusamkwapula* jwalijose jwakusampochela mpela mwanache jwakwe.”
7 Jemanja mkusosekwa kupilila yiliyose yamkulaga nayo ligongo yeleyo yili chamuko chenu.* Pelepo nikuti Mlungu akumwona jemanja kuŵa ŵanache ŵakwe. Nambi pana mwanache jwalijose jwele babagwe ŵangamjamuka?
8 Nambo naga jemanja wosope nganimpochela nawo chamuko chelechi, nikuti mli ŵanache ŵapetinji ngaŵaga ŵanache ŵakwe ŵasyesyene.
9 Nambosoni baba ŵetu ŵakutuŵeleka ŵaliji mkutujamuka ndaŵi syosope soni twaliji mkwapikanila. Naga twatendaga myoyo ni baba ŵetuwo, kuli uli Atati ŵakusalongolela umi wetu ni msimu weswela? Ana ŵelewo ngatukusosekwa kwapikanila ni mtima wosope kuti tutame ni umi?
10 Pakuŵa mwanja baba ŵetu ŵakutuŵelekawo ŵatujamwiche kwandaŵi jamnono soni ŵatujamukaga mwakamulana ni yaŵayiwonaga jemanjajo kuti yili yambone. Nambo Mlungu akusatujamukaga kuti yindu yitujendeleje chenene. Akusatenda yeleyi ni chakulinga chakuti m’weji tuŵe ŵaswela mpela jwalakwejo.
11 Yili yisyene kuti pandaŵi jakutujamuka ngayikusaŵa yakusangalasya, nambo yikusaŵaga yakupweteka.* Nambope kwa ŵandu ŵalijiganyisye kutyochela pa chamuko chelecho akusakola mtendele soni akusaŵa ŵakulungama.
12 Myoyo, mlimbisye makono gangalimbangana soni malungo gangali machili.
13 Nambosoni mpitilisye kongola matala gakwenda sajo syenu, ni chakulinga chakuti chiŵalo chelemale chikatyoka m’malo gakwe gakulumbikanila, nambo kuti chipole.
14 Mlinjelinjeje kutama mwamtendele ni ŵandu wosope, soni mlinjelinjeje kuŵa ŵaswela ligongo naga mundu nganaŵa jwamswela ngasiŵawona Ambuje.
15 Mlolechesyeje kuti pakapagwa jwalijose jwakulepela kupochela umbone mtima wekulungwa wa Mlungu. Mtendeje yeleyi ni chakulinga chakuti pakaŵa mchiga wakuŵaŵa wakutandisya yakusawusya, soni kuti ukajambuchila ŵandu ŵajinji.
16 Mlolechesyesoni kuti pasikati penu pakaŵa jwalijose jwakutenda yachikululu* kapena jwangayamichila yindu yakusosekwa mnope ya Mlungu mpela Esawu. Jwalakweju ŵajasile upile wakwe wakuŵa jwandanda kupagwa pakuwuchenganya ni chakulya chaŵalile kampepe.
17 Jemanja mkumanyilila kuti pambesi pakwe jwalakwejo paŵasakaga kupochela upile, babagwe ŵamkanile. Atamose kuti jwalisile mnope pakusachilila kuti babagwe achenje nganisyo syawo, nambope nganiyikomboleka.
18 Jemanja ngaŵa kuti myiche palitumbi lyele mpaka mkombole kulikwaya, litumbi lyakolela moto soni lyakola liwunde lyepiliwu, litumbi lya chipi mnope nambosoni lya mbungo jamachili,
19 palitumbi lyele pakupikanika kulila kwa lipenga soni maloŵe gakutyochela kwinani. Ŵandu paŵapikene maloŵego, ŵamsalile Mose kuti ngakusaka kupikanasoni gane.
20 Pakuŵa woga wakamwile mnope jemanjajo ligongo lya lilamusi lyakuti, “Atamose chinyama naga chikukwaya litumbilyo, mkusosekwa kuchiponya maganga.”
21 Nambosoni, yaŵayiweniyo yaliji yakutesya woga mnope mwamti Mose ŵatite, “Woga wungamwile soni ngutetemela.”
22 Nambo jemanja myiche ku Litumbi lya Siyoni nambosoni msinda wa Mlungu jwaumi, wawuli Yelusalemu jwakwinani. Kweleko kwana masausande gangaŵalanjika ga malayika
23 gali gasongene pampepe. Kwanasoni mpingo wa ŵanache ŵandanda kupagwa ŵa Mlungu ŵele mena gawo ŵagalembile kwinani, soni kwana Mlungu jwali Jwakuwelusya jwa wosope. Nambosoni kwana umi wa ŵandu ŵambone ŵele aŵele ŵamlama soni msimu weswela ukusiwalongolela.
24 Kwanasoni Yesu jwali namangoswe jwa chilangano chasambano, soni myasi jiŵamisile pa m’weji. Myasi jeleji jikusaŵecheta yakwamba yindu yambone mnope kupunda myasi ja Abele.
25 Mlolechesye kuti ngamkukana kumpikanila jwele jwakuŵecheta ni jemanja kutyochela kwinani. Kalakala ŵandu ŵaŵakanile kumpikanila jwele juŵakalamusyaga pachilambo pano pakwamba yachachitenda Mlungu, ŵandu ŵeleŵa Mlungu ŵajonasile. Naga yaliji myoyo ni jemanjajo, kuli uli m’weji naga ngatukumpikanila jwele jwakuŵecheta kutyochela kwinani? Nditu ngasitutila chilango* chakwe.
26 Pandaŵi jelejo chilambo chapasi chatenganyiche ligongo lya maloŵe ga Mlungu, nambo sambano akuŵecheta mwakusimichisya kuti, “Chinjitenganyasoni, ngaŵaga chilambo chapasipe, nambo yimpepe ni kwinani kwakwe.”
27 Sambano maloŵe gakuti, “chinjitenganyasoni,” gakulosya kuti chachiyityosya yindu yayikutenganyikayo. Yindu yakwe ngaŵaga yaŵapanganyisye Mlungu, mwamti chachiyityosya ni chakulinga chakuti yindu yanganiyitenganyika yitame mpaka kalakala.
28 Myoyo, pakuŵa tuchipochela Uchimwene wele wanganiwuŵa utenganyiche, kwende tupitilisye kupochela umbone mtima wekulungwa. Umbone mtima welewu ukusatukamuchisya kumtumichila Mlungu mwakumjogopa soni mwakumchimbichisya.
29 Pakuŵa Mlungu jwetu ali mpela moto wakutinisya.
Maloŵe Gamwiŵanda
^ Alole Kugopolela kwa Maloŵe Gane.
^ Kapena kuti, “akusampa chilango.”
^ Kapena kuti, “ligongo yeleyo mpaka yimjiganye.”
^ Kapena kuti, “yikusaŵaga yakudandawulisya.”
^ Alole Kugopolela kwa Maloŵe Gane.
^ Ŵane akusati “chamuko.”
